ESB-tröllasamkunda meginlandsins; bless!

"He has erected a multitude of New Offices, and sent hither swarms of Officers to harass our people and eat out their substance"

Fundur Theresu May með fram- og bakbekkjamönnum Íhaldsflokksins gekk vel. Frú May verður forsætisráðherra Bretlands um langan tíma. Hún mun leiða Bretland út úr Evrópusambandinu, þar sem Bretland heldur hreðjataki um yfirfangavörð þess, sem er útflutningsdópistinn Þýskaland. En Þýskaland þolir ekki að neitt land yfirgefi ESB-fangabúðir þess, sem eru hinn svo kallaði "innri markaður" og hið sovéska reglugerðarfargan hans

Yfirgefi lönd þessar fangabúðir þá fellur Þýskaland saman, því það þolir ekki að keppa á mörkuðum undir sinni eigin mynt. Það þarf að ríða um heiminn á brotnum bökum annarra. Bretland er því frá og með nú á leið til að verða fullvalda ríki á ný. Til hamingju með það Bretland

Tilgangslaust er að tala um "hart" eða "mjúkt" Brexit. Fullveldi Bretlands mun sjá landinu fyrir þeim viðskiptasamböndum sem landið þarf á að halda. Bretland þarf ekki á Evrópusambandinu að halda. En Þýskaland þarf hins vegar á þeim fangabúðum að halda til að halda sér gangandi

Gervihnettir á sporbraut umhverfis Þýskaland eru í landfræðilega og pólitískt erfiðri stöðu. Þau lönd þurfa á bandamönnum að halda og þeir bandamenn eru og verða ávallt Íhaldsmenn hins engilsaxneska heims, sem aldrei trúað hafa á þvaðrið um úníversalisma John Locke. Eru því stjórnarskrár Þýskalalands og Frakklands dúkkulísugarðar einir, eins og sagan sannar. En verst af öllum þeim misfóstrum er þó sjálf stjórnarskrá Evrópusambandsins sem er tær sovéskur John Locke

Gott verður fyrir Bretland að yfirgefa þessa tröllasamkundu meginlandsins. Það er "self-evident" sannleikur, en ekki "úniversal"

Fyrri færsla

Hvernig myndi fara ef DDRÚV tæki sitt eigið meðal?

Hvernig myndi fara ef DDRÚV tæki sitt eigið meðal?

DDRÚV í Austurberlín Reykjavíkurborgar hefur komist að þeirri niðurstöðu að reiðjólaverslun Fálkans sé með lægsta verðið á ökutækjum. Borin voru saman vöðvaknúin ökutæki, fóðruð á matvælum, og hins vegar vélknúin ökutæki, fóðruð á pressuðum jurtaleifum úr krúttmögum risaeðla. Og viti menn: Fálkinn er með ódýrustu ökutækin

Hvernig myndi nú fara fyrir DDRÚV ef þeir neyttu sinnar eigin feiti, þó ekki væri nema bara fyrir slysni. Hvernig skyldi því lúxus batterí vinstrisinnaðra ríkisbubba reiða af í svona eins og einnar mínútu samkeppni

Myndi það lifa daginn af? Nei það myndi DDRÚV ekki gera. RÚV er hörmulegt misfóstur sem ekki er hægt að laga. Það verður því að loka þessari einokunarbúllu og afhenda Þjóðminjasafninu svo kallaðan menningararf þess til varðveislu og viðhalds. Og það helst strax. Þeir hafa rústað sjálfum sér svo oft að um útvarpandi rústir einar er að ræða. Stríðsminjasafn!

Þetta er sem sagt enn ein falska fréttin frá DDRÚV úr Austurberlín Reykjavíkurborgar. Svona lifir það af enga samkeppni

Einu sinni reyndi sænska COOP að reka sovéskar verslanir í Svíþjóð. Öllum vörum átti að pakka í eins umbúðir án kennimerkja. Þetta dó þó skömmu eftir fæðingu. En hér með hefur DDRÚV blásið nýju lífi í gamla sænska sovétið. Gjörið svo vel, DDRÚV er bara best því það fær mest, ekki satt. Og svo er það Samanburðar-Trabantinn maður - og sambærilegu sovésku ljósaperurnar!

Fyrri færsla

Kostuleg Costco koma

Krónan og Bónus ódýrari en Costco

Kostuleg Costco koma

Nú get ég ekki lengur orða bundist vegna skítkasts svo margra yfir stétt íslenskra verslunarmanna. Þeim er útstillt sem glæpamönnum. En það eru þeir ekki

Sjáið nú til góða fólk. Costco og þannig versalnir, eins og til dæmis WalMart, stunda ekki fyrst og fremst verslunarrekstur. Efst á tilvistar og tilgangslista þeirra er að pressa framleiðendur í verði. Tilvist þeirra byggir á því að pressa framleiðendur. Og út á það gengur öll tilvist þeirra. Costco er þess utan heildverslun og miðað við heildverslun er vöruverð þeirra ekkert sérstakt

Þegar manns helsta starf er að pressa framleiðendur í krafti stærðar, þá gerist ýmislegt sem ekki endilega er neytendum í hag. Þetta þarf ekki nauðsynlega að fara saman. Það er ekki lögmál. Framleiðendur geta til dæmis brugðist við með því að nota ódýrari og verri hráefni í þær vörur sem fara til svona samstæða. Og þeir gera það. Neytandinn veit ekki af þessu en kaupir samt. Hér er ég ekki að benda á neinn sérstakan því þetta hafa framleiðendur á Íslandi mátt sætta sig við um visst skeið. Svo er það hin brennandi spurning hvort að maður fái ekki bara á endanum það sem maður borgar fyrir

Spurt er til dæmis hvernig hægt sé að lækka verð á dekkjum um svo og svo marga tugi prósenta. Fyrir það fyrsta verða menn að bera epli saman við epli en ekki hnetur. Er það gúmmí sem notað er í dekkin sambætilegt? Er það hálfónýtt gúmmí frá til dæmis Kína sem verður að grjóti í kulda? Dekk eru ferskvara. Þau, seld sem óseld og notuð sem ónotuð, eru ónýt eftir fimm ár. Þá er mýktin farin úr þeim. Og dekkin eru eina sambandið sem bifreið þín hefur við veginn. Þau verða því að vera góð. Án góðra dekkja er góður bíll lítils virði

Dæmi: íslenskur dekkjasali skrifar birgi sínum og segir að Costco sé komið á markaðinn með 60 prósent lægra verð á dekkjum. Og hann segir; ef við fáum ekki betra innkaupsverð hjá þér þá munum við ekki geta selt nein dekk frá þér. Nú er úr vanda að ráða hjá birginum. Hann gerir sér grein fyrir að lækki hann ekki verð sitt til heildsölu- eða smásöluaðilans á Íslandi þá er markaður hans horfinn ekki seinna en ári síðar. Hann kemur því með tilboð sem segir að þú kæri smásöluaðili minn lækkar þig ef við lækkum okkar verð til þín. Úr getur orðið töluverð verðlækkun. En samtímis geta þeir ákveðið að hækka verð á ýmsu öðru sem fer á milli þeirra. Útkoman getur orðið meiri dekkjasala og verri þjónusta eða jafnvel engin þjónusta. Við búum jú í svo kölluðu "þjónustu-samfélagi", ekki satt, þar sem enginn hefur lengur efni á að nota þjónustuna, vegna þess hversu dýr hún er. Laun eru ekki smáræðispóstur í rekstri hér á landi. Og skattar!

Costco er ekki með neina þjónustu til að hrópa húrra yfir svo þeir geta byggt stórbragga og hent þar inn vörum á pöllum þar sem þeir segjast vera heildsali. Kostnaðurinn hjá þeim er lægri. Vilji menn versla í grafhvelfingum, þá þeir um það. Ekki skipti ég mér af því. En menn munu náttúrlega ekki nenna því nema að hluta til. Þegar æðið er svo runnið af þeim þá hættir þessi della að vera fréttnæm frétt um vel þekkta fífla frá nýrri heildsölu. Fínt að fá Costco hingað, virkilega fínt, en hvað með það! Þetta er bara Costco og þeir eru þarna til að græða peninga eins og allir aðrir, en áherslur þeirra eru einungis aðrar

Ég veit fyrir víst að íslenska verslunarstéttin er alveg ágæt. Hún er alls ekki verri en í útlöndum þar sem ég bjó í tæp þrjátíu ár. Alls ekki verri, en hins vegar að mörgu leti betri, því hér er fákeppnin minni en víðast hvar í ESB. Þetta veit ég. Þar er einokunin í dreifingarliðnum alveg skelfileg. EES hefur bundið okkur við þetta ESB-bákn og það er slæmt fyrir Ísland. Mjög slæmt

Ergo: enginn smásölumarkaður neins lands í Evrópu er eins dýnamískur og sá íslenski. Það er staðreynd sem ekki er hægt að horfa fram hjá. Hér er búið að umturna flestu á þessum markaði á meðan frostjökull ESB hefur búið til frosinn markað elíta á meginlandi Evrópu. Á meðan hafa íslenskir kaupmenn hér heima þurft að hafa sig alla við til að halda sér á baki skepnu samkeppninnar. Ekkert er hér lengur eins og það var árið 1987. Öllu hefur verið umturnað á þessum markaði. Og ekki endilega til hins betra, en umturnað samt

Svo vinsamlegast látið renna af ykkur. Sovét-Ísland er og veður bara til í ESB. Þar er manni gert skylt, með hattinn í hendinni, að biðja um rakvélablöðin við búðarkassann, því það er ekki hægt að hafa þau í hillum. Þeim er bara stolið því verð þeirra er svo Sovét-hátt

Sem sagt, eins og svo oft áður. Hér heima er ekki allt verst. Ónýta Ísland er ekki til. Það er bara til í Evrópusambandinu

Ég sakna gömlu íslensku sjoppanna, með sjaldgæfar tegundir karamella í boði á búðarborðinu - og göfugrar sálfræðiþjónustu þeirra

Fyrri færsla

OPEC ágætis dæmi um svo kölluð "samkomulög"

OPEC ágætis dæmi um svo kölluð "samkomulög"

Myndskeið: Gamla testamentið blessar nýkjörinn forseta

Í fyrra lofuðu OPEC-ríkin hvort öðru að þau myndi skera niður olíuframleiðslu. Þessi ríki hafa bundist samtökum, eins og í París, um að minnka eitthvað. Gera sínum þjóðum eitthvað slæmt ef hinir lofa að gera eitthvað jafnslæmt við sínar þjóðir. Á ESB-máli er þetta kallað "samhæfing". En framleiðslan minnkaði ekki af því að Rússlandi sárvantar peninga, svo "talið er víst" að þeir hafi "svindlað" á framleiðslutölunum

Þetta er enn eitt dæmið um "samkomulag" á borð við það sem heimurinn hoppaði upp í sjálfan sig yfir að Donald J. Trump neitaði þátttöku í. Hann neitaði þátttöku í Parísar-samsærinu sem reynt var að breiða yfir með hugtaka-dúnsæng "samkomulaga"

Það fyndna er að olíuverð stjórnast hvorki af framboði né eftirspurn, því orka er mannkyninu of mikilvæg til að verði hennar sé leyft að stjórnast af því, nema að hluta til. Og það fyndna er einnig að ristilspeglaheimur féspeza sem segir Bandaríkin búin að vera, stjórnast af því sem Bandaríkin segja og gera, eða gera ekki. Froðan sullast þar upp um alla spegla ef Bandaríkin segja nei

OPEC og Parísarsamkomulagið er ein og sama skúffan. Og Kína er stærsti leiðtogi fátæktar og kúgunar í heiminum. Það land verður ávallt þannig því það krefst kúgunar til að hægt sé að halda því saman. Það verður því ávallt einungis musteri látaláta og mun aldrei ráða neinu nema með kúgun

Bandaríkin voru hins vegar stofnuð til að virka ekki nema að hluta til. Þau voru stofnuð til að ríkisstjórnin myndi ekki virka. Og þau voru stofnuð til að Sameinuðu þjóðirnar myndu aldrei virka, því ef sú stofnun virkar þá verður Parísarsamsærið heimur allra til að láta kúga sig í

Bandaríkin voru stofnuð til að atvinnulíf fólksins myndi virka en ríkisstjórn þess helst ekki, nema að lágmarki til. Sterkar ríkisstjórnir eru afleiðing en ekki orsök. Þær eru slæm afleiðing vandamála sem aldrei verða leyst

Til hamingju íslenska þjóð á Sjómannadaginn. Fullveldi Íslands ber hann uppi. Blessuð sé Íslenska Þjóðkirkjan mín, því vér mótmælum enn

Fyrri færsla

Svona ganga breytingar fyrir sig

Svona ganga breytingar fyrir sig

Íhaldsmaðurinn

Þeir sem undrast ástandið í Bandaríkjunum gera sér ekki grein fyrir að einmitt svona ganga breytingar fyrir sig undir forseta sem kosinn var til að gera miklar breytingar. Hann setur að sjálfsögðu margt í uppnám. Hann er uppnáms-forseti því það er ekki hægt að gera breytingar án þess að setja það sem ekki vill breytast í uppnám. Uppnám verður því það sem einkenna mun breytingamanninn Donald J. Trump. Þetta er ekki þægileg innivinna hjá honum

Í Bretlandi kaus þjóðin í þjóðaratkvæði miklar og sögulegar breytingar sem að Sir John Fortescue hefði glaðst yfir. Líklega þær mestu á Vesturlöndum frá lokum Síðari heimstyrjaldar. Það á sem sagt að breyta mikilvægum hlutum. Og þær breytingar valda uppnámi. Vanvita elítur misskilins John Locke skjálfa, því hann skildi heldur ekki sjálfan sig

Það sem sameinar þessi tvö lönd eru sterkar lýðræðislegar stofnanir sannra Íhaldsmanna þar sem þrískipt valdið hefur stanslaust eftirlit með hvort öðru. Það skákar og mátar í tafli sem engan enda má taka. Og þetta þrískipta vald er komið úr einmitt Gamla testamentinu, þ.e. Ísraelaríki hinu forna. Þessi tvö lönd munu því áfram standa sem vitaverðir hins frjálsa heims. Það geta þau af því að þau voru byggð af sönnum Íhaldsmönnum, sem lásu Biblíuna og skildu hana. Restin af heiminum eru mest sökkvandi sovétríki og evrópusambönd prinsa. Lengi lifi engilsaxneskt lýðræði!

Fyrri færsla

Er Air Iceland Connect Eyjafjallajökull

Er Air Iceland Connect Eyjafjallajökull

Ein leiðin til að drepa forvitinn ferðamann er svona sveitamennska. Að láta hann halda að hann hafi aldrei farið að heiman. Vesalingar Flugfélags Íslands eru svo hræddir við grundvöll sinn að þeir hafa hoppað af honum. Svífa þeir nú um í lausu lofti. Og til að geta lent þurfa þeir fjarvistarsönnun frá skynseminni. Að þeirra mati getur Maersk ekki staðist, en það er stærsta skipafélag heimsins. Að fljúga með Lufthansa er malbik sem endar í Badedas

F L U G F É L A G   Í S L A N D S

Þegar ég sá það vegaskilti á ensku hefði ég málað yfir það ef málning hefði verið við höndina. Og gamlir herstöðvarandstæðingar hefðu haldið að verstu spár þeirra hefðu ræst. Að kaninn hefði bara tekið allt landið yfir og lagt íslenska menningu í rúst. En nei, þetta eru þá bara þeir sjálfir! Þetta var í Lundareykjadal, þetta malbik endar skilti Vegagerðarinnar á ensku

Hvaða alger aumingjaskapur er þetta eiginlega? Eru menn búnir að missa vitið! Því meiri enska, því meira líkist Ísland ömurlegri túristagildru, og sem landið sannarlega er að verða. Open í stað opið og closed í stað lokað. Best færi á að þessi búlla lokaði bara strax, áður en verra hlýst af. Maður vissi þó í gamla daga að Kanaútvarpið var kanaútvarp. En í dag veit maður ekki hvort að um aumingjaskap er að ræða eða bara svæsna spéhrædda sveitamennsku númer hundrað og eitt

Aumingjar!

Fyrri færsla

Banka-ruslatunna evrusvæðis flutt úr einni í aðra

Banka-ruslatunna evrusvæðis flutt úr einni í aðra

Spænski stór-bankinn Banco Popular hefur nú verið færður sem ónýtt rusl til í ruslatunnufjármálageira evrusvæðis og sem evru-seðlabankaveldi og framkvæmdastjórn Evrópusambandsins sögðu fyrir ekki svo löngu (október 2012) að væri skotheld fjármálastofnun sem þyrfti ekki að hafa neinar áhyggjur af, eins og sömu "stjórnvöld" sögðu á sama hátt og svo flott þegar þau gerðu Dexia-bankann að "skotheldri" fjármálastofnun þvers á landamærum Láglanda, en sem hrundi svo í fullkomna rúst stuttu síðar. Tekjurnar af földum lífeyrissjóðum ríkisstarfsmanna Þýskalands í skúffufélögum þess á Írlandi voru leynilega notaðar til að fjármagna þá "björgun" Dexia

Spænski bankinn var því í gær færður yfir í stærri ruslatunnur Santander banka keppinautarins á Spáni, fyrir bara eina evru. Ku það vera sú eina og sama evra sem tyllt var framan á svitabolsmaga fjármálaráðherra Íslands. Undanfarnar vikur hefur áhlaup á Banco Popular verið í gerjun. Búið var að tæma 1/4 úr honum. ECB-svitabolsyfirvöld evrunnar sögðu því allt í einu kófsveitt síðustu reykfylltu nótt, að bankinn væri gjaldþrota í evrum

Banco Popular stofnaði árið 2009 dóttur-brunagildruna Aliseda Gestion sem sá um að kaupa þær fasteignir sem bankinn hafði lánað til með ónýtum lánum, en sem hverra eigendur lágu þá gjaldþrotnir undir. Aliseda Gestion endurbauð svo fram gjaldþrotnar brunarústir bankans til sölu, með hundrað prósent 40 ára lánum á engum vöxtum til aumingja mest í útlöndum, og helst alls konar kínverja, sem pissa áttu hagkerfið út á ný með eins konar rakvélablöðum krónísks ESB-lekanda, sem öllum evrulöndum er skylt að hafa að eilífu

Að forsögn afglapaveldis ESB átti evran að bjarga efnahag Spánar og var það því af henni umsvifalaust lagt í rúst. Aldrei í mannkyns-sögunni hefur ein mynt eyðilagt eins mikið og evran. En hún er einkaryksuga Þýskalands. Þá peninga sem vantar á Spáni er nú að finna á kistubotnunum heima í Þýskalandi, sem ryksugustýran Merkel þykist stjórna, en stjórnar ekki samt

Já, ein evra var það. Eftir situr hinn íslenski Benedikt-fjármálaráðherrann brennimerktur með magasýrum einnar skaf-evru. Situr sá skaf-miði fastur á honum um aldur og ævi. Ein evra, ekki satt

Atvinnuleysi á Spáni mælist tæp 18 prósent og 40 prósent hjá ungu fólki, en það fólk ku eiga að fjármagna framtíðina á Spáni, skyldi hún óvænt birtast

Fyrri færsla

Hvað er Bandaríski herinn að hugsa?

Hvað er Bandaríski herinn að hugsa?

Jú. Frá því að Rússland kom til baka úr fríinu frá sögunni og Evrópusambandið hóf upplausnarferli sitt 2008, hafa menn neyðst til að hugsa upp nýja hluti í sambandi við varnarmálin í Evrópu. Ljóst er að sjónarmið Bandaríkjanna innan NATO hefur áratugum saman ekki verið virt. Þýskaland og fleiri lönd Vestur-Evrópu hafa ekki staðið við skuldbindingar sínar í NATO frá því að Rússland kom til baka úr fríi sínu frá sögunni árið 2008, er það tók Georgíu og hélt síðan af stað til Krím, Úkraínu og nágrennis. Þetta er sú skoðun sem einnig ríkir meðal almennings í Bandaríkjunum sjálfum og sem borgað hefur NATO-brúsann. Að sjónarmið hennar hafi ekki verið virt

Núverandi ríkisstjórn Bandaríkjanna er sú sem allra ósáttust er við þróun varnarmála í Evrópu. Hún ályktar að samband Bandaríkjanna og NATO-landa Evrópusambandsins gangi ekki endilega lengur upp. Hún hefur dregið þá erfiðu ályktun af slæmri reynslu og sem er sú; að ekki sé hægt að stóla á stærstu lönd álfunnar

Bandaríkin eru því tilbúin að veita þeim formlega lausn frá NATO-aðild, sem hingað til hefur of mikið og að mestu verið óformleg í verki. Í staðinn ætla Bandaríkin að handvelja áreiðanlega bandamenn að eigin vali úr upplausnarferlis-grúppu Evrópusambandsins. Hóp landa sem hafa gagnkvæmra hagsmuna að gæta

Þessi lönd eru að líkindum Pólland og Rúmenía sem allra efst á lista, Ungverjaland, Búlgaría, Eystrasaltslöndin, Skandínavía og Bretland og sennilega Ísland

Innan skamms verður Pólland áhrifameira ríki í Evrópu en Þýskaland hefur verið. En þannig fer oft er mikilvæg ríki verða strategískt mikilvægir bandamenn Bandaríkjanna (dæmi: Ísland, Suður-Kórea og Vestur-Þýskaland). Sameinað Þýskaland er ekki lengur mikilvægt fyrir Bandaríkin. En það er Pólland hins vegar orðið og landið er einnig sögulega ákafur bandamaður Bretlands og Bandaríkjanna

Bandaríkjamenn vita að valdatímabil Vladimírs Pútín mun einn góðan veðurdag taka enda, og líklega fyrr en síðar, því verr sem gengur í Rússlandi. Þar ganga hlutirnir nefnilega mjög illa. Og þeir vita að "Póst-Pútín" Rússland verður þá mjög hættuelgur staður miðað við stöðuna núna. Í millitíðinni vonast þeir til að hafa búið svo um hnútana að þýsku valdastéttinni í uppleystu Evrópusambandi og NATO, sé á ný gert kleift að viðhafðast hjálparlaust, en ytra verndaðri, í gömlum neðanjarðarbyrgjum Berlínarborgar

Bandaríkin hafa því að mestu látið þarna við sitja og hafið nauðsynlegar gagnaðgerðir sem felast í hönnun nýs varnarsvæðis sem kalla má "Norhtern Tier Defence System", eða Norður-Varnarbandalagið. Hvað verður um NATO skiptir Bandaríkin ekki afgerandi máli lengur. Þetta varnarsvæði í smíðum er þegar byrjað að þjálfa sig saman. Upplausnarferli ESB er ekki hægt að stöðva en það er hins vegar hægt að einangra það frá varnarmálunum. Fullur þýskur ryksugupoki af gjaldþrota ESB-ríkjum verður aldrei sterkur söfnuður bandalagsmanna

Tvennt vinnst með þessu. 1. Öryggi Evrópu er tryggt og 2. upplausnarferli Evrópusambandsins er tryggður lokaður heimur til að falla saman í innávið - en ekki út og til austurs. Ekkert getur lengur stöðvað þetta upplausnarferli álykta Bandaríkin. Þessi einangruðu lönd að baki nýja varnarsvæðisins geta svo stofnað með sér nýjan kjaftaklúbb fyrir hin gömlu málefni sín í poka, sem seðlabanki Bandaríkjanna mun kannski hjálpa til við halda lokuðum á meðan hann er að falla saman

Bandaríkin hafa staðsett þúsundir bandarískra hermanna í þessum löndum Austur-Evrópu til að láta drepa þá. Það er að segja, ef að Rússland haggar sér enn frekar vestur á bóginn, þá þurfa þeir að drepa þessa Bandaríkjamenn fyrst. Við það hrekkur dyrabjalla í Washington í gang og glymur slæmum tónum, fyrir vesturfarann sem þar með hefur ráðist á Bandaríkin. Ofsóknir Evrópusambandsins á hendur Póllandi ber að skoða í þessu ljósi

Þetta útskýrir afstöðu Donalds J. Trump í þessum málum. Og þess vegna staðfesti hann ekki í mæltu máli sínu hinar fyrri skuldbindingar Bandaríkjanna í NATO-bandalaginu, á fundinum í Brussel í síðustu viku. Bandaríkin hafa gefist upp á að bíða eftir því að þau lönd sem látin verða sigla sinn sjó, gangi í NATO

Fyrri færsla

Stærsta vandamál Evrópu er áfram Þýskaland

Stærsta vandamál Evrópu er áfram Þýskaland

"Ég var kjörinn fulltrúi fólksins í Pittsburgh en ekki París"

- Donald J. Trump

Þeir sem neita því að Þýskaland sé stærsta vandamál Evrópu, gleyma því að öll Evrópa snýst einmitt um vandamálið Þýskaland. Búið er að segja okkur í samfellt 60 ár að svo sé. Og sem bein afleiðing þeirrar ályktunar er krafist þess að íbúar meginlands Evrópu samþykki að búið sé að umturna Evrópu yfir í það sem hún ekki endilega sjálf vill vera, en þarf að vera, er okkur og þeim sagt. Hún er orðin svona vegna Þýskalands. Heilt batterí af ólýðræðislegum stofnunum og pólitískt ólögmætum svikráðum í einmitt krafti þeirra, stýrir Evrópu núna. Það batterí er Evrópusambandið og elítur þess

Og Evrópusambandið var stofnað til að glíma við vandamálið Þýskaland, ekki satt. Þýskaland er sem sagt vandamálið. En nú hefur Þýskaland tekið vandamálið yfir og það sjálft er orðið Evrópa, að mestu leyti. Frakkar mega því nú sitja heima í landi sínu, sem í of lágreista rúst er lagt vegna myntar, yfirríkislegra stofnana og batterís sem þeim er enn sagt að séu tilkomin vegna vandamálsins með Þýskaland. Ekki satt

En nú hefur vandamálið það öðlast sitt eigið líf, þannig að verkum innan Frakklands núna eru virk öfl sem aðeins er hægt að líkja við þau virku öfl sem unnu saman með Þýskalandi í Síðari heimsstyrjöldinni: unnu með því við að "sameina" Evrópu". Framgangsmátinn er hins vegar annar í dag en hann var þá. En imperíal er hann samt. Adolf var imperíal-veldi kynþáttaelíta með heimsyfirráð í eftirrétt

Emmanuel Macron var sem persóna kjörinn forseti Frakklands um daginn. Það var hins vegar ekki pólitík hans sem var kjörin forseti. Þjóðin studdi ekki pólitík hans, heldur studdi hún persónuna Macron til að koma í veg fyrir að önnur persóna yrði forseti landsins. Umboð Macrons hjá sundraðri þjóð er því ekki mikið. Enda sýnir það sig í stjórnmálum Frakklands, núna strax, og langt aftur í fortíðina allar götur frá Frönsku byltingunni. Landið er á sinni fimmtándu stjórnarskrá síðan þá. Það segir okkur að eitthvað margt og mikið virkar ekki eins og vera skyldi innanborðs í Frakklandi, sem er á sínu fimmta lýðveldi. Hvað er að í Frakklandi fimmunnar og þeirrar fimmtándu?

Marcon hagar sé eins og kjáni gagnvart þeim sem hann skuldar flest. Hann gerir lítið úr forseta Bandaríkjanna og lítilsvirðir hann. Það voru Bandaríkjamenn sem kusu þann forseta sinn og það sem þeir kusu var einmitt pólitík hans, þrátt fyrir persónuna. Í engilsaxnesku lýðræði er málefnið ávallt stærra en maðurinn sem koma á því til framkvæmda. Slíkt stjórnarfar er mjög slæmar fréttir fyrir þá sem aðhyllast einræði og andlýðræðisleg öfl. Þannig að Macron forseti Frakklands er hér fyrst og fremst að ausa úr sér yfir sjálfa bandarísku þjóðina. Því hefur hann ekki efni á. Frakkland getur ekki staðið á eigin fótum. Hvorki í fjármálaheimi veraldar undir mynt Þýskalands, né í utanríkismálum, né í efnahagsmálum og allra síst í varnarmálum, nema með því að segja sig úr Evrópusambandinu fyrst. Landið hefur lítið að segja miðað við fyrri tíð, nema með því að annast fyrst og fremst sig sjálft og sína kjósendur, en ekki Evrópu sem er ekki til, nema sem landfræðilegt hugtak

Og annars staðar í Evrópu, á austri væng hennar, hugsa menn sitt. Þar eiga menn næstum engra sameiginlegra hagsmuna að gæta með Frakklandi og heldur ekki með uber-vandamálinu Þýskalandi. Austur-Evrópa getur staðið sjálf af því að Bandaríkin vilja það. En án hennar stenst Vestur-Evrópa hins vegar ekki. Og sérstaklega ekki með Macron sem forseta Frakklands, ef þetta er þá ekki bara enn eitt umboðslausa baby-face álfunnar að gera í sig, áður en andlitið frýs fast til er kaldur pólitískur veruleikinn frostbítur það af honum

Frakkland skuldar Bandaríkjunum óheyrilega eftir síðustu hundrað árin. Í 15 ára stríði er hófst sem árás á NATO-ríkið Bandaríkin árið 2001, var bandalagið í fyrsta sinn virkjað samkvæmt samningi sem til er vegna veldis Bandaríkjanna og sem þar í stendur: "allir fyrir einn og einn fyrir alla". En það fór samt þannig að Bandaríkjamenn máttu sætta sig við að heyja lengsta stríð í sögu lands síns að mestu einir, án virkra bandamanna að ráði. Tryggð er einungis tryggð þegar flest í veröldinni segir þér að þú eigir ekki að vera trúr einmitt núna, en þú ert það samt. Það er tryggð. Og Frakkland og Þýskaland brugðust bandamanni sínum er þau afneituðu vandamáli hans og létu Bandaríkin sitja ein, ásamt Bretum, föst í vandamálum næstu 15 árin

Þessu hefur forseti Frakklands ekki efni á. Og franska þjóðin veit það. En henni er hins vegar sagt að hún eigi áfram að lifa vanrækt sem grunnpólitísk eining landsins og mest á lygi. Á lyginni um Evrópu sem á ný orðin er næstum því Þýskaland. Of mikið Þýskaland. Of mikið vandamál. Of mikið næstum því óleysanlegt vandamál á ný

Þegar Macron segir eftirfarandi til að hæða og spotta forseta Bandaríkjanna: "Gerum heiminn mikilfenglegan á ný" (e. “Make our planet great again”) - þá er hann að segja: "fórnaðu landi þínu svo að heimurinn megi verða mikilfenglegur á ný". Hann segir hér með að heimurinn hafi verið mikilfenglegur vegna Bandaríkjanna. Það getur vel verið að einmitt það sé rétt hjá honum, en þá varð heimurinn aðeins þannig vegna þess að Bandaríkin sjálf voru mikilfengleg. Og þau urðu að vera það, til að geta haft eitthvað gott að segja

En enginn leiðtogi neinnar þjóðar í heiminum var kjörin, né verður nokkru sinni kjörinn, til að gera heiminn mikilfenglegan á ný. Enginn hefur umboð til slíks. Og enginn ætti nokkru sinni að reyna það. Því það er uppskriftin að helvíti á jörð. Það er aðeins hægt að vísa veginn og aðstoða aðra með svipuð viðhorf til að gera sín eigin lönd mikilfengleg á ný. Að þjóðin vísi veg með flottu fordæmi og það hefur Bandaríska þjóðin svo sannarlega gert. En það er greinilega ekki það sem forseti Frakklands hefur á sinni dagskrá. Hann er greinilega kominn til valda til að sparka dósinni enn lengra niður götu Evrópu til glötunar og inn í næsta lýðveldi Frakklands, í röð næstum of endalausra slíkra torgreinanlegra mistaka

Macron hefur ekki efni á að heyja neins konar stríð við Bandaríkin. Bandaríkin hafa hins vegar efni á að heyja stríð og styrjaldir og tapa þeim. Kerfið stenst það mjög vel því engilaxneska kerfið er ávallt stærra en einn maður. Þegar hins vegar Macron tapar stríði (deilum) við Bandaríkin, sem hann mun gera, þá hrynur um leið fimmta lýðveldi Frakklands, því Macron er stærri en pólitík þess. Þannig er nú það. Þannig kerfi hafa ekki efni á að tapa. Og þau geta næstum aldrei sigrað, vegna þess að þau eru bara einn maður

Evrópa nálagst 1914 hægt en örugglega á ný. Þökk sé Evrópusambandi þess. Það er þjóðfélagslega séð ólögmæt pólitísk eining. Það er hins vegar þjóðin sem er hin eina sanna pólitíska eining sem komin er til að vera. Það stendur svart á hvítu í Gamla testamenti Vesturlanda. Allt annað er rusl og létt bráð ömurlegra afla, eins og sést. Þetta endar ekki sérlega vel. Það er mín skoðun

Donald Trump hefur svarið þjóð sinni hollustu, með því að kyssa stjórnarskrá hennar á Biblíu Lincolns. Hann ætlar að gera Bandaríkin mikilfengleg á ný. Án aðstoðar Frakklands, Þýskalands, Evrópu og heimsins. Til þess var hann kjörinn og þannig urðu Bandaríkin til: þau gerðu sig sjálf. Þau eru og verða áfram Made in USA

Fyrri færsla

Þrír stórir hvellir þann 1. júní 2017

Þrír stórir hvellir þann 1. júní 2017

Þrennt

Á sama degi og USS Nimitz lagði í hann, frá Bremerton-flotastöðinni á vesturströnd Bandaríkjanna, til Vestur-Kyrrahafs, þar sem tveggja þrepa skagi Kóreu rís úr sæ, gerðist allt þetta þrennt:

1. USS Nimitz lagði í hann og mun sameinast flota tveggja annarra flugmóðurskipa Bandaríkjanna skammt undan Kóreuskaga. Þrír bardagahópar verða þá þar til (á)taks ásamt strategískum sprengjuflugvélaflota Bandaríkjanna á Guam. Í Persaflóa er fjórða flugmóðurskipið staðsett, USS George H.W. Bush og árásarhópur þess, til að tryggja að Asíulönd geti keypt olíu og fengið hana afhenta með skipum sem sigla þurfa um kyrkingarsund guðsins gamla Hormoz. Eins og flestir vita greinilega ekki, þá stjórnast olíuverðið ekki af framboði og eftirspurn, heldur af geópólitískum veruleika heimsins. Orkumarkaðurinn, í hvaða formi sem er, er ríkjum of mikilvægur til að verðinu sé leyft að stjórnast af svo kölluðum "markaðsöflum"

2. Sama dag var nýtt flugmóðurskip Gerald R. Ford-klassans afhent bandaríska flotanum til sjóprófa og uppsetningar-fullnustu. Það verður bardagklárt eftir tæplega þrjú ár. Þetta skip, USS Gerald R. Ford (CVN 78), var smíðað í Newport News skipasmíðastöðinni í Virginíu og er dýrasta skip sem bandaríski flotinn hefur nokkru sinni fengið afhent. Það kostar tæpa 13 milljarða dala

3. Sama dag var fjárkúgunarveldi hugtilbúnaðar-delludeildar hinna alþjóðlegu afganga kommúnistaflokks gömlu sovét-akademíunnar, sparkað út úr Bandaríkjunum. Forsetinn gerir hér grein fyrir rothögginu sem dáleiða mun sjálfkeyrandi bransann undir grænar torfur

Á meðan halda Bandaríkin áfram að þróa sífellt ódýrari lyftur fyrir græjur út í geim, sem skaffa munu þeim geim-sólar-orku næstu mörg hundrað þúsund árin. Henni verður með einhverskonar bylgjum beint til réttra móttökustaða í þeirra landi. Fréttamönnum er hins vegar sagt að þróun þessa verkefnis sé fyrirhuguð mönnuð ferðalög sjálfkeyrandi sturtuklefa til Mars. Svipað og Kína sagði sömu fréttamönnum að skrokkur hins ný-gamla flugmóðurskips þeirra sem fannst í þrotabúsbókhaldi gjaldþrota sovétríkis, ætti að sjálfsögðu að vera fljótandi jómfrúarhótel fyrir ferðamenn undan sextán metra strandlengjum Hong Kong. Þegar svo til Mars er loks komið, tekur sjálfkeyrandi geðveikin við og sturtuklefinn breytist í gufuáhvolf

Íslendingar ættu að reyna að framleiða eitthvað mikilvægt og óétandi fyrir kannann. Þar sem ég bjó á Jótlandi í tæp 30 ár, áður en ég forðaði mér heim í þjóðríkið mitt burt af öskuhaugum Evrópusambandsins árið 2010, voru í litlum bæ í Terma A/S fyrirtæki framleiddir hlutar í orrustuþotur bandaríska flughersins. Þetta gæti orðið fínt hernaðartæknilegt fyrirtæki í stað steiktra hamborgara ofan í lágfargjalda fólk á bænum úr ESB. Svona fyrirtæki ætti til dæmis að liggja við Hvalfjörð eða Eyjafjörð í öruggri fjarlægð frá Stóra-Kleppi borgarinnar. Ég get þegar séð þetta fyrir mér á þessum stöðum þar sem þeir hafa felst er til þarf. Öryggi, gott fólk, hráefni, orku og óbrenglaðar sveitastjórnir

Fyrri færsla

Þýskaland ætti að segja sig úr NATO