Leita í fréttum mbl.is

Bloggfærslur mánaðarins, desember 2009

Moody's aðvarar stjórnvöld Grikklands: ef þið farið í styrjöld við grísku þjóðina þá mun það þýða lækkun á lánshæfnismati gríska ríkisins

Moody’s sendir frá sér nýja aðvörun til Grikklands.

Eins og margir vita þá lækkaði lánshæfnismatsfyrirtækið Moddy’s mat sit á lánshæfni gríska ríkisins í síðustu viku. Þessi lækkun fylgir í kjölfar lækkunar annarra matsfyrirtækja. Einkunnin var lækkuð frá A1 til A2. Um leið sagði Moody’s að litlar líkur væru á yfirvofandi greiðslufalli gríska ríksins alveg á næstunni. Þessi yfirlýsing frá Moody’s róaði marga mikið.

En þessi yfirlýsing varð þó frekar skammgóð ánægja því í viðtali við gríska blaðið Kathimerini í gær segir Sarah Carlson - sem er yfirmaður greiningar á lánshæfni ríkissjóða hjá Moody’s - að það versta eigi ennþá eftir að koma til Grikkja. Hún segir að langtíma lánshæfnis- og greiðslugetumat Moody’s sé háð því að skilningur og samþykki grísku þjóðarinnar styðji við og undir aðgerðir ríkisstjórnar Grikklands og einnig að ríkisstjórnin verði fær um að skilja og nýta sér hugsanlegt samþykki og skilning þjóðarinnar. En samhliða þessu gerir Moddy’s einnig kröfu til að seðlabanki ESB muni halda áfram að taka við skuldabréfum gríska ríksins sem tryggingu gegn fyrirgreiðslu úr bankanum til bankakerfis Grikklands. Annars er hætta á lánsfjárkreppu og lausafjárkreppu sem mun gangsetja lækkun lánshæfnismatsins um mörg þrep.

Sarah Carlson segir ennfremur að ríkisstjórnin hafi komið auga á veiku hliðar efnahags- og fjármála Grikklands og að hún sé að vinna að varanlegum breytingum. En hún segir ennfremur að ríkisstjórnin hafi hvorki tryggt sér velvild né skilning almennings á aðgerðunum og að það liggi heldur ekki fyrir hvernig ríkisstjórnin ætlar að framkvæma aðgerðirnar í samspili sínu við þjóðina.

“Vegna þess að nokkur tími mun líða þar til aðgerðir ríkisstjórnarinnar munu bera ávöxt höfum við sett þetta nýja og lægra lánshæfnismat Grikklands á neikvæðar horfur. Neikvæðar horfur þýða að það eru meira en 50% líkur á að matið verði lækkað enn frekar innan næstu 12 til 18 mánaða.” | Kathimerini

Alþjóða Gjaldeyrissjóðurinn (AGS) mun lenda á flugvellinum í Grikklandi í janúar.

Samkvæmt heimildum gríska blaðsins Kathimerini hefur ríkisstjórn Grikklands nú þegar leitað ásjar AGS til að reyna koma fjármálum ríksins á réttan kjöl. Blaðið segir að það sé í skattamálum sem AGS eigi að aðstoða ríkisstjórnina - að AGS eigi að aðstoða við að koma skattheimtu landsins í lag svo hún megi fullnægja kröfum Brussel. Blaðið segir ennfremur að framkvæmdanefndin í Brussel hafi vantrú á að ríkisstjórninni muni takast að koma fjármálum landsins í það ásættanlegt horf að þau verði ESB þóknanleg. Því þorir ríkisstjórnin ekki að treysta á eigin hæfni af ótta við að tillögum og áætlunum hennar verði hafnað af æðsta ráði ESB. Ríkisstjórnin leitar því til AGS í von um að það muni blástimpla áætlanir ríkisstjórnarinnar í augum Brussel. | Kathimerini

Fyrri færsla

Andstaða almennings á Íslandi mun sjálfkrafa fella lánshæfnismat ríkissjóðs Íslands erlendis. 


Andstaða almennings á Íslandi mun sjálfkrafa fella lánshæfnismat ríkissjóðs Íslands erlendis.

Sú óhæfa sem ríkisstjórn Íslands er nú í gangi með í æðstu stofnun Íslands, sjálfu Alþingi Íslendinga, mun sjálfkrafa leiða til lækkunar á lánshæfnismati ríkissjóðs Íslands.

Þau vinnubrögð og glæframennska sem ríkisstjórn Íslands viðhefur núna mun ekki ganga vel ofaní erlenda lánadrottna. Þessi vinnubrögð munu ganga enn verr ofaní erlenda lánadrottna en ofaní íslenskan almenning. Miklu verr.

Það er alveg 100% öruggt að mikil valdníðsla ríkisstjórna leiðir alltaf til lækkunar á trausti þeirra hjá lánadrottnum og mest hjá lánadrottnum erlendis. Það er líka 100% öruggt að ríkisstjórnir sem vinna svona illa að mikilvægum málum og sem aðhafast svo fullkomlega í trássi við vilja þjóðarinnar, munu sjálfar fella lánshæfnismat þjóðar sinnar erlendis.

Engir erlendir lánadrottnar munu líta það mildum augum þegar ríkisstjórn fer algerlega gegn vilja þeirrar þjóðar sem kaus hana sér til verndar. Þegar um svona stórt og mikilvægt mál er að ræða eins og Icesave, þá verða stjórnvöld að tryggja sér samþykki og velvilja almennings. Annars mun fara fyrir Íslandi eins og kannski á eftir að fara fyrir Grikklandi. Þá gæti nefnilega það langtum versta ennþá verið eftir. Styrjöld gegn þegnunum verður ekki verðlaunuð af lánshæfnismatsfyrirtækjum. Þvert á móti. Þau munu refsa stjórnvöldum fyrir valdníðslu og valdhroka til að aðvara aðra lánadrottna.

Steingrímur og Jóhanna. Hlustið vel. 

Þið eruð ekki í gamla Kreml núna. Þið eruð stödd í lýðræðisríki. Ef þið hagið ykkur eins og valdníðingar þá munuð þið uppskera ríkulega refsingu og fyrirlitningu hjá þjóðinni. Það versta er þó það að bök ykkar sjálfra eru ekki nógu breið, sterk og ung til að bera afleiðingarnar. Hrum bök ykkar munu brotna í spón við minnsta álag og byrðin mun öll lenda á þjóðinni sem kaus ykkur sér til verndar. Þjóðin mun veðra ykkur ævinlega fjandsamleg því þið hafið nú þegar brugðist henni fullkomlega. Þetta veit Moody’s og þetta veit Fitch.

Þess vegna hefur yfirmaður greiningar skuldamats ríkissjóða hjá Moody’s, hún Sarah Carlson, gert Grikkjum það alveg ljóst að það versta er líklega eftir fyrir Grikki. Ef ríkisstjórn Grikklands hefur ekki samþykki grísku þjóðarinnar í harkalegum aðgerðum sínum þá mun það sjálfkrafa þýða lækkun á lánshæfnismati ríkissjóðs Grikklands um mörg mörg þrep.

 

“The long-term credit capacity of Greece will depend on the acceptance of the government’s measures by the Greek people and their dynamic application by the government,” she argues 

 

Það versta gæti því verið eftir fyrir bæði Grikki og Íslendinga. Hagið ykkur því ekki eins og einræðisherrar í bananalýðveldi. Það borgar sig ekki og það er engan vegin þess virði. Þjóðin mun nefnilega þurfa að gjalda þess í langan langan tíma og það er þjóðin sem býr til greiðslugetu ríkissjóðs. Og þá verðið þið eins mikið og eins langt fjarverandi frá ábyrgðinni eins og íslensku útrásarfurstarnir eru núna; í eigin útlegð skammar, fyrirlitningar og aumingjaskapar.

En þjóðin mun þurfa að heyja það stríð sem þið gáfust upp á. Þetta veit bæði Moody’s og Fitch. Hvenær ætlið þið að skilja þetta líka? Þið hafið sýnt núna að þið eruð bæði tvö mikið skammtímafólk. Þið hagið ykkur nákvæmlega eins og skammtímalánafíklar.

En þjóðin kaus ykkur ekki til að gegna hlutverki VISA. Hún kaus ykkur alls ekki til að gera það sem þið eru að gera - og heldur ekki til þess sem þið eruð búin að gera nú þegar. Þið eruð fullkomlega umboðslaus og bráðum algerlega rúin öllu trausti kjósenda og allra lánadrottna Íslands erlendis. Hættið að misnota ríkissjóð Íslands sem ykkar eigið VISA-kort. Þið hafið ekkert leyfi til þess.

       | Slóð: gríska blaðið KathimeriniMoody’s issues new warning

Á íslensku;

a) Moody’s sendir frá sér nýja aðvörun til Grikklands

b) Alþjóða Gjaldeyrissjóðurinn (AGS) mun lenda á flugvellinum í Grikklandi í janúar

- hér í  glugganum þriðjudaginn 29. desember 2009

Fyrri færsla

Launþegasamtökin í Danmörku segja að evrusvæðið sé einar rjúkandi efnahagslegar rústir. 


Launþegasamtökin í Danmörku segja að evrusvæðið sé einar rjúkandi efnahagslegar rústir.

Ugebrevet A4 er blandt Danmarks mest dagsordensættende medier. 

Þessar upplýsingar munu þið ekki finna á vef ASÍ því þar hvíla stjarfar og fullkomlega dáleiddar Rauðhöfðaendur yfirstjórnar ASÍ fastlímdar á hænsnaprikum þeim sem Samfylkingin hefur úthlutað þeim fyrir ekki neitt. Stjórn ASÍ sitjur á priki þessu núna og gerir mikið á gólfið. Fnykurinn er ekki góður og detta undirsátar samtakanna unnvörpum á þessu sleipa en bónaða gólfi yfirmanna ASÍ.

En í Danmörku segja hagfræðingar launþegasamtaka þess lands að efnahagur evrusvæðis sé ein rjúkandi rúst. Þetta sögðu samtökin í vikubréfinu A4 sem er virt útgáfa launþegasamtakanna og sem oft er vitnað í.

Raun-stýrivexti á Írlandi 1999-2009. Í stórum dráttum

Kreppan hefur breytt evrusvæðinu í efnahagslegan hryllingsklefa, segir A4. Ríkisgjaldþrot ógnar Grikklandi. Aðeins tvö af 16 löndum evrusvæðis uppfylla kröfur myntbandalagsins. Aðeins lágir vextir og nýr vöxtur, segir A4, getur bjargað löndum myntsvæðisins frá að belgrífa sig á hol á skuldaborgarísjaka evrusvæðis. Þetta, verð ég að segja, eru fyrirfram brostnar vonir mannanna því ef það er eitthvað sem myntbandalagið er snillingur í þá er það að kyrrsetja hagvöxt og gera hann upptækan áður en hann yfir höfuð getur náð að myndast á elliheimilinu Evrusvæði Krata S/F.

Danmörk uppfyllir ekki skilyrðin inn í myntbandalagið (EMU) segir A4. Ekki skal mig ekki undra það því hagvöxtur í Danmörku hefur verið sá fimmti lélegasti í OECD síðustu tíu árin og verður sá þriðji lélegasti þau næstu tíu. Þökk sé heilagri bindingu barnsins við staur inni í Brusselgarði. Danska barnið sem aldrei mun læra að ferðast í traffíkinni sökum heimsku stjórnmálmanna af evrukratakyni í flokk. Hér á ég auðvitað við hið aumkunarverða barnabeisli sem bindur dönsku krónuna við staur inni í miðju Þýskalandi. Súrrealismi fánýtis hagkerfa. Danir eru auðvitað hættir að taka eftir beislinu, orðnir því vanir, og taka því ekki eftir að þeir eru að sökkva djúpt niður með EMU-ísjakanum. Svíar höfðu þó vit á að klippa á þetta beisli árið 1992 og fóru því ekki niður á hafsbotn með draugaskipinu Evrusvæði S/F.

Gírkassi Evrópusambandsins: allir gírar eru þar aftur á bak

Finnar voru því miður svo heimskir að henda finnska markinu fyrir borð árið 2000 og eru núna sokknir í heimsmet samdráttar þar í landi sem er ennþá verri en á Íslandi. Núna er finnska hagkerfið nefnilega skroppið svo mikið saman að meira en 50 ár eru liðin frá því að finnska hagkerfið hefur klessukeyrt svona rækilega. Þökk sé evruverki Brusselkrata sem nú tekur Finnland með sér í blautu fallinu niður gröf þjóðfélaga sem einu sinni voru eitthvað. Finnar geta ekki skilað evrunni til baka. Það er ekki hægt. Þeir eru því fastir um alla eilífð í sjálfsárekstri. Nú myndi það því hjálpa Finnum mikið að auglýsa að þeir ætli að taka sig á og ganga alveg úr evru. Það myndi gleðja alla. Það myndi líka sýna mikið hugrekki og mikla sjálfsbjargarviðleitni sem myndi fá alla til að skilja að Finnar ætla ekki að verða að fyrrverandi Ittala kristalmola inni í frystiklefa ESB.

Spánn er á leið á eftir Grikklandi inn í þokuna sem umlykur þennan borgarísjaka Brussel S/F. Ítalía sem ennþá er að reyna að sameinast mafíunni í suður hluta þess lands er líka að sogast inn í þokuna sem umlykur frystiklefa þessa stærsta borgarísjaka hagvaxtar í heiminum. Inni í þokunni eru nú þegar frosin föst fyrir mörg lönd. Sjálfu Írlandi er búið að breyta í ú-land undir stjórn myntbandalagsins sem lagði efnahag Írlands í rúst með neikvæðum stýrivöxtum þar árum saman. Þrjú Eystrasaltsríki eru svo geymd djúpfyrst inni í hryllingsklefa ERM II fyrirkomulagsins.

Myntbandalagið sekkur

Allt í EMU er lýsandi dæmi um heilbrigðar andstæður sem breyttust í þjóð- og efnahaglegan hafragraut í krafti málamiðlana sem embættismenn elduðu á þeim Prímus Mótor sem gengur beintengdur fyrir gasinu sem streymir út úr afturenda Brussel. Hérna gengur því allt eins og það á að ganga. Enginn getur villst á skítafýlunni frá eldamennsku Brussel og á heilnæmu lofti heilbrigðrar skynsemi. Þessi munur er átakanlega sláandi núna.

Þetta veit vikubréfið A4 sem er gefið út af danska ASÍ. En þeir þora þó ekki að segja ríkisstjórn Danmerkur að losa skipið frá bryggjupolla EMU. Það væri of mikið og myndi jafngilda því að vera Galileo nútímans. Þeir á A4 yrðu allir atvinnulausir og myndu bara bætast aftast í röðina á eftir þeim 809.000 manns í Danmörku sem hafa enga atvinnu núna. Ofaní þá tölu koma svo ein milljón ellilífeyrisþegar. Þessar 809 þúsund hræður án atvinnu eru brottkastið frá tilveru Danmerkur í ESB og EMU. Þessir fiskar þjóðfélagsins eru nú uppstaflaðir í geymslukössum í frystilestum ríksins að eilífu. Engin þjóðfélög þola ESB í lengdina. Þau deyja. Verða fátæktinni og atvinnuleysinu að bráð; LO; Eurozonen er en økonomisk ruin | DST

Næsta skref ESB og EMU verður að afnema það sem eftir er af sjálfstæði þjóðanna undir yfirskyni "fjármálalegs stöðugleika". Herlög "fjármálalegs stöðugleika" verða næst á matseðli Prímus Brussel. Allt til þess að bjarga myntbandalaginu. Mundu; þú sást þetta fyrst hér á blogg mínum.

Fyrri færsla

Borgar menntun sig í svo kölluðu "norrænu velferðarkerfi?"


Gleðileg jól þið öll, - og gott hangikjöt með laufabrauði. Hvað meira er hægt að biðja um?

 Laufabrauðið. Eigin framleiðsla

Óska ykkur öllum gleðilegra jóla með von um að þið eigið góða og gleðilega hátíð ljóss, friðar og frelsis

 


Borgar menntun sig í svo kölluðu "norrænu velferðarkerfi?"

  

Umbun fyrir menntun: hve mikið meira er í launaumslaginu fyrir skatt 

Mynd; Cepos.dk 

Danska hugveitan Cepos tekur þetta efni fyrir í nýrri rannsókn. Á þessari mynd sést hve mikið það borgar sig hreint efnahagslega (umbun í formi launagreiðslna fyrir skatt) að ganga menntaveginn með því að leggja á sig nám á háskólastigi sem í Danmörku er venjulega kallað “videregående uddannelse” - og - sem að mestum hluta til samanstendur af kandidatsprófi eftir 5 ára háskólagöngu. Hér er um einfalt meðaltal allra menntagreina að ræða. Dönsk skólastjórnvöld og ofdekraðir atvinnurekendur hafa lengi verið á þeirri skoðun að BSc gráða eða “bachelor-menntun” sé ekki hægt að nota til neins og því fara flestir í 5 ára háskólanám sem stundað er í 10 mánuði á ári í 5 ár. Myndin sýnir hve mörg prósent þú hagnast á því að fara í þetta lengra nám miðað við að láta þér nægja menntaskóla- eða iðnnám. Þetta eru tölur frá mörgum löndum OECD.

Drengir hafa auðvitað komið auga á þetta og sækja því núna mun minna í háskólanám. Þeir sem t.d. vilja verða læknar núna eru því oftar stúlkur en það er oft slæmt því stúlkur vilja t.d. helst ekki vera skurðlæknar heldur sækjast þær frekar eftir að vinna mýkri læknastörf eins og til dæmis að deila út pillum, fylla út pappíra, tala við sjúklinga og helst ekki vinna á vöktum. Þetta er náttúrlega ekki algilt, heldur sá "trend" sem kvartað er yfir. Drengir sækjast hinsvegar oftar í blóð, vélsagir, borvélar og græjur eða bara læknahandverk og eru því í yfirgnæfandi mæli þeir sem hafa sótt í að stunda skurðlækningar. En það eru bara svo fáir drengir sem koma nýjir til þessa náms á hverju hausti. Þeir fara frekar í trésmíði. Þar er nefnilega hægt að kveikja fyrr í skólabókunum og éta svo að segja strax úr launaumslaginu. Þetta er norræn velferð. 

"The article also notes that “Europe’s best brains are leaving in droves. Some 400,000 E.U. science and technology graduates currently reside in the United States, and barely one in seven, according to a recent European Commission poll, intends to return”; that “European immigration to the United States jumped by some 16 percent during the 1990s”; and that “there are now half a million New York City residents who were born in Europe"

 

Innfluttir læknar koma því hingað frá Pakistan og Indlandi á meðan innfæddir og oftar en ekki kvenkyns danskir sálfræðingar sitja á skólabekk til að læra um sáluhjálp handa sjúklingum sem eru að springa úr pirringi vegna tungumálaerfiðleika á sínum eigin sjúkrahúsum í eigin landi - og svo auðvitað líka til að læra um sáluhjálp til félagslega einangraðra karlkyns lækna sem koma hingað án fjölskyldu alla leið frá Langtíburtuztan. Koma hingað til að borga mikinn skatt og sem fara svo aftur til síns heima við fyrsta tækifæri. Þetta er svo gott. Svo gott er þetta skattakerfi sem er orðið svo flókið að enginn getur lengur reiknað út sinn eigin skatt. Skattakerfið þar sem réttaröryggið er horfið því jafnvel dómstólarnir skilja ekki lengur þetta skattakerfi. Því þarf að vanda vel í hvaða héraðsdómi skattamál fá meðferð því útkoma dóma er oft háð túlkun dómsmanna á lögunum. Þessi túlkun er misjöfn eftir því hverjir túlka skattalöggjöfina.

Ríkið er hér hinn frægi rúðubrjótur hans Frédéric Bastiat og allir vinna við að ráðgefa öllum um hvernig á að komast hjá rúðubroti ríksins. Ónýtar starfsstéttir eins og skattaráðgjafar spretta upp eins og gorkúlur og hagvöxtur verður því lélegri og lélegri fyrir vikið, því allir vinna á Moskvulegum skrifstofum við að ráðgefa öllum um rúðubrot ríkisins. Þetta eru miklu meira en handónýt afleidd störf sem hámenntað fólk vinnur við.  Það er svo mikið af svona lélegum afleiddum störfum hérna að hagvöxtur í Danmörku var sá 5. lélegasti í OECD síðustu 10 árin og verður sá 3. lélegasti í OECD næstu 10 árin líka. Danmörk hrapar neðar og neðar á skalanum yfir ríkustu þjóðir heimsins vegna fíflagangs stjórnmálamanna í hinu norrænda velferðarkerfi. Kerfi sem þeir hafa ekki efni á lengur því hænan var étin lifandi af þeim sjálfum.  

Réttaröryggið er því orðið ákaflega veikt og gloppótt sökum spagettíflækju stjórnmálamanna. Skattayfirvöld nota löggjöfina eins og skammbyssu með einni patrónu eða réttara sagt, yfirvöld stunda rússneska rúllettu með þessum verkfærum yfirvaldsins. Það gerir ekkert til þó yfirvöld tapi málinu því þau "eiga" nóg til af auðæfum þegnana til að keyra mál á hendur þegnunum, sem alltaf þurfa að sanna sakleysi sitt sama hversu ákæra yfirvalda er vafasöm. Dómarastéttin er orðin ansi þreytt á að þurfa að eyða tíma sínum í mál sem skattayfirvöld vita fyrirfram að eru töpuð. Dómarar hafa gagnrýnt skattayfirvöld harðlega fyrir að sóa tíma réttarins. En yfirvöld taka áhættuna engu að síður því þau gætu nefnilega "óvart" fengið hagsæða túlkun á spagettí-lögunum sem koma stanslaust á færibandi frá fjölmiðla-þyrstum þingmönnum þingsins, þ.e. ef málið er tekið fyrir í “hagstæðum” héraðsdómi með hagstæðum túlkum.

Munurinn á jaðarsköttun láglaunamanns og hálaunamanns 

Mynd; Cepos.dk 

Mynd 2; Munurinn á jaðarsköttun láglaunamanns og hálaunamanns. Seinni myndin sýnir okkur hvernig hinni fyrrnefndu umbun í launagreiðslum fyrir skatt reiðir af eftir að hafa farið í gegnum hið stigversnandi jaðar-skattakerfi hinnar “norrænu velferðar”. Hér eru það skatta-prósentustigin sem eru sýnd á vinstri ás. Lægsti jaðarskattur á laun í Danmörku er 43%. Hæsti jaðarskattur er 63%. Myndin tekur mið af jaðarsköttun launa hjá láglaunamanni með 67% af meðallaunum starfsmanns í iðnaði og svo hátekjumanns með 167% af þessum meðallaunum starfsmannsins í iðnaðinum. Prósentustig sköttunar. Eins og sést er þetta hlutlaust (neutral) á Íslandi og Tékklandi því þar er (var!) flatur skattur. En nú er það búið að vera og norræna velferðarkerfið heldur nú innreið sína á Íslandi. En í "norræna velferðar kerfinu" fer hér hinsvegar það litla sem ávannst við menntunina burt áður en það fyrir slysni hefði dottið ofaní í vasa menntaða mannsins.

Hér í Danmörku fær t.d venjulegur hagfræðingur með 5 ára háskólanám ekki endilega meira í laun en trésmiður fær hjá góðum meistara með góð verkefni. Í rannsókninni tekur Cepos einnig fyrr æfitekjur.

Mottó norræna velferðarkerfisins er því kannski þetta: lokum skólunum og allir fari út á stillas. En þá blasir við það smá vandamál að það þarf ekki að byggja neitt undir neinn lengur. Ekkert DeCode, engir peninga-turnar, engin sjúkrahús, engar skemmur, ekkert álver því enginn finnur upp neitt til að nota álið í. Þá byggir maður kannski bara Moskvublokkir í staðinn, - eða opin berar byggingar.

Það er engum vafa undirorpið að sá mikli fjöldi fólks með góða menntun sem flutti til Íslands á mörgum síðustu árum flutti þangað meðal annars vegna þess að skattakerfið var einfalt og það átti auðvelt með að gera sér grein fyrir að hverju það gékk. Kosturinn var líka sá að flatur skattur virkaði hvetjandi á þetta fólk. Rannsókn Cepos PDF; Præmien ved uddannelse i Danmark

Tengt efni:

Vox EU; The European brain drain: European workers living in the US

The Heritage Foundation; Fiscal Policy Lessons from Europe - PDF

Fyrri færsla

Ríkisstjórn Íslands. Gagnslausir illviðrahnjúkar 


Ríkisstjórn Íslands. Gagnslausir illviðrahnjúkar

Peningavirkjun illviðrahnjúka ríkisstjórnarinnar mun hraðfrysta Ísland í stað þess að gagnast landinu okkar

Betur hefði þessi virkjun illviðrahnjúka ríkisstjórnarinnar verið notuð til að verja þegna Íslands gegn því sem mun dynja á þjóðinni næstu mörg árin. Í stað þess að vinna fyrir þegnana er unnið gegn þegnunum.

Vandamálið er sjálf ríkisstjórnin í Stjórnarráðinu; helstu einkenni Kremlar Íslands hafa verið og eru enn þessi; Aldrei er neitt birt af upplýsingum nema að þær séu píndar úr úr stjórnvöldum af andófsmönnum í útlöndum eða mönnum sem hafa sambönd í útlöndum. Annað einkenni. Mikill og innilokaður hefndarþorsti sem nú er látinn ríða yfir þjóðina.

Eina raunverulega og nauðsynlega grundvallarhlutverk ríkisins er að vernda líf, limi og eigur þegnana. Það reyndi ríkisstjórn Geirs H. Haarde þó að gera með því að reyna að tryggja eigur almennings. Það virðist henni hafa tekist.

Í raun og sannleika geta þegnarnir sjálfir séð um allt hitt ef út í það er farið. Þeir geta stofnað og rekið heilbrigðiskerfi í sjálfseignarformi, menntakerfi og aðstoðað bágstatt fólk. Ekkert af þessu þarf fyrst að fara inn í heilabú starfsmanna ríkisins og koma þaðan út aftur sem ríkisrekstur. Þegnarnir geta þetta vel sjálfir og hafa oft gert þetta sjálfir. Þeir geta þetta allt nema þetta sem ég nefndi fyrst; löggæslu, landvarnir og dómsvald. En hér bregst ríkisstjórn Íslands gersamlega. Hún og menn hennar ganga jafnvel svo langt að setja algerlega til hliðar alla þessa þrjá grundvallarþætti sem yfir höfuð réttlæta sjálfa tilvist ríkisins. Hún verndar ekki líf og limi þegnana, hún verndar ekki landið þeirra og ekki heldur eigur fólksins. Dómsvaldið er heldur ekki notað til varnar í þágu þjóðarinnar. Þvert á móti. Það er algerlega sett til hliðar og sent í sumarfrí. 

Það eina sem ríkisstjórn komma Vinstri Grænna og semikomma Samfylkingarinnar reyna að gera er að taka eigurnar af þegnunum. Ofaní þetta krefst hún líka að þegnarnir greiði skuldir lítillar klíku manna sem virðist nú hafa fengið innstu tökin innan peningavirkjunar illviðrahnjúka þeirrar ríkisstjórnar sem nú situr að sumbli í Stjórnarráði Íslands.

Það fyrsta sem ríkisstjórnin hefði átt að gera - á meðan innviðir fjármálageirans voru enn sæmilega virkir - var að stofna her af fjármálafólki sem hafði ekkert annað verkefni en að vinna gegn hagsmunum Bretlands á fjármálamörkuðum um allan heim. Spá gegn þeim og vinna gegn þeim á allan hátt. Nota herinn. Breiða út óhróður og falskar upplýsingar um fjármál þessa ríkis og hugsanlega annarra - og reyna á allan hátt að grafa undan gjaldmiðlum þeirra á sem mest skemmandi og spellvirkjandi hátt. Þetta hefðu verið lágmarks varnarviðbrögð ríkisins, því ríkið réði þá yfir bönkunum. Svo hefði átt að breiða út lygar og óhróður um alla banka og ríkisstjórn Bretlands og reyna að fá hana niður með hnakkann á sem svæsnasta háttinn, sem þökk fyrir hryðjuverka meðferðina. Núna er ríkisstjórnin hins vegar orðin vopnalaus. Þetta kann hún vel - hún hefur sýnt það í verki - en hún gerði ekkert, nema náttúrlega innanhúss á Íslandi. Þar voru þessi vopn notuð, gegn þjóðinni. Enda veit forsætisráðherrann ekki að það er til heimur í útlöndum. Hún er clueless.  

En nú er of seint að fara út í svona varnir því subbulána kreppa ESB-landa er nú í uppsiglingu (covered bonds). Hún á sér upptök víða, t.d. í Grikklandi, Austurríki og á Spáni - via - bankakerfi Austur-Evrópu og Balkanskaga. Svo liggja leiðir glötuðu peningana til Lundúna og seðlabanka ESB sem verður AIG Evrópu. Fyrstu 1384 bankarnir á Spáni hafa þegar lokað og læst á seinustu 12 mánuðum. Subbulána kreppan mun murka lífið úr öllum þeim restum sem enn eru til á lífi í ormétnu eignasafni gamla Landsbankans erlendis. Nú er of seint að hefja þau viðbrögð sem átti að viðhafa frá byrjun. Markaðurinn mun sjá fyrir því, en um leið mun hann því miður taka eignir Landsbankans erlendis af lífi. Þá verður ekki hægt að gleðjast yrir þroti bankakerfis Bretlands og ESB. Aukaverkanirnar verða því miður þær að subbulána-kreppa ESB mun tortíma eignum þrotabúsins í leið sinni á hausinn.

Aldrei hefur verið til eins gagns- og áhrifalaus ríkisstjórn neins staðar í heiminum. Gagnslausir illviðrahnjúkar.


Er evru-landið Grikkland nú þegar orðið gjaldþrota inni í sælureit Evrópusambandsins?

Myntbandalagið sekkur 

Evrópskir lyfjaframleiðendur kvarta yfir að hafa ekki fengið 7 miljarða evrur greiddar frá hinu ríkisrekna heilbrigðiskerfi Grikklands í langan tíma. Engar reglulegar greiðslur fyrir græjur og lyf hafa borist frá gríska ríkinu síðan 2005, en þá var endursamið um gjaldfallna reikninga frá fyrri árum. Síðasta vor bað svo gríska ríkið um enn frekari greiðslufrest í stað þess að greiða inna á gjaldfallnar skuldir til lyfjafyrirtækja. Svissneskt lyfjafyrirtæki hefur nú gert fjárnám í sjúkrahúsi í Grikklandi. 

Upplýsingar um hernaðarútgjöld gríska ríkisins virðast sem betur fer vera hernaðarleyndarmál og eru því varðveittar sem ríkisleyndarmál sem Brussel fær ekki að sjá.

Kannski gríska ríkið sé að byggja upp birgðir vopna svo það megi verjast innrás 150.000 embættismanna herafla lánadrottna frá sæluherbúðum pennaherveldis Bruzzels og Co. Svo og frá evruverska plat seðlabankanum í landi gamalmennana í Þýskalandi. Landinu sem árum saman hefur stundað launa- og kostnaðar undirboð innan evrusvæðis og þannig komið mörgum löndum myntbandalagsins á hausinn. Svo hefur evruverski plat seðlabankinn hjálpað til með því að stilla raunstýrivexti þessara landa á neikvætt svo takast mætti að sprengja efnahag þeirra varanlega í loft upp.

Grikkir eru sennilega að bræða málma og skotfæri í nýja mynt sem dugar þeim betur en evruhlussan hefur gert. (FT)

Blessun ertu okkar sveigjanlega íslenska króna.  

Fyrri færsla

Ríkisbanki eins evru-ríkis þjóðnýttur af evru-ríkinu í öðru evru-ríki


Ríkisbanki eins evru-ríkis þjóðnýttur af evru-ríkinu í öðru evru-ríki

Josef Pröll fjármálaráðherra Austurríkis  og embættismaður Andreas Schieder óska til hamingju 

Mynd; Fjármálaráðherra Austurríkis, Josef Pröll og embættismaður Andreas Schieder kynna glæsilegan nýjan ríkisrekstur í Vín í gær (Stúfur)

Halda mætti að ég væri með óráði

En nei, þetta er rétt. Austurríki þjóðnýtti í gær þýska bankann Hypo Group Alpe Adria. Þetta var gert til að reyna að forða fjármálakerfi evrulandsins Austurríki frá því að brasa saman inn á stofugólf skattgreiðenda. En skattgreiðendur þarna eru orðnir frekar aldraðir sökum mikillar rúmmálslegrar hógværðar í marga áratugi og þola því illa svona niðursparnað. Austurríki gékk - enda stutt að fara - í ESB árið 1995 og tók niður mynt Evrópusambandsins frá Brusselhimnum árið 1999. En það er árið sem myntbandalagið hófst á loft. Nú er það svo hátt á lofti að enginn nær til þess. Aðeins tvö evrulönd af sextán eru svo hátt sett að þau uppfylli uppgönguskilyrðin upp í myntbandalagið núna.

En hvað er svona merkilegt við þetta? Ekkert annað en það að þessi nú þjóðnýtti banki í Austur Ríki var í eigu ríkisstjórnar Bæjaralands í fyrrverandi vestur ríki Þýskalands. Eins og þið vitið er flest fyrrverandi í Evrópu. Fólkið líka.

Já. Vegna þess að Austurríki er í myntbandalaginu þá þurfti Fransmaðurinn og seðlabankastjórinn Jean-Claude Vigilant Trichet að eyða helginni í Austurríki. Þar fæst hvergi ætur biti matar fyrir sannan Fransmann. Hann hírðist því úti í bifreið og borðaði nesti á meðan hann beið eftir að bankinn færi nógu mikið á hausinn svo hann gæti stigið upp í hann. Svo hátt var flugið á þessum banka, enda var hann í eigu ríkisstjórnar Bæjaralands Þýskalands.

Þetta var björgunaraðgerð segja fréttamiðlar. Bankanum var bjargað til og frá ríkinu. Evrusvæðinu var líka bjargað frá hruni. Móðurríkið sem stýrir Bayern Landesbank skaut (af byssu?) 825 milljónum evrum inn í nýja bankann eftir hafa látið bæverska ríkið selja 67% hlut sinn í bankanum fyrir eina bæ bæ evru til ríkiskassa Austurríkis. Forstjóri Bayern Landesbank sagði svo af sér, enda létt verk, því allt er ein rjúkandi rúst í öllu ríkisrekna Landesbankakerfi Þýskalands. Stjórnmálamenn sitja þó þægilega áfram í bankaráði Bayern Landesbank.

Þetta er sem sagt annar bankinn í evrulandinu Austurríki sem er þjóðnýttur á einu ári. Hinn fyrri hét Kommunalkredit Austria AG, sem þýðir eiginlega Bæjaraútgerð Austurrísku Sveitafélaganna. Mikið af útlánum bankakerfis Austurríkis hefur farið til Austur-Evrópu og landa á Balkanskaga. Útlánin hafa þó vonandi ekki öll farið í bæjarútgerðir eða SAS, sem væri þá eins konar SÍS í útrás frá Austurríki. Þið munið eftir SÍS? En markaðirnir óttast samt mjög að svo sé tilfellið. Þá eru tveir af sex kerfislega mikilvægum bönkum evrulandsins Austurríkis komnir niður í skjól skjaldborgara Austurríkis. Fjórir eru eftir. 

Fleiri stuttar fréttir í glugganum 

Fyrri færsla

Evrópusambandið ein rjúkandi rúst. Sósíalistar ESB endurskilgreina óskir sínar.


Evrópusambandið ein rjúkandi rúst. Sósíalistar ESB endurskilgreina óskir sínar.

Umboð seðlabanka Evrópusambandsins 

Ok. Hvað höfum við?

Eitt stykki myntbandalag í upplausn. Myntbandalag sem kemur í veg fyrir hagvöxt og hagsæld. Hagvaxtarslátrari. Fátæktargildra. Það hlaut að koma að skuldadögum núllvaxtar. 

Lettland. Á barmi örvæntingar og undir umsjá AGS. Lettneska hagkerfið er að hverfa í mesta samdrætti á vesturlöndum. Fasteignaverð fallið um 60%. Gengisbinding við evru var brjálæði. Allt bankakerfið í eigu útlendinga. 

Litháen. Á barmi örvæntingar. Hagkerfið að hverfa. Allt bankakerfið í eigu útlendinga.

Eistland. Á barmi örvæntingar. Hagkerfið að hverfa. Allt bankakerfið í eigu útlendinga.

Finnland. Meiri samdráttur núna en var þar þegar Sovétríkin hrundu. Miklu meiri samdráttur er í Finnlandi núna en á Íslandi. Þetta gerist þrátt fyrir 10 ára evruaðild Finnlands. Iðnaðarframleiðsla og útflutningur hruninn. Massíft atvinnuleysi og enn hærra en á Íslandi. Fátækt eykst. Fjármagn vantar í vaxtasprota.   

Ungverjaland. Undir umsjá AGS

Grikkland á leið að missa sjálfstæði sitt sem sem þjóð. Er á leiðinni í faðm AGS undir stjórn ESB. Verða settir í evrubann og geta ekkert gert til að auka samkeppnishæfni. Meiga ekki prenta sína eigin peninga. Hafa ekkert gengi. Yfirvofandi greiðslufall gríska ríkisins. 

Spánn. Er á svipaðri leið og Grikkland. 20% atvinnuleysi er á Spáni núna og 42% atvinnuleysi hjá ungmennum. Landið er ein rjúkandi rúst eftir peningastefnu evrópska seðlabankans.

Írland er sokkið. Sumir Írar segja að byrja þurfi samfélag þeirra upp á nýtt. Landið er ein rjúkandi rúst eftir peningastefnu evrópska seðlabankans.

Þýskaland í mesta samdrætti af öllum meiriháttar hagkerfum heimsins. Massíft atvinnuleysi áratugum saman. 

Bretland. Breska bankakerfið var 8 klukkustundum frá gjaldþroti.

Danmörk. Hver fjórði danskur bóndi er á leið í gjaldþrot. Hver bóndi í Danmörku skuldar að meðaltali 650 miljónir ISK.  

Svo kemur hér rúsínan í pylsuenda ESB

Martin Schulz, sem er hávær Þjóðverji og leiðtogi sósíalista á þingi Evrópusambandsins, hefur lýst því yfir að frá og með nú séu 184 þingmenn þessa hóps sósíalista orðnir "hreyfing and-kapítalista" sem munu ráðast gegn "hagkerfi sem byggist á peningum eða sem er peningaknúið".

Hér gengur allt eins og það á að ganga eftir að Berlínarmúrinn féll frá austri og yfir Vestur-Evrópu. Hann féll mest vestur á bóginn en ekki öfugt, greinilega. 

Ýmsar slóðir með nánari fréttum: 

Fyrri færsla

Er evran landgönguprammi? Mikil spilling í Evrópusambandinu og í Brussel segja þegnarnir


Er evran landgönguprammi? Mikil spilling í Evrópusambandinu og í Brussel segja þegnarnir.

Bloomberg: Ireland, Greece May Leave Euro, Standard Bank Says. 

Er evran landgönguprammi? 

Fullfermi af fíflum. Bók eftir Fintan O'Toole 

Spilling er tískuorð á að minnsta kosti á tveimur eyjum og heilu meginlandi. Þetta á ekki bara við núna heldur næstum alltaf. Inn á tölvuskjá minn rataði írska bloggsíðan Sinn Féin Keep Left. Ástæðan var sú að ég var að "Googla" Finnland. Jahá svona gerist þetta. Þessi írska bloggsíða fjallar ekki um Finnland heldur um Írland. Þar var verið að vitna í bókadóm í blaðinu Guardian. Bókin heitir: “Fullfermi af fíflum - hvernig heimska og spilling sökkti hinum keltneska tígur”

Irish GDP is now shrinking faster than in any other advanced economy, and the country's gross indebtedness is larger than Japan's

 

Mín reynsla er sú að það fyrsta sem manni dettur í hug er yfirleitt það rétta. Þegar ég sá mynd bókarkápunnar af þrífóta evrunni þarna á kafi í höfninni í Dyflinni, þá datt mér strax í hug sokkinn landgönguprammi. Búið er að losa og tæma djásnið. Upp er svo sprottinn skógur byggingakrana. Afleiður byggingakrana eru yfirleitt byggingar - og skuldir, miklar skuldir.

En byggjendur eru nú flestir lagstir í rúmið inni í svefnálmunni sem NAMA-ríkisstjórn Írlands er að leigja undir alla þá sem byggðu þessa risastóru svefnálmu - og sem seinna urðu atvinnulausir eftir að þeir voru búnir að losa, tæma og byggja úr prammanum. Það er sem sagt komið að útborgunardegi. Ekki fyrir Íra heldur fyrir þá sem sendu þeim evruna með neikvæðum stýrivöxtum árum saman. Það er að segja, stýrivextirnir voru neikvæðir á Írlandi því þar var verðbólgan miklu hærri en heima á þýska stýri-vaxtaheimilinu í Frankfurt. Þessir þýsku vextir stýra svo vel. 

Perhaps its best hope now is to revert as soon as possible to third world status and qualify for a loan from the IMF.

 

Það er eiginlega ekki hægt að hafa eftir það sem stendur um það sem stendur í bókinni. Best er að lesa það í hljóði. En þarna á bloggsíðunni er nefnt að Írar verði að byrja þjóðfélag sitt uppá nýtt, því það sé svo spillt. Þetta hefur maður kannski heyrt áður? En maður, var þetta ekki paradísin sjálf? Var þetta ekki í ESB? Var evran þá sem Trójuhryssa Landgönguprammadóttir fyrir Íra? Já það var hún, greinilega; Bloggsíðan Sinn Féin Keep LeftTime for mutiny on this ship of fools 

Svo er það meginlandið sjálft - og Brussel

Þar er ástandið víst ekki mikið betra ef marka má skoðanakannanir. Niðurstöður Eurobarometer um spillingu í ESB eru eftirfarandi:

Þrír af hverjum fjórum 500 milljón manns Evrópusambandsins segja að það sé mikil spilling í samfélagi þeirra. Þetta eru þá 375 milljón manns sem segja að þeir búi í spilltu samfélagi. Þeir segja að spillingin sé fólgin í samspillingu stjórnmála- og viðskiptalífs. Þetta er ekki nýtt því þetta er það sama og fólk sagði í flestum löndunum árið 2007.

Nema í Finnlandi, því þar segja tvöfalt fleiri Finnar að það sé spilling í finnska samfélaginu núna en árið 2007 - eða 51% Finna í dag á móti 25% Finna árið 2007. Það eru fjármál stjórnmálaflokka og einstök skandalamál einstaklinga í fjölmiðlum sem valda þessari breytingu í Finnlandi.

Svipuð en þó verri er sagan í Austurríki. Þar álíta 61% að það sé spilling í þjóðfélagi þeirra á móti 47% á árinu 2007. Austurríkismönnum finnst vera spilling í dómskerfinu, lögreglu og stjórnmálum. Mútur eru þar líka nefndar.

Einna verst er ástandið á Möltu. Þar finnst næstum öllum íbúum þessarar eyju að spilling ríki í samfélagi þeirra, eða 95% á móti 84% árið 2007. Lengi getur vont versnað.

Í Bretlandi álitu 74% land sitt vera spillt. Þetta er 9 prósentustigum verra en árið 2007. Næstum allir Búlgarar álitu samfélag sitt vera spillt, eða 97% þjóðarinnar. Einungis 22% Dana finnst danska samfélagið vera spillt. Margir Íslendingar vita ennþá að Danmörk er eitt af fimm Norðurlöndum.

Svo kemur rúsínan í ESB-endanum: Yfir 75% af 500 milljónum íbúum ESB álíta að Evrópusambandið sjálft og stofnanir þess séu spilltar; EU Observer; Europeans see corruption as major problem

Þetta er allt saman frekar "valla valla bing bang"

Fleiri stuttar fréttir í glugganum 

 

Fyrri færsla

Gríski harmleikur gærdagsins 


Næsta síða »

Höfundur

Gunnar Rögnvaldsson
Gunnar Rögnvaldsson

Búseta: Ísland.
Reynsla: 25 ára búseta í ESB og fyrirtækja-rekstur í DK/ESB frá 1985 til 2010. Samband:
tilveraniesb hjá mac.com

Ég er hvorki skráður á Facebook, Twitter, Linkedin né á neinum öðrum "félags-vefjum". Aðsetur skrifa minna er einungis að finna hér á þessari síðu og á tilveraniesb.net og í blöðum og tímaritum

Bloggvinir

Innskráning

Ath. Vinsamlegast kveikið á Javascript til að hefja innskráningu.

Hafðu samband