Angela Merkel kom skríðandi til Póllands

Fyrir kosningar lét hún höggin dynja á Póllandi. Og ef Pólland væri á evrum þá væri komin krísa í peningamál landsins. En svo er ekki, þökk sé sjálfstæðri mynt Póllands

En svo komu þýskar kosningar og þar tók það kanslarann heila esb-pólitíska miðöld að mynda nýja ríkisstjórn. Þar lafir persóna hennar nú á tíu atkvæða meirihluta í kanslaraembætti. Það var því lágreist Merkel með blauta púðurdós í vasa sem kom til Póllands á fyrsta erlenda stoppi hennar sem endurkjörin, ef litið er burt frá Lotharinga-ferð hennar á biðstofuna í París

En hvað er hún að gera til Póllands? Jú hún vonast til að Weimar-þrennan geti veitt henni pólitískt vogarstangarafl gegn þýska miðflóttaaflinu sem er að tæta Evrópusambandið í tætlur. Hún vonast til að þrennan -Frakkland, Þýskaland og Pólland- geti orðið vettvangur fyrir pólitískan stuðning við UHU-límtúbuna sem hún er að reyna kreista síðustu endurlífgunartilraunina á Evrópusambandinu upp úr. Vonast er til að Pólland geti kallað önnur ríki Austur-Evrópu með í örvæntingar-hoppið ofan á límtúbunni

Ekkert land í Evrópu er eins háð Evrópusambandinu og Þýskaland. Hinn svokallaði "innri-markaður" er efnahagslegt einka öryggis- og nýlendusvæði Þýskalands (e. buffer-zone). Án þess er efnahagur Þýskalands búinn að vera, því það verðmætasta sem til er á Vesturlöndum í dag er eftirspurn. Hana hefur Þýskaland alls ekki

Það hefur þó ekki enn físað inn hjá Merkel að Pólland, en ekki Þýskaland, er á leið að verða ný-mikilvægasta ríki meginalands Evrópu. Sá skilningur kemur síðar, með flugpóstinum frá Washington, því talandi hausar Þýskalands segjast geta samþykkt Rússland upp að landamærum Póllands. Og svo er það Nord-stream leiðslan sem keisari Merkel er vel hugsanlega að kveikja í Úkraínu með og þar með Póllandi líka

Mánudaginn 25. apríl 2005 sagði Vladímír Pútín að hrun Sovétríkjanna hefði verið "stærsta pólitíska katastrófa 20. aldarinnar". Þessi fyrrverandi agent KGB sagði þetta í ávarpi til þingsins. Og það er ekki tilviljun að þessi forseti Rússlands skuli hafa komið úr röðum KGB-manna. Rússlandi hefur alltaf verið haldið saman með þannig "öryggis-apparati". Ekkert annað afl en leyndur og ljós terror getur haldið Rússlandi saman sem ríki

Hvað hugsar maður sem sér fall Sovétríkjanna sem stærstu pólitísku katastrófu 20. aldarinnar. Já það er nú það. En ef forseti Rússlands héti ekki Pútín í dag, þá héti hann bara öðru nafni, en Rússland væri samt alveg eins; þ.e. Rússland, byggt á rússneskum hefðum

Fyrri færsla

ESB hefur þrjá daga til að forðast viðskiptastríð

ESB hefur þrjá daga til að forðast viðskiptastríð

Donald Trump er þessa dagana að hlusta á vol og væl sendinefndar Þýskalands með Brussel-hatta á höfðunum í betliferð til Washington. Óðir hattarar ESB hafa nú þrjá daga til að komast hjá viðskiptastríði við Bandaríki Norður-Ameríku

Þýskaland er með 9 prósent af landsframleiðslu í viðskiptahagnað við umheiminn. Það er stærsti hagnaður í heiminum í krónum og aurum talið og klafi á bæði heiminum sem og öðrum esb-ríkjum, og langt fyrir ofan það sem sáttmálar esb heimila. Nema á Rússlandi. Þar er smá útflutningsplús fyrir Rússland vegna rússnesku orkunnar sem Þýskaland er algerlega háð. En útflutningur Þýskalands til Rússlands hefur samt og þrátt fyrir svo kölluð "höft" vaxið svo að hann er nú á pari við það sem var árið 2007. Þessi útflutningur Þýskalands til Rússlands tryggir að sérhver samstaða Þýskalands með Stóra-Bretlandi og Bandaríkjunum er aðeins í orði, en ekki á borði. Enda er rúmur meirihluti Þjóðverja hlynntur frekari nálgun Þýskalands við Rússland, á sama tíma og 82 prósent Þjóðverja hræðast Donald Trump, en aðeins 44 prósent segjast hræðast Pútín hinn Góða

Ef ESB gengst ekki að tollaáformum Trumps á stál og ál og þrengingum að Kína, þá skellir hann tollum á alla bílaframleiðslu ESB-ríkjanna. Og ef Donald Trump á yfirhöfuð að skoða hinn afar slæma málstað ESB-landanna, þá þurfa þau fyrst að leggja skothelda áætlun á borðið fyrir framan hann, yfir hvernig þau sem NATO-ríki ætla að mæta NATO-sáttmála-skuldbindingum sínum um að þau leggi tvö prósent af landsframleiðslunni af mörkum til varnamála. Bandaríkin borga 70-75 prósent af varnarútgjöldum NATO, en meginland Evrópu næstum ekkert

Þetta geta ESB-ríkin auðvitað ekki, því þau eru ófullvalda efnahagslegir krypplingar og færu í þrot ef þau ættu að verja sig sjálf. En kannski Rússland geti aðstoðað Þýskaland við að klæða sig í svona eins og einn drullusokk eða svo. Hver veit. Hver veit hvenær Þýskaland tryllist á tollunum og reiknar sig aftur austur. Svar: það veit enginn

Þeir sem trúa ekki eiturefnaárás upp á Rússland, eru annað hvort með hlátursgaslögn í heilann eða sjá sýnir, þó svo að rjúkandi sannanir skorti. Það er bara ein ástæða fyrir því að Vladímír Pútín er forseti Rússlands núna; 1a. hann er hvorki væskill að nafni Mikhail Sergeyevich Gorbachev, né 1b. volæðingurinn Boris Nikolayevich Yeltsin. Pútín er það sem menn óttast. Og þess vegna er hann einmitt forseti Rússlands. Hann er það sem rússneska fólkið óskar sér; Varðstöðumaður Rússlands sem menn taka mark á. Fjórar innrásir úr vestri gleymast ekki svo hratt. Rússland er ekki hvaða ríki sem er og verður það aldrei. Það verður aldrei eins og menn í vestri óska sér að það sé. Eins gott er að horfast í augu við þá staðreynd og standa sig á verðinum gagnvart Rússlandi, því annars fer illa. Þeir einu sem staðið geta þá vakt eru Bandaríkin, saman með vissum löndum Austur-Evrópu

En eins og er, hefur Rússland aðeins efni á lyklaborðs-aðgerðum, hersýningu í Sýrlandi og pólitískum púðurdósamat. Ef olíuverðið hefði ekki hrunið, þá hefði Rússland nú þegar haft efni á Úkraínu. En efnahagsstaðan núna er sú, að það er rétt svo að Rússland hefur efni á að niðurgreiða olíuna til Hvíta-Rússlands um 2,5 milljarða dali á ári, undir heimsmarkaðsverð. Og meira að segja rússneskt dagblað kvartar yfir því "tekjutapi" rússneska ríkisins

Fyrri færsla

Spái Sjálfstæðisflokknum 34 prósent fylgis í næstu kosningum

Spái Sjálfstæðisflokknum 34 prósent fylgis í næstu kosningum

Upptaka í gær: Ávarp formanns hefst á tíundu mínútu

****

Landsfundur Sjálfstæðisflokksins er settur. Bjarni Benediktsson, leiðtogi flokksins, setti fundinn í gær og krafðist áframhaldandi fulls og óskerts fullveldis Íslands, stundvísi og aga. Ferming og fullfermi Íslands er í gangi. Hún stendur yfir og bát Bjarna verður ekki ruggað. Hann kemur heill til hafnar og landar fullfermi í næstu kosningum, vegna þess að aðgát var höfð í nærveru afla. Staðfast og með varkárni siglir hann fullfermi Sjálfstæðisstefnunnar í land. Rugg er ekkert, því þungt er haldið um stýrið og stefnufesta á stíminu skilar aflanum heim

 

Áfram með róðurinn kæru Sjálfstæðismenn. Róið Íslandi heim!

 

Happafley Íslands: Sjálfstæðisflokkurinn

****

 

Fyrri færsla

Hver er munurinn á viðbrögðum Bretlands og Berlín-Brussel við efnavopnaárás?

Hver er munurinn á viðbrögðum Bretlands og Berlín-Brussel við efnavopnaárás?

Stutta svarið er; gas og orka. Bretland er ekki háð Rússlandi í orkumálum. Berlín-Brussel er háð Rússlandi í orkumálum

Lengra svarið er það; að Lundúnir líta öðrum augum á Moskvu en Berlín-Brussel, vegna þess að Lundúnir nota ekki sama kíkirinn á utanríkismálin og þann sem meginlandið notar. Kíkir meginlandsins er blindur á öðru auganu gagnvart Moskvu á meðan kíkirinn í Lundúnum sér hlutina með báðum augum, þ.e. eins og þeir eru

Lundúnir sjá það sama í kíkinum og Washington sér nú, eða frá og með 2008, þegar heimurinn sem búinn var til 1945 og 1991, hrundi til grunna og Moskva byrjaði að flæða út yfir landamæri sín. Nokkuð sem stjórnarskrá Gamla testamentis Biblíu Vesturlanda bannar. Og sem merkilegt nokk gerðist þegar Rússland flæddi inn í Georgíu aðeins fjórum vikum áður en banki Lehmansbræðra féll og hélt Vesturlöndum uppteknum við hrun alþjóðavæðingar og Evrópusambands. Þar samstilltust utanríkismála-sjónaukar engilsaxneskra manna og eru samstilltir enn

Lincoln forseti gefur Grant hershöfðingja fyrirmæli

London ætlar ekki að sökkva til botns með Evrópusambandinu og Donald J. Trump er kominn í stað glóballar í Hvíta húsið og hefur kveikt þar á glóðarperum Edisons aftur. Þaðan koma nú glóbellir fljúgandi út um gluggana, með glóbalista-merkið þrykkt fast á afturendann, með þrus prenttækni Trumps. Utanríkisráðherra Tillerson kom út um norðurgluggann í fyrradag og þrír aðrir glóbellir komu upp um skorsteininn sem Lincoln notaði áður en Grant hershöfðingi, standandi við hinn sama arin, en þá forseti, gerði þá skyssu árið 1871 að óska Þýskalandi til hamingju með vegferðina upp á "veginn til lýðræðis", en sem endaði hins vegar með engu lýðræði, heldur með 150 milljón manna líkhúsi meginlands Evrópu, undir lúmskum formerkjum stjórnarfarslegrar alræðisástar, þar sem stjórnmálin eru þjóðnýtt, eins og þegar hefur gerst í Evrópusambandi og Rússlandi. Hin, að því er virðist, erfðafræðilega arfleið stór-meginlands Evrópu og rugludalla þess í "stjórnmála-vísindum" virðist vera orðin óafturkallanleg stökkbreyting á Evrópu, sem er næst minnsta heimsálfa veraldar og skagi út úr tröllauknu meginlandi Rússlands

En Skotar kusu sem betur fer að halda afturendanum á Bretlandi lokuðum og Lundúnir þurfa því ekki að óttast um líf sitt vegna samninga Skota við glötun úr austri. Slíka samninga geta Skotar ekki gert svo lengi sem Bretland er stjórnarfarslegt heimsveldi Anglo-American-arfleiðar Íhaldsmanna. Og svona til að kilta forvitni þeirra sem eitthvað muna, þá gerðu Stóra-Bretland og Pólland með sér varnarsamning um síðustu jól kristinna manna, eftir að DJT hafði blessað Varsjá og tekið sér sæti undir Hamrinum. Í leiðinni og til frekari útskýringar er hægt að geta þess að Kanada fær að vera sjálfstætt ríki vegna þess að afturendinn á því er lokaður með Monró úr ís. Annars væri það land hluti af Bandaríkjum Norður-Ameríku. Og Québec fær leyfi til að tala frönsku vegna þess að Bandaríkin eru með afturendann á Kanada lokaðan. Annars væri Québec á ensku

Pútín Rússakeisara vantar nú bráðnauðsynlega sem flesta óvini sem líta út fyrir að vera að eyðileggja komandi kosningar þann 18. þessa mánaðar. Þar verður Pútín endurkjörinn, eða næstum því sjálfkjörinn. En hann vantar þó lífsnauðsynlega sjálfa kjörsóknina. Hann vantar alveg lífsnauðsynlega að geta sýnt fram á vissa lágmarks kjörsókn fyrir sig og einnig þá sem fyrirfram ákveðið er að tapa muni kosningunum. Því án kjörsóknar á Pútín á hættu að vissir menn í Vestri geri grín að kosningunum með því að segja að hann sé ekki lögmætur keisari Rússlands. Fregnir um að nemendum hafði verið mútað með hærri einkunnum ef þeir kjósi, berast til dæmis frá Tatarstan

Kjörsókninni má þoka upp með því að sýna kjósendum, svo ekki verður um villst, hvað gerist með þá sem kjósa alls ekki. Að því leytinu koma fregnir af efnavopnaárás á þá sem svíkja, sér vel. Með þessu er ég ekki að fullyrða að keisarinn standi að baki árásinni á Bretlandseyjar, það veit ég ekki með vissu. En hún kemur sér óneitanlega vel. Moskva hefur þegar gefið út yfirlýsingar um að engilsaxneskir séu að reyna að eyðileggja komandi endurkjör rússneska keisarans

Rússland Pútíns stendur afar veikt núna. Efnahagurinn er slæmur og keisarinn ræður þar litlu um, því söluverð orkunnar er svo lágt á heimsmarkaði og hernaðarútgjöldin eru að sliga rússneska ríkið í þeim aðstæðum. Það var einmitt þessi baneitraða blanda sem dró Sovétríkin til dauða. Og þegar Sovétríkin féllu, þá féll um leið sovéski-múrinn gegn vestrænum áhrifum og lýðræði, frá Balkanskaga til Indlands. Við bráðnun þess múrs fór íslam yfir í eins konar jökulhlaup og er þar enn. Ferðalag rússneska keisarans Pútíns til Sýrlands var því sett á svið sem Potemkin-alþjóðlegur áhrifamáttur Rússlands fyrir kosningar á heimavelli. Það var gert til að reyna að halda rússneskum kjósendum við þá mikilvægu hugsun að atkvæði þeirra skipti enn máli í kosningunum næstkomandi sunnudag. Þetta er svona, því keisarinn og hirð hans óttast ekkert meira en þann hrylling að kjósendur missi trúna á hið pólitíska kerfi Rússlands. Og ef þeir kjósa ekki, þá þýðir það að kjósendur hafa misst trúna á hina pólitísku hugmynd sem heitir Rússland. Síðast þegar það gerðist þá féll keisarinn og kommúnistar komust til valda og gerðu byltignu. Þetta gerðist svo aftur þegar þeir misstu völdin vegna þess að fólkið hafði ekki lengur trú á hinni pólitísku hugmynd sem hét Sovétríkið. Kjörsóknin er því aðalatriðið hér. Hana verður að pína upp, því annars er allt og meira til í stórkostlegri hættu fyrir Rússland sem ríki

Gerist þetta aftur núna, eða á næstu árum, sem er alls ekki ólíklegt, þá getur rússneska þjóðin þó enn leitað til Rétttrúnaðar-kirkju Krists, því hún er þjóðkirkja og gufar ekki upp eins og keisari og Sovétríki. Og vert er að geta þess að á bréfsefni patríarks hennar stendur enn prentað heimilisfangið Konstantínópel, sama hversu hátt og mikilvæg Moskva gnæfir yfir öllu

Þetta er staðan núna. Stórríki í upplausnarferli með fimmtán þúsund kjarnorkuvopn innanborðs, er lítið til að hlægja að

Fyrri færsla

Hverjir fengu best borgað fyrir að sjá inn í framtíðina?

Hverjir fengu best borgað fyrir að sjá inn í framtíðina?

• Stjórnmála- og embættismenn
• Háskólar
• Fjölmiðlar
• Sérfræðingar
• Bankar
• Seðlabankar
• Lögfræðingar
• Hagfræðingar
• Viðskiptafræðingar
• Fjárfestar
• Félagsfræðingar
• Borgarstjórar
• Bæjarstjórar

****

Allir áttu það sameiginlegt að hafa verið í háskólum. Næstum án undantekninga. Þar voru allir þessir verðlaunaðir fyrir að hugsa þráðbeint í þráðbeinum línum. Þeir komu því út úr háskólunum með þá sannfæringu að þeir væru gáfaðir og snjallir. Og þaðan gengu þeir í hópinn sem fékk best borgað fyrir að sjá inn í framíðina. Fóru á þing, fóru í bankana, fóru í ráðuneytin og háskólana. Þeir fóru í allsherjar gáfna-think-tank þeirra sem hugsa eins. Þeir sáu ekkert, gátu ekkert og geta ekkert enn. Á þessa leið sagði Írinn David McWilliams á SIC ráðstefnunni um daginn (Strategic Investment Conference)

En launin fá þeir enn. Og það eina sem þeim dettur í hug í dag er að kalla þá populista sem eru ekki í gáfumannafélagi þeirra

Heimsstyrjöldin fyrri skall á. Rétt á undan hafði öllum verið sagt að slíkt ætti ekki að geta gerst, vegna þess hversu "samofin viðskipti" á milli landa væru orðin í Evrópu. Bretland varð næstum undir vegna fríverslunar. Engu mátti muna

Svo skall Heimsstyrjöldin síðari á. Það átti heldur ekki að geta gerst vegna þess að Þýskaland átti jú að vera búið að vera. Enginn sá neitt, nema Winston

Svo skall Kalt stríð á, því hálf-sovéskir háskólar gáfnafélags Vesturlanda héldu að Sovétríkin væru eins konar Sameinuðu þjóðir embættismanna. Og þeir menn gátu ekki haft rangt fyrir sér, var það nokkuð? En aftur var það samt íhaldsmaðurinn Winston sem vissi betur og sagði svo í litlum bæ í Missouri fylki Trumans

Svo féllu Sovétríkin þráðbeint ofan á gáfumennafélag Vesturlanda. Þau féllu beint ofan á háskólana. Þráðbeint. Enginn sá neitt koma. Ekki einu sinni viku fyrir fall þeirra

Og svo hrundi yfirríkislegt Evrópusambandið og alþjóðavæðingin haustið 2008 og eru enn að hrynja. Ekkert múkk heyrist úr útvarpsturnum háskólanna. Þvert á móti, útvarpsstjórarnir ganga áfram í Viðreisn og Samfó

Síðan er Donald Trump kosinn til valda, og þá, já þá veit turnspíruveldi gáfumannafélagsins loksins hvað er að gerast, eða svo halda þeir. Þeir klína merkimiða á ófögnuðinn og á honum stendur popúlismi (lesist: ekki einn af okkur). En þeir vita samt ekkert enn. Hah ha ha ha. Þeir halda að málið snúist um "alþjóðleg viðskipti" (prump) og nokkur prósent til eða frá í landsframleiðslunni (meira prump). Þetta er sprenghlægilegt, hah ha ha ha

Það eina sem dugar við svona varanlegri vitskerðingu er að lækka launin, eða loka háskólunum. Það er því lítið undarlegt við það að stuðningur við háskóla sem menntastofnanir meðal Repúblikana, sé kominn undir fimmtíu prósentin. Því miðað við háskólana í dag var Kaþólska kirkjan þegar orðin Apollo-11 á miðöldum

En þetta hafa ungir drengir þegar séð. Þeir sjá að háskólarnir eru að mestu orðnir að hellum á heiði hundheiðinna frummanna, en nú með blúndum og bróderuðum gardínum fyrir gluggunum. Gluggatjöldin eru komin aftur

Fyrri færsla

Auðlegð þjóðanna

Auðlegð þjóðanna

 

Mynd; Bandaríska varnarmálaráðuneytið. USS Carl Vinson (CVN-70) varpaði akkerum í Víetnam þann 5. mars, 2018. Þetta er fyrsta slík heimsókn frá lokum Víetnamstríðsins 1975. Eitt stykki af öllu strategískt mikilvægu hjá mesta þjóðríki mannkynssögunnar, kostar minnst einn milljarð dala. Millistéttin er burðarstólpinn

****

Já, Adam Smith skrifaði Auðlegð þjóðanna. Hann skrifaði hvorki Örbyrgð Sameinuðu þjóðanna né Fátækt Evrópusambandsins, því hann vissi að auður gæti aðeins orðið til hjá þjóðum. Þess vegna heitir bókin Auðlegð þjóðanna. Auðlegð getur aðeins orðið til meðal þjóða. Þær einar hirða um sitt fólk og sinn auð. Þeir sem vilja þjóðirnar og þjóð-ríki þeirra feig, nota auð þeirra til að kaupa sér völd til að tortíma sinni eigin þjóð. Það sést ágætlega á til dæmis Viðreisn þessa dagana, sem er á leið út úr þjóðinni, en sem krefst þess að fá auð hennar sem pólitíska skiptimynt með sér í ferðatöskunni, til að kaupa sér inn völd hjá þeim sem hugsa eins. Viðreisn vill þannig eignast verndara valda sem tortíma auðlegð þjóðanna

Fyrri færsla

Tollar: Aðeins fyrsti áfanginn segir Donald J. Trump

Tollar: Aðeins fyrsti áfanginn segir Donald J. Trump

Hvíta húsið: Forseti Bandaríkjanna leggur tolla á tvo málma í gær

****

Efnahagsaðgerðir Donalds Trump forseta Bandaríkjanna halda áfram og tollur á innflutt stál og ál sem hann setti á í gær, eru aðeins fyrsti áningarstaðurinn á langri leið, sagði hann. Hér er ekki um að ræða aðgerðir sem hægt er að bera saman við þá tolla sem til dæmis Ronald Reagan og Bush hinn fyrsti gripu til á innflutta málma í tíð þeirra sem forsetar. Báðir voru sannfræðir og "trúðu" á "frjálsa verslun" sem kenningu. Og til að sanna sig sem verandi á varðbergi gagnvart því sem nú hefur kallað Donald Trump til valda, og sem mistókst því hrapallega, þá skelltu þeir tollum á til að sannfæra bandaríska kjósendur um að fríverslun í þeirra höndum væri ekkert sem óttast þyrfti. Þeir væru mjög svo á verði. Sextíu þúsund horfnum verksmiðjum síðar, er mönnum ljóst, að þeim var einmitt ekki treystandi í þeim efnum. Þeir voru ekki á verði

Í síðustu færslu nefndi ég að Bandaríkin væru að mínu mati að enda hlutverk sitt sem endurreisnarveldi heimsins og hafi frá og með 2008 farið inn í sitt eigið endurreisnartímabil, sem hófst með kjöri Donalds J. Trump veturinn 2016 í forsetaembættið. Sumum hefur kannski þótt þetta hjákátleg staðhæfing, því það er að sjálfsögðu ekki hægt að endurreisa það sem aldrei hefur áður verið. Bandaríkin voru ný af nálinni og byggja varð þau upp algerlega frá grunni. En það er nú samt ekki rétt, því að sjálft stjórnarfarið sem komst á og sem sigraði og byggði síðan upp öflugasta og voldugasta þjóðríki mannkynssögunnar, var ekki nýtt af nálinni. Það stjórnarfar kom frá Englandi og hét Íhaldsstefna (Conservatism). Það sem flestir kalla Bandarísku byltinguna frá 1765 til 1783, var ekki bylting, því að um endurreisn var sannarlega að ræða, dregið af þeirra tíma enska hugtaki sem þýddi "revolve". Enska orðið "revolution" er það þegar jörðin hefur lokið eins árs göngu sinni um sólu. Engu hefur verið kollvarpað, heldur var stjórnarfar Íhaldsmanna endurreist í Norður-Ameríku. Málið hafði ekkert með byltingu að gera, þó svo að kollvarpandi og niðurrífandi byltingaröfl Líberalista væru vissulega til staðar. Málið sem þetta tímabil í Bandaríkjunum snérist um, var sjálf endurreisn þess frelsis og réttinda sem stjórnarskrárbundin og þingræðisleg ríkisstjórn Englands hafði skaffað Englendingum, frá og með Sir John Fortescue (1394–1479) og John Selden (1584–1654), sem eru brautryðjendur Íhaldsstefnunnar. Bygging Bandaríkjanna frá Abraham Lincoln 1861 til Calvin Coolidge 1929, var næstum því að öllu leyti sjö áratuga verk forseta Bandaríkjanna sem allir nema tveir voru Repúblikanar - og þar með Íhaldsmenn. Strax um aldamótin 1900, aðeins tæplega fjörutíu árum eftir borgarastyrjöldina, var helmingur alls þess sem framleitt var í heiminum, framleiddur í Bandaríkjunum. Aldrei í mannkynssögunni hafði annað eins afrek sést - og það var stjórnarfarinu að þakka. Stjórnarfari Íhaldsmanna með Biblíuna sem hornstein

Donald J. Tump er þannig Íhaldsmaður. Á hann virka ekki rök eins og þau að viðskiptastríð sé "skaðlegt". Því þau rök svara til að krefjast þess að vagninn sé spenntur fyrir hestinn og ferðalagið hefjist innan tíðar, ... sannið þið til, aðeins er um tímabundið ekkert-mjakast að ræða. Donald Trump hugsar ekki þannig. Stríð verður ekki nema að menn berjist á móti því sem hann var kosinn til að gera. Gott og vel, látum þá viðskiptastríðið koma, hugsar hann, en ég mun vinna það. Ég ætla að sigra. Og það mun hann gera, því hann hefur svo litlu að tapa, en hinir mestu. Það mun því verða viðskiptastríð og það mun kosta efnahagslegt blóðbað. Patton sem las í Biblíunni "hvern einasta helvítis dag", hefði sagt að markmiðið væri að láta andstæðinginn um að kála sér fyrir sinn málstað. Og þannig mun það verða. Nema að menn úti í heimi þegi og bíti endurreisn Bandaríkjanna í sig og viðurkenni að hún er þeim sjálfum fyrir bestu. En hér eru þó vissar undantekningar á og flestir vita hverjar þær eru

Það var ekki af tilviljun sem Bretar fengu Winston Churchill, en meginland Evrópu fékk hins vegar Stalín, Hitler, Mussolini, Sovétríki, DDR og ESB. Og án Bandaríkja íhaldsmanna og Winston Churchill, hefði íslenska öldin þá orðið allt önnur en hún varð 1944

Fyrri færsla

Bandaríkin á leið úr endurreisnar-hlutverki

Bandaríkin á leið úr endurreisnar-hlutverki

Wilbur Ross viðskiptaráðherra Donalds Trump, segir að tímabilið frá 1945 sé liðið og að fyrir höndum sé að vinda ofan af því. Þann 4. mars síðastliðinn sagði hann:

- - - 

"Frá lokum Síðari heimsstyrjaldar höfum við [Bandaríkin] einliða gefið og veitt allskonar ívilnanir. Í byrjun var sú stefna sennilega af hinu góða ... ívilnanir sem til dæmis sanngjarnt var að veita Þýskalandi og Japan 1945, en sem ekkert vit er í að veita lengur", sagði hann. "Þessi lönd standa sterkt, eru þróuð hagkerfi og þarna er mikið af sögu [history] sem þarf að vinda ofan af"

- - -

Þetta fellur að þeirri skoðun minni að Bandaríkin séu að enda hlutverk sitt sem endurreisnarveldi heimsins og hafi frá og með 2008 farið inn í sitt eigið endurreisnartímabil, sem hefst með verkstjóranum Donald Trump 2017

Heimurinn allur er því að renna inn í nýtt enduruppsetningartímabil sem hefst með, já hverjum öðrum en Donald Trump Bandaríkjanna og Brexit Stóra-Bretlands

Síðast tók það Repúblikana sjö áratugi forseta úr flokknum að koma Bandaríkjunum úr rústum borgarastyrjaldar og í það að vera öflugasta framleiðsluveldi sem mannkynið hafði nokkru sinni séð. Tímabilið hóst með Abraham Lincoln 1861 og verkið stóð klárt þegar Calvin Coolidge yfirgaf Hvíta húsið 1929

Endurreisn Bandaríkja Norður-Ameríku er hafin. Og ekkert smá stykki mun koma út úr henni

Fyrri færsla

Vísindafélagið Vanþekking fær á sig drit

Vísindafélagið Vanþekking fær á sig drit

Kapítalista-skipafjélag James Onedin á leið í gúano: Þá vissu flestir menn meira en þeir vita í dag. Til dæmis stöðu sína á hnettinum

****

Uppgötuvar vísindafélags Vanþekkingar fékk á sig brim í síðustu viku. Í vari sínu við Háballaröngstræti sósíalismans, skullu milljón og hálf mörgæsa á félagsmönnum og drituðu þá í kaf. Einber "feluleikur", segir vísindafélag Vanþekkingar. Hlutabréf félagsins féllu samt og halda áfram að falla (sjá "stór-frétt")

Vísindafélagið Vanþekking býður öllum safnaðarmeðlimum góðan dag, og farsæls heimsendis (veit ekki hvort deila ætti því orði götunnar sem "heim-sendist" eða "heims-endis", en deilið því samt)

Krjúpið og meðtakið orð götunnar

Fyrri færsla

Róm sendir Brussel löngutöng

Fundu óvænt faldar mörgæsabyggðir

Róm sendir Brussel löngutöng

Ítalía

Flokkar andsnúnir pólitískum elítum ESB-aflanna komu sitjandi ríkisstjórn Ítalíu frá völdum um helgina. Allt er í steik á Ítalíu. Evran hefur rústað efnahagnum. Atvinnuleysi er enn langt fyrir ofan það sem evran særði fram 2008. Fjármála- og bankakerfið er í molum og 16 prósent útistandandi lána eru enn í öndunarvél, heimili og fyrirtæki geta ekki greitt af þeim. Engin börn fæðast. Kaupmáttur er lægri en fyrir 10 árum og borgin Róm er að verða gjaldþrota og Vatíkanið svitnar. Ríkið skuldar 130 prósent af þeirri tapsgefandi landsframleiðslu sem hægt er að kreista fram, eða 2,8 billjóna skuldaklafa í evrum sem landið ræður engu um. Atvinnuleysi meðal ungs fólks er yfir 30 prósentur. Landið er að rifna í tvennt. Norðrið vill ekki lengur "niðurgreiða" suðrið og Katalóníustemming bankar á dyr sem engar eru, því gargandi skríll og glæpasamtök á mannætustigi flæða frá hafinu yfir landið, samkvæmt 1930 Brussel-sáttmálareglum um endurtekið helvíti í Evrópu. Fóru því kosningarnar eins og þær fóru. Fólk hefur fengið nóg - og það nóg fer greinilega hratt vaxandi

Það styttist í Mexíkó, með sína níu drepna stjórnmálamenn í hverjum mánuði, samkvæmt nýlegri skýrslu Etellekt og sem því þorir ekki einu sinni að gefa upp heimilisfang sitt, en hvers áreiðanleiki hefur fengist staðfestur. Skýrslan kom út á meðan gargandi Hollywood skríll úr plasti, með 500 byssu-vopnaðan múr í kringum sig, gaf helmingi minna skít í Trump en á síðasta ári, en sem 20 prósent færri Bandaríkjamenn nenntu að fylgjast með í imbakassa bransans. Lægsta Oscars-áhorf nokkru sinni

Þýskaland

Þýskir sósíaldemókratar (SPD) samþykktu um helgina að fara í stjórn með flokki Angelu Merkel í bunker. Það gerðu þeir af ofsahræðslu við nýjar kosningar, þar sem flokkurinn myndi líklega þurrkast algerlega út úr pólitísku landslagi Þýskalands. Fylgi SPD mældist aðeins 15 prósent í síðustu viku, sem svarar til fylgis AfD, sem þar með mælist næst stærsti stjórnmálaflokkur Þýskalands. SPD hefur hrapað frá 20,5 prósent afhroði í kosningunum í september síðastliðinn, niður frá 41 prósentu fylgi á aðfararnótt evrunnar 1998 og fram til rjúkandi brunarústa hennar í dag. SPD óttast kjósendur meira en allt annað og valdi því að leita skjóls í neðanjarðarbyrgi Berlínar, þar sem endurskoðunarnefndin á því hvort að lýðræði sé nú heppilegt stjórnarfyrirkomulag, hefur aðalstöðvar sínar í dag. Kosningar eru að verða matröð fyrir þau pólitísku öfl sem komið hafa Evrópu í 1930-ástand dagsins í dag. Svo þær þarf að forðast þar til Skjaldborgar-bann við þeim óskapnaði tekur gildi á ný

Fyrri færsla

Klikkaði skaparinn, er spurt