Gengur Donald J. Trump í skrokk á Þýskalandi?

Hagnaðurinn á viðskiptareikningi Þýskalands við umheiminn er nú um það bil sá stærsti í veröldinni. Hann er hvorki meira né minna en næstum því stærri en hagnaður Kína er við umheiminn og sem prósent af landsframleiðslu nálgast hann 9 prósent! Sem þýðir 91 prósent geggjun fyrir flest önnur lönd evrusvæðis

Bandaríska fjármálaráðuneytið setti Þýskaland á sérstakan gátlista í október á síðasta ári. Þetta er listi sem blikkar rauðu í mælaborðinu yfir helstu gengisfalsara og nurlara veraldar. Þar blikkar nú þýska hagkerfið beint framan í andlit hins nýkjörna forseta

Obama gerði minna en lítið í þessu á allri sinni forsetatíð eins og flestu öðru, enda fór hann úr embættinu sem óvinsælli forseti en Nixon var og sem meira að segja sagði af sér. Einungis Ford, Truman og Carter mældust hjá Gallup, á tímabilinu frá 1945 til 20. janúar 2017, óvinsælli forsetar en Obama var í embættinu

Donald Trump þarf að glíma við þennan vanda. Hvað gerir maður við land eins og Þýskaland, sem ríður til veislu á bökum mölbrotinna hagkerfa evrusvæðis. Vanti Þýskaland enn lægra gengi til að styðja við útflutningsfíkn sína, þá kveikir það bara í enn einu evrulandinu í viðbót, evran lækkar bang og út hendast enn fleiri gámar frá höfninni í Hamborg. Þetta veit Donald Trump mjög vel

Á meðan eru mörg hagkerfi á evrusvæðinu að deyja í evrum. Þau eru varanlega löskuð. Það er ekki einu sinni hægt að lána þeim peninga því þau eru ekki lánshæf og fleiri peningar gagnast þeim ekki lengur. Þau geta einfaldlega ekki tekið við þeim því þeir gera ekkert gagn því einkageirinn er í öndunarvél. Meira súrefni kálar honum bara. Einkageirinn er; fyrirtæki og heimili. Þetta er finnska leiðið sem koma skal

Fáir hafa veitt því athygli að kosningabaráttan um brexit og svo kosningabarátta Donalds J. Trump, eru sennilega einu slíkar í manns minnum þar sem baráttan gekk ekki að mestu út á krónur og aura, heldur flest annað. Það eru tímamót og frétt til næsta bæjar, en sem enginn hefur sinnt í geggjunaræðisköstum flestra svo kallaðra "fjölmiðla"

Síðasti ráðherra Bandaríkjanna sem gekk í skrokk á Þýskalandi var James Baker. Donald Trump mun sennilega margfalda hann með tíu og hann gæti einnig látið verða af því að rífa suma afskaplega vonda pappíra í þúsund tætlur. Og svo hefur Donald Trump einnig símanúmerið hjá henni Yellen

Fyrri færsla

"Multilateral" eða fjölþjóðaisminn að renna sitt síðasta skeið

"Multilateral" eða fjölþjóðaisminn að renna sitt síðasta skeið

Stefnur, ismar, líkön og straumar koma og fara. Ein slík stefna á sviði milliríkjaviðskipta var merkantílisminn. Sú stefna og það viðskiptalíkan Evrópulanda ríkti í tæplega þrjár aldir. Merkantílisminn féll svo dauður niður er Bretar og Frakkar gerðu tvíhliða viðskiptasamning á milli landa sinna og sem kenndur er við Cobden og Chevalier, árið 1860. Hann er sagður fyrsti "(frí)verslunar-samningurinn" á milli ríkja. Sá tvíhliða viðskiptasamningur ruddi braut 57 tvíhliða viðskiptasamninga í Evrópu á minna en næstu 20 árum

En auðvitað eru svo kölluð "frí og frjáls viðskipti" ekki til og hafa aldrei verið til, þau eru alltaf pólitísk og ófrjáls að einverju leyti fyrir einhvern. Öðruvísi geta þeir "samningar" ekki orðið til. En viðskipti eru hins vegar sannarlega til, því er ekki hægt að neita. En þau eru aldrei frí né frjáls. Og oft eru þau ferlega klikkuð þegar á heildina er litið, þ.e. fyrir aðalfélagið, sem er þjóðfélag þjóðríkisins. En viðskiptin geta hins vegar verið tollfrjáls. Það geta þau

Á okkar dögum hefur e. "multilateralism" eða fjölþjóðaismi ráðið ríkjum það lengi, að allir eru komnir með lægsta sameiginlega nefnaranefið sitt í slíkum félagsskap, ofan í hvers manns kopp í mörgum löndum, sem þeir eiga ekkert erindi í. Þar þefa rugluð mismennin, kyngja eða skyrpa því sem gerist í öðrum löndum. Ygla sig eða kumpánast allt eftir því hvernig dagurinn er fyrir þá, en ekki hina. Allt er því að verða ein stór steik aftur og einn stór imperíalismi hins lægsta sameiginlega nefnara slíkra fyrirkomulaga. Þetta skeið er nú að renna út, og punkturinn fyrir aftan það er kominn á loft og byrjað að slá niður

Evrópusambandið er eitt gott dæmi um slíkt dulbúið viðskiptalíkan umhverfis svarthol. Bæði ESB og evran eru viðskiptatæki elíta til að stjórna öðrum og til að hagnast helst á þeim. Síðar meir í sögunni verður Evrópusambandið dæmt sem ófriðarbandalagið er tætti Evrópu í tætlur

Það sem tekur við af multilateralismanum, er stóri sannleikurinn úr hinum Heilögu ritningum Vesturlanda: þ.e. þjóðríkið sem hornsteinn velfarnaðar þjóða. Þjóðríkin munu svo gera eða ekki gera þá tvíhliða samninga við önnur lönd eftir því sem þeim sýnist. Þjóðríkið er komið aftur. Og imperíalismi þeirra sem gráta Brexit og fjórða og fjórtánda júlí, fer í kistulagningarferlið: ENDIR

Hér er tímamóta Fíladelfíu-ræða Theresu May í lauslegri þýðingu Björns Bjarnasonar; Theresa May hvetur - og hér má horfa á hana. Allir sem áhuga hafa á veröldinni ættu að kynna sér efni þessarar ræðu. Hún markar tímamót eins og innsetningarræða Donalds J. Trump gerir einnig: og hana má horfa á hér. Tvær stefnumótandi ræður sem marka sömu tímamótin

Fyrri færsla

Skelfilegt: stjórnmálamaður sem meinar það sem hann segir!

Skelfilegt: stjórnmálamaður sem meinar það sem hann segir!

Mikið fát og fum er að grípa um sig. Í Hvíta húsið er sestur maður sem meinar það sem hann segir. Og sem ætlar að framkvæma það sem hann lofaði kjósendum. Þessu eru menn ekki vanir. Það er náttúrlega algerlega skelfilegt að kjósendur fái ekki bara eitthvað fyrir atkvæði sitt; heldur fái það sem þeim var lofað

Eitt af því sem Trump segist ætla að gera hefur hann sagt á sem breiðastan hátt til að halda sem flestum leiðum opnum fyrir hvernig hann ætlar að ná því markmiði sínu; að uppræta Ríki íslams (ISIS). Að hann segi þetta, þýðir að Bandaríkin álíta "öfga-íslam" ógn við hagsmuni Bandaríkjanna í heiminum. Alvarlega ógn sem þau verða að takast á við sem fyrst

En það er bara einn hængur á því máli, en sem forsetinn mun þó finna út úr, því hann gefst ekki upp; hvernig á að skilja á milli pólitísks-íslam og ópólitísks-íslam? Svarið við þeirri spurningu er þetta; það er bara alls ekki hægt, því að hið eina rétta íslam er ávallt pólitískt íslam

Þegar íslam er í sínu eðlilega og rétta ástandi, þá er það pólitískt trúarafl og ríkis-stjórnin sjálf. Það mjúka íslam sem Vesturlandabúar hafa lært að þekkja að nokkru leyti er, já, það er hin mölbrotna og ónýta útgáfa af íslam fyrir 1,2 milljarða múslíma á veraldarvísu. Rústirnar af réttu íslam

Hin eina eðlilega og rétta birtingamynd íslams er pólitískt íslam sem bæði og samtímis er trúarlegt,- pólitískt,- og lagalegt yfirhöfuð lágrétts ríkisfyrirkomulags er nefnist kalífat

Þetta þarf Trump að glíma við. Það getur hann, því að virki hans er hið lórétta ríkisfyrirkomulag Vesturlanda sem hinar Heilögu ritningar gáfu heiminum; þjóðríkið. Og þau stjórna heiminum að mestu leyti af því að þau virka. Þau eru meistarar "nútímunar" nútímans (e. modernity)

Þau þurfa ekki að virka öll í einu af því að þau eru lóðrétt ríkisfyrirkomulag. Kalífatið er annaðhvort af eða á, alls staðar í einu, þvert á landamæri , ef það á að virka. Það er lágrétt ríkisfyrirkomulag

Takist Bandaríkjunum þetta ekki, þá verður birtingarmynd hins rétta íslams í fæðingarhríðum sínum eins og fæðingarhríðir byltinga Evrópu voru á einum stað í einu: fjöldamorð út í gegn - en þá bara alls staðar í einu, um allt kalífatið gjörvallt út í gegn

Trump mun sýna þeim hversu glötuð hreyfing þeirra er. Hversu vonlaust þetta er fyrir þá. Hversu mikið ofurefli þjóðríkið Bandaríkin eru miðað við kalífatið. Og það er nóg. Það er nóg að stilla drekanum upp og sýna íslam-x-y fram á ofurefli hans

Þetta munu Bandaríkin geta og jafnframt gera, af því að Evrópa er orðin algerlega getulaust fyrirbæri sem klikkað Evrópusamband álfunnar við ekki neitt. Þar er allt sambandslaust dinga ling gaga gúkk og nuts. Evrópusambands-kalífatið er svik við Vesturlönd, við þjóðríkið, og Evrópa mun þurfa að ganga í sjálfa sig aftur, ef hún á að virka á ný. Sú útganga útaf fyrir sig, mun ekki endilega ganga friðsamlega fyrir sig, - eins og við nú þegar erum byrjuð að sjá. Og það vita íslamistar ákaflega vel. Og það veit Donald J. Trump líka

Fyrri færsla

Fjölmenningarsamfélagið Sýrland

Fjölmenningarsamfélagið Sýrland

James Mattis hermaður til 48 ára, settist standandi í embætti varnarmálaráðherra Bandaríkjanna föstudaginn 20. janúar 2017. Undir hann heyrir allur herafli Bandaríkjanna. Fyrsta aðgerð hans var að senda eftirfarandi í skeyti til allra sem að varnarmálum Bandaríkjanna vinna:

"It is good to be back and I am grateful to serve alongside you as Secretary of Defense." - Það er gott að vera kominn aftur (til þjónustu) og ég er þakklátur fyrir að þjóna við hlið ykkar sem varnarmálaráðherra

Síðan hringdi Mattis á sinn kostnað yfir Atlantshafið í bandamenn sína, sem Bandaríkin hafa í samfellt 68 ár vonað að axlir vaxi á, og talaði fyrst við yfirmann NATO, sem er fátækur Norðmaður. Því næst hringdi hann í verðandi fullvalda kollega sinn í Stóra Bretlandi, Michael Fallon, til að láta hann vita að Stóra Bretland nýtur ávallt einstakrar sérstöðu sem grunnstólpa-bandamaður varnamála Bandaríkjanna

Mattis verður látinn um að breyta NATO úr sogröri niður í Bandarikin og í þjóðvarnar-bandalag fullvalda þjóðríkja

Ég hef horft á alla blaðamannafundi Hvíta hússins frá því að Donald Trump tók við embætti forseta þjóðríkis Bandaríkjanna, og ég horfði á Mattis koma fyrir hermálanefnd öldungadeildar Bandaríkjaþings. sem sjá má hér. Hér er einnig vefslóðin á setur Hvíta hússins á YouTube

Þegar þjóðin, já þjóðin, er numin á brott úr ríkjaskipan veraldar, þá breytist heimurinn í fjölmenningarríkið Sýrland - hættulega spilaborg og sundrungarfélag tundurs. Þetta vita allir nema þeir kjánar sem eiga að vita þetta. Og ríkjaskipan veraldar byggir á grunneiningum sem nefnast þjóðríki. Þeir sem vita þetta ekki, en ættu að vita það, eru í asnaskap að stofna til Sýrlands um alla plánetuna. Þá dreymir um nýtt Sýrland og Júgóslavíu sem nýtt helvíti á þeirra jörð, án þess að gera sér grein fyrir óskum sínum

Margt fólk með ofgreinda greindarvísitölu er í pólitískum rétttrúnaði að reyna að stofna til Sýrlands á tröppum sínum. Lýðskrum þeirra ætti venjulegt fólk ekki að hlusta á. Þessir lýðskrumarar tala í sífellu um "fjölmenningu". Mataruppskriftir frá öðrum löndum er ekki fjölmenning. Ei heldur húðlitur manna. Sýrland er hins vegar fjölmenning. Hafa skal það sem rétt er

Veruleg hætta er nú á að stórir hlutar Evrópu séu að breytast í nýtt Sýrland

Fyrri færsla

Sjálfstæðismaður kominn í Hvíta húsið

Sjálfstæðismaður kominn í Hvíta húsið

Einn stærsti atburður meira en bara nútímasögunnar fer nú fram, beint fyrir framan augu okkar

Nýr leiðtogi bandarísku þjóðarinnar er kominn í Hvíta húsið. Hann komst þangað fyrir eigin vélarafli. Hann skuldar engum neitt, nema þeim sem komu honum þangað; þ.e. kjósendum

Enginn bransi kom honum þangað. Engir hagsmunir komu honum þangað. Engir fjármunir annarra komu honum þangað. Enginn fjölmiðill kom honum þangað. Enginn flokkur kom honum þangað. Ekkert opinbert elítubatterí kom honum þangað. Og ekkert alþjóðlegt elítuálit kom honum þangað

Elítur allra fyrirbæra voru á móti honum. Allir valdamestu fjölmiðlar voru á móti honum, nema einn. Þeir ættu reyndar ekki að hafa nein mark á takandi völd, en þeir hafa það samt

Mest öll menningarelítan var á móti honum, sérstaklega sú til vinstri. Flestir pennar voru á móti honum, sérstaklega þeir til vinstri. Flestir hinir gáfuðu, með barnlausu greindarvísitöluna, voru á móti honum. Repúblikanaflokkurinn var að mestu á móti honum. Allt þetta batterí hafði Obama í bakið. Allt!

Donald J. Trump hefur ekkert af þessu. Hann hefur engan, - nema þá sem kusu hann. Hann hefur Bandaríkin. Hann stendur einn með þjóð sinni. En hann mun leiða hana áfram, hvað sem hver segir

Fyrri færsla

Landgöngulið Donalds Trump fer í bátana

Landgöngulið Donalds Trump fer í bátana

Sagt er að valdaskiptateymi Donalds J. Trump sé við það að stíga um borð í landgönguprammana og hefja innrás í 30 helstu ríkisstofnanir og ráðuneyti lýðveldisins. Fallhlífasveitir forsetans eru þegar lentar á tröppum þessara stofnana og hafa þær myndað brúarhöfuð sem landgönguliðið vinnur út frá

Fallhlífarsveitirnar munu svo afhenda landgönguliðinu lendingarskjöl forsetans, -segir sá sem fengið hefur að sjá eitt slíkt, en þó ekki fengið að lesa í þeim. Sagt er að hvert slíkt skjal sé um það bil 100 blaðsíðna innrásar,- hreinsunar,- og viðgerðaráætlun fyrir hverja einstaka stofnun. Hver stofnun mun fá að vita hverju hún verður að breyta, hvern á að reka og hverja þarf að ráða. Sagt er að lendingarskjöl forsetans séu þess eðlis og svo ítarleg að útilokað sé annað en að mörg ár hafi farið í að búa þau til

Þetta verða því vesturvígstöðvarnar um langan tíma. Fyrir utanaðkomandi aðila mun þetta stríð líta út sem öngþveiti, þar sem fólk kemur fljúgandi út um gluggana og nýtt er sent inn. Hinir utanaðkomandi, pressan og góða kyrrstöðustóðið, munu á meðan segja að forsetanum haldist illa á fólki

Svo virðist sem að lendingarskjölin innihaldi tvö markmið: að breyta ríkisstofnunum sem hafa komið sér upp stofnanamenningu til óbóta. Og að breyta menningu í þeim stofnunum sem reyna að gera það sem þær eiga að gera, en geta það ekki vegna stofnanamenningar sem lamar og hindrar þær í vinna sitt verk

Fyrri færsla

Trump hellir uppnámi á kerfið

Trump hellir uppnámi á kerfið

James Mattis svarar einni af spurningum Gillibrand, sem er demókrati frá New York. Allt 3,5 tíma grillið má skoða hér, þar sem nýi varnarmálaráðherrann kom til staðfestingar fyrir nefnd Öldungadeildarinnar. Spennan og fróðleikurinn hefst næstum samstundis

Kellyanne Conway kosninga-strategíu-ráðgjafi Trumps, sagði að hinn nýi forseti myndi senda 98-oktan áfall um allt kerfið um leið og hann settist í embættið. Ræðuna sína skrifaði hann sjálfur, segir hún, en "með aðstoð" góðra manna, smávegis já

Jahá, erhem, pípan..harðfiskur..lýsi..kaffi..tja; Já, kannski eins konar 98-oktan súper trompet-högg sem lamar bráðina og helst rotar hana, en eftir viku vaknar kerfið úr rotinu, startar sér upp, og keyrir á nýjum nótum án þess að fatta hvers vegna það keyrði ekki alltaf svona áður; þ.e. á Trump nótum

Markmið Trumps er að ná fram mjög miklum breytingum á einni viku og ná fram stærra höggi á kerfið fyrir færri dali. Ná fram jarðvegs breytingum sem tæki aðra tólf ár að reyna að framkvæma með talla la la já góðan daginn elsku vinur strategíu

Til að ná þessu fram, þarf að láta alla halda að manni sé til alls trúandi. Einn sólarhringur er nú liðinn og þetta gengur bara ansi vel, verð ég að segja. Þetta er kölluð skapandi eyðilegging og er aðalsmerki kapítalismans; Bigger bang for the buck

Þetta voru mínir fimm aurar. Sofið rótt, Bandaríkin vernda ykkur enn

En á næstu dögum eða vikum, mun Norður-Kórea senda upp ICBM; þ.e. Taepdong2 eldflaug sem getur borið kjarnorkuvopn á milli heimsálfa; e. intercontinental ballistic missile - þ.e. eldflaug með 5-8 þúsund kílómetra drægni, sem þá nær til Íslands (horfa til hánorðurs), Evrópu niður að Spáni, Ástralíu og til norð-norð-vestur strandar Bandaríkjanna. Hvort að tilraunaskotið tekst eða ekki, veit enginn. Suður-Kórea segist hafa njósna-séð neðri hluta 15 metra langrar eldflaugar á flutningavangi í síðustu viku

Hvort að Norður-Kóreumenn þori þessu með 98-oktan manninn í Hvíta Húsinu, veit heldur enginn. En þeir munu ekki vita hvaðan á þá stóð veðrið þegar því verður dælt í þá

Anker Jörgensen var síðasti sósíalista forsætisráðherra Danmerkur sem fór í frí til Norður-Kóreu, sér til heilsubótar, á lúxus hressingarhæli sósíalismans þar í landi. Með sér í skjalatöskunni hafði hann ríkisleyndarmál Danmerkur til aflestrar í hvíld sinni þar (Heimild: UEJ 1996). Þetta var friðarframlag evrópska sósíalismans til NATO-aðildarinnar á þessum árum, og ekki hefur það batnað síðan þá. Svona var NATO-staða hinna "evrópsku bandamanna" Bandaríkjanna um næstum alla Evrópu. Ekki er því hægt að segja annað en að Eyjólfur hafi hresst sig töluvert við í sinni Norður-Kóreu í dag. Á þessum tímum fjármagnaði og skipulagði KGB flestar hinar svo kölluðu "friðarhreyfingar" Vesturlanda. Í dag fjármagna þeir mótmæli og varðelda. Kúnnarnir eru sömu tegundar nytsamir fábjánar og síðast

Frá og með árinu 1975 varð nettóútflutningur Bandaríkjanna til heimsins neikvæður. En þá gerðust Bandaríkin neytandi heimsins til þrautarvarna. Það er búið núna, segir Trump

Fyrri færsla

Skyldur Evrópu við Bandaríkin

Skyldur Evrópu við Bandaríkin

Í gær skrifaði ég um NATO og Trump. Hægt er að setja tilvistarvanda NATO upp á eftirfarandi hátt:

a) Evrópa hefur áhyggjur af því að Bandaríkin yfirgefi NATO. b) Bandaríkin eru hins vegar enn að velta því fyrir sér hvenær Evrópa ætli að ganga í NATO. Ég velti því einnig fyrir mér hvenær Ísland ætli að ganga í NATO

Hið sama gildir um tilvistarvanda Evrópusambandsins. Rússland þarf ekki að hafa áhyggjur af því hvort og hvenær Rússland ætli að ganga í Rússland, né heldur af því hvort að Rússland muni yfirgefa Rússland. Það sama gildir um Bandaríkin. Þarna haggast ekkert. Enginn þarf að hafa slíkar áhyggjur af þesskonar tilvistarvandamálum þar

En þetta gildir hins vegar ekki um nein 27-lönd Evrópusambandsins, né heldur um Evrópusambandið sjálft sem stofnun. Þar hafa allir í öllum löndum viðvarandi áhyggjur af því að landið þeirra ætli að yfirgefa sjálft sig og ganga úr sér og í öll, en samtímis engin, önnur ákveðin lönd sambandsins. Og sambandið sjálft sem stofnun hefur viðvarandi áhyggjur af því að gufa upp þegar eitt land ákveður að hætta í skrípaleiknum og ganga í sjálft sig á ný. Geðið í þessum félagsskap mun bila, það er ekki spurning, og þegar það gerist þá mun það gerast sem geðbilun

Þetta er tíminn þar sem í ljós mun koma hvort að Bandaríkin og Evrópa eigi yfir höfuð samleið lengur og hvort að Bandaríkin muni láta Evrópu sem heild sigla sinn sjó, og einbeita sér að því eina þjóðaröryggismálamarkmiði sem þau hafa í Evrópu: að koma í veg fyrir að nein ein pólitísk eining geti nokkru sinni ráðið yfir öllum Evrópuskaganum á meginlandi Rússlands. Því markmiði geta Bandaríkin náð með því að einbeita sér að ríkjum Intermarium-svæðisins. Þar er fleygurinn sem skilur á milli lífs og dauða fyrir meginland þess sem þar hefur öldum saman verið. Og það eru bara Bandaríkin sem geta rekið þann fleyg á réttan stað. En ekkert NATO þarf hins vegar lengur til þess. Bandaríkin virðast eiga lítið sameiginlegt með restinni af meginlandi Evrópu, sem er útkjálki út úr meginlandi Rússlands, og það er staða mála sem Evrópa hefur skapað sjálf

Næsti forseti Bandaríkjanna verður sá sem mun segja þetta. Það er alger tilviljun að sá maður heitir Donald J. Trump. Þetta lá í loftinu og hefur legið í loftinu frá því að Evrópa gekk úr sjálfri sér og inn í ekkert

Fyrri færsla

Segir Donald Trump satt um að NATO sé úrelt - eða ekki?

Segir Donald Trump satt um að NATO sé úrelt - eða ekki?

Er þetta rétt hjá forsetanum? Og hver hefur áhuga á sannleikanum?

Til að svara því þá verða menn fyrst að spyrja sig þessarar spurningar: Ef við gefum okkur að NATO sé úrelt, fyrir hverja er varnarbandalagið þá úrelt og fyrir hverja það þá ekki úrelt?

NATO var stofnað sem varnabandalag Bandaríkjanna og Evrópu gegn hættu frá Sovétríkjunum. NATO átti að verja Evrópu og Norður-Ameríku gegn hættunni frá Sovétríkjunum.

Evrópa var í rúst vegna heimsveldisdrauma Þýskalands og markmiðs Versalasamningsins um að viðhalda valdaójafnvægi á meginlandinu vissum aðilum í hag, en öðrum ekki. Sá samningur var vopnaða útgáfan af evru og myntbandalagi Evrópusambandsins (EMU)

Efnahagur og sjálfstraust Evrópu var í rúst. Efnahagur Bandaríkjanna var ekki í rúst og sjálfstraust þeirra var í lagi. Efnahagur Íslands var einnig í rúst vegna kúgunar öldum saman og sjálfstraustið var næstum ekki neitt, en fór samt batnandi vegna 1918 og 1944. Vonin bjargaði okkur

Bandaríkin höfðu þá mikilla varnarhagsmuna að gæta á meginlandi Evrópu. Kalda stríðið var tilvistarógn gagnvart þeim og Evrópu og Íslandi

Bandaríkin sáu auman á Evrópu og stofnuðu NATO sér til varnar, og til varnar Evrópu, og Íslandi

Bandaríkin borguðu brúsann - allan

Frá því að þetta var staðan hefur margt breyst þökk sé Bandaríkjunum. Bandaríkin hjálpuðu Evrópu að rísa á fætur með örlátum gjöfum og gerræðislega kostnaðarsamri öryggis regnhlíf sem kom í veg fyrir að Sovétríkjunum rigndi niður á þá sjálfa og Evrópubúa sem voru á vestrænu áhrifasvæði Bandaríkjanna. Evrópa lifði og andaði undir varnarregnhlíf Bandaríkjanna. Vegna þessa varð Evrópa rík, en Sovétríkin og leppríki þeirra urðu fátæk

Sovétríkin detta svo í sundur vegna fátæktar. Þau höfðu ekki efni á sjálfum sér eins og Evrópa hafði ekki efni á sjálfri sér í rústum Þýskalandskeisarans Adolfs Hitlers. Hún þurfti hjálp og fékk hana. Bretland fékk enga hjálp en veitti hins vegar Evrópu og Íslandi hjálp og verndaði hana og okkur

Vegna þessa varð Evrópa rík. Það gat hún orðið vegna þess að hún fékk gjafir og vernd. En núna eru engin Sovétríki til sem ógna Evrópu. En Evrópa getur samt ekki varið sig. Bandaríkin verja hana ennþá. Hagkerfi Evrópu er stærra en hagkerfi Bandaríkjanna. Og 200 milljón manns fjölmennari. Evrópa er rík og hún er rík vegna verndar og gjafa Bandaríkjanna. Ísland er líka ríkt en gerir ekkert. Gerir sjálft lítið sem ekkert sér til varnar. Hvað er að?

NATO á að heita varnarbanalag. En í fyrsta skiptið sem 5. grein sáttmálans var virkjuð, þá brugðust bandamenn Bandaríkjanna í Evrópu að mestu. Ekki alveg, en samt að mestu. Það gerðist þegar íslamistar réðust á Bandaríkin 11. september 2001. Sólarhring síðar var 5. grein NATO virkjuð vegna ákalls frá Bandaríkjunum til að lögga himininn yfir þeim (operation Eagle Assist, október 2001 til maí 2002). Bandaríkin stóðu næstum því ein, nema að því leyti að NATO gat skaffað AWACS, en sem Bandaríkin áttu þó sjálf. Gagnslaust og úrelt drasl evrópska meginlandsins tók aðeins að litlu leyti þátt í og bara vissum aðgerðum á erlendri grund. Aðeins Bretland stóð að fullu með Bandaríkjunum

Þýskaland og Frakkland neituðu þess utan í kjölfarið að rétta Bandaríkjunum hjálparhönd í bæði fyrsta og öðrum fasa eftirmálans; Afganistan og Írak. Þar breyttist sambandið á milli Bandaríkjanna og annars vegar Þýskalands og Frakklands á afgerandi slæman hátt. Þýskum hermönnum er þess utan bannað að taka þátt í bardögum þar sem þeir koma við sögu í NATO ISAF. Herafli NATO getur ekki einu sinni ferðast yfir landamæri margra NATO-ríkja í sjálfri Evrópu nema með því að bíða í 5 daga eftir leyfi frá yfirvöldum viðkomandi landa. Herveldi Eistlands gegn Rússlandi er til dæmis aðeins sex þúsund manns á friðartímum og helmingur þeirra eru í honum vegna herskyldu. Hinum megin við landamærin, sem fíflkerlingar segja í Evrópu að séu úrelt fyrirbæri, stendur 60 til 100 þúsund manna herafli Rússlands á þessum hluta Vestursvæðis rússneska hersins.

Virkjun NATO gegn Rússum við austurjarðar NATO-svæðisins er næstum því til að hlægja að. Þau fjögur lönd sem kalla sig Visegrad-löndin (V4) -Pólland, Ungverjaland, Tékkland og Slóvakía- ætla til samans að senda 600 hermenn til Eystrasaltsríkjanna, eða 150 hver, á þessu ári og Þýskaland 200 hermenn með sín kústsköft. Á þessu ári munu Bandaríkin hins vegar sjálf og stranglega tvíhliða hafa sett inn fullvopnaða 5-8 þúsund manna herdeild og tæplega þúsund topp tjúnaða skriðdreka á þessum væng og sem er meira en helmingi meira en allur styrkur NATO er á þessu heita svæði. Allur hinn gangfæri skriðdrekafloti alls Þýskalands er aðeins 220 stykki af úreltum Leopard2 brandara frá 1970. Hvað á þetta að þýða?

Bandarískir skattgreiðendur og mannslíf eru lögð beint að veði beint framhjá NATO til varnar Evrópu! Af hverju er þetta svona? Jú vegna þess að þegar að NATO ríkjum Evrópu kemur þá eru fyrirvararnir svo margir á þátttöku þeirra í aðgerðum, að vonlaust er að eiga við það bákn á neyðarstund. Til dæmis voru í gildi 83 þátttöku-fyrirvarar evrópskra ríkisstjórna NATO-landa innan ISAF-herfaflans í Afganistan

Summa summarum:

Sovét er dautt. Tilgangur NATO var að mæta ógninni frá Sovét. Sjálft skotmark NATO er horfið. Hvað á það þá að miða á? Bara eitthvað út í loftið?

Evrópa er rík og Ísland er ríkt, en Bandaríkin aumkvuðu sig þó samt yfir fyrrverandi leppríki Sovétríkjanna þegar þau losnuðu mölbrotin undan oki þeirra, og samþykktu þeirra vegna að standa áfram sem ábekingur NATO á meðan þau ríki væru að koma sér á fætur og innlima sig sjálf inn í herstjórnarkerfi Vesturlanda, sem er viðamikil stofnun. Síðan þá eru liðnir áratugir

Bandaríkin sjálf njóta lítils gagns af NATO vegna þess að Sovét er dautt. NATO gagnast ekki hagsmunum Bandaríkjanna í Evrópu. Þess vegna snúa þau sér beint til Intermaríum ríkjanna og ganga þar tvíhliða til verks; með tvíhliða samningum um varnir þeirra. Þar er NATO bara til athlægis og jafnvel beinna trafala með sinn hernaðarlega kústskaftaskóg meginlandsins

Ef einhver getur sagt mér að NATO sé ekki úrelt vegna þess að það er gamalt og gagnslítið fyrir þann sem borgar fyrir það, þá má viðkomandi mjög gjarnan svara mér með rökum um að svo sé ekki

Fyrir meginland Evrópu og Ísland er NATO hins vegar ekki úrelt, því þau fá þar allt gratís á kostnað Bandaríkjanna. Þannig félagsskapur er ekki bandalag, heldur sogrör þeirra ofan í Bandaríkin. ergo: NATO er í reynd úrelt stofnun. Donald Trump segir satt

Ísland er ekki mikilvægt fyrir Bandaríkin lengur. Að minnsta kosti ekki eins og er. Það getur hins vegar hæglega orðið það aftur. En hin krónísku pólitísku vandræði við land eins og Ísland, sem virðist ekki kunna að skammast sín, eru svo mikil að landföst herstöð fyrir Bandaríkin er ekki eins álitleg og fljótandi herstöð. Mitt álit er að NATO sé úrelt af því að það er gamalt og að Bandaríkin viti það mjög vel. Og að í stað þess munu koma tvíhliða sáttmálar við hvert ríki fyrir sig eins og er að gerast í Intermaríum ríkjunum

Við verðum að taka málin í okkar hendur og að minnsta kosti vera fær um að lögga lofthelgi okkar eins og landhelgina og sjá um fyrstu varnir í þær klukkustundir sem það tekur Bandaríkin að koma á vettvang og að þeir hafi þá sanngjarnan rétt til að lenda hér og vera hér með sínar ómetanlegu græjur okkur og þeim til varna án hins eilífa pólitíska aumingjakjaftæðis allt of margra í okkar bandarískt blessaða landi. Það er staðreynd að Bandaríkin hafa blessað Ísland og gera enn. En þeir hafa ekki þolinmæði í endalausan aulahátt okkar

En eins og er þá er held ég að skömm okkar sé mikil í augum Bandaríkjanna. Mér finnst það sálfum, en ég vona að ég sé svo illa að mér í þessum efnum að ég hafi algerlega rangt fyrir mér. Ég vona það

Takk

Fyrri færsla

Bretland losar sig við hlut sinn í Evrópusambandinu

Bretland losar sig við hlut sinn í Evrópusambandinu

 

Bretland hefur ákveðið að losa sig við hlutabréf sín í Evrópusambandinu. Rekstur sambandsins gekk erfiðlega um stund, en eftir að nýtt Þýskaland hóf yfirtöku á flestum atkvæðagefandi hlutum þess, er Bretum nú ljóst að Evrópusambandið hefur ávallt síðasta orðið sem Sameinað Þýskalandi H/F. En það þýðir að kjölfestir hluthafar hafa ekki lengur orðið og að félagið stendur því líklega frammi fyrir afskráningu og einkafélagsformyndugleika. Greinendur eru sammála um mikilvægi þess fyrir Breta að hafa losað sig við hlut sinn í tæka tíð

Áhrifin á Evrópusambandið GmbH verða hins vegar þau að fjármálalegi stöðugtlekinn sem einkennt hefur Evrópusambandið, mun verða enn meiri og gera bankakerfi jafnvel óþörf í löndum sambandsins. Áhrifin á peningastefnu ESB eru þau að hún verður endurskoðuð á kjörtímabilinu sem á ný er þúsund ár

Bretland hefur þó skilið eftir þann helming eignastýringar sem í augnablikinu sér um markaðsvakt á bréfum Rússlands í Eistlandi, Lettlandi, Litháen, Póllandi, Rúmeníu og Búlgaríu. Hinn helminginn sjá Bandaríki Norður-Ameríku um, vegna þess hve tímafrekt það er fyrir hina innri markaðsvakt Evrópusambandsins sjálfs að sjá um peningatalningu hins innri markaðar Þýskalands í sambandinu

Lýkur þar með þátttöku Bretlands í stjórnmálum 28 annarra ríkja á meginlandi Evrópu. Í framtíðinni mun Bretland einbeita sér að sínum eigin stjórnmálum og hefja viðskipti við heiminn á ný undir merkinu "hinn ytri markaður". Verður vörumerkjastjórn aftur sett í hendur breskra kjósenda undir slagorðinu:

Great Britain!

Fyrri færsla

Auðvitað er NATO úrelt - eins og það er núna