Munið þið eftir Tarik Aziz?

Hvernig stendur á því að mér detta tímarnir í kringum hátind Tarik Aziz í hug þegar ég sé þessa mynd hér að neðan og les fréttina? Einhver sem getur svarað því. Hvað er að. Eða var það bara CNN sem stóð fyrir þessu og gerði þetta svona eftirminnilegt? 

Eða er það klukkan á veggnum. Hún er annað hvort 13:23 eftir hádegi eða 01:23 eftir miðnætti. Úrið svitnar. Þetta gæti verið tveggja daga mynd. Höggmynd.

En hvar er myndin tekin. Í Aþenu? Í Róm? Á Íslandi? Í Sofíu eða á Möltu?

Svo er það lestarvagninn til vinstri á mynd myndarinnar. Útsýnið úr honum minnir mig ósjálfrátt á Doctor Zhivago. Hana sá ég einn, sem 10 ára gamall, því ekki var um annað að ræða, þegar ég fór einn með flóabátnum góða Drangi frá Siglufirði á skíðavikuna í Hlíðarfjalli. Nauða ég og nauða. Skarðið var auðvitað lokað. Ekki einu sinni Scanían hans pabba míns góða komst yfir. Það var að sjálfsögðu þessi merkilega stólalyfta sem dróg mig af stað. Svoleiðis höfðum við ekki. Mikill hafís var á leiðini og sumir ældu, en ekki ég. Bjartur reykti pípu sína, stýrði og lyktin var góð. Ég sá líka Sound of Music í sömu ferð. Trapp fjölskylduna. Tvær myndir á einni viku var svakalegt. En það voru jú tvö bíó. Fyrri myndin sat lengi í mér.

En svo er það þessi fáni. Stjörnunrar þekki ég, en liturinn er samt eitthvað svo breyttur. Eða þreyttur. Við erum að vinna.

Fyrri færsla

160 þýskir skattheimtumenn svífa til jarðar í Grikklandi 

Sakar Morgunblaðið um lygar, ranglæti og heimsku

160 þýskir skattheimtumenn svífa til jarðar í Grikklandi

Um er að ræða 160 manna setulið þýskra skattheimtusérfræðinga sem aðstoða eiga við innheimtu skatta og gjalda af almenningi í ESB- og evruríkinu Grikklandi. Matsfyrirtækið Standard & Poor's flokkar nú Grikki sem gjaldþrota þjóð í gjaldþrota ríki. Stjórnmálamenn Grikklands hafa sumir hverjir verið fyrri til og þegar flutt peninga sína úr landi. Kannski þeir hvíli í sama skattaskjóli og lúxuslífeyrissjóðir 1.100 embættis- og stjórnmálamanna Evrópusambandsins gerðu í byrjun ársins 2009.

Fjármálaráðherra Norður-Rínar fylkis í Þýskalandi, Norbert Walter-Borjans, segir að Grikkland standi nú í svipuðum sporum og Austur-Þýskaland gerði þegar það kom gjaldþrota og eyðilagt undan kommúnisma Sovétríkjanna. Afleiðing 30 ára aðildar Grikklands að Evrópusambandinu og 10 ár þess í myntvafningi sambandsins, er sem sagt ekki nein hörmungaleg smásmíði. Svo virðist sem evran hafi jafnvel virkað betur en til var ætlast; sem gereyðingarvopn. Hver kann að umgangast gereyðingarvopn? Aðeins tveir möguleikar eru; on eða off

Almennt er talið að síðsta innheimtuferð Þýskalands inn í Grikkland hafi ekki verið nægilega hámörkuð. Þessi gangi þó betur, þar sem Þjóðverjar telja sig orðna sérfræðinga í Evrópufræðum.

Fyrri færsla

 

Ég spila ekki póker með fullveldi Íslands

 

Ég spila ekki póker með fullveldi Íslands

Eins og við fengum að vita í nýrri skýrslu um húsnæðismarkaðinn í evruríkinu Írlandi, þá er evru-ástandið í því landi orðið þannig að þeir einir sem hafa bestu og tryggustu stöður hjá hinu opinbera — eða eru að öðrum kosti í vinnu hjá erlendum stórfyrirtækjum — geta fengið lán til húsnæðiskaupa. Og þá fá þeir ekki meira en sem svarar til 60 prósentum af kaupverði. Þessu greindi ég frá í síðustu bloggfærslu.

Og nú eru danskar húsnæðislánastofnanir hættar að lána Dönum til húsnæðiskaupa ef þeir búa úti á landi þar sem svo vill til að verð margra fasteigna er fallið niður í hálfa milljón danskra króna, eða sem svarar til 11,5 milljónum íslenskra króna. Upphaflega ástæðan fyrir þessari þróun er sú að Danmörk gekk í Evrópusambandið árið 1973. Á þeim tíma sem liðinn er frá inngöngu Dana í sambandið, hefur dönskum landbúnaði hrakað það mikið að hann er að deyja. Og með landbúnaðinum deyr danska landsbyggðin. Hið samfélagslega hlutverk dansks landbúnaðar og afleiddra atvinnugreina var það mikið. Ég þekki þetta því ég bjó í jóskri mold í 25 ár. Atburðarásin hefur nú náð því stigi að danskar húsnæðislánastofnanir, sem allar eru evrutengdar, vilja ekki lengur lána fólki peninga til þess að kaupa sér húsnæði í ESB-kirkjugarði Danmerkur á landsbyggðinni. Gott og vel segja kratar.

Á Hvanneyrarfundi Sjálfstæðismanna í Borgarfirði í haust kom ég og jós úr mér að verið væri að drepa Ísland með engri alvöru og pólitískt djúpri byggðastefnu* í landinu. Fyrir góðra —og vonandi tryggra— flokksmanna tilstilli, rataði neisti af þessu inn í Landsfundarályktun flokksins í byggðamálum. Það búa jafn margir á Íslandi í dag og á tímum Snorra Sturlusonar. Höfuðborgarsvæðið hér frátalið. Það var heldur ekki til þá. Þetta er í einu orði sagt brjálæði! Fullkomið brjálæði. Land sem ekki er notað verður á endanum tekið af okkur. Tekið af okkur. Numið af öðrum. Skiljið þið þetta?

Helstu afleiðingar engrar alvöru stefnu í þessu lífsnauðsynlega máli eru; bólugrafið hagkerfi áratugum saman, með tilheyrandi ónauðsynlegri verðbólgu. Svæsin eignaupptaka. Miklu minni nýsköpun. Glötun verðmæta. Minni samkeppni. Meiri fákeppni. Og afkynjun höfuðborgarsvæðisins (svo ég þurfi ekki að nota hér orðið úrkynjun), sem komið er úr tengslum og tryggum festum við landið. Það er orðið að skráargati Íslands. Það er ekki heppilegt að allir búi í skráargati. Í engu ríki heimsins getur þessu verið svona farið nema í Mónakó og Andorra. Ósló er bara 500.000 manns. En í landinu búa fimm milljón manns. Okkar höfuðborg er því miður ekki lengur höfuðborg fyrir land fiskimanna, bænda og smærri atvinnurekendur. Býrð þú í skráargati Íslands?

Ég sagðist ekki spila póker með fullveldi Íslands. Þess vegna hef ég ekki enn þorað að gerast meðlimur í stjórnmálaflokki. Að mínu mati eru menn að spila póker í stjórnmálum ef þeir segja eitt við kjósendur en gera svo allt annað og öfugt eftir kosningar. Sjálfstæðisflokkurinn, sem er mér kær, hefur ekki enn afneitað nógu skýrt og afdráttarlaust fyrir mér og öðrum, að hann, undir ENGUM kringumstæðum, vilji EKKERT með NEITT af neinni Evrópusambandsaðild hafa með að gera. Að þar standi 0,00000 og void inni á bankabók flokksins. Að Ísland gangi ALDREI í neitt ríkjasamband og ekki í neitt Evrópusamband. Flokkurinn hefur heldur ekki enn eiðsvarið óskertu fullveldi landsins í peningamálum algera hollustu sína. Ég bíð. Á meðan hleður Vigdís Hauksdóttir og Sigmundur Davíð fullveldispunktum Framsóknarflokksins inn á kjörseðil minn. Hvað á ég að gera? Ég spila ekki póker á kjörstað.

Hér eru tvö viðtöl: Davíð Oddsson og Vigdís Hauksdóttir. Af hverju eru þau ekki þrjú, viðtölin? Því miður eru þau ekki bæði í kjöri. Þá væri val mitt ljúft og létt. Gerðu eitthvað maður!

 

* Nei: Byggðastefna er ekki það að ríkissjóður kjördæmapoti trilljón krónum inn í Göt á fjöllum

Fyrri færsla:

 

Evran og hvellhettur

 

Tengt:

 

Ný rannsókn Íslandsbanka, PDF; Þýðing sjávarklasans í íslensku efnahagslífi + Heimasíðan 

Evran og hvellhettur

 

Sósíalistar og kommúnistar segja enn að Sovétríkin hafi mistekist vegna þess að þar voru menn sem kunnu ekki að umgangast evrópska sósíalismann. Sem afleiðing urðu þjóðir sósíalisma Sovétríkjanna bláfátækar. Þær misstu af nútímanum og allt að sjötíu milljón manns létu lífið vegna smávægilegra mistaka í umgengnisháttum. Já, heilu þjóðirnar misstu næstum lífið. Fræðimenn þessa furðuheims eru enn að útlista mistökin í ræðum og riti.

Nú þegar Grikkir urðu í reynd þjóðargjaldþrota í evrum í fyrradag, þá er okkur sagt að það sé vegna þess að þeir kunnu ekki að umgangast evruna. Halda mætti að hér væri um plastískt sprengiefni að ræða. "Varaðu þig, ekki láta myntina falla á gólfið, þá blæs hún hausinn af þjóðarbúinu". Þetta er furðuleg röksemdafærsla. Grikkjum var einmitt sagt að evran væri lausn á flestum vandamálum þeirra. Að hún verndaði þá gegn áföllum, stuðlaði að framförum, hagvexti og atvinnusköpun. Engin þessara loforða hafa ræst frekar en draumar sósíalista gerðu í Sovétríkjunum. Meiri og litríkari sósíalismi var þó sífellt kallaður á vettvang.

 

Ég hef séð hér heima hvernig sumir menn eru vanir að umgangast íslensku krónuna. Æða oft á henni og fara jafnvel offorsi yfir hana. Fyllast ofkæti, viðhafa kæruleysi, láta heilu bankakerfin hrynja ofan á hana og eru almennt vanir því að hún komi alltaf upp á ný til að bjarga þeim. Ég ætla bara að vona að íslensk skipa- og flugfélög séu ekki að standa í flutningum með þessa mynt Evrópusambandsins. Tjónið gæti orðið hreint ævintýralegt ef varlega er ekki farið. Setja þyrfti aðvörunarmerki á evrupeninga. Því hlýtur miðstjórn Evrópusambandsins í Brussel að geta komið í verk á skömmum tíma.  

****

SCSI/RICS Annual Property Report 2011

EVRURÍKIÐ ÍRLAND - HÚSNÆÐISLÁN TIL ALMÚGANS

The Availability of Finance (bls. 14)

On the residential side, only those in secure roles either in the public service or from high profile international firms are being offered mortgages, despite claims to the contrary from the banks themselves; even then, it has become extremely difficult to secure a mortgage for a loan-to-value ratio of greater than 60%. On average, the loan to value ratio for new mortgages is less than 70%, albeit at reduced values.

****

Í Sovétríkjunum höfðu þeir það gott sem voru í æðstu opinberum stöðum eða höfðu aðgang að dollurum. Á Írlandi er evru-ástandið í landinu orðið þannig að þeir einir sem hafa bestu og tryggustu stöður hjá hinu opinbera — eða eru að öðrum kosti í vinnu hjá erlendum stórfyrirtækjum — geta fengið lán til húsnæðiskaupa. Og þá fá þeir ekki meira en sem svarar til 60 prósentum af kaupverði. Írar kunna ekki að umgangast mynt Evrópusambandsins.

Meiru af ESB er nú hellt ofan í Grikkland, án nokkurs samráðs við þjóðina, eins og var í Sovétríkjunum. Gríska þjóðin hefur aldrei verið spurð að neinu er varðar Evrópusambandið. Hún var ekki spurð um sjálfa aðild landsins að ESB fyrir 30 árum síðan. Hún var ekki spurð um upptöku evru, þegar þrjú þúsund ára mynt landsins var bara sí svona hent fyrir borð.

Ríkisskuldir evrulandsins Portúgal eru allt í einu komnar í 107 prósent af landsframleiðslu. Eða svo héldu menn þar til í fyrradag. En nú er hins vegar komið í ljós að ríkisstjórn landsins kunni ekki að umgangast plastíska sprengiefnið evruna. Henni fipaðist svo — líklega vegna sprengihættu — að hún var ófær um að telja fram skuldir sjálfra ríkisfyrirtækja landsins í evrum. Þessar ótöldu fipuðu skuldir í evrum svara til fjórðungs fjárþarfar portúgalska ríkisins næstu þrjú árin, segir nýjasta rannsókn BNP Paribas. Hvað skyldi gerast næst. Afar erfitt er að umgangast mynt sem stökkbreytist alltaf þegar síst er þörf á þannig breytingum. Já, hvað næst?

  

Munið; evran átti að koma í veg fyrir krísur og vernda

Átti að vernda, koma í veg fyrir krísur og "lækna"

 

Allar ófarir evrulanda undanfarin ár hafa lítið sem ekkert með heimskreppu að gera. Ófarir evrulanda eru allar afleiðingar hinnar sameiginlegu myntar Evrópusambandsins. Allt mikilvægt er varðar þessa mynt hefur reynst gallað og sannað sig sem verandi algerlega öndvert við það sem lofað var

• Grikkland er gjaldþrota eftir 30 ár í Evrópusambandinu
• Evruupptaka 2002
• Evran átti að vernda landið gegn áföllum
• Aðgangur að alþjóðlegum fjármálamörkuðum lokaður landinu og bönkum þess í samfellt 4 ár
• Tók aðeins 6 ár að sprengja efnahag í tætlur undir evru
• Neikvæðir raunstýrivextir allan tímann
• ESB-aðild átti að byggja "nýtt Grikkland". 30 ár eru liðin!

Langar þig að taka og greiða lán í Grikklandi? Spáni? Portúgal? Írlandi? Ítalíu? Eistlandi? Slóvakíu? Slóveníu?

Malta

Malta tók upp evru 2008. Nú hefur lánshæfnismat ríkissjóðs landsins verið lækkað í tvígang á síðustu sex mánuðum vegna smitáhrifa og niðurbrots í efnahags- fjármálalífi landsins. Evruknúið bankakerfi Möltu má sín lítils þegar um sundurtætt viðskipti evrubanka yfir landamæri er að ræða. Ríkissjóður og lýðveldi Möltu hefur misst allan útgáfurétt peninga, öll vaxtavopn og getur lítils stuðnings vænst frá bankakerfi í evrusvelti. Landið hefur misst allt fullveldi í peningamálum. Það er vélarvana. 

Aðeins þrem vikum eftir að síðustu ríkisfjárlög landsins voru samþykkt og viðtekin af fulltrúum fólksins, kom framkvæmdavald Evrópusambandsins í Brussel bréfleiðis til Möltu og blés hin nýju ríkisfjárlög lýðveldisins af borðinu. Þeim var skipað að gera ný. Og skera niður og neðar.

Allt er nú undir á Möltu, sérstaklega þverrandi lýðræði og fölnandi frelsi. Þar slær köldum svita út á reyndustu stjórnmálamönnum landsins. Við blasir hin óhjákvæmilega ömurlega framtíð inngreypt með ESB-innlimun og evruupptöku. Til baka verður ekki snúið.

Og áfram halda bylgjupappafréttamenn Íslands að forheimskast í silfruðu sardínupartý ljósvakamiðla landsins. Hvar er botn tunnu þeirra?

 

Fyrri færsla

 

Ríkisstjórn Jóhönnu að stimpla inn á fávitahæli?

 

Ríkisstjórn Jóhönnu að stimpla inn á fávitahæli?

Séð svona þreytu áður?

 

Pólverjinn Gregorz Kolodko sat sem fjármálaráðherra í fjórum ríkisstjórnum lands síns og einnig sem varaforsætisráðherra Póllands. Nú kennir hann við Kozminski háskólann í Varsjá. Hann skrifaði grein í Financial Times í gær þar sem hann lýsir ástandinu í myntbandalagi Evrópusambandsins með eftirfarandi orðum:

Eftir síðasta fund fjármálaráðherra evruríkja sem gat af sér 130 miljarða evru björgunarlán til Grikkja, væri freistandi að segja að nú séu hlutirnir komnir á beinu brautina. En svo er ekki. Þeir stefna í hreinar hörmungar, sem þegar eru að gerast og sjást sem gjörningur hægfara stórslyss. Að blekkja almenning, misreikna og afvegaleiða markaði er hvorki stefna né stjórnun, heldur hrein heimska (FT)

Hvern dag býst ég við að hafin verði geðrannsókn á ríkisstjórn Jóhönnu Sigurðardóttur. Það sætir furðu að slík rannsókn skuli ekki þegar vera vel á veg komin, eins og rannsóknarréttar(geim)far hennar er staðsett. Stjórnin sér ekki jörðina lengur; Hún er lost in space. Komin í skjól frá fólkinu.

Tengt, Financial Times 9. febrúar; Germany and Europe: A very federal formula

 

Fyrri færsla; Evran: 70 prósent tap á ríkisskuldabréfum Grikklands 

Evran: 70 prósent tap á ríkisskuldabréfum Grikklands

Evruupptakari 

Fyrst ECB-seðlabanka Evrópusambandsins tekst að láta 70 prósent tap lífeyrissjóða og fjárfesta á ríkisskuldabréfum Grikklands líta út sem björgun í pakka, þá hlýtur Argentína að vera svissneskur ostur. En það voru einmitt lífeyrissjóðir og stofnanafjárfestar sem keyptu þessi ríkisskudlabréf Grikklands, eftir að hafa skoðað útstillingarskiltin í sýningargluggum ECB og Brussels. Þar stóðu stífmálaðar útstillingargínur seðlabankans frá 2002 til 2007; Írland, Spánn, Portúgal, Grikkland og svo framvegis. Fimm árum síðar er evrusvæðið orðið eins og glampandi kattaskítur í tunglsljósi.

Af hverju ekki að una Grikklandi þeirrar síðustu læknismeðferðar að fá að fara í ríkisgjaldþrotið? Það er auðvitað ekki hægt því þá myndi Brusselveldið missa andlitin. Þess í stað fáum við hægfara niðurbrot og upplausn ESB-Evrópu. Hún leysist hægfara upp eins og rotnandi hræ.  

Krónukeyptur og dugar enn, sýnist mér

 1967an dregur evruna á öskuhaugana 

Skattavírinn

Þegar ég var polli á Siglufirði þá fórum við félagar út í gat því okkur var sagt að það væri verið að gera það með demantsborum. Vonsviknir sáum hins vegar bara járnarusl. En heim komum við samt með sprengjuvír, sem sagt er að sé sams konar bjölluvír og sá sem lagður hefur verið af ríkisstjórninni alla leið til Brussel. Þetta er samt sprengjuvír. 

Þið sjáið þetta fyrir ykkur. Hringt er um bjölluvírinn til Íslands og allsherjaráðherrann tekur upp tólið: Geld, ja? Nei nei, ekki geld! 

Lögin frá 1932 um tekjutökur ríkissjóðs Bandaríkjanna urðu ekki að demöntum í höndum ríkisstjórnar Hoovers. Þegar taprekstur ríkissjóðs jókst hroðalega vegna þess að svo margir urðu atvinnulausir, þá var svar ríkisstjórnarinnar þetta; hún flutti hæstu tekjuskatta frá 25 prósentum og upp í 63 prósent tekjuskatta. Fasteignaskattur var tvöfaldaður og skattur á hagnað fyrirtækja var hækkaður um 15 prósent. Þið þekkið ferlið hér heima undir núverandi 180 gráðu Hooverríkisstjórnar Íslands.

Það flotta við þennan demantsbor ríkisstjórnar Hoovers var það að hann virkaði eins og sprengjuvír á allt hagkerfið. Allt varð miklu verra. Það eina sem reynt var til að sporna við Stóru kreppunni var ávalt niðurskurður. Lítið sem ekkert annað var reynt af neinni alvöru, fyrr en allt var komið til heljar. Sama hver forsetinn var. Þessi sami sprengjuvír hefur nú verið lagður á milli evrulanda Evrópusambandsins. Hann er sjálft Evrópusamband evrunnar.

 

Hafið þið lesið nýju skýrsluna um Sjávarútveg Íslendinga? Ekki það nein. Ekki séð fullfermdan bátinn í auga þínu enn?

Skyldir þú ekki vita það, þá er sjávarútvegur Íslendinga UNDIRSTÖÐUATVINNUVEGUR þjóðarinnar, ásamt landbúnaði. Sjávarútvegur er fjórðungur íslenska hagkerfisins og stærsti hluti útflutningverðmæta okkar. Tölvan sem þú notar við að lesta þetta var einu sinni fiskur um borð í bát. Furðu má sæta að sjávarútvegurinn skuli ekki enn liggja sem mergur í hryggsúlum háskólasamfélagsins. Úr sjávarútvegi landsins hefur restin af íslenska hagkerfinu verið byggð upp með. Litlar þjóðir þola ekki að missa UNDIRSTÖÐUATVINNUVEGI.

 

Ný rannsókn Íslandsbanka, PDF; Þýðing sjávarklasans í íslensku efnahagslífi + Heimasíðan

Nýjar myndir úr friðarbandalagi Evrópusambandsins

Evrópufréttir í tilefni 20 ára afmælis Maastricht sáttmálans sem Þýskaland braut árin 2002, 2003 og 2004, fyrst ríkja.

Í Evrópu Þýskalands er ástandið orðið þannig að þýska Bild-Zeitung blaðið heimtar að eini gjaldmiðill Grikklands sé tekinn frá grísku þjóðinni. Reyndar er þessi gjaldmiðill ekki bara Grikklands, heldur nota 17 önnur ESB-lönd Maastrichtsáttmálans hann líka, en ekkert þeirra á gjaldmiðilinn þó. Það sést á þeim. Þau skjálfa annað hvort úr hræðslu eða af bræði. Enda sagði Helmut Kohl alltaf að þessi mynt væri spurning um styrjöld eða frið, þegar hann seldi hana.

En samt heimta þýskir fjölmiðlar nú að þessi eini gjaldmiðill sé tekinn af grísku þjóðinni. Fjármálaráðherrann þýski gerir allt hvað hann getur til að Grikkland yfirgefi evruna með því að setja grísku þjóðinni svo hrikalega afarkosti að þeir jafngilda því að Grikkland verði evrusvæðisnýlenda.

Aðeins þjóðir á fyrsta farrými hagkerfa eiga sinn eigin gjaldmiðil. Íslenska krónan verður ekki af okkur tekin. Hún er okkar. 

En hér eru myntir . . afsakið . . hér eru myndir dagsins úr Bild-Zeitung undir fyrirsögninni; út úr evrunni með Grikkland. Næst verður Grikkjum sennilega bannað að gefa út blöð og anda.

Bein slóð á Evrópufréttir Bild-Zeitung í Þýskalandi þar sem sjá má fleiri friðarmyndir frá evrusvæðinu: Schmeißt die Griechen endlich aus dem Euro! 

  

Fyrri færsla

Dagur í lífi myntar, Össurar H/F? 

Dagur í lífi myntar, Össurar H/F?

Rétt áður en fjármálaráðherra Þýskalands, Wolfgang Schäuble, hóf í fyrradag langlínu símtal sitt alla leið niður til Grikklands, þá lagði hann það til í útvarpsþætti á SWR2 (Südwestrundfunk), að þingkosningum ætti að fresta í Grikklandi og að tæknileg ríkisstjórn teknókrata (væntanlega innanbúðar frá Brussel) þyrfti að setjast þar við völdin.

 

Enn fremur sagði hann að sú ríkisstjórn mætti ekki að innihalda stjórnmálamenn á borð við Evangelos Venizelos og Antonis Samaras. Þetta yrði svipað módel og er nú við öll völd á Ítalíu. Wolfgang Schäuble sagði; "Þegar maður horfir til umræðunnar innanlands í Grikklandi og til þarlendra skoðanakannana, þá spyr maður sig þeirrar spurningar, hver mun tryggja að staðið verði við þá samninga sem verið er að gera."

Þess má geta að stjórnlagaprófessorinn frá Aristótleles háskólanum í Thessaloniki, Evangelos Venizelos, er varaforsætisráðherra Grikklands og situr undir ESB-pöntuðum forsætisráðherra Evrópusambandsins í Grikklandi sem póstpantaður var úr katalóg ECB-seðlabanka Evrópusambandsins. Antonis Samaras er hagfræðingur og leiðtogi stjórnmálahreyfingarinnar Nýtt lýðræði (New Democracy).

Bjarni Harðarson fyrrum Alþingismaður hefur undanfarið verið á ferðalagi um mörg lönd og skrifað heim til okkar Íslendinga. Ég er næstum því viss um að hann hafi ekki enn komið í neitt land sem býr við svo lélega mynt að hún krefjist þess að þingkosningum sé frestað þar til hún jafni sig og að fulltrúar fólksins séu leystir upp af erlendum aðilum. 

Þýskaland á langa og stranga hefð fyrir því að brjóta og brenna samkomulög við önnur ríki. Svo Wolfgang Schäuble er hér algerlega á heimavelli. 

Forstjóri Össurar kominn upp á hækjur?

Hann er í grein í Morgunblaðinu í dag og talar þar um kosti þess fyrir Össur H/F að vera í pesólandi Mexícó, sem upplifði afar erfiða gjaldmiðilskreppu árið 1994 og aftur á ný svo seint sem árið 2008. Þetta er kannski ástæðan fyrir því að Mexíkó er í uppáhaldi hjá forstjórn fyrirtækisins.

 

Fréttaleiftur frá 10. október 2008 - Peso - mynt 110 miljón manna þjóðar

 

Mexíkó átti í erfiðleikum með að halda uppi eðlilegum gjaldeyrisviðskiptum í gær. Markaðurinn hafði ekki trú á Peso og enginn vildi kaupa eða eiga mynt mexíkönsku þjóðarinnar sem telur 110 miljón manns. Peningarnir flúðu yfir til myntar Bandaríkjanna. Gengi peso gagnvart dollara féll um rúmlega 12% í gær. Á tímabili var fallið 15% innan dags. PS; Skoðið gjarnan myndina af gengisþróun mexíkanska pesó, hinni gagnlegu mynt Össurar H/F. 

Össur H/F gæti nú leigt sér skrifstofuhúsnæði á Írlandi því um helmingur þess stendur tómur á sumum svæðum. Og lóða- og jarðarverð er fallið um 90 prósent. Þar kæmist fyrirtækið líka í aðra mynt en þá sem eftir fæðingu þess á Íslandi stendur því nú fyrir þrifum. Einnig gæti Össur H/F keypt á danskri suður-sjálenskri fornbókasölu myntpassíusálma danskra atvinnurekenda frá því úr síðustu þjóðaratkvæðagreiðsluheimsstyrjöld Dana um evruna þar í landi. Hún fór fram árið 2000. Þá sögðu þessir atvinnurekendur að Danmörk myndi verða dönsku krónunni að bráð, landið myndi einangrast og fyrirtæki landsins detta dauð niður.

Nú er staðan þannig í Danmörku að mikill meirihluti forstjóra stærstu fyrirtækja landsins, sem skráð eru í dönsku kauphöllinni, vilja ekki sjá evruna sem mynt í heimalandi sínu. Það er runnið af þeim. Færustu þjóðhagfræðingar og prófessorar í viðskiptum í Danmörku segja einnig nú að binding dönsku krónunnar við staur niðri í Frankfurt, sé ákaflega slæm fyrir landið. Þeir spyrja; "hvernig á að skapa vöxt þegar hið peningapólitíska frelsi er farið úr landi og frelsi í ríkisfjárlagagerð hefur verið varpað fyrir róða" með því að Danmörk varð aðili að tveimur af þremur fösum myntbandalags evrunnar - sem nú hefur sprengt öll öryggin í töflunni. Ljósin eru slökkt í myntbandalaginu. 

Og svo segir Torben Pedersen hjá Institut for Strategi og Globalisering á CBS að staðan í Danmörku sé svo slæm að útlendingar forðist að fjárfesta í landinu. Ulrik Bie, sem er yfirgreinandi (chefanalytiker) hjá Nykredit Markets segir að Evrópa sé búin að tapa baráttunni um framtíðina. Hún sé orðin steypuklossi. Þökk sé því sem ESB fylgdi? Um 80 milljón manns í ESB eru nú orðnir fátæklingar. Og Danmörk er orðið fátækasta Norðurlandið. Aðeins fimm prósent af dönskum þingmönnum á nýkosnu þingi hafa staðið í sjálfstæðum atvinnurekstri. Restin eru pappírsmenn.

Velkominn til Mexíco Össur H/F. En álverið í Straumsvík er hér enn og fer hugsanlega að verða Íslendingum meira virði en Nokia er nú orðið fyrir hagkerfi Finnlands. Svo við nefnum nú ekki nein nöfn eins og til dæmis lífsnauðsynlegan sjávarútveg og landbúnað okkar. Íslendingar munu alltaf spyrja sig þeirrar spurningar hvort það sé nú þess virði að gera ráð fyrir því að Össur H/F verði hér ennþá árið 2050. Spyrjið Nýfundnalendinga; hvert hagnaði (fyrrverandi) lands þeirra er skipað út?

Þó svo að Össur framleiði hækjur þá er óþarfi að yfirfæra þá framleiðslu yfir á alla íslensku þjóðina, með fullri virðingu fyrir framleiðslu ykkar og snilli. Þjóðin er sem betur fer að mestu leyti heilbrigð í þessum málum. En væri ég hluthafi, eftir þetta viðtal, þá myndi ég selja strax. En ég er það ekki. 

Ég endurtek

Myntbandalag ESB er dragbítur á raunverulegum framgangi efnahagsmála, þ.e. dragbítur á raunverulegum hagvexti sem skapar velmegun. Myntbandalög eru óskabörn þeirra sem hafa ekki áhuga á raunveruleikanum, heldur á formsatriðum, því myntbandalög eru koddar öndunarvéla aðgerðarleysis og ósjálfstæðis - verkfæri uppgjafarhugsunar. 

Að ætla að taka upp evru þegar maður heitir ekki Frakkland eða Þýskaland er svona eins og smástrákur sem loksins kemst í næstu götu gamla hverfis síns og sér að allir ganga þar um með hækjur. Hann fer heim og segir við mömmu sína: Mamma, mamma! ég vil fá hækjur eins og hinir. "Allir eru með hækjur".

 

Fyrri færsla

 

Aðeins opinberir í tryggum stöðum geta fengið húsnæðislán

 

<><><> SÍMSKEYTI AÐ HANDAN <><><>

HUGLEIÐING DAGSINS

Argentina

1) Since 1991, the peso has been fixed to the dollar at a one-to-one rate under a currency board system. Þökk sé slæmum ráðum IMF 
1 Peso = 1 Dollar

 

<><><>

2) "All of our economy ministers have gone to Harvard -- to learn what? To rob the country?" said one frustrated woman, voicing widespread anger at a political class seen as corrupt and inept.(FT)

 

<><><>

3) With Argentina devaluing its peso over the weekend, 
the conventional economic wisdom finally got its way. 
Wall Street Journal, editorial, 2002-01-08

<><><> SÍMSKEYTI ENDAR <><><>