Samruni - stöðnun - upplausn

Í dag föstudaginn 19. maí 2017, hefst fyrsta ferð hins nýkjörna forseta Bandaríkjanna til útlanda. Fyrsta vestræna stoppið er Jerúsalem. Það kemur á undan Vatíkaninu, enda er Gamla testamentið hornsteinn Vesturlanda og það er haft á undan Nýja testamentinu í hinum Heilögu ritningum Vesturlanda. Engan er hægt að tala við í ESB svo það tekur því ekki fyrir POTUS að reyna það sérstaklega. Hann flýgur bara hjá og droppar inn hjá NATO sem hann heldur uppi

****

Á öllum tímabilum sögunnar verða til viðtekin hugtök sem lýsa eiga í einu orði því sem er að gerast í veröldinni. Frá 1945 til 1991 var það hugtakið Kalda-stríðið sem átti að lýsa stjórnmálastöðunni á Vesturlöndum og víðar. Frá 1991 þ.e. frá hruni Sovétríkjanna og fram til ársins til 2008, var talað um "samruna Evrópu". Hugtakið samruni varð hið staðlaða svar við öllu því sem menn héldu að væri að gerast

En á þessu tímabili varð til samferðarmaður sem lítið var talað um. Hann hét stöðnun. Evrópa var stöðnuð. Það þýddi að samruninn hafði þegar átt sér stað, eins og seðlabankastjóri Danmerkur frá 1965 til 1994, Erik Hoffmeyer, benti dönskum stjórnmálamönnum á, er hann sagði að efnahagslegri sameiningu ESB væri þegar lokið með tilkomu hins innri markaðar og það sem á eftir kæmi væri pólitískur samruni Evrópu. Þetta sagði hann árið 2000

En lítið vissi Hoffmeyer um það sem koma skyldi. Árið 2008 sprengdi Evrópusambandið sig í loft upp með sjálfsmorðssprengjubelti sem sambandið hafði sjálft lagt um alla álfuna á árunum frá 1991 til 2008. Þetta sjálfsmorðssprengjubelti ESB var lítt sýnilegt. En það þurfti bara rétt að stíga einum höllum fæti á það til að fútta mest allri Evrópu af eins og púðurtunnu, sem springur innávið. Hún féll saman

Það hugtak sem lýstir með einu orði ástandinu í Evrópu núna, er því þetta: upplausn. Og upplausnin er andhverfa samrunans. Þar falla hlutirnir í sundur, tvístrast. En enginn veit enn hvernig Evrópa mun lenda. En lenda mun hún samt, og með miklu öryggi sem enn eitt hefðbundið tímabil sögunnar, þ.e. sem styrjöld

Engin öld mun líða án styrjalda. Það eina sem hugsandi menn vita ekki enn, er í hvaða formi styrjöldin verður. Mun hún verða í sínu versta og sársaukafyllsta formi eða ekki: þ.e. verður hún borgarastyrjaldir eða ekki. Ansi er ég hræddur um að einmitt þannig muni hin gamla hefðarfrú sögunnar líta út; sem borgarastyrjöld. Öllu tiltæku hefur Evrópusambandið og tilvist þess að minnsta kosti í langan tíma sáð til að svo megi verða

Öll dagblöð sem vilja láta bendla sig við veruleikann, ættu að stofna málaflokks-flipa í öllum útgáfuformum sínum. Flipa sem ber heitið: upplausn Evrópu. Það myndi auðvelda lesendum að gera sér grein fyrir þeim raun-veruleika sem þeir þrátt fyrir allt lifa enn í. Og ég geri ráð fyrir að jafnvel ungir þingmenn okkar geti lesið þessi tvö orð: upplausn Evrópu. Þetta er að vísu dálitið langt, en það verður bara að hafa það

Fyrri færsla

Jæja, virka stýrivextir ekki?

Jæja, virka stýrivextir ekki?

Því var árum saman haldið fram hérna heima á meðan koppasveit Samfylkingaflokka var að reyna að troða Íslandi inn í Evrópusambandið, að stýrivextir krónunnar okkar virkuðu ekki. Þetta var gert til að blekkja almenning, kjósendur

En núna er mikið grátið yfir því hve stýrivextir Seðlabankans virka vel. Og að þeir séu náttúrlega allt allt of háir í hraðast vaxandi hagkerfi Vesturlanda, sem er jafn galin ályktun og sú fyrri

Stýrivextir virka. Þeir virka alltaf en það tekur mismunandi langan tíma að láta þá virka. Það sést til dæmis á allri Suður-Evrópu. Hún liggur í rúst eftir neikvæða raunstýrivexti ECB-aukaseðlabanka Þýskalands, sem bjó þar til stærstu fjármálabólu veraldar. Raunstýrivextir hans voru háðir þjóðerni og útkoman úr hamförum þessa ECB-eiknaseðlabankalings Þýskalands eru háðar þjóðerni

Þetta er hinn innbyggði kerfis-nasismi Evrópusambandsins, hann er háður þjóðerni og sem logið var upp sem sú stofnun sem átti að búa til evrópskrar útkomur, en ekki útkomur byggðar á þjóðerni. Ef þú heitir Þýskaland þá ertu í góðum málum. En ef þú heitir Grikkland eða Suður-Evrópa þá ertu rusl. Svona er allt sambandið

Á Íslandi er engin sérstök eyfirsk útkoma úr krónunni né heldur reykvísk útkoma. Það er vegna þess að íslenska krónan er raunveruleg mynt, en evran er hins vegar gjörspillt pólitískt ökutæki dulbúin sem mynt. Evrópusambandið er ónýtt og það er að eyðileggja Evrópu

Og nú hefur koppaþing ESB lagt til að atkvæðaréttur Ungverjalands í Evrópusambandinu verði afnuminn og frá landinu tekinn. Og sennilega er Pólland næst á þeim lista. Þetta gengur bara vel. Rússland gleðst og Hitler væri stoltur

Vestur-Evrópa býr ekki á sömu pólitísku plánetu og Austur-Evrópa. Svo halda menn að þessi lönd geti verið á sömu mynt. Þvílíkir grasansar. Vestur-Evrópa mun aldrei koma Austur-Evrópu til aðstoðar. Alveg sama þó svo að Rússland réðist inn í hana, Vestur-Evrópa myndi ekki lyfta litla fingri þeim til aðstoðar. Það eina sem verndar Austur-Evrópu eru Bandaríki Norður-Ameríku af því að þau hafa sameiginlega hagsmuni. Pólland á ekkert sameiginlegt með Frakklandi og öfugt. Ekkert! Evrópa er ekki til nema sem landfræðilegt heiti

Evrópusambandið og morknar stofnanir þess halda tortímingarför sinni áfram um allt meginlandið. Það hefur sambandið gert frá stofnun þess. Enginn skreiðarhjallur Íslands væri nógu stór til að hengja koppasveitir Evrópusambandsins þar upp til þerris. Svo stórt er þetta heimsveldi afglapa

Fyrri færsla

Microsoft í samvinnu við Norður-Kóreu gegnum NSA?

Microsoft í samvinnu við Norður-Kóreu gegnum NSA?

Kannski hafa "allir" ekki enn gleymt átökum Apple Inc. við bandarísk yfirvöld, sem urðu vegna þess að Apple neitaði að aðstoða öryggis- og njósnabatterí ríkisins við að búa til hugbúnað til að brjótast inn í iOS stýrikerfið sem knýr lófatölvur Apple á borð við iPhone, iPad og smátækið Apple-TV. Apple sagði að þeir myndu ekki aðstoða yfirvöld við að búa til slíkt krabbamein sem svo dreifði sér um veröldina

Nú hlýtur að vakna sú spurning hvort að Microsoft hafi aðstoðað bandarísk yfirvöld við að búa til stokkhólmskan hugbúnað. Hugbúnað sem viðskiptavinir fyrirtækisins eiga helst að læra að elska, og jafnvel þann sem þannig veldur þeim áverka og fjárkúgun

Þetta er reyndar ekki nýtt. Hugbúnaður Microsoft var frá stofnun fyrirtækisins svo gallaður og lélegur að fyrirtækið gat ekki markaðsfært hann á tölvunar- og kerfisfæðinga heimsins. Þeir litu ekki við honum. Fyrirtækið valdi því að fara hjáleið inn í hjarta vestrænna fyrirtækja og stofnana. Það bjó til og markaðsfærði glans-ímynd gagnvart sjálfum stjórnendum fyrirtækjanna og hún virkaði. Stjórnendur sem höfðu lítið sem ekkert vit á tölvukerfum og hugbúnaði tóku vörur Microsoft og keyrði þær ofan í kokið á tölvunar- og kerfisfræðingum sínum. Og ef þeir neituðu, þá voru þeir reknir

Þarna hófust hinar dimmu miðaldir tölvunar í veröldinni, þ.e. á árunum í kringum 1995, og sem síðan þá hafa virkað sem skattlagning heimskunnar á flestar stofnanir, fyrirtæki og einstaklinga. Hugbúnaður Microsoft er ennþá svo mikill gallagripur að hann þolir illa að hann sé notaður. Alls konar læknalið, lyfjaskápar og falskar sjúkrastofnanir, þurfa að koma að rekstrinum. En ekkert dugar. Vörur fyrirtækisins eru erfðafræðilega hannaðar til að keyra krabbamein best

Ekki myndi ég nenna að nota tölvu án erfðafræðilega meðfædds ónæmiskerfis. Dettur það ekki einu sinni í hug. Og nú skammar Microsoft viðskiptavini sína fyrir að nota draslið frá þeim eins og það er. Gott og vel, þetta er enn sem komið er nokkuð frjáls heimur og fátt er fullkomið í honum. Og mönnum leyfist enn sem komið er að vera fífl. En skömmin er samt Microsofts. Þeir eru framleiðandinn

Krækja; Wall Street Journal: Researchers Identify Clue Connecting Ransomware Assault to Group Tied to North Korea

Fyrri færsla

Undanþáguflokkur ESB-sinna

Undanþáguflokkur ESB-sinna

Samfylkigin varð undanþágumiðstöð banka- og viðskiptalífs frá veruleikanum. Sú undanþága endaði með svo gott sem fullkomnu hruni alls þess sem hrunið gat, af því að Samfylkingin sagði: "menn þurfa að verða djarfari"

Samfylkingin varð undanþágumiðstöð landráðalegra pólitískra afla sem ætluðu sér að stúta fullveldi þjóðarinnar. Samfylkingin sagði: "menn þurfa að verða djarfari"

Samfylkingin varð svo undanþáguendastöð eins kjördæmakjörins þingmanns frá veruleikanum. Þessi flokkur og flokkar af þessari gerð eiga varla að geta vera til. Þeir krefjast undanþágu, því Samfylkingin sagði: "menn þurfa að verða djarfari" - með annarra manna fé og fullveldi

Allt sem Samfylkingin og útbú hennar standa fyrir er áfram vont. Mjög vont og verður alltaf vont. Og menn þurfa að verjast því sem vont er. Menn þurfa að varast og verjast "þróaðri stjórnmálatækni" Samfylkinga. Jafnvel enn fastar en þeir áttu verjast "þróaðri fjármálatækni" hennar

Samfylkingin er lús á þjóðum og hana á ekki að viðreisa því hún tæmir þjóðir. Þetta eru þjóðir Vesturlanda að læra á hinn harða máta

Fyrri færsla

Of ungir "þingmenn"?

Of ungir "þingmenn"?

Þetta er athyglisverð spurning hjá Styrmi Gunnarssyni. Hann spyr hvort að þingmenn (stjórnmálamenn) okkar séu of ungir

Hverju á maður að svara. Þetta er spurning sem á fyllilega rétt á sér, vegna þess að:

Frá því að Vesturlönd drógu þá ályktun af styrjöldinni sem hófst 1914 og lauk 1945, þar sem 100 milljón manns misstu lífið af pólitískum orsökum, þá varð það niðurstaða að eitthvað nýtt yrði að koma að stjórn Vesturlanda. Og að draga þyrfti nokkrar af beittustu tönnunum úr þjóðríkjunum, sem af sérfræðingum voru álitnar skemmdar. Fallist var á að sérfræðingar yrðu úrbætandi lausn og tanntökumenn. Gengist var í að stofna apparöt sem lytu ekki pólitískum lögmálum. Sérfræðingar áttu að stýra því apparati, því þeir áttu að vera ópólitísk lausn vandmála, vegna þess að enginn þyrfti að kjósa þá. Þar með yrði það eina sem þeir áttu að gera var að vera sérfræðingar: Þeir áttu að skila árangri, þeir áttu að virka, því þeir lutu ekki neinu nema lögmálum sérfræðinnar, sama hvað á dyndi í veröldinni og sama hver kysi hvern og hvenær

Dæmi um sérfræðinga: Múrari og bifvélavirki eru til dæmis sérfræðingar. Þeir skila árangri. Þeir byggja hús sem hrynja ekki og þeir gera við bilaða bíla. Læknar gera við fólk og forritarar búa til forrit. Bókhaldari færir bókhald. Við þurfum sérfræðinga

Sameinuðu þjóðirnar voru því stofnaðar. Alþjóða gjaldeyrissjóðurinn og World Bank og NATO voru stofnuð. Nýtt fjármálakerfi með jafnvel ótal greiningardeildum og hin miklu fjármálaeftirlit voru stofnuð. Seðlabankar voru fylltir upp af sérfræðingum og stjórnmálamönnum sparkað út. Þetta eru allt stofnanir mannaðar sérfræðingum út í ystu æsar. Ofan í þetta hafa svo komið hundruð annarra alþjóðlegra stofnana og samtaka sem allar eru stútfullar af sérfræðingum, eða svo skyldi maður ætla. Og enn eitt nýja heimsveldi lausnaskapandi sérfræðinga í viðbót var stofnað, stútfullt af sérfræðingum: sjálft Evrópusambandið og myntbandalag þess

En hver er svo árangurinn af þessu öllu. Jú heimurinn hangir á ný á heljarþröm eftir að sérfræðingar þessara stofnana klessukeyrðu veröldinni og Íslandi 2008. Þessi heimur skilaði því miður ekki árangri. Sérfræðingaveldið brást. Þeir voru ekki sérfræðingar

Seðlabankar voru ekki sérfræðingar, þótt "sjálfstæðir" væru. Þeir sáu ekkert, nema Davíð af því að hann var ekki sérfræðingur. Alþjóða gjaldeyrissjóðurinn var ekki sérfræðingar, hann kom ekki auga á neitt. Bankar voru ekki sérfræðingar, því þeir sprengdu allt í tætlur og sjálfa sig í loft upp. Greiningardeildir voru ekki sérfræðingar. Þær og deildir háskóla greindu ekki vandann sem þær sátu á og bjuggu jafnvel til með þurri þögn sinni. Bankaráðgjafar voru ekki sérfræðingar eins og gefið var í skyn. Þeir vissu lítið í sinn haus né annarra því þeir stóluðu á aðra sem áttu að vera sérfræðingar. Fjármálaeftirlit reyndust ekki vera sérfræðingar í neinu nema í að koma auga á ekki neitt. Verkalýðshreyfingin baðaði sig í sturtu sérfræðinnar og missti vitið og hefur ekki fundið það enn. Sameinuðu þjóðirnar hafa lítið leyst af hendi, nema helst losað þá sem borga við foss peninga. Og Evrópusambandið og stofnanir þess hafa sprengt Evrópu í loft upp. Hin sprenghlægilega framkvæmdastjórn þess er ekki sprenghlægileg útaf engu. Hún sprengir, jafnvel í tætlur

Allir sem hafa sveinsbréf í einhverju hefðu þarna misst réttindin sín. Allir læknar sem skilað hefðu þessum árangri væru fyrir löngu orðnir réttindalausir og flugvirkjar sætu í fangelsi

Þannig að mjög hægt og rólega er hægt að segja að sú ályktun sem eftir 1945 kom af stað sérfræðingaveldi Vesturlanda, var að mestu leyti röng. Því þetta veldi virkaði ekki. Það skilaði ekki árangri. Þeir reyndust ekki vera sérfræðingar sérfræðingarnir

Vopnuð átök og stríð eru hafin á ný. Barist er á víðstöðvum í Evrópu og nágrenni hennar. Tannlausar þjóðir ESB-Evrópu eru vel flestar sigldar sérfræði-sligaðar í kaf og klofning og ónýt ríki eru í smíðum í rústum sérfræðinganna í ESB-Evrópu. Þeir voru nefnilega engir sérfræðingar. Þeir höfðu ekki það sem til þurfti samanber Icesave já-já-amen hópunum af glötuðum sérfræðingum sem þekktu hvorki fólkið á jörðu niðri né heldur þekktu þeir þjóðina. Þeir voru sannarlega grasasnar flestir og er það skjalfest meitlað í vitund þjóðarinnar. Hún treystir þessu fólki ekki lengur. Og sem betur fer var Lýðveldið Ísland ekki orðið tannlaus ESB-gómur samkvæmt ráðgjöf sérfræðinga, en allt var reynt og mest með svikráðum studdum sérfræðiáliti til að koma svo illu yfir okkur. En tennur lýðveldisins virkuðu, því þær höfðu ekki verið dregnar úr, og þær bitu fast frá sér. Það skipti öllu máli fyrir okkur að hafa þær, flugbeittar

En hafa stjórnmálamenn/þingmenn það sem til þarf núna? Það hafa þeir ekki ef þeir halda að þeir geti orðið "þingmenn" með aðstoð sérfræðinga og unnið pólitískt starf með aðstoð sérfræðinga sem eru ekki sérfræðingar. Stjórnmálamenn okkar verða að geta virkað og gengið einir og óstuddir og þeir verða að hafa vísdóm. Það er ekki nóg að hafa bara kunnáttu, heldur verða þeir einnig að hafa vísdóm. Og það er ekki hægt að búa yfir vísdómi ef maður er of ungur. Það er einfaldlega ekki hægt. Og svo þarf maður að þekkja þjóðina, sjálft fólkið. Þekkja hana út og inn. Það tekur tíma

Það sem við höfum í dag er sennilega sú versta staða sem heimurinn hefur séð síðan 1945. Við höfum nefnilega of marga of unga sem stjórnmálamenn í höndum sérfræðinga. Þetta er sennilega það versta sem gerst hefur síðan elítur og aðall skutu 1914 í gang, og sem endaði með 100 milljón drepnum

Það er orðin mín persónulega og því sem næst óhagganlega skoðun, að innan 10-20 ára muni Evrópa, Rússland, stór hluti Asíu, öll Mið-Austurlönd og Norður-Afríka loga svo glatt, að því ástandi muni jafnvel verða gefið nafnið þriðja heimstyrjöldin. Að mínu mati er þetta orðin þróun sem ekki er lengur hægt að stöðva. Árið 1914 voru það aðall og elítur sem réðu för. Í dag eru það sérfræðingar að allt of miklu leyti

Svo svar mitt við spurningu Styrmis er þetta. Já stjórnmálamenn okkar eru of ungir. Þeir eru reyndar varla stjórnmálamenn lengur. Við þurfum á vísdómi að halda og við þurfum á öldungaráði að halda. En munum við fá það? Nei svo sannarlega ekki, vegna þess að stjórnmálamenn okkar eru of ungir til að hafa vísdóm og þeir eru því flestir einungis talsmenn sérfræðinga, því þeir geta ekki verið neitt annað. Og það sem verra er, þeir geta ekki vitað hve vísdómur þeirra er lítill. Sérfræðingarnir vilja hafa þetta svona. Þar við mun sitja, og heimurinn fara þessa ferð hér að ofan, einu sinni enn. Þetta ríki í ríkinu þarf að rífa í tætlur

Gott að hann Trump rak lögreglustjórann. Hann gerði það af því að sá var ekki sá sérfræðingur sem hann átti að vera. Hann gerði það af því að hann hefur vísdóm til að gera það. Hann er nógu gamall til þess. Það þarf að reka fullt af fólki í heiminum. Fullt af fólki, heilan sand af fólki. Og svo mætti forsætisráðherrann okkar hætta að reyna að virka og gera sig út sem sérfræðingur. Annars verður hann rekinn, því hann má ekki vera sérfræðingur

Fyrri færsla

Pasta í súrkáli grillað í hollenska þinginu

Pasta í súrkáli grillað í hollenska þinginu

Ábóti ECB-aukaseðlabanka Þýskalands, herra Útópíus Draghi evrupáfi III, sat fyrir svörum í hollenska þinginu í gær. Þar staðfesti hann þrennt mikilvægt

1) Myntin evra býr til útkomur sem háðar eru þjóðerni og litlu öðru. Á lægsta enda skalans yfir útkomuna úr hinni sameiginlegu mynt er Grikkland, sem evran hefur lagt í rúst. Í hinum enda skalans yfir útkomuna úr evrunni, þ.e. í sæti sigurvegarans, er Þýskaland. Það hefur sigrað á meðan Grikkland hefur tapað svo stórt að það liggur í rúst sem flokka má, því sem næst, sem misheppnað ríki (e. failed state). En Þýskaland stendur sem alger sigurvegari með stærsta viðskiptahagnað nokkurs ríkis veraldar (Current Account) í dölum talið. Þetta er mun betri efnahagslegur árangur og hagfelldari landvinningar en innrásir og herseta færðu Þýskalandi í Síðari heimstyrjöldinni. Þýskaland á Evrópu núna og það mun forma hana til sem þýska. Loksins tókst það

Ábóti ECB-aukaseðlabanka Þýskalands, Mario Draghi, staðfestir hér frammi fyrir hollenska þinginu að Holland, sem gervitungl á réttri sporbraut umhverfis Þýskaland, sé einmitt í hópi sigurvegaranna. Það hefur hagnast á evrunni. Holland er eitt af þeim löndum sem "þénuðu á evru", segir hann. Það er auðvitað engin tilviljun, því evru-kerfið var skrúfað saman fyrir Þýskaland og þau lönd sem líkjast því mest. Þetta er þá eftir allt saman bara einfaldur evru-nasismi sem evran er byggð á (svo ég noti nú hið viðtekna en ranga heiti sem klaskað var á sósíalisma Hitlers). Hún framleiðir sigurvegara og tapara, háða þjóðerni. Það sem mestu máli skiptir í þessu tortímingarkerfi evrunnar er hvað þú heitir og hvar þú ert fæddur. Þetta er sprenghlægilegt, því ein af áróðursbrellum sambandsins var að það átti að koma í veg fyrir einmitt nasisma í hvaða formi sem er. Þetta var náttúrlega lygi frá upphafi til enda. Evrópusambandið og evran voru sett á laggirnar til þess að gefa þeim sem hönnuðu það einn möguleika í viðbót á að níðast á öðrum. Svo einfalt er þetta bákn. Enda er það þegar langt komið með að eyðileggja flest gott

2) Í þessu kerfi evrulanda er innbyggður mekanismi sem kjósendur hafa enga hugmynd um að sé til. Hann heitir TARGET2 og hann yrði stimplaður algerlega ólögmætur í hvaða einasta lýðræðisríki, ef um hann hefði sérstaklega verið fjallað í þeim stofnunum sem kenna sig við lýðræðislegt stjórnarfar. Fari Holland úr evrunni þá fær það ekki þá peninga til baka sem það á inni í kerfinu, segir Útópíus Draghi, og sem aðrar þjóðir kerfisins eru óafvitandi orðnar ábyrgar fyrir. En ef að hins vegar eitt ríki sem er í skuld við kerfið skyldi ætla að yfirgefa það, að þá hefur seðlabankastjóri hins peningalega Frankensteinveldi evrunnar, Útópíus Draghi, sagt að það land geti ekki sloppið út fyrr en það hafi gert skuld sína upp við kerfið. Hér hangir ekkert saman, heldur er þetta eitt stórt einveldi geðþótta. Verða herir landanna þá kannski notaðir sem innheimtustofnanir þeirra ríkja sem eiga mest inni í kerfinu - eða verða kerfis-skuldalöndin einfaldlega gerð upptæk? Ein ensk trilljón evra er ekki smápeningur. Hún er ein billjón

3) Draghi segir einnig að evran sé óafturkræfur gjörningur. Að lönd sem einu sinni taki upp evru geti aldrei um alla eilífð hætt á henni. Að hún sé verri en heróín fyrir löndin sem hafa álpast þar inn. Þetta er hann búinn að segja tvisvar sinnum á skömmum tíma. Þegar þriðja fullvissandi staðfesting um þetta kemur úr munni hans, þá veit heimurinn allur að þetta er lygi og að allt heila dótið mun brasa saman ofan á ríkin og þjóðir þess. En sem evrukerfið hefur nú gert farlama og svo ósjálfbjarga að flest er þar á heljar þröm eftir aðeins eitt minniháttar áfall, miðað við svo margt annað í sögu heimsins. Þetta drasl er allt saman eitt handónýtt kerfi sem aðeins er fært um að framleiða styrjaldarástand

Þegar þjóðir evrusvæðis Evrópusambandsins munu standa frammi fyrir þeim ískalda veruleika að stjórnmálamenn þeirra hafa komið yfirríkislegum strúktúr fyrir í ríki þeirra og sem yfir höfuð er ekki hægt að fjarlægja, komast úr né vinda ofan af innan ramma hins lýðræðislegs stjórnarfars, sem er sjálfur hornsteinn þjóðríkjanna, já þá mun helvíti opnast og læsa klóm sínum um þann litla frið sem eftir er í þessum löndum. Þegar þeim verður ljóst að ekki er hægt að komast út öðruvísi en með hjálp skriðdreka á götum landa þeirra og járntjalda við landamærin, þá vita allir hvað verður næst. Og eftir þann hildarleik munu rannsóknarnefndir þjóðþinganna ekki skera neinar tillögur til refsinga við nögl. Hin gamla suður-ameríska flóttaleið pólitískra agenta svona kerfis, mun þá skyndilega hitna á ný

Evran er, enn sem komið er, hin borgaralega útgáfa Víetnamstríðsins. Hertæknifræðingar ráða för. Þeir kalla sig "sérfræðinga". En þeir eru veruleikafirrtir, því þeir vita svo lítið um fólkið. Vita næstum ekkert um þá andstæðinga sína. Vita næstum ekkert um það sem knýr fólk þjóðanna áfram. Tap er það eina sem þessir "sérfræðingar" framleiða. Eins og "þróuð fjármálatækni" og "stjórnmálatækni" Samfylkinga gerði og gerir hér heima enn. Hrun

Fyrri færsla

Hræðslubandalagið sigraði í Frakklandi

Hræðslubandalagið sigraði í Frakklandi

Nýr forseti Frakklands verður Emmanuel Macron. Hann verður forseti vegna þess að þjóðin vildi hann ekki. Hann fór eftir leikreglunum og er því réttkjörinn útilokunar-forseti fólksins sem vildi hann ekki, en fékk hann samt, frekar en Blum, eins og hrópað var þegar sumir menn sögðu "frekar Hitler en Blum", sem þess utan var Gyðingur. Hitler var þá talinn berja hagsmuni þeirra betur á brjósti sér, svipað og Evrópusambandssinnar sjá nú sína hagsmuni marða gula og bláa á brjósti Macrons, sem einu vörnina fyrir þá gegn frönsku þjóðinni, sem örvæntir meira og meira um framtíð sína

Svo nú stendur Macron forseti fyrir þeim 3/4 kjósendum sem hefðu kosið Sósíalistaflokk Hollande en gerðu það ekki vegna þess að leiðtogar þess flokks brugðust kjósendum sínum. Þeir hræðslu-kusu því í síðari umferð þann sem þeir héldu að gæti komið í veg fyrir eitthvað. Macron er ekki þeirra maður í embætti, en hann er það samt. Sko til

Svo hræðslu-fékk hann í síðari umferð 1/3 hluta af kjósendum hægri flokks Repúblikana, sem brugðust kjósendum sínum líka, einu sinni enn. Þeir hræðslu-kusu Macron til að koma í veg fyrir eitthvað. Hann er alls ekki þeirra maður í embættinu, en er það samt

Og helming fékk hann í síðari umferð af kjósendum eins konar kommúnistaflokks hundrað prósent skatta, til að koma í veg fyrir eitthvað. Macron er alls ekki þeirra maður. En er það samt

Macron er því eftir síðari umferð orðinn réttkjörinn fulltrúi næstum allra sem eru til vinstri, en sem vildu hann helst ekki. Hægri hliðin er 80-prósent-ekki til í hinum nýja Macron-forseta. Og 12 prósent vildu ekki kjósa neinn og skiluðu auðu. Og extra 12 prósent, miðað við fyrstu umferð, vildu alls ekki kjósa neinn á borðstólum ESB-hirðarinnar núna, en sem kusu hins vegar í fyrri umferðinni

Svo mun koma í ljós hvernig forseta Stokkhólms-heilkenni síðari umferðar gengur að stjórna í Frakklandi. Mun þjóðin læra að elska þann sem hún vildi ekki en fékk samt?

Þarna var kosningakerfi "verkefni-óttans" að skila niðurstöðum. Henni verður að kyngja og virða, því þetta er það kerfi sem er, en sem mætir samt sívaxandi innvortis óánægju. Tekist hefur einu sinni enn að koma í veg fyrir að óskafulltrúi fólksins verði við völd. Og hinumegin þeirra landamæra þar sem 60-70 prósent Frakklandsmegin kusu Marine Le Pen, já þar fagna gul-bláir yfirmenn ESB-hirðarinnar ákaft í sínum búkner

Það er að segja í sjálfu Þýskalandi sem stofnað var til sem Sambandsríki-óttans -það var árið 1871 stofnað af Bismarck til að verjast samkeppni- já það ríki er enn að ryðja sér til rúms á meginlandi Evrópu. En vegna þess að það var stofnað sem Sambandsríki óttans, til að koma í veg fyrir samkeppni, þá varð það eina landið í veröldinni sem hýst gat Helförina hnökralaust. Og þannig er nú það. Slíkt er áhrifavald óttasamsteypunnar

Hindra verður, hvað sem það kostar, að þjóðarvilji nái fram að ganga. Þjóðaróviljinn hefur því náð fram að að ganga á meginlandi Evrópu, einu sinni enn. Og hann gengur í takt

Verður nú kosið aftur þangað til rétt niðurstaða fæst? - eða verður annað kölska-eyrað rifið af Marine Le Pen með hrossaklippum í pólitískri fegrunaraðgerð og hún sett í stað Macrons sem réttkjörin í forsetaembættið, eins og gerðist þegar Frakkar höfnuðu stjórnarskrá Evrópusambandsins 2005, en fengu hana yfir sig samt. Það efast ég um

Allir hljóta nú að sjá hvers vegna Evrópusambandið fékk friðarverðlaun Nóbels. Röksemdafærslan fyrir þeirri veitingu var cirka svona: Hermenn Hitlers börðust hart og af miklu hugrekki. En samt hlutu þeir lítinn heiður. Það var súrt fyrir þjóð þeirra og þá sjálfa, sem hetjur. En hugsið um þetta: hefðu þeir þrátt fyrir allt sigrað, þá er líklegt -og reyndar staðreynd- að þegar þeir loksins gátu snúið heim til fjölskyldu sinnar á ný, að sigur þeirra hefði þá þegar komið því til leiðar að búið væri að útrýma henni, er hinir hugrökku stæðu loksins sem hetjur á stofugólfinu heima. Evrópusambandið er -enn sem komið er- pappírsútgáfa þessa kerfis. Því verður að kála, áður en það kveikir í Evrópu. Frakkar hefðu átt að óhlýðnast siðferðilega ólögmætum skipunum ESB-hersins í gær, því þjóðarheimili þeirra er í húfi

Dauður Adolf Hitler er ennþá mikilvægasti stjórnmálamaður Evrópu. Og þetta lagast sennilega aldrei, því ónýtar stofnanir meginlandsins ráða för

Fyrri færsla

Algert vænghrun vinstrisins - og forsetakosningar í Frakklandi

Algert vænghrun vinstrisins - og forsetakosningar í Frakklandi

Mynd: Franski Stalínistinn Maurice Thorez, skólaforfaðir Emmanuel Macrons, var heiðraður sem andlit á sovésku frímerki. Hann kom sovéska Ecole Nationale d’Administration skólanum á laggirnar í Frakklandi eftir að hafða dvalið í Moskvu Sovétríkjanna árin sem fósturjörð hans Frakkland var hernumin, eyðilögð og plundruð af nasistum í of ákafri samvinnu við suma í París

****

Teknókratinn Emmanuel Macron gat ekki boðið sig fram til forseta Frakklands nema með því að dulbúa sig sem verandi "miðjumann" andspænis kjósendum. Staðan á vinstri væng stjórnmála Vesturlanda er orðin sú að sá vængur hangir ekki lengur uppi, heldur er hann dottinn af flugvélinni, sem er þjóðin

Það kom nefnilega í ljós þegar á þann væng reyndi, á flóknu og erfiðu flugi, að hann gat ekki gert upp við sig hvort að hann væri fastur við þjóðina sem pólitíska grunneiningu veraldar, eða hins vegar hvort að hann væri enn áfastur altarisstyttunni af Karli Marx, sem er guðfaðir alþjóðaisma vinstri vængsins. Vinstrið er því hrunið. Algerlega. Það er dottið af þjóðinni og þjóðarlíkamanum vegna þess að á altari vinstrimanna stendur ennþá styttan af Karl Marx - böðuð í reykelsi Kants

Á altari hægri vængsins stendur hins vegar þjóðin. Það gerir hún vegna þess að þjóðin er grunnpólitísk eining í veraldarhafinu. Og í þjóðinni eru einstaklingar. Hægri menn vita að þeir sem einstaklingar geta einungis verið frjálsir svo lengi sem þjóðin heldur áfram að vera þjóð. Einstaklingar eru og verða aldrei grunnpólitísk eining í veraldarhafinu. Aðeins þjóðin getur verið grunnpólitísk eining í því ógnar hafi. Þetta stendur í Gamla testamentinu. Og á því eru Vesturlönd byggð. Þess vegna kemur það fyrst tveggja í hinum Heilögu ritningum Vesturlanda. Á undan hinu Nýja

Í Bretlandi rís nú loksins hið langþráða "Nýja Ísrael" þjóðarinnar, sem John Lyly benti henni á er Biblían komst á tungumál fólksins *

Þegar vinstri vængurinn dettur af þjóðinni, þá verður hann að imperíalisma í formi Sovétríkis, Evrópusambands, Rómarríkis og Babýloníuveldis. Imperíalisminn og sú afbökun á frelsi einstaklingsins, festir sig síðan á heimsveldið, sem sá ismi sjálfkrafa smíðar til að líkja eftir þjóðinni. Og hann heldur að hann geti flogið. Það getur hann ekki, nema með því að drepa fæðingarfrjálsa einstaklingana um borð með ófrelsi og kúgun. Með því að gera þá að tölfræði. Svo hrapar allt draslið eins og það hefur árþúsundum saman ávallt gert. En fyrst kálar það milljónum manna. Milljónum og aftur milljónum manna

Þannig er nú það. Og þess vegna sagði Emmanuel Marcon í gærkveldi að Marine Le Pen boðaði í reynd borgarastyrjöld, kæmist þjóðin hennar loksins aftur til raunverulegra útslitavalda í Frakklandi. Hann sagði þetta, svo sérfróð vinstri jakkaföt sem hann er, án þess að gera sér grein fyrir því að einmitt hann, já hann, er hinn nýi aðall sem hangir orðið hæst við hún forsetahallar Élysée. Hann heimtar vernd fyrir sig og sinn nýja aðal. En fær hann vernd?

Marine Le Pen sagði þetta við kjósendur í gærkvöldi: "alveg sama hvernig kosningarnar fara, Frakklandi verður stjórnað af konu; annað hvort af mér, eða frú Merkel kanslara Þýskalands"

Franska byltignin hófst á því að skilgreina frönsku þjóðina. Skilgreina hverjir áttu að fá að vera í henni og hverjir ekki. Aðallinn átti ekki að vera með í henni, það var alveg klárt. Hann varð því ekki hluti af frönsku þjóðinni. Tikk takk, tikk takk. Nema hvað. Aðall er samt orðinn hluti af þjóðinni á ný. Hann heitir ESB og sjálfur ESB-Marx stendur nú á hæst á tilbeiðslualtari Macrons. Og enn er þessi Karl baðaður í reykelsi Kants. Þegar þjóðin loks fattar kjarna málsins, og ef engar horfur eru á að réttur búnaður sé á altarinu, þá verður ekki bara algert vinstra vængfall, því það er þegar orðið, heldur einmitt annað hvort borgarastyrjöld eða ný bylting

Þannig er nú það. Einu sinni klæddust vinstrimenn lopapeysum til að dulbúast í þjóðinni, samkvæmt tilsendri forskrift frá miðstjórn Sovétríkjanna. Í dag hanga þeir á þjóð okkar sem háskólamenntaður lúsafaraldur sérfræðinga og embættismanna. Þjóðin er að sligast undan þeim og þeir vita það vel. Enda er tilgangur þeirra sá hinn sami og síðast: að stúta þjóðinni. Meðvitað sem ómeðvitað

Geng ég hins vegar enn í ekta heimaprjónaðri lopapeysu og ullarsokkum til öryggis. Ullina fæ ég hjá Bjarti í Sumarhúsum, því með ískrandi íhaldssemi Ritninganna er hann kominn með 200 sjómílur, hitaveitur og stórar bræðslur málma. Hann er salt þjóðarinnar og fjárhirðir. Hann er fjárhirðarnir Abraham, Jakob, Móses og Davíð. Maður sem heldur hjörð sinni saman, en sundrar henni ekki

Í gærkveldi, fyrir franskar kappræður, suðum við því kjötbollur úr sauðahakki sveitar, með hvítkáli frá austan fjalls, kartöflum úr eigin garði, lauk í þjóðarsmjöri og rabarbarasultu úr sama garði. Ef á þarf að halda, verður þetta ískrandi étið til enda tímans, því hjörðinni er haldið saman

Stjórnmálamenn geta einungis verið stjórnmálamenn ef þeir vita hverjum þeir eru ábyrgir gagnvart. Forsætisráðherra Íslands og ríkisstjórn hans er ábyrg gagnvart íslensku þjóðinni, en ekki Þjóðverjum né neinum öðrum. Bara hann og stjórn hans er ábyrg gagnvart hinni íslensku þjóð og enginn annar . . meira hér: Staða mála í Evrópu og víðar: núna og næstu áratugi

****

* Sjá Yoram Hazony “On the National State Part 1: Empire and Anarchy". Lesið einnig Jerúsalembréfin hans

Fyrri færsla

Staða mála í Evrópu og víðar: núna og næstu áratugi

Staða mála í Evrópu og víðar: núna og næstu áratugi

Frans Páfi segir að Evrópa sé að falla í sundur. "Hver þjóð hefur rétt á að kjósa sér þá pólitísku leiðtoga sem hún vill" - segir hann. Hann er þarna að vísa til komandi forsetakosninga í Frakklandi

En málið þar er einmitt það, að fimmtánda stjórnarskrá Frakka og sem nú ríkir í Fimmta lýðveldi Frakklands síðan 1791, gefur frönsku þjóðinni einmitt ekki kost á því að kjósa sér þá pólitísku leiðtoga sem hún alveg endilega vill. Stjórnarskráin þeirra er með þann alvarlega innbyggða ágalla að hún talar um eins konar móral. Kosningar í Frakklandi ganga í reynd frekar, og of mikið, út á að koma í veg fyrir að eitthvað geti gerst, heldur en að stuðla að því að það sem þjóðin endilega vill, geti gerst. Hvað varðar þessar kosningar núna, þá er stjórnarskráin stór þröskuldur fyrir því að einmitt það sem Frans Páfi segir, geti yfir höfuð gerst, eins og fjöldi frambjóðenda stendur í dag og einnig margar síðustu kosningar. Það má að mörgu, en þó alls ekki að öllu leyti segja að kosningarnar séu frekar skilvirkt hræðslukerfi en hitt. Bæði til þings og forseta. En þetta er mál sem varðar Frakka sjálfa. Og vonandi er það einmitt bara þannig

Af ummælum Páfa sé ég að hann -þó svo hann segist ekki skilja frönsk stjórnmál- er vitur maður sem viðurkennir þjóðina sem pólitískan grunneiningar-hornstein Vesturlanda. Þetta fer mjög vel, því allir spáðu því að fyrirtæki hans, Kaþólska kirkjan, ætti ekki guðlegan né hvað þá heldur jarðneskan séns í Frakklandi eftir byltinguna. Að kirkjan hans yrði send til skiptaráðanda og gerð upp. En því var öðru nær. Frakkland komst af, af því að einmitt franska þjóðin ákvað að hún vildi ekki lifa án kirkjunnar sinnar. Og hvað varðar byltinguna sjálfa, þá er sennilega vonlítið að hún hefði getað myndast án frelsishugsjóna hinna Heilögu ritninga Vesturlanda, og reist þar af leitt burðarvirki hennar inn í framtíðina, samkvæmt einmitt hugsjónum þeirra

Evrópa er þó ekki að detta í sundur eins og Páfinn segir. Það sem hins vegar er að detta í sundur er niðurstaðan sem hugsuð var sem útkoman úr pólitískum dauða 100 milljón manna í Evrópu, frá 1914 til 1945. Þeir Evrópubúar dóu af pólitískum orsökum. Svipað gerðist einnig annars staðar á sama tíma. Í Sovétríkjunum gerðist þetta og í Asíu gerðist þetta líka. Þetta gerðist sem sagt á öllum landmassa Evrasíu, þ.e í öllum hinum gamla heimi, eða því sem næst

Niðurstaðan sem dregin var af þessu tímabili var sú, að draga þyrfti tennurnar úr þjóðunum og þjóðríkjum þeirra. Stofnanir á borð við Sameinuðu þjóðirnar og í dag um það bil hundrað aðrar alþjóðlegar alþjóða "alþjóðastofnanir" áttu að sjá um að þetta gæti ekki gerst aftur. Í Evrópu var gengið enn lengra því þar var stofnað yfirríkislegt fyrirbæri sem heitir Evrópusambandið, og sem í dag er sjálfstætt ríki yfir þeim ríkjum sem eru í því. Sambandið er þó ekki fullvalda enn, en unnið er dag sem nótt að því að dæla fullveldinu úr aðildarríkjunum og yfir í yfirríki Evrópusambandsins. Fullveldið getur nefnilega bara verið á einum stað í einu

En þetta kerfi alþjóðlegra og yfirríkislegra stofnana hefur þróast sér yfir höfuð, og það sem verra er, þessi fyrirbæri sem redda áttu málunum eru búin að klessukeyra heiminum svo rækilega á ný, að hann er að of miklu leyti orðinn sú stjórnlausa veröld sem Henry Kissinger varaði við fyrir áratugum síðan. Heimur á barmi stjórnleysis

Stjórnmálamenn geta einungis verið stjórnmálamenn ef þeir vita hverjum þeir eru ábyrgir gagnvart. Forsætisráðherra Íslands og ríkisstjórn hans er ábyrg gagnvart íslensku þjóðinni, en ekki Þjóðverjum né neinum öðrum. Bara hann og stjórn hans er ábyrg gagnvart hinni íslensku þjóð og enginn annar

Jóhönnu-stjórn Samfylkingar og Vinstri grænna reyndi að hlaupast undan þessum frumskyldum og sem þar að auki mynduðu sjálfan tilvistargrunvöll hennar. En hún var einfaldlega kosin burt fyrir vikið. Kosin burt vegna þess að það var hægt að kjósa hana burt. Og vegna þess að sá ófrávíkjanlegi réttur til frelsis er okkur tryggður með stjórnarskrá. Okkar stjórnarskrá. Hún var kosin burt fyrir að hafa brugðist þjóðinni í miklum erfiðleikum. Menn geta því rétt ímyndað sér hvað er í gangi í samsteypu 27 þjóða þar sem ríkisstjórnir flestra landa hafa á svipaðan hátt brugðist þjóðum sínum. Brugðist þeim á altari 1945-ályktunar, og sem þess utan var röng. Stjórnir sem ekki er hægt að kjósa burt vegna þess að sú næsta sem tekur við, er einnig á pikkföstum mála hjá ESB. Algerlega sjálfkrafa og án endurnýjanlegs umboðs fyrir því að svo sé og eigi að vera

Stjórnmálamenn geta einungis verið stjórnmálamenn ef þeir vita hverju þeir eiga að stjórna en ekki stjórna. Og vita hverja þeir eiga að vernda og hverjum þeir eiga að sýna hollustu. Viti þeir þetta ekki, þá breytist það sem þeir eiga að stjórna í einmitt það sem við okkur blasir í Evrópu. Þar hefur Evrópusambandið breytt Evrópu í einn allsherjar suðupott. Þar hefur eitt Evrópusamband skapað stjórnlausar kreppur á sviði pólitísks lögmætis ríkja, rústað efnahag þjóða, lagt í eyði framtíð heilla kynslóða og rænt þær mannsæmandi framtíð - og einnig skapað tilvistarkreppur sem ekki er hægt að komast út úr án þess að drepa sjálfan sig í leiðinni

Mest öll niðurstaðan sem dregin var af tímabilinu 1914 til 1945 var þessi: Hún átti að koma í veg fyrir að þetta eða hitt gæti gerst:

a) Evrópusambandið varð and-þjóðlegt (e, anti nation) og þar með andlýðræðislegt. Það átti að koma í veg fyrir X. Sambandið er antí. Þetta hefur tekist. Evrópa sambandsins er að hrynja, eins og Frans Páfi bendir á. Evrópa er á leið niður en ekki upp

b) NATO var and-sovéskt fyrirbæri og ætti þar með að vera hætt störfum í dag. Það var antí. Sovétið er horfið, þökk sé NATO, en þó mest Bandaríkjunum. Endurskilgreina þarf því hinn stofnanalega tilgang NATO og tilvistargrundvöll þess ef það á að halda áfram. Það segi ég vegna þess að það hefur aldrei verið hægt og verður aldrei hægt að halda Rússlandi saman nema með harðri hendi, hvort sem okkur líkar það eða ekki. Landið er svo landfræðilega varnarlaust að annað mun aldrei ganga upp nema á miklum velsældartímum, sem sjaldgæfir eru vegna einmitt þessarar staðreyndar. Þess vegna þurfum við að hlúa að Rússlandi í stað þess að þjarma að því. Til eru leiðir til þess og þær heita sameiginlegir hagsmunir. Þjóðir hafa nefnilega hagsmuni en ekki vini

Sameinuðu þjóðirnar höfðu þó vit á -sennilega mest vegna þátttöku Bandaríkjanna í það skiptið- að setja inn í stofnsáttmála þeirra að sú stofnun snérist algerlega um samvinnu sjálfstæðra og fullvalda þjóða. En jafnvel alþjóðaista-elítur heimsins hafa náð að grafa undan þessu lögmæti Sþ að miklu leyti

Það hafa alltaf verið til þjóðir og það verða alltaf til þjóðir. Þeir sem neita þessu afneita hornsteinum mannlegrar tilveru. En "þjóðernishyggja" er hins vegar pólitískt heiti á nýrri hugmyndafræði í bókum. Því tilbúna hugtaki úr bókaskápum var svo klesst á þjóðina, til þess eins að ná fram ákveðnum og fyrirfram gefnum niðurstöðum, og í ákveðnum pólitískum tilgangi. Það heiti og hugtak er alveg nýtt í sögunni. Og einnig það nafn, var að miklu leyti búið til til þess að koma í veg fyrir eitthvað. Horft var í bakspegilinn þegar það var búið til

Það virðist vera svo, að einungis í Bandaríkjunum hafi menn -já við erum öll menn- haft vit á því að stofna pólitíska einungu í veraldarhafinu sem að mestu gengur alls ekki út á það að hindra eitthvað, heldur til að stuðla að einhverju. Eins og til dæmis frelsi manna og að skapa þeim jafna möguleika á að sækjast eftir hamingju. Fyrir fyrst og fremst sig sjálfa og sína, en ekki aðra

Allir vinna gegn öllum í Evrópu undir hatti útþvældrar lygi um "samvinnu". Evrópusambandið vinnur gegn NATO, því það vill draga þjóðar tennurnar úr ríkjum Austur-Evrópu, sem lífsnauðsynlega þurfa á þeim að halda í glímunni við Rússland. Þýskaland og Frakkland þola ekki sterka Austur-Evrópu, því það þýðir að þau tvö missa völd og vægi í Evrópusambandinu, sem þau þykjast eiga. Allar þær aðfarir ESB að Austur-Evrópu sem við sjáum í dag, eru vegna þess að Evrópusambandið þolir ekki að stjórnmálamenn þeirra landa séu fyrst og fremst ábyrgir gagnvart sínum kjósendum, en ekki öðrum. ESB þolir ekki að þær stjórnir séu ekki eins og Jóhönnu-stjórnin var, fyrst og fremst ábyrgar gagnvart Evrópusambandinu en ekki þjóðinni

Sameining Þýskalands þýddi endalok þeirra skilyrða sem Evrópusambandið gekk að, gagnvart kjósendum Frakklands á sínum tíma. Frakkland hefði ekki samþykkt ESB með sameinað Þýskaland innanborðs í dag. Þetta vita franskir kjósendur vel og þeir finna það ítarlega og ótvírætt á sinni eigin sál og líkama

En Vestur-Evrópa skiptir ekki lengur máli. Það er Austur-Evrópa sem skiptir öllu máli. Það er þar sem hlutirnir munu gerast í Evrópu í framtíðinni. En í heildina séð er tími Evrópu liðinn. Fimm hundruð ára áhrifavaldatímabili hennar í heiminum er lokið. Flest ef ekki allt mikilvægt í framtíðinni mun verða ákveðið í Washington. Og þannig mun allur heimurinn verða skrúfaður saman hin næstu mörg hundruð árin. Gamli heimurinn er búinn að vera

Evrópusambandið og alþjóðastofnanir geta ekki breytt heiminum. Þær eru heldur ekki sérlega gagnlegar, og sjá: kjarnorkuvopn hér - og kjarnorkuvopn þar. Það eina sem Þýskaland á eftir er að koma sér upp kjarnorkuvopnum. Það er landinu óheimlit samkvæmt "alþjóðlegum" samningum. En allir vita hvernig farið hefur fyrir svoleiðis samningum þegar á reynir. Hvort að Þýskaland verði á undan Íran, Taívan, Suður-Kóreu og Japan eða öfugt, skiptir ekki máli, því Þýskaland er með borgaralega kjarnorku. Það tæki landið því ekki nema frá sex mánuðum til tveggja ára að gera sér öruggt, fullhert og skilvirkt vopn úr henni. Landið er það tæknilega burðugt. Enginn gæti komið í veg fyrir það. Þýskaland er miðflóttaaflið sem er að tæta Evrópu og það snýst ávallt um ótta, því það var stofnað af ótta - við samkeppni. Það er hræðslubandalag

Það sem skiptir máli í framtíðinni er þjóðin. Og það sem skiptir öllu máli fyrir þig er hvar þú ert fæddur sem maður. Og þannig á það að vera, því það býr til þau betri stjórnmál að stjórnmálamenn viti hvert hlutverk þeirra er. Annars geta þeir ekki stjórnað neinu, en þeim sjálfum mun hins vegar verða stjórnað af öðru; þ.e. engu. Eins og Evrópa er í dag

2008 breytti öllu. Ef við hefðum ekki haft fullveldið, þá værum við búin að vera í dag. Ríkin í ESB hafa ekki fullveldi og þau eru því í algerlega stórkostlegum vandræðum níu árum síðar. Fyrir þær þjóðir skipti 2008 öllu máli. En fyrir okkur og Bandaríkin var 2008 hins vegar ekki óyfirstíganlegt áfall. Við höfðum fullveldið og þjóðfrelsið og gátum því sparkað fulltrúum ófrelsisins út

Meira að segja utanríkisþjónusta Páfagarðs veit meira um utanríkisviðskipti Norður-Kóreu en ESB veit um sjálfa Evrópu. Heimsveldi Evrópusambandsins er þannig að það veit ekki neitt. Það er því að enda. Það fæddist á röngum forsendum og það er því ennþá fætt í gær

Franska byltignin hófst á því að skilgreina frönsku þjóðina. Skilgreina hverjir áttu að fá að vera í henni og hverjir ekki. Aðallinn átti ekki að vera með í henni, það var alveg klárt. Hann varð því ekki hluti af frönsku þjóðinni. En nú stendur nýr ESB-aðallinn hins vegar svo gott sem hæst við hún á fánastöng Élysée í dag. Frakkar vita vel að þannig getur Frakkland þeirra ekki gengið lengur. Komandi kosningar skipta þar engu um. Ekkert getur lengur stöðvað upplausn Evrópusambandsins

Við skulum halla okkur að ofureflinu. Og það er bara í Vestri. Það er það eina sem mun skipta öllu máli í framtíðinni. Ofureflinu á réttum stað. Á stað sem gengur út á að stuðla að frelsi manna

Washington 1. desember 1862
Abraham Lincoln um Bandaríki Norður-Ameríku

“the last best hope of earth”

- og þetta gildir enn

Fyrri færsla

Sigur: skilaboð til fimmflokksins: Ákvæðið um þjóðar­at­kvæði fallið úr gildi!