Leita í fréttum mbl.is

Bloggfærslur mánaðarins, ágúst 2010

Hver nema forsætisráðherra Íslands segir svona

Jóhanna Sigurðardóttir forsætisráðherra segist hafa íhugað að segja sig úr íslensku þjóðkirkjunni. Hver nema einmitt þessi forsætisráðherra Íslands segir svona? Það gerir enginn í heiminum nema núverandi forsætisráðherra Íslands. Enginn annar segir svona.

En þá segi ég. Það myndi sennilega blíðka þjóðina nokkuð ef Jóhanna léti verða af því að segja sig úr þjóðkirkjunni okkar. Þjóðkirkjan sjálf myndi ekki líða meiri skaða en þegar er orðið og sjálf myndi Jóhanna ekki verða verri en hún er nú þegar. Það er hreint ótrúlegt hversu fjandsamleg Jóhanna er í garð þess sem íslendingum er hve heilagast; landið okkar, fullveldi þess og hins andlega hornsteins samfélags okkar. Fyrrum félagsmálaráðherra ætti manna best að vita í hverra fótspor sagan fræði hana. 

Hætt er við að ekki muni standa steinn yfir steini þegar loksins þessi ríkisstjórn Íslands verður búin að ljúka sér af við að rústa íslensku samfélagi niður í rætur. 

A face saving device

Enn er unnt að bjarga andlitinu. Komið er óhagganlega í ljós að Samfylkingin í ríkisstjórn hefur logið að þjóðinni. Það sama gildir sennilega um marga Vinstri græna í ríkisstjórn.
 
Sendiför fulltrúa Alþingis til Brussel, undir skammbyssuhlaupi Samfylkingarinnar gegn Vinstri grænum, er ennþá hægt að stöðva á meðan höfuðið er enn á herðum þeirra sem töpuðu vitinu úr því ofan í einn bolla af Café Latte í Brussel gegn því að lofa þeim sem greiðslu afhendingu á fullveldi Íslands fyrir minna en ekki neitt. 

Ísland á ekki í viðræðum við Evrópusambandið. Verið er hinsvegar að innlima Ísland inn í Evrópusambandið án vitundar þjóðarinnar og þingheims. Öguðum lygum og falsi er beitt í besta anda Evrópusambandsins. Svona fer flest fram innan þeirra lokuðu landamæra. 
 
Hér er hægt að sjá sönnunargögnin; Egill Jóhannson: Það er rétt hjá Jóni Bjarnasyni að ESB aðlögun Íslands er hafin - skoðið sjálf skjöl Evrópusambandsins sem Egill vísar á.  Skoðið einnig bloggfærslu Haralds HanssonarÞað er bannað að segja satt

Andlitsbjörgunartækið (a face saving device) fyrir Ísland heitir makríll. Hann er hægt að nota til að pakka saman og segja bless við Brussel. Þar næst þarf að koma liðinu heim í eiðsvarna yfirheyrslu hjá stofnunum íslenska lýðveldisins. Ekki verður tekið milt á þessu forherta bortferli.
 
Ennþá er þó hægt að bjarga andlitinu íslenska og enn er hægt að útskýra málið fyrir umheiminum með því að kalla aðlögunarliðið heim á teppið þar sem þeim verður ákveðin viðeigandi refsing og makleg málagjöld eftir miklar yfirheyrslur. Svo þarf að ljúka málinu með því að henda markíl í hausinn á yfirgangsstofninum í Brussel. Makríl já.  
 
Það myndi blíðka þjóðina nokkuð ef forsætisráðherrann segði sig svo að lokum úr íslensku þjóðkirkjunni - okkar.  
 
Fyrri færsla
 

Fasteignaverð á Spáni og Þýskalandi mun lækka um 75% á næstu 40 árum.

BIS Demographic impact on housing 
 
Kæri lesandi. Hvað veist þú um öldrunarhagkerfi? Lítið sem ekki neitt, datt mér í hug. Það er skiljanlegt því þú býrð svo sannarlega ekki í öldrunarhagkerfi. Íslendingar eru ekki svo heimskir og búa sér til gelt og ónýtt Evrópusambandslegt samfélag. 

Hvernig heldur þú að þingkosningar fari fram í löndum þar sem 60% kjósenda eru yfir sextugt? Hvaða málefni skyldu verða efst á baugi í bæjarstjórnar- og þingkosningum í svoleiðis hagkerfum? Ný barnaheimili eða atvinnumöguleikar ungs fólks? Hærri barnabætur eða betri skólar? Hærri laun, lægri skattar, framfarir og nýsköpun?

Hvernig heldur þú að hlutabréfamarkaður sé í öldrunarhagkerfum? Bíður hinn stóri heimur eftir því að geta fjárfest í hrynjandi samfélögum sem einungis geta boðið ungu fólki upp á að bera margfaldar skattbyrðar á við heilbrigð samfélög? Hver vill fjárfesta í efnahagslegum elliheimilum með örfáum ungum manneskjum innanborðs? Hver vill flytja til svoleiðis samfélaga? Masókistar eða framfarasinnað fólk? Íslendingar? Össurar?  

Hvernig heldur þú að hagvöxtur verði í öldrunarsamfélögum? Verður hann yfirþyrmandi sterkur eða mun hann hverfa alveg og aldrei koma þar aftur fyrr en eftir þau 500 ár sem það tekur að snúa öfugum aldurspíramídanum við á ný. Aldurspíramídanum sem nú borar sig ofan í höfuð og pyngju yngra fólks í Evrópu. Mun þetta hvetja þær fáu ungu manneskjur sem eftir eru til orkufrekari framkvæmda í svefnherbergjum sínum? Eða mun unga fólkið frekar kjósa með fótunum, þ.e.a.s ef það getur það? 

Hvernig heldur þú að það standi til með launahækkanir og kaupmátt í öldrunarhagkerfum? Hvernig skyldi annars standa á því að raunlaun Þjóðverja eru lægri í dag en fyrir 12 árum? Hvernig skyldi standa á þessu? Af hverju er smásala sú sama í Þýskalandi í dag og hún var fyrir 15 árum? Hvað er að?

Hvernig heldur þú að fasteignamarkaður sé í öldrunarhagkerfum? Heldur þú að það verði yfirgnæfandi eftirspurn eftir nýju eða notuðu húsnæði? Heldur þú að byggingameistarar standi á öndinni af hrifningu yfir glæsilegum framtíðarhorfum í svona hagkerfum? Heldur þú að það verði ojbarasta svo svakalega skemmtilegt að selja húseignir sínar í öldrunarhagkerfum? Og verðið svo rosalega frábært og ávöxtun eiginfársins maður. Þetta verður hreint ævintýralegt. Gróðinn endalausi. Meðal sölutími 10-20 ár? Allt verður bara að gera sig?

Allt þetta hér að ofan mun auðvitað verða þess valdandi að svona markaðssvæði mun vaða í peningum erlendra fjárfesta og hrikalega sterkt lánstraust ríkissjóða í hrynjandi skattagrunni mun að sjálfsögðu laða alþjóðlega peninga að á hlægilega lágum vöxtum hvaðanæva úr heiminum. Fjármálaheimurinn er nefnilega svo alþekktur fyrir hafa brennandi áhuga á að fjárfesta í deyjandi eignum. Það er bara svona.

Já, þetta verður einmitt bara svona. Bank for International Settlement (BIS = banki seðlabanka heimsins) segir í nýrri skýrslu að fasteignaverð á Spáni muni ekki bara falla heldur hverfa um 75% fram til ársins 2050. Og hvaða ástæðu skyldi nú bankinn koma með, af hverju á þetta að verða svona slæmt á Spáni? Jú öldrun væni minn. Enginn hefur viljað svo lengi og vill enn síður nú um daga fæða börn inn í þetta deyjandi samfélag. Framtíðarhorfur samfélagsins eru svo hörmulegar. Spánn er orðið öldrunarhagkerfi. Það sama segir BIS um þýska fasteignamarkaðinn, 75% lækkun þar á næstu 40 árum í viðbót við þá 20% lækkun sem þar hefur orðið á síðustu 15 árum. Og það sama er að segja um Grikkland - og það sama um heimaland mafíunnar í ESB,  Ítalíu. Í Portúgal mun verðið lækka um tæplega 90% á þessu sama tímabili. Glæsilegt. Bætið svo við allri Austur Evrópu og þá fáið þið út paradís Samfylkingarinnar, sjálft Evrópusambandið. Æ hve gott það verður að vera bundinn við rafmagnslausan ljósastaur Evrópusambandsins. Þetta verður auðvitað algerlega hið eina sanna framtíðar markaðssvæði íslensks atvinnulífs. Eftirspurnin verður hreint geggjuð. 

Þeir sem hafa áhuga á að ganga í Evrópusambandið hljóta annað hvort að vera haldnir kvalarlosta eða fáheyrðri heimsku og fávisku. Sennilega er þetta sama liðið sem hélt að það gæti gengið á vatninu frá Álfhóli til Skjaldborgar 101. Var það ekki einmitt það sem utanríkisráðherra Íslands sagði; að hann hefði ekki hundsvit á fjármálum samfélagsins. Jú, það var hann.
 
Hin eina óendurnýjanlega náttúruauðlind Evrópusambandsins er fólkið sjálft. Ég vona að það sama gildi um Samfylkinguna. Nú ætlar Samfylkingin úr Álfhóll að ganga á vatninu alla leið inn í skjaldborg Evrópusambandsins. Til sjálfrar þjóðgeldingarmiðstöðvar Evrópu í Brussel. 
 
 
 
Fyrri færsla
 

Byggt á veikustu stórmynt veraldar: evrunni

Hvað var það sem fékk heimsmarkaðinn til að missa fullkomlega trú á Grikklandi, Írlandi og Spáni. 

Það var fyrst og fremst sú staðreynd að löndin hafa ekki lengur neina sjálfstæða mynt og enga stjórn á eigin peningamálum. Þau eru því orðin efnahagslegar nýlendur.

Í reynd og sannleika eru þessi lönd því ekki sjálfstæð ríki lengur. Það veit markaðurinn. Þess vegna bregst hann svona við. Nýlendur eru ekki góðir pappírar og verða það aldrei. Það er fullveldið sem býr til lánstraustið og trúverðugleikann.  

Löndin þessi eru því orðin ótrúverðug. Svona er að missa fullveldi sem þjóð í eigin landi. Það kostar. Í lengdina kostar missir sjálfstæðis og fullveldis þjóðirnar hina mikilvægu velmengun sem býr til velferðina handa þegnunum. Því kynntust Íslendingar í 700 ár. Þannig er að missa fullveldið. Þá er það bara fátæktin, ölmusan og ánauð sem bíður. 
 
Ríkisstjórn Samfylkingar og Vinstri grænna þrýstir Íslandi inn á veginn til ölmusu, fátæktar og ánauðar í Evrópusambandinu. Ég mótmæli því harðlega.  
 
 
Fyrri færsla
 

Niðurlagningarverksmiðja lýðræðis í Evrópu hefur þegar tekið til starfa á Íslandi

Þetta  er allt hið ömurlegasta mál. Samfylkingin og Vinstri grænir eru komnir í landráðalegt brask og með lýðræði og fullveldi lýðveldis okkar sem stofnað var fyrir aðeins 66 árum. Gersamlega án samþykkis þjóðarinnar og í algerri andstöðu við vilja hennar. Nú eru þessir tveir flokkar að grafa undan því sem forfeður okkar börðust svo hart fyrir svo lengi. Þökk sé þeim getum við átt bjarta framtíð í okkar eigin fullvalda ríki. Svei þessu upplýsta skítapakki sem leggur svona út í að eyða því sem vannst með svo miklu erfiði. 

En það er einmitt svona sem flest fer fram í Evrópusambandinu. Lýðræðinu er fórnað fyrir útópíuverk skammsýnna stjórnmálamanna og kjósendum er alltaf sagt að ekki sé hægt að vinda ofan af "ferlinu". Þetta mál er allt hnýtt þannig saman. Þetta flokkast óhjákvæmilega undir landráðastarfssemi og hefur hún farið svona fram í Evrópu áratugum saman. Sjaldan er sannur vilji þjóðanna á bak við neitt og oftar en ekki eru þjóðirnar ekki spurðar að neinu.  

Hér VERÐUR Alþingi að grípa í taumana og sjá til þess að innlögn Íslands inn á einkasjúkrahús Samfylkingarinnar í Brussel verði stöðvuð og dregin fullkomlega til baka. Við höfum engan áhuga á þurfa að þramma helsjúkan evrópskan stofugang með þýsk/franskar styrjaldarhækjur á fíflagangi doktors Össurar Ötkers Skarphéðinssonar á einkasjúkrahúsi Samfylkingarinnar í Brussel.  

Nú þarf að stöðva þennan taumlausa og leynda yfirdrátt ríkisstjórnarinnar strax. Henni er ekki treystandi fyrir bankabók þjóðarinnar. Það sjá allir.
 

mbl.is Ný staða í ESB-málinu með „aðlögun“ í stað umsóknar
Tilkynna um óviðeigandi tengingu við frétt

70% atvinnuleysi í boði ESB

Í 25.000 manna skipasmíðabæ Grikklands eru um 70% íbúanna atvinnulausir. Skipin eru send til Tyrklands því mynt Grikklands er ónýt. Hún heitir evra og er gengi hennar nú statt á tunglinu fyrir friðinn í Evrópu.
 
Skattatekjur gríska ríkisins eru hratt fallandi og að þorna upp þrátt fyrir skattahækkanir. Um 9% af landsframleiðslu landsins fara í að greiða vexti á nýjum lánum sem fara í að borga vextina á gömlu lánum ríkisins. Verslanir fara unnvörpum á hausinn því neytendur eiga svo fáa evrutunglpeninga. Kaupmáttur launþega er hruninn aftur til ársins 1984. Atvinnuleysingjar hafa ekki efni á heilbrigðisþjónustu því leyniþjónusta ESB hefur komist að sannleikanum um efnahag Grikklands. Ekki er hægt að fá atvinnuleysisbætur lengur en í eitt ár. Verkföll og ófriður blasir við. Grikkland er nefnilega á skurðarborði Evrópusambandsins. Það er í miðju boðinu. Í pakkanum. 

Ríkisfjármála varðsveitir friðarbandalags Evrópusambandsins hafa sem kunnugt er steypt sig sjálfar niður við skrifborðin í fjármálaráðuneyti Grikklands. Í gríska forsætisráðuneytinu situr nú í rafmagnsstól þessa friðarbandalags maður nokkur sem samkvæmt skírnarvottorði ESB kirkjunnar heitir Mr Papadependencyfreelunchopoulos. Hann er því miður dauður núna. Hann dó inni í ESB. Í boðinu hjá ESB. AGess komst líka með í boðsveitina.     

Óvitarnir á þýska blaðinu Der Spiegel eru með nýja grein um hrakfarir Grikklands í myntbandalagi Evrópusambandsins. Þennan sprungna þýska spegil ætti ritstjórn blaðsins að nota til að grandskoða hvaða áhrif stanslaus 12 ára innvortis gengisfelling þýska elliheimilisins hefur haft á efnahag Grikklands undir sérsaumuðum þýskum stýrivöxtum seðlabana Evrópusambandsins. Væri ritstjórn þýska spegilsins þessa umkomin þá myndi hún uppgötva hvert peningar Grikkja hafa farið á þeim árum sem Grikkland hefur verið læst inni í myntbandalagi Evrópusambandsins - alltaf á raunstýrivöxtum sem allan tímann hafa verið neikvæðir miðað við verðbólgu gríska hagkerfisins. Jafnvel börn geta reiknað út hvað gerist þegar peningar kosta minna en ekki neitt. 

Sem sagt; eftir 29 ár í ESB er Grikkland bust. Geri aðrir betur. 
 
  

Átakanleg blinda eða forheimska Evrópusambandssinna?

Því er oft haldið fram af ESB-sinnum að Evrópusambandið snúist um samvinnu þjóða hinnar styrjaldarhrjáðu og þreyttu Evrópu. Já þreytt er þessi heimsálfa sem nú hnignar hraðar en hagstofustáss Brussels nær að tilkynna almenningi í löndum sambandsins. Að allt þetta bákn sem rakið er hér að neðan snúist bara um samvinnu. Eins konar samvinnu, samyrkju, samskotum eða sameiginlegu hinu og þessu. En sem á endanum, ef ESB fær að ráða, mun auðvitað enda með samruna og þögulli eyðni þjóðareinkenna Evrópu í faðmi nýrra kynslóða. Nýrra kynslóða sem aldnar hafa verið upp í vöggu áróðursherdeila Evrópusambandsins. Fjármagnið til áróðurs er þar óendanlegt.
 
Veikastir fyrir áróðri Evrópusambandsins eru nýjar kynslóðir sem þekkja ekki neitt annað en þann massífa ESB-áróður sem þeim er kenndur frá blautu barnsbeini. Skyldumyndin af góðgerð ESB sem límd er í formi búmerkis ESB föst upp á veggi við allar mjólkurkistur og eplakassa á öllum þeim barnaheimilum Evrópusambandsins sem náðarsamlegast hafa fengið leyfi hjá Brussel til að deila út ókeypis ESB-eplum eða niðurgreidda ESB-mjólk (innflutt bannað) handa börnum. ESB er nefnilega svo gott. Ætlast er til að unga kynslóðin muni þetta þegar hún vex úr grasi þjóðríkisins og inn í ESB-baunagras Evrópusamrunans. Munið mín kæru börn eftir ESB-merkinu á vegginum við eplamjólkina sem varð að koma alla leið frá Brussel því landið þitt var orðið svo ofur-sjálfstætt á veru sinni í ESB.      

Þessu sama var þó - og alveg fram í rauðan dauðann - haldið fram um flest þau ríki sem á sínum tíma tilheyrðu Sovétríkjum Evrópu. Þar - samkvæmt öllum Fylkingarmönnum, flestum Samfylkingarmönnum og undantekningarlaust öllum kommúnistum í ytra byrði þáverandi lygavefstóls stjórnmála- og menningarelítu Evrópu - átti allt að vera svo gott í þessu sambandi ríkja kommúnista í Austur-Evrópu. Þegar valdinu nakta var beitt með kúgun, aftökum, pyntingum og útrýmingu, þá kallaðist það á vesturlandi menningarelítu Evrópu að verið væri, alveg rétt í þessu, að tryggja friðinn í Evrópu - og reyndar heiminum öllum. Tryggja friðinn! Þetta fékk maður að heyra þegar nánar var spurt til tíðinda. Alltaf var þetta alveg að koma, árangurinn var bara rétt handan við hornið hvassa.

Aðferðirnar í Evrópu hafa verið mýktar í dag. En að öðru leyti eru hvatirnar og áróðursaðferðirnar ennþá svipaðar. Lýðræðinu skal ennþá drekkt í Evrópu. Og alltaf er útópían við það að ganga upp og árangurinn er ávalt rétt handan við hornið endalausa, sem smá saman breytist í grátmúr. Nú seinast hafa menn skyndilega uppgötvað að myntbandalag Evrópusambandsins getur því miður ekki gengið upp nema að ríkisfjárlög hinna svo kölluðu ofur-sjálfstæðu ríkja sambandsins verði sameinuð og sett undir vald ókjörinna Evrópusambandsmanna Brussels, eða í það minnsta, að aðalstöðvar sambandsins verði settar sem æðsti dómari yfir því hvernig skattatekjum ríkjanna skuli varið hvað varðar mikilvægustu útgjaldaliði ríkissjóðs. Þið vitið kæru lesendur; skattatekjurnar eru þeir fjármunir þegnana sem í flestum löndum sambandsins nema allt að helmingi þjóðartekna í ríkjum sambandsins. 

Þegar betur er að gáð, munu allir sem hafa viljann til að sjá og skilja, að þarna er bara um að ræða sára einfalt innvortis valdarán ESB í dulargerfi samvinnunnar. Fullveldinu og sjálfstæðinu er stolið og það skorið undan þjóðunum í smá skömmtum. Það fer svo í farveg niðurfalls og eyðist. Hornsteinninn er holaður með reglugerðum og skrefum sem þjóðfélagslega er ógerningur að vinda ofan af aftur.  

Hefur þú einhvern tíma séð svo kallaða "samvinnu" þjóða sem krefst eftirfarandi atriða?: 

  • Hertra og hærri tollamúra gegn umheiminum
  • Eigin myntar
  • Afnám réttar þjóðríkja til að gefa út sína eigin mynt
  • Skilyrðislausrar þvingunar til að hætta útgáfu eigin myntar og skyldu til að taka upp mynt sem þú hefur ekkert um að segja
  • Eigin seðlabanka
  • Undirgangast vaxta- og peningapólitík erlends seðlabanka sem leggur efnahag lands þíns í rúst, þ.e. ef þú heitir ekki Þýskaland eða Frakkland.
  • Eigin dómstóla og löggjafar sem er æðri löggjöf svo kallaðra "fullvalda ríkja ESB" á æ fleiri sviðum
  • Óteljandi áróðursherdeilda sem einnig ráða yfir fjölmiðlum
  • Þings og þingmanna
  • Forseta og utanríkisráðherra
  • Eigin stjórnarskrár
  • Eigin lögreglu
  • Eigin komandi hervalds
  • Rétt til að nýta auðlindir annarra þjóða
  • Réttar annarra þjóða til að kjósa sig til auðæfa annarra landa
  • Fána
  • Þjóðsöng
Hér er ekki um samvinnu að ræða. Hér er verið að stofna nýtt ríki: sambandsríki Evrópu, USE.  
 
Eftir 25 ára búsetu og atvinnurekstur í Evrópusambandinu hef ég þetta að segja kjánum Íslands, sem nú eru að reyna að notfæra sér hræðslukastið sem kom þeim svo afar heppilega þegar illa reknar fjármálastofnanir hrundu á Íslandi:

Það er núna sem ferlið á að stöðva. Það er of seint að stoppa öll ferli sama hvaða nafni þau nefnast þegar inn í Evrópusambandið er komið. Þá væri, hægt en bítandi, Ísland okkur glatað. Þetta er ekki pakkaleikur. Landið okkar er í húfi.
 
Tengt
 
 
Fyrri færsla
 

Feilnóta í fimmtu rúgbrauðssymfóníu Evrópu

Ögmundur Jónasson alþingismaður og fyrrverandi heilbrigðismálaráðherra gaf út sitt eigið heilbrigðisvottorð á meðan hann gat. Vottorð sem gerði honum kleift að yfirgefa gaukshreiður Samfylkingarinnar í gegnum aðaldyr skjaldborgarvirkis ríkisstjórnar Íslands gegn fólkinu. Þaðan út er erfitt að sleppa.

Í grein í Morgunblaðinu leyfði Ögmundur sér að framkvæma hljóðprufu á fimmtu rúgbrauðssymfóníu Evrópu, sem nú er flutt af 120.000 manna þokulúðrasveit hins rísandi stórríkis Evrópu, sjálfu Evrópusambandinu. Um 500 milljón Evrópubúar eru skyndilega og algerlega óafvitandi orðnir aðnjótandi forystu forseta sem þeir hafa ekkert fengið að segja um, né heldur þeirrar nýju stjórnarskrár sem gerði kjör þessa manns mögulegt. Stjórnarskráar sem dregin var sem járntjald yfir hausa 500 milljón manns. Geri aðrir betur. 

Þessi svo kallaði forseti 500 milljón undirsáta Evrópusambandsins var "kjörinn" af tveimur jáurum og nokkrum smápeðum þeirra í kvöldverðarboði í Brussel. Þessi forseti sem enginn í Evrópu kaus ritaði því sem nokkuð næst áróðursgrein í Morgunblaðið. Þá lagði hvítan reyk upp frá gaukshreiðri skjaldborgarinnar á Íslandi. Nákvæmlega eins og gerðist þegar forsetinn var "kjörinn" af lítilli valdaklíku undir kvöldverðinum fræga í Brussel. Nú tónar þessi þokulúður rúgbrauðstónverk sitt í Morgunblaðinu.   

Áður hafa í Evrópu verið leiknar kommúnistasymfónían, nýlendustefnan, nasisminn, og fasisminn. Fjögur evrópsk tónverk fram í alla fingurgóma. Fimmta tónverkið heitir Evrópusambandið. Allir vita hvernig tónverk Evrópu enda. Lýðræðinu skal alltaf fórnað fyrir hina fáu og útkoman er alltaf nýr ófriður, ný fátækt og nýjar hörmungar. Fyrir vikið hnignar Evrópa í hægfara endalokum hins fyrrverandi af öllu fyrrverandi í þessum heimi.    

"Leonard Shapiro ritaði um Sovétríkin að “hið sanna markmið áróðurs er ekki að sannfæra né hvað þá að telja fólki trú um eitthvað. Nei, hið sanna hlutverk áróðurs er að búa til heilsteyptan jafnsléttan opinberan jarðveg þar sem fyrstu sprotar hugsana trúvillinga munu birtast sem brak og brestir mishljómsins. Í nótnabók Evrópusambandsins eru ósamhljóma raddir ekki liðnar."
 
Þetta ritaði efnahagslegur ráðunautur fyrrverandi forsætisráðherra Bretlands í grein í Wall Street Journal: hér er greinin í íslenskri þýðingu minni. Þarna var verið að draga lambhúshettu evrópska járntjaldsins yfir hausa Íra: Derek Scott: Sannleikurinn um efnahagsmál Írlands
 
Fyrri færsla
 
 

Varðandi Seðlabanka Íslands: merkilegt en samt skiljanlegt

sedlabanki_logo2
Kröfur og væntingar almennings til Seðlabanka Íslands virðast á öllum sviðum vera margfalt meiri og strangari en kröfur og væntingar almennings voru og eru enn til Fjármálaeftirlitsins og sjálfs Forsætisráðuneytis Íslands. 

Seðlabanki Íslands er í huga Íslendinga afar mikilvæg stofnun og hlutverk hans er stór hluti af sjálfstæði og fullveldi Íslands og þjóðarinnar allrar. Sjálfstæð mynt Íslands hefur unnið kraftaverk og komið Íslandi inn í efstu sæti velmegunar og velferðar í heiminum. Án sjálfstæðrar myntar hefði þetta ekki verið hægt.

Þetta vita allir Íslendingar, innst inni. En sumir þeirra neita þó að læra að lifa með þá galla sem fylgja kostunum. 

Evrópsku viðbrögðin við feilnótum kapítalismans eru vel þekkt: kommúnismi, fasismi, nasismi, uppreisn frá miðju, sænsk leið(indi) og nú seinast hið nýja stórríki Evrópu sem er að verða fullsmíðað og sökkklárt í skipasmíðastöð Brussels. ESB-Titanic mun sigla fjórðu leið Evrópu til fjandans - og sökkva þar. 

Ef Seðlabanki Íslands væri niðri í skúffu í Frankfürt þá myndi enginn Íslendingur gera neinar kröfur til hans - og heldur ekki til skúffudeildar þeirrar sem leysir þar upp fullveldi og sjálfstæði Íslands sem annara ríkja Evrópu í þjóðslökkvivökva Evrópusambandsins. Þá væruð þið fyrst illa stödd sem vélarvana rekald á heimshöfunum. 

Mitt ráð til Íslendinga er því þetta; látið ykkur þykja vænt um Seðlabanka Íslands. Mitt ráð til íslenskra stjórnmálamanna er þetta; reynið að gera Seðlabankanum kleift að auka velvild almennings í garð þessarar mikilvægu stofnunar fullveldis okkar. Ekki þurrka af skítugum skóm ykkar yfir á Seðlabankann og ekki þröngva honum upp í horn með vanhæfni ykkar. Nánar hér; Seðlabankinn og þjóðfélagið  
 
Fyrri færsla
 

Ragnar Arnalds hafði rétt fyrir sér

Á síðasta ári sagði Ragnar Arnalds í viðtali við endurvarpsstöð Evrópusambandsins á Íslandi, RÚV, að þeir væru ekki að standa sig. Að Ríkisútvarpið starfaði ekki í sátt og samkvæmi við rekstrarheimild þess um óhlutdrægni  - sem er tilverugrundvöllur ríkisrekins RÚV. 

Ég er meira en sammála Ragnari Arnalds. RÚV er að því komið að ýta sér sjálft út úr þeim böndum sem réttlæta ríkisrekstur. RÚV er nánast orðið einkafjölmiðill ESB á Íslandi - á kostnað þjóðarinnar.

Hverjir sem yfirmenn yfirmanna EÚV eru á Íslandi: hvað ætlið þið að gera í þessu? Af hverju er þetta orðið svona? Af hverju er þetta liðið?

Og hvernig stendur á því að 8 af hverjum 10 fréttamönnum RÚV eru rauðir? Hvernig stendur á því?


mbl.is Formaður LÍÚ: Ummæli slitin úr samhengi
Tilkynna um óviðeigandi tengingu við frétt

Næsta síða »

Höfundur

Gunnar Rögnvaldsson
Gunnar Rögnvaldsson

Búseta: Ísland.
Reynsla: 25 ára búseta í ESB og fyrirtækja-rekstur í DK/ESB frá 1985 til 2010. Samband:
tilveraniesb hjá mac.com

Ég er hvorki skráður á Facebook, Twitter, Linkedin né á neinum öðrum "félags-vefjum". Aðsetur skrifa minna er einungis að finna hér á þessari síðu og á tilveraniesb.net og í blöðum og tímaritum

Bloggvinir

Innskráning

Ath. Vinsamlegast kveikið á Javascript til að hefja innskráningu.

Hafðu samband