Leita í fréttum mbl.is

Bloggfærslur mánaðarins, maí 2017

Bandaríski flotinn tekur stjörnusiglingafræði upp á ný

Navigation aboard the guided-missile destroyer USS Stout

Mynd og frétt: NPR 22. febrúar 2016

Svo seint sem í fyrra var stjörnusiglingafræði tekin upp á ný sem námsefni í akademíum bandaríska flotans. GPS tæknin er óáreiðanleg, viðkvæm og komandi skotmörk í hverslags hernaði. Langt er síðan að til dæmis Rússar gátu brenglað GPS merki og gert þau að svo gott sem rugli

Það fólk sem alið hefur allan sinn mann í borgum er orðið svo heimsku-hættulegt að það stefnir heiminum í hættu. Því lengra sem borgarfólk fjarlægist sveitina, hugsun og vitran lífsmáta byggðan á landnematilfinningu og lífsnauðsynlegri svartsýni í lífinu, því heimskara og óhamingjusamara verður það. Sokkinn skipafloti bjartsýnisfólksins liggur því enn á sjávarbotni við strendur Noregs. Ekkert land það fólk nam. Í dag situr það króknað fast í föl á heiði

Nýjasta dæmið um þannig heimsku eru "sjálfkeyrandi bílar". Þetta er svo heimsk hugsun að hún er orðin viðtekin sem staðreynd í hugum þeirra sem orðnir eru malbikaðir bjálfar

Tölvu og hugbúnaðarfólk veraldar er búið að byggja upp heim sem þolir ekki að hann sé notaður, né hvað þá að tækni þeirra sé notuð í mikilvæga hluti né trúað fyrir neinu mikilvægu. Að brjótast inn í ónýt kerfi er það sem er að gerast dag hvern. Svo ömurlegur er minnisvarði þessi. Þeir sem þekkja þennan heim best vita að þetta er rétt. Annars þekkja þeir alls ekki heiminn sinn

Þegar fjárkúgunarhugbúnaður glæpalýðs veraldar birtist á tímatöfluskjáum lestarkerfa stórborga og á skurðstofum sjúkrahúsa, þá veit maður að núverandi mest úrbreiddu hugbúnaðarkerfi heimsins eiga ekki nema 10 ár eftir ólifuð í

Þeir sem bjuggu þennan hugbúnað til voru bjálfar og þeim hefur mistekist í allra lægstu þrepum erfiðleikaskalans. Yfirbygging þeirra er því rusl sem þolir ekki notkun

Donald Trump sigraði yfirgnæfandi stórt í persónulegum atkvæðafjölda í Bandaríkjunum öllum, ef að New York og stórborgir Kaliforníu eru teknar út. Það segir okkur að landnemasál Bandaríkjanna er enn ekki orðin geðveik, ef litið er burt frá ófrjósömum alþjóðaelítum úrkynjarða stórborga. En þær elítur hafa misst vitið, eða jafnvel aldrei frá fæðingu haft það. Í Brexit-kosningunum var sagan sú sama. Bretar eru enn óbrjálaðir, nema í borgarvirkjum gegn veruleikanum

Þeir sem muna Búrfell hér heima muna hvernig þessi landnemahugsun er. Hún er varfærin og þjóðfélagsleg, tekur mið af því sem getur gerst mörgum skerfum síðar og flanar ekki út í sjálfsmorðsborgarlínur sem liggja inn í gaukshreiður grasasna í sjálfkeyrandi apabúrum. Þar sem yfirlæknirinn er stanslaust í ímyndaðri ferð til Mars að skoða hundrað milljón drepnar klukkustundir Sigmundar Freud, sem liggja ofan á hundrað milljón líkum Karls Marx, borandi í nef sitt - svo nefndar séu bara tvær yfir-þvælur tuttugustu aldarinnar sem komu úr sömu skúffu og sjálfkeyrandi vitsmunalegar drepsóttir nútímans eru fastar í

Það er millistétt okkar með landnemahugsun sem byggt hefur Ísland upp og það sama gildir um Bandaríki Norður-Ameríku. Og það er hún sem fjármagnar mesta herveldi mannkynssögunnar, þar sem eitt sykki af öllu strategískt mikilvægu kostar milljarða dala

Utanríkisráðherra okkar er sennilega orðinn algert borgarbarn. Hann heldur að NATO sé sjálfkeyrandi banki sem hægt er að taka allt út án þess að leggja nokkuð inn

Krækja: U.S. Navy Brings Back Navigation By The Stars For Officers

Fyrri færsla

Verður Norður-Kórea ríkt land?

Myndband: Stjörnusiglingafræði 1942


Verður Norður-Kórea ríkt land?

Nú er úr vondu að ráða. Ég get ekki lengur lesið Financial Times. Það er búið að sanna sig sem ekki-fjölmiðill með því að hafa alltaf rangt fyrir sér um flest. Einu sinni áttu starfsmenn þess og svipaðra fjölmiðla góða og kórónaða daga. Það var á meðan þeir, en ekki almenningur, höfðu beint símasamband við útlönd. Þeir fengu markaðs-fréttir og annað á undan almenningi og gátu þannig selt fólki áskrift að því sem það hafði ekki efni á sjálft. Þetta var greinilega það eina sem þessir fjölmiðlar höfðu fram yfir apa með lyklaborð í búri

Nú er þessi munur farinn. Almenningur er kominn með sama síma og FT og WSJ. Og þá sér maður að þeir hafa oftast rangt fyrir sér um næstum allt sem máli skiptir. Restin er suð. Ekkert er að marka svo kallaðar markaðsfréttir og ekkert er að marka skrif þeirra um efnahagsmál og síst af öllu er neitt að marka nein skrif þeirra um stjórnmál. Ég er að hugsa um að segja upp sem greiðandi

Wall Street Journal get ég heldur ekki lesið lengur því þeir eru svo gegnsúrir út af kjöri Donalds Trump að þeir falsa flestar fréttir svo úr verður súrt kál. Snúa flestu á haus. Maður veit og sér að skrif þeirra eru svindl og blindskrift. Paul Krugman er heldur ekki hægt að lesa lengur, því hann er orðinn úthverfur af bræði. Rangan á honum snýr út og úr öllu. Hann er orðinn stjórnmálamaður, loksins. New York Times er heldur ekki hægt að lesa því þeir eru enn súrari vegna Trumps en WSJ. Ég er því að hugsa um að segja upp. Ég horfi á sömu hlutina og sé það sama og þeir, en skil flest á allt annan hátt. Svo af hverju ætti ég að hlusta á þá sem höfðu svona allt allt of oft rangt fyrir sér

Jæja, að efninu

Það eru tvær leiðir sem Norður-Kórea getur farið til að öðlast ríkidæmi:

Leið 1. Halda áfram á þeirri leið sem þeir þegar eru á. Það eina sem landið stendur fyrir er þróun kjarnorkuvopna. Haldi þeir því áfram geta þeir orðið ríkir á að selja kjarnorkuvopn til aðila sem eiga slík vopn ekki. Nóg er af mögulegum viðskiptavinum. Engin hugmyndafræði liggur á bak við ríkisstjórn landsins. Hún er bara hreint helvíti. Ekkert hugmyndafræðilegt afl er að flækjast fyrir við stjórnun landsins. Enginn mórall. Engin samviska. Engin mennska. Ekkert, nema hrein og skær græðgi. Valdastétt landsins ætlar sér að nota þjóðina áfram sem sínar einka-þrælabúðir svo að hún geti áfram lifað í vellystingum, hvað sem það kostar. Þetta er hin fullkomna "stealth" lokaútgáfa sósíalismans. Þessu geta þeir orðið ríkir á og lifað hátt í langan tíma. Þetta er hægt því nóg er af drullusokkum í veröldinni til að kaupa af þeim fullbúin kjarnorkuvopn og flest sem í þau þarf. Alltaf

Enginn mun geta komið í veg fyrir kjarnorkuvopnasölu þeirra næstu marga áratugi. Og ekkert getur lagfært stjórnmálastétt landsins annað en að drepa hana. Þessi viðskiptauppskrift og stefnumörkun þýðir að leiðtoginn getur ekki gefist upp á komandi misserum - og aldrei í framtíðinni. Hann verður að fara í stríð sé sótt að honum núna og alltaf síðar. Öll valdastétt landsins myndi persónulega skera úr honum líftóruna í trylltum ótta ef hann svo mikið sem blikkar einu auga. Hann fer í stríð, það er öruggt. Hann velur leið eitt

Á næstu vikum verður hann að sannfæra Bandaríkin um að hann hafi stóru bombuna klára sem einhverskonar vopn. Ef hann hefur hana klára sem vopn, þá verður hann að sýna vopnið á næstu vikum. Til dæmis með því að keyra fyrir okkur demó með því að sprengja hana á hafi úti með flaug. Ekkert mark verður tekið á neinu neðanjarðargutli. Þetta verður hann að gera til að fá frið og framhaldslíf. Vopnið veitir valdastéttinni framhaldslífið. Það tryggir að enginn sé að káfast upp á hana

Þetta er kallað "nuclear clarity" (ég sprengi án fyrirvara vopnið mitt svo allir sjái, ergo: ég er með vopn). Hingað til höfum við einungis fengið að sjá "nuclear ambiguity" (ég er með vopn, en sýni það ekki, en sprengi einhverja klessutunnu neðanjarðar, trúið mér)

Það erfiðasta er að búa til sjálft vopnið úr stórri klessutunnu. Það þarf að minnka það og herða. Það þarf að þola 10G hröðun framan á eldflaug út í geim, svo kuldann í geiminum, endurkomuhitann inn í gufuhvolf jarðar og svo að springa á réttum tíma á réttum stað. Það má helst ekki lenda og springa ekki með merkimiðann "framleitt í Norður-Kóreu" á halanum. Sé um næstu nágranna að ræða, sem á að kála, þá þarf flaugin ekki að yfirgefa gufuhvolfið

Leið 2. Gera eins og Suður-Kórea. Verða strategískur vinur Bandaríkjanna. Allir sem verða þannig vinir Bandaríkjanna verða ríkir. Dæmi? Ísland, Þýskaland, Japan, Suður-Kórea. Og næst á þeim lista núna eru Pólland, Rúmenía og Búlgaría. En Norður-Kórea gæti hins vegar komst efst á listann, strax, immed. Það getur landið gert með því að gefast upp og sameinast suðurhlutanum. Þetta kostar eitt símtal. Þetta er mjög auðvelt, en samt ekki hægt

Norður-Kórea mun ekki velja leið númer tvö. Þeir munu velja leið númer eitt. Það verður stríð. Og hinir mörgu komandi viðskiptavinir verða bandamenn landsins í því stríði

Nú er sem sagt fyrir valdastéttina að drepast eða láta sprengja sig í tætlur. Aðeins leið númer tvö getur komið í veg fyrir að valdastéttinni verði bara tortímt. Leið númer tvö tryggir að valdastéttinni verður ekki tortímt, heldur verður henni vandlega tortímt

Bara síminn getur reddað þessu. Sími sem almenningur hefur ekki

Fyrri færsla

USS Nimitz leggur í hann


USS Nimitz leggur í hann

1 + 1 + 1 = ofurefli

Bandarísk flotayfirvöld hafa tilkynnt að USS Nimitz (CVN-68) láti úr höfn flotastöðvarinnar í Bremerton í  Washingtonfylki á vesturströnd Bandaríkjanna þann 1. júní 2017

1. Flugmóðurskipið USS Nimitz og árásarhópur þess leggur sem sagt í hann á fimmtudaginn. Förinni er heitið til Vestur-Kyrrahafs, en þar er land sem heitir Norður-Kórea. Hópurinn verður viku á leiðinni. Þar mun hann sameinast flota:

2. USS Carl Vinson (CVN-70) og árásarhóp þess sem staðsett er undan Kóreusaga. Heimahöfn CVN-70 er San Diego í Kaliforníu

og svo

3. USS Ronald Reagan (CVN-76) og árásarhóp þess, sem einnig er staðsett undan Kóreuskaga. Heimahöfn CVN-76 er Yokosuka í Japan

Er þá allt þegar þrennt er? Það hugsa ég

Eða þarf að panta heila opnu í fjölmiðlum til að auglýsa það sem er að gerast beint fyrir framan augun á öllum sem augu ættu að hafa

Norður-Kórea, starir nú niður í ofboðslegt hyldýpi sem er að opnast

Tengt:

Fyrri færsla

Nýtt viðtal við varnarmálaráðherra Bandaríkjanna (mæli með)


Nýtt viðtal við varnarmálaráðherra Bandaríkjanna

CBS-viðtal við James Mattis

Það er ekki á hverjum degi sem James Mattis ráðherra varnarmála talar við fréttamenn um nýjar áherslur í varnarmálastefnu Bandaríkjanna. Hún breytist í eðli sínu aldrei og getur ekki breyst, því hún mótast af legu Bandaríkjanna sem ein heild í veraldarhafinu. En nýjar áherslur verða þó til. Þær taka mið af því sem brennur á Bandaríkjunum sem táningi með yfirgnæfandi heimsáhrif, sem áður tilheyrðu Evrópu í 500 ár. Þeim stútaði Evrópa sjálf á 30 árum, eða frá 1914 til 1945. Hún gerði sig að engu og verður aldrei aftur neitt annað en þýðingarlítill landmassi með 52 ríkjum á, því annað er ekki hægt. Evrópuskaginn út úr Móðir Rússlandi býður ekki upp á neitt annað

Fjórði hver dalur heimsframleiðslunnar verður til í Bandaríkjunum. Fjörutíu prósent einkaneyslunnar fer fram í Bandaríkjunum, því hið opinbera sem neytandi er svo hlutfallslega lítið miðað við flest önnur lönd. Í Bandaríkjunum er stærsta samhangandi landbúnaðarsvæði veraldar, svo stórt og frjósamt að það getur brauðfætt flestar manneskjur á plánetunni. Um það streyma siglanleg fljót sem eru lengri og ódýrari flutningaleið en öll samanlögð önnur siglanleg fljót jarðarinnar. Sjöundi hver gámur sem fluttur er út frá Kína fer til aðeins einnar verslunarsamstæðu í Bandaríkjunum, Walmart.

James Mattis segir að hugmyndin á bakvið Ríki íslams sé banvænn hugmyndafræðilegur ruslahaugur sem sviðinn verður niður í rót og malbikað yfir. Og Norður Kórea er bein ógn við Bandaríkin, segir hann. Þarna hafið þið það. Og Rússland er úti að aka í bensínlausri nafnlausri bifreið sem hann botnar ekkert í. Gefum hermanni Mattis orðið, en þar hóf hann feril sinn árið 1969, eða fyrir 48 árum, í bandaríska hernum

Eldflaug skotið upp frá Wonsan í Norður Kóreu flaug ca. þessa leið 28. maí 2017

Ágiskuð stefna er mín: 450 km gul loftlína dregin

Norður Kórea skaut annarri eldflaug upp í gærkvöldi. Að sögn þeirra sem skrifa fréttir flaug hún 450 kílómetra frá Wonsan og lenti í efnahagslögsögu Japans. Giskað er á að þetta hafi verið sovéskt hönnuð flaug sem í stærstu útgáfu nær jafnvel til höfuðbogar Japans, eða þúsund kílómetra. Sem er aðeins rúmlega tvöfalt lengra en hryðjuverkandi flaugin í gærkvöldi var látin fljúga

Fyrri færsla

Norður-Kórea nú eða aldrei?


Norður-Kórea nú eða aldrei?

Það að Norður-Kórea sé orðin fær um að framleiða og skjóta upp eldflaugum knúnum föstu eldsneyti, boðar ekki gott. Það þýðir að japanska þjóðin hefur ekki nema nokkrar mínútur, kannski sjö, til að undirbúa sig fyrir kjarnorkuárás. Tíminn sem vesturströnd Bandaríkjanna hefur er nokkuð lengri, í mínútum talið

Þegar eldflaugar nota hins vegar fljótandi eldsneyti, þá þarf að koma því á flaugarnar áður en þeim er skotið upp og það tekur tíma. Sé vitað hvar þær eru staðsettar er hægt að fylgjast með áfyllingu og undirbúningi skots með aðstoð gervihnatta - og ná að búa sig undir kjarnorkuárás eins mögulega og hægt er

Nýr leiðtogi Suður-Kóreu tók sér sólarhringsfrí frá stöfum í síðustu viku. Það er ekki dæmigerð suður-kóreönsk hegðun, því þeir vinna mest allra þjóða. Hvað var það sem krafðist svona mikils næðis að nýr þjóðarleiðtogi Suður-Kóreu þurfti að stimpla sig út til að geta gert. Þurfi hann að taka erfiða ákvörðun. Þurfti hann að hugsa sig vel um?

Ef Norður-Kórea kemst upp með að þróa kjarnorkuvopn sem með rekstraröryggi ER hægt að beita, þá markar sá atburður að ekki er lengur hægt að eiga við landið. Ef því er leyft að komast yfir þann erfiða þröskuld, þá er orðið of seint að gera nokkuð í málinu. Þannig virka kjarnorkuvopn

Hvað mun gerast næst? Þetta vandamál er ekki á förum, þvert á móti, það er sífellt meira aðkallandi

Fyrri færsla

Utanþings ríkisstjórn Þýskalands lækkar í hafinu


Utanþings ríkisstjórn Þýskalands lækkar í hafinu

Myntbandalagið sekkur

Mynd: "Very bad" að sökkva

Utanþings ríkisstjórn Þýskalands, Deutsche Bank AG, er að sjálfsögðu niður á mörkuðum í dag um 2,1 prósent. Donald Trump forseti Bandaríkjanna er staðráðinn í að koma upp um og kveða niður misnotkun Þýskalands á löndum Evrópusambandsins og umheiminum

Rannsókn hans á gerræðislegum viðskiptaójöfnuði mun birtast í júní. Þá gæti farið svo að Þýskaland yrði stimplað sem gengisfalsari. Hann sagði að Evrópusambandið sé einkabifreið Þýskalands. Það notar þá haugsugu sem ryksugu ofan í 26 önnur ríki sambandsins í krafti handjárna myntbandalags ESB sem Þýskaland skrúfaði saman sér í hag, en öðrum til skaða. Þetta falsar gengi Þýskalands í veraldarhafinu, hroðalega

Hann hefur rétt fyrir sér. Þýskaland er að tæta Evrópu í tætlur. Þessi birtingarmynd brýst einnig fram í NATO, eins og sést á gíslatökuhóp þýska kanslarans, í fyrri færslu, sem þorir ekki að yrða á bandaríska forsetann. Talaði því enginn við hann nema Stoltenberg. Ég man vel eftir svona hegðun frá því í gaggó

Fyrri færsla

Donald Trump til NATO: borgið eða..


Donald Trump til NATO: borgið eða..

Forseti Bandaríkjanna heldur ræðu í nýjum aðalstöðvum NATO í Brussel 25. maí 2017

Ræða Donalds Trump í nýjum aðalstöðvum NATO, féll ekki í góðan jarðveg hjá hjörðinni sem hann verndar í Evrópu, eins og sjá má á andlitum svo oft kallaðra "leiðtoga Evrópu", sem hlógu vandræðalega til að reyna að breiða yfir getu- og allsleysi sitt í öllum málum

NATO segist ætla að taka þátt í pappírsvinnu ásamt fljúgandi ratsjá, en án allra bardaga, í baráttunni við Ríki íslams og þeirra afla sem það ríki gengur fyrir

Ríki íslams er land í Mið-Austurlöndum, þvers á landamæri nokkurra ríkja. Landsvæðið sem það stjórnar er á bilinu 50 til 100 þúsund ferkílómetrar. Þetta ríki eins og stendur í nafni þess, er ríki íslams. Það stundar utanríkisviðskipti, innheimtir skatta og veitir þjónustur. Það skaffar menntun og rekur sitt eigið stjórnmála- og réttarkerfi byggt á alræði. Það rekur einn hæfasta herafla í Mið-Austurlöndum sem berst, sigrar og tapar án þess að missa móðinn. Það rekur hryðjuverkafaraldur í Evrópu til að draga til sín lifandi aðföng og kveikja elda handa sér innan Mið-Austurlanda, sem á endanum sprengja mun allan heimshlutann saman í eitt stórt ríki Íslams, ef áætlun þess gengur upp

En þetta vita leiðtogar Evrópu víst lítið um, því þeir, en þó einungis varnalaust fólk þeirra, sem verið er að sprengja í loft upp, ætla að taka þátt í pappírsvinnu og skaffa ratsjárflugvélar sem bandaríkin létu þá hafa og borguðu fyrir. Þetta heitir að taka þátt. Kannski hafa NATO ríkin í Evrópu þarna gefið Bandaríkjunum fyrirheit háð 83 fyrirvörum um þátttöku eins og var svo oft í Afganistan. Oft var betra að sleppa því að hafa fyrirvaraveldi Evrópu með en ekki, var stundum sagt

Því nánar sem maður skoðar og virðir meginland Evrópu fyrir sér, þá gerir maður sér grein fyrir því að ekkert hefur breyst síðan 1932. Allt er við það sama. Sami skítamórallinn ríkir um alla álfuna og á milli landanna. Segja má með öryggi að Evrópusambandið sé Ríki skítamórals

Fyrri færsla

Ferðaþjónusta á krossgötum


Ferðaþjónusta á krossgötum

Það sem kom Íslandi fyrir alvöru á landakort ferðamanna, var fjármálahrunið. Alþjóðlegir "hrægammar" lágs verðlags í hinum almenna heimilisgeira erlendra ríkja, lyktuðu blóð. Þannig tala menn venjulega um "spákaupmenn" þegar þeir geta ekki borgað þeim, en þegar þeim hins vegar vantar peninga þeirra þá eru þeir kallaðir "fjárfestar". Og þegar blóðið flýtur þá kaupa menn. Lækkun gjaldmiðilsins í kjölfar bankahrunsins var hið íslenska hagkerfi að segja: komið hingað og gerið góð kaup á meðan birgðir endast. Og þetta virkaði. Gjaldmiðillinn virkaði og Ísland er uppselt

Ef Grikkland færi úr evrunni þá myndi hið sama gerast þar. Pantanakerfin myndu brasa saman og allt seljast upp sem hendi væri veifað og hagvöxtur kæmist í gang á ný og skattatekjur ríkissjóðs myndu þar af leiðandi ekki þorna upp og skera lánshæfnismatið undan honum. Þetta er hið mannlega eðli. Allir vilja gera góð kaup, ef það mögulega er hægt

Fjármálahrunið varð sem sagt góð landkynning. Ísland er algerlega uppselt. Og þegar allt er uppselt þá þarf að hækka verðið til að hármarka gróðann á meðan það er hægt. Neyta á meðan nefi okkar stendur. Og þar með talinn er virðisaukaskattur á greinina

Segja má að kominn sé tími á væga og hefðbundna kreppu á Íslandi (e. recession, þ.e. samdráttur í minnst tvo ársfjórðunga í röð). Kreppur eru nauðsynlegar því þær taka til í hagkerfinu og henda illa reknum einingum út, lagfæra lélega framleiðni og binda enda á taprekstur. Of mikið af of mörgu er rekið með tapi í þessum nýja geira hagkerfisins. Smá kreppa myndi hreinsa út

Að sjálfsögðu á að herða ferðamannabransann eins og aðra bransa. Burðarvirki hans getur og má aldrei tengjast verðlagi. Menn eiga ekki að fylla gagnagrunna íslenskrar ferðaþjónustu upp með nöfnum og heimilisföngum á verðviðkvæmum viðskiptavinum, því þannig verður hann lítils virði og bara enn eitt blóðrauða hafið í samkeppninni. Okkar haf á að vera blátt. Slá þarf á þennan gorkúluskóg svo að upp rísi geiri í hagkerfinu sem þolir áföll

Erlendir ferðamenn sem skila íslenskum frímerkjum er þeir sjá hvað þau kosta í erlendri mynt, eru með hundrað prósent öryggi staðsettir á röngum stað á plánetunni. Þeir eiga að fara til ESB-Rúmeníu, þaðan sem þeir hafa efni á að senda póstkort sín heim í evruþrælaríkið, þar sem raun-launahækkanir, sökum gengisbindingar, koma til launþega á 18 ára fresti

Ég vissi að krónan okkar myndi gera sitt til að hrista lúsina af bransanum. Takk íslensk króna. Þú vinnur verk þín vel. Komi og dugi náttúruleg kreppa ekki eins og vera ber, þá þarf að hækka stýrivexti til að koma henni af stað

Nálgast nú sumarfrí þingmanna. Komast þeir þá heim í garðinn sinn til að reyta þann arfa sem kominn er. Og heit efnalaugin bíður fjármálaráðherrans, sem orðinn er allsber

Fyrri færsla

Bandaríkin búa sig undir styrjöld


Bandaríkin búa sig undir styrjöld

CVN-70, USS Carl Vinson og árásarhópur þess flugmóðurskips (carrier strike group; CSG) er nú staðsett undan Kóreusaga. Heimahöfn CVN-70 er San Diego, Kaliforníu

CVN-76, USS Ronald Reagan og CSG þess flugmóðurskips er einnig staðsett undan Kóreuskaga. Heimahöfn CVN-76 er Yokosuka í Japan

CVN-71, USS Theodore Roosevelt er nýkomið úr þjálfunarleiðangri til heimahafnar í San Diego og hafa flotayfirvöld sagt að flugmóðurskipinu og komandi CSG þess verði sett ný verkefni á næstunni, en áfangastaður var ekki gefinn upp

Hundrað F-16 orrustuþotur Bandaríkjahers eru staðsettar í Suður-Kóreu

Andersen flugstöð bandaríska flughersins er á eyjunni Guam, þrjú þúsund kílómetra suðsuðaustur af Pyongyang, sem er höfuðborg Norður-Kóreu. Þar eru strategíaskar sprengjuflugsveitir bandaríska flughersins staðsettar. Þær sem eru lítt sýnilegar á ratsjám - ásamt þungavinnuvélunum B-52. Flotastöð sjóhersins er einnig á Guam

Lítt ratsjár-sýnilegar F-35 flugvélar Bandaríkjanna hafa frá því í janúar verið staðsettar í Japan

Hvar eldflaugakafbátar Bandaríkjanna eru staðsettir veit enginn, nema þeir sem stjórna aðgerðum þeirra

Almannavarnir og þjóðaröryggisstofnun halda kynningu á fundi á vegum viðskiptaráðs Guam-eyju á miðvikudaginn í næstu viku, þar sem borgaralegar öryggisvarnir verða kynntar vegna stöðunnar á Kóreuskaga. Eyjan er hluti af Bandaríkjunum og þar búa um 160 þúsund manns

Engar tilraunir hafa verið gerðar til að fela neitt. Mikil uppbygging hernaðarmáttar Bandaríkjanna fer nú fram fyrir opnum tjöldum undan Kóreuskaga

Bandaríkjaforseti er á ferðalagi erlendis til 27. maí. Gera má og gera má ekki ráð fyrir að beðið verði með aðgerðir þar til hann er kominn heim. En það veit enginn fyrr en þá

Sagt er að forsetar skapi ekki söguna, heldur að það sé sagan sem skapi þá

Bandaríkin hafa fyrir langa löngu dregið rautt strik sem Norður-Kóreu verður ekki liðið að stíga yfir. Því striki er líklega náð. Og samt veit það enginn með vissu. En þá áhættu er varla hægt að taka mikið lengur, það er greinilegt

Donald Trump sagðist ælta að senda heila armöðu til Norður-Kóreu. Og það er hann að gera. Hann gerir allt sem hann segir. Stefna hans er gagnsæ. Blindingjar veraldar eru hins vegar flestir

Fyrri færsla

Verður Ungverjaland sett í poka og sent til Brussel?


Verður Ungverjaland sett í poka og sent til Brussel?

Í síðustu viku ákvað þing Evrópusambandsins sem enginn kaus, hið svo kallaða Evrópuþing, að nú ætti Evrópusambandið, sem enginn kaus heldur, að hefjast handa gagnvart Ungverjalandi. Þinginu líkar ekki við löglega kjörin stjórnvöld Ungverjalands. Þar situr ríkisstjórn sem hefur hugsað sér að gæta hagsmuna Ungverja. Þetta er skelfilegt. Og markmiðið með aðförinni er að ESB takist með sovéskri stjórnarskrá í rassvasanum að taka burt atkvæðarétt Ungverjalands í Evrópusambandinu. Að Ungverjaland eigi að sitja þar við hlaðborð Samfylkinga-Viðreisnar og horfa á aðra fara með málefni landsins eins og þeim sýnist, ókjörnir. Algerlega ókjörnir og án umboðs

Þetta minnir mig dálítið á innrás Sovétsambandsins í Afganistan (Soviet-Union). Miðstjórnin með uppstoppaðan Brezhnev á skafti, réðst inn í landið á jóladag 1979 með þeim rökum að þar væri farin að grassera "þjóðernishyggja" sem myndi smita út frá sér inn í hin svonefndu sovétlýðveldi (hin þyngri útgáfa fullrar ESB-aðildar). Þið vitið kæru lesendur; í steypustöð vinstrisins er hverskonar frelsi ávallt kallað "þjóðernishyggja" þegar vinstrið heldur að burðarþol kúgunarinnar sé að minnka í steypu þess. Þannig fór sá jóladagur og höfuð Hafizullah Amin forseta Afganistan var af sovéskum sérsveitum sent í plastpoka til Kreml sem sönnunargagn fyrir vel unnu verki, en sem þó aldrei lauk. Kreml hélt jafnvel að forsetinn hefði ætlað að hafa samband við Bandaríkin, og það gekk náttúrlega ekki

Reyndar minnir aðalritari Evrópu, Angela Merkel, mig nokkuð á Leonid Brezhnev að því leyti að hún virðist vera stoppuð upp af svipaðri miðstjórn og samskonar þingi. En Brezhnev var þó mun skemmtilegri en hún og heilastarfsemi hans líklega léttari

En dagatal sambandanna beggja er þó hið sama. Jóladagur var notaður til að gera innrás í Afganistan og 17. júní var notaður til að tilkynna Íslandi að aðlögunarinnrás Brusselveldisins hæfist formlega einmitt þann eina dag ársins af öllum öðrum mögulegum

Pólland segist ætla beita neitunarvaldi verði Ungverjaland sett í poka. En það er nú ekki víst að það gildi þá, mín kæra Varsjá

Lotharinga öxull Berlín-Parísar hræðist Pólland og Intermaium hugmynd Pilsudski, sem nú er í uppbyggingu. Pólland verður orðið meira veldi en Þýskaland innan Evrópu innan næstu 20 ára. Pólland er nefnilega, eins og öll Austur-Evrópa, í tilvistarhættu beggja megin frá. Úr austri sækir Rússland að Austur-Evrópu og úr vestri sækja hin gömlu öxulveldi ESB að henni

Sterkasti og traustasti bandamaður Austur-Evrópu eru Bandaríki Norður-Ameríku. Flest ríki sem eru í strategísku sambandi við Bandaríkin verða stórveldi í sínum heimshluta. Annars væri Suður-Kórea ekki á Samsung-setrum heldur á hrísgrjónum í dag. Þýskaland skiptir Bandaríkin ekki máli lengur. Bless

Fyrri færsla

Samruni - stöðnun - upplausn


Næsta síða »

Höfundur

Gunnar Rögnvaldsson
Gunnar Rögnvaldsson

Búseta: Ísland.
Reynsla: 25 ára búseta í ESB og fyrirtækja-rekstur í DK/ESB frá 1985 til 2010. Samband:
tilveraniesb hjá mac.com

Ég er hvorki skráður á Facebook, Twitter, Linkedin né á neinum öðrum "félags-vefjum". Aðsetur skrifa minna er einungis að finna hér á þessari síðu og á tilveraniesb.net og í blöðum og tímaritum

Bloggvinir

Innskráning

Ath. Vinsamlegast kveikið á Javascript til að hefja innskráningu.

Hafðu samband