Leita í fréttum mbl.is

Bloggfærslur mánaðarins, nóvember 2017

Til hamingju ný ríkisstjórn

Engar skammbyssur notaðar. Engin kúgun. Samt tókst þetta. Og án þess að Tími neins sérstaks ofsóknara krefðist þess að vera kominn

Katrín Jakobsdóttir vann fyrir sínu og var treyst

Bjarna Benediktssyni var treyst vel og vann hann verkið með sóma

Sigurður Ingi gerði sitt

Þetta hlýtur að geta virkað

Til hamingju með þetta Ísland! Ég óska þessari ríkisstjórn velfarnaðar

Sögulegt er að "gömlu kommarnir" landi forsætisráðherra Íslands. Ég gleðst þeirra vegna. Þetta er sögulegur atburður og markar vonandi viss tímamót

Þingið fær Steingrím J. sem forseta. Hlýtur að virka

Eins máls krataflokkurinn Samfylking hefur líklega runnið sitt eina og stutta skeið

Áfram Ísland!

Ég hlakka til 100 ára fullveldisafmælis íslenksu þjóðarinnar á næsta ári

Fyrri færsla

Ímyndaða "iðnbyltingin" eyðileggur framleiðni Vesturlanda


Ímyndaða "iðnbyltingin" eyðileggur framleiðni Vesturlanda

Grein FT: Productivity and the crisis of attention

Þessu varpar Dan Nixon fram á vef stefnudeildar breska seðlabankans. Reyndar heitir bankinn Englandsbanki eða Bank of England. Hann gefur líka út sterlingspund

Uppfært: (bein krækja á færsluna hjá BoE: Bank Underground blog)

Bein tengsl eru líklega á milli fallandi framleiðni í þróuðum hafkerfum og innleiðingu stafrænnar tækni, sérstaklega snjallsíma, segir í skrifum seðlabankamannsins

Þetta er ansi áhugaverð tilgáta hjá Nixon. Ég hef alltaf sagt að það ætti að banna tölvur í grunnskólum (og snjallsíma, þeir eru tölvur)

Og ég hef líka alltaf sagt að forðast ætti fyrir alla muni galopin skrifstofurými. En það verður náttúrlega ekki gert fyrr en að fyrirtækin fara á hausinn. Það er ekki hægt að hugsa í þannig umhverfi. Enda hugsaði enginn neitt og hrunið skall bara á sérfræðingum sameinuðu opnu skrifstofuveldanna. Eitt púff og allt var farið

Og svo kórónar Nixon getverk sitt með því að vera mér sammála um að "Big Data" sé líklega algerlega útúr-tilgangslaus heilaspuni og bara enn ein kenningin veidd upp úr salerni, eða búin til hjá sérfræðingum í opnum skrifstofurýmum, nema hvað. Músasmellirnir og önnur notendaviðbrögð eru mest suð frá taugaveiklun og skorti á einbeitingu. Það er það sem "big data" er. Betra hefði verið að taka snjókorn upp á disk og kalla þau "big data" - stór-gögnin miklu

Þannig var það með "nýja hagkerfið", sem um tíma seldist vel. Síðasti söludagur þess reynist þó vera 1. janúar árið 2000. Þá sprakk það

Mamma mamma!, allir eru að iðnbylta sér, má ég ekki líka. Jáh, allir eru..

Fyrri færsla

Taparar virðast ætla að snúa bökum saman


Taparar virðast ætla að snúa bökum saman

Vestur-Þýskalandi: fyrir tíma Evrópusambandsins - 1986

****

Verður Angela Merkel áfram leiðtogi taparanna ?

Nú berast þær fréttir frá Þýskalandi að íhaldsmenn og sósíaldemókratar hyggist halda tapsferðinni áfram í nýrri samsteypustjórn

Stjórnarmyndunarvandræði í Þýskalandi eru til komin vegna þess að kjósendur sáu ekki lengur mun á flokkunum tveimur sem ríkt hafa sem ein samsteypa yfir Þýskalandi í 12 ár. Þess vegna flúðu þeir þessa flokka. Og stjórnarflokkarnir tveir töpuðu því kosningunum

Tap CDU/CSU íhaldsflokks Angelu Merkels varð það versta í sögunni eftir síðasta stríð. Tap SPD sósíaldemókrataflokks sósíalista varð líka það versta í sögunni eftir stríð. Hrun þessara tveggja flokka varð vegna samvinnu þeirra

Samvinna flokkanna varð að samsæri gegn kjósendum. Og kjósendur brugðust við, vegna þess að hægri og vinstri mega aldrei vera sammála um allt það mikilvægasta. Það er stranglega bannað, því það er samsæri gegn kjósendum. Kjósendur fyrirlíta því tapsflokkana fyrir að þora ekki að halda skoðunum sínum á lofti

Og nú eru kjósendur þessara tapara farnir. Þeir sögðu bless. Og tapsflokkarnir tveir reyna að axlayppa þá staðreynd burt með því að snúa bökum saman um að þeir kjósendur sem flúðu einmitt þá, komist hvergi annarsstaðar í aðstöðu til að hafa áhrif á landsstjórnina. Þetta er ávísun á enn frekari harkfarir. Þetta er líka heilabilun

Tapararnir sigra. Sigurvegararnir tapa. Og sigurvegararnir komu flestir úr tapsflokki Angelu Merkels:

FDP eða Frjálsir demókratar fengu 2,2 milljón nýja kjósendur og töpuðu 40 þúsund af sínum gömlu yfir til AfD. Af þessum 2,2 milljónum nýju kjósendum komu 1,36 milljónir úr flokki Merkels og 0,45 milljónir komu frá sósíaldemókrötum

AfD eða Valkostur fyrir Þýskaland, fékk 2,27 milljón nýja kjósendur og komu tæplega milljón þeirra úr flokki Merkels. Hálf milljón kom frá sósíaldemókrötum og tæplega önnur hálf milljón kom frá Die Linke eða Vinstri. AfD fékk einnig 0,7 milljón nýja kjósendur sem ekki höfðu kosið síðast, eða voru nýir kjósendur

AfD er nú þriðji stærsti stjórnmálaflokkurinn í Þýskalandi. Næst verður hann orðinn næst stærsti flokkurinn og FDP sá þriðji stærsti, því miðvinstrið virðist búið að vera. Það er orðið svo ESB-klesst

Þýskaland þarfnast stjórnmálaflokka sem eru ósammála um þá framtíð sem bíður landsins og sem byggja á lærdóm um það slæma sem kom landinu í þessa aðstöðu; og hið slæma er einmitt sjálft Evrópusambandið, sem svo gerði. Það samband, sem í litlu sem engu sambandi er við neina kjósendur í Evrópu, er hægt en örugglega að rústa þýskum stjórnmálum

Kjósendur fyrirlíta meginflokkana fyrir að vera aular og eru þeir flokkar því óðum að breytast í flokkasprænur á meðan hinir byggja sig upp og taka við sem nýir meginflokkar. Þýskaland er byrjað að ramba og vambast. Það sullast til í 1949-sökklinum. Landið er ekki að hrynja, að minnsta kosti ekki enn sem komið er. En það mun ekki leiða neitt nema tap ofan á tap, ramb, vamb og sull næstu árin

Og næst þegar kosið verður, er eins líklegt að þá hefjist formleg endalok Evrópusambandsins, sem -eins og David Cameron orðaði það- hefur eitrað stjórnmálin, áratug eftir áratug eftir áratug

Unga fólkið í Þýskalandi þarf ekki lengur á samviskubitvopnum að halda. Það hefur ekkert með þau að gera. Íhaldsmenn geta eðli málsins samkvæmt ekki endalaust verið í stjórn með úniversalistum, án þess að rústa sjálfum sér í leiðinni. Íhaldssamt Þýskaland veit vel hvað slíkt þýðir

Hvað gerist næst í Þýskalandi? Það er nýja spurningin á meginlandi taparanna. Sú spurning þótti óhugsandi fyrir bara 9 árum síðan. Hvað gerist næst!

Fyrri færsla

Konungur Bandaríkjadalur ríkir enn og fastara


Konungur Bandaríkjadalur ríkir enn og fastara

Myndskeið: Bandaríkjadölum hent niður

Þrátt fyrir 40 ára samfelldar hrakspár um að konungsríki Bandaríkjadals sé að gufa upp, á ekkert slíkt sér stað í veruleikanum. Þar sannast að lítið er að marka það sem fólk segir og ættu menn frekar að fylgjast með því sem þeir og markaðir gera. Samkvæmt neytendakönnun sagðist til dæmis næstum enginn hafa keypt hljómplötu með Heino í Þýskalandi, en samt hafði hann selt meira en 50 milljón eintök í landinu. Og í Svíþjóð seldu Vikingarna fleiri plötur en Abba, þó svo að aðeins fáir segðust eiga þær. Líklegt er að Geimundur Valtýsson, BG og Ingibjörg lúti sömu lögmálum hér heima og við skulum ekki minnast á sjálfan Donald J. Trump sem enginn segist hafa kosið, því það þykir ekki nógu fínt til opinberrar frásagnar

Sem sagt, nú er Bandaríkjadalur með stærri hlutdeild í skuldbindingasafni evrópskra viðskiptabanka en evran er með. Það þýðir að öryggi er talið betra og stærra ef Bandaríkjadalur er notaður sem mynt þegar markaðsaðilar veita lán og þeir taka á sig skuldbindingar. Þá er það Bandaríkjadalur sem er myntin sem tekið er mark á frekar en allt annað í myntsafni veraldar. Einn vegur og Eitt belti Kína er nú byrjað að snúa upp á sig og mun enda sem óteljandi snærisspottar til að hengja upp skreið á turnspírur kínverska hagkerfisins sem falla mun saman í einn lágvaxinn hjall, sannið þið til - og lesið varir mínar; hjall

Hvað varðar seðlabanka veraldar þá eru þeir að auka hlutfall Bandaríkjadals í forðum sínum. Engum líkar kínversk gjaldeyrishöft til bjargar miðstýrðri gengisbindingu, pólitískar peningaskammtanir evrusvæðis og sú sívaxandi pólitíska áhætta sem orðin er krónískt vaxandi innbyggður veikleiki í myntir eins og evru og kaldri kommamynt Kína

Enginn getur hreyft litla fingur í veraldarhagkerfunum án þess að rekast á einn eða annan hátt á bandaríska hagkerfið, sem er svo yfirgnæfandi stórt og voldugt að allt sem þar gerist eða gerist ekki, hefur áhrif á alla

Ný stýrivaxtahækkun bandaríska seðlabankans mun líklega koma fyrir áramót og skattakerfisbreytingar Trumps forseta hafa getuna til að auka enn skort á dölum erlendis, því stór hluti bandarískra fyrirtækja mun þá taka hagnað sinn heim og telja hann fram þar. Samtímis er bandaríski seðlabankinn að sjúga inn það fé sem hann sleppti lausu sem fljótandi fúkkalyfi á síðustu kreppu. Hann lítur svo á að sjúklingurinn þurfi ekki lengur á lyfjagjöf að halda

Á sama tíma óttast Þjóðverjar manngerða verðbólgu úr turnspírum ECB-seðlabankans. Þeir vita sem er, að sá banki sprengdi Suður-Evrópu alla í loft upp með neikvæðum raunstýrivöxtum og þýskum peningum og óttast nú að þýska hagkerfið sé næst á sprengilista þess glataða seðlabanka heimilislausrar myntar

Í nótt hrundi Suður-Kóreanska Samsung um rúmlega fimm prósent á mörkuðum vegna lægri einkunnar frá Morgan Stanley, sem sagði að Suður-Kórea og stór hluti Asíu sé kominn of djúpt á kaf í hálfleiðara. Sá bisness er að mínu mati orðinn hálfleiðinlegur og hálfglataður, því stór hluti alls tölvunarbransa veraldar er kominn á síðasta snúning og stórkostleg töp bíða þeirra sem ráða ekki algerlega sjálfir yfir sínum platformi öllum, frá a til ö. Þ.e. bæði yfir vél- og hugbúnaði og þar með talinni hönnun og framleiðslu örgjörva. Og það gerir Samsung bara alls ekki. Fullt stopp..

Krækja, WSJ: King Dollar

Fyrri færsla

Gamaldags katalógar sendir í póstkassa fólksins á ný


Gamaldags katalógar sendir í póstkassa fólksins á ný

Bandarískar póstversalnir eru byrjaðar að senda prentaða katalóga út í póstkassa fólksins á ný. Í fyrsta skiptið síðan 2011 hefur Sears sent jólapöntunarlistann sinn á prentuðu formi út í póstkassa fólksins. Ástæðan er sú að þar standa listarnir skínandi upp úr öllu öðru, því allir hinir eru komnir með allt sitt á netið, þar sem ekkert stendur lengur uppúr, nema kostnaðurinn, svik, prettir og svínarí og núll lifandi persónuleg þjónusta. Á netinu kafnar allt því þangað eru allir komnir og kostnaðurinn við netið er ekkert smáræði og oftast stórkostlega vanmetinn. Sérstaklega vanmetinn er tæknilegi kostnaðurinn við ónýt tölvukerfi með ónýtum stýrikerfum -bæði hjá seljanda og kaupanda- og lélegum hugbúnaði sem ekkert getur og sem samkvæmt eðli þessarar úreltu tækni, getur ekki vitað hvort að hann er að keyra vírusa, þjónusta glæpagengi, eða ekki. Kallast hann því snjall og er helsta verkfæri hettuklæddra aumingja

Allt þetta dót er nú svo vonlaust ónýtt að engin leið er að bæta þessa tækni. Hún var svo hroðalega gölluð frá byrjun, að hún svarar til hestvagns sem settur var framan á eldflaug. Og nú er bara að bíða þess að greiðslukortum og upplýsingum um alla viðskiptavini og birga Amazons verði stolið. Það getur varla verið lengra í það en að tölvuvæddum ríkisstjórnkerfum landa verði algerlega rústað

Og þegar það rennur upp fyrir svokölluðum "fjárfestum" að arðsemi netverslana á borð við Amazon er og verður jafn hlægilega hversdagsleg og arðsemi lágvöruverslana með matvæli, þá mun fjögur hundraðfalt verð hlutabréfs í þannig fyrirtæki miðað við hagnað þess, virka jafn hlægilega og túlípanageggjun fyrri tíma virkar á menn í dag. Svipað og stafrænar myntir virka á þá sem standa einn slæman dag með bara núllið í stað eins í miðjunni á einu stóru slíku núlli úr tvíundarkerfi. Falsaður Picasso eftir fimm ára barn mun þá verða eftirsóttara verk miðað við slíkar raf- og stafrænulausar heilastöppur nútímans

Tölvunarbransinn er nú staddur á þeim aldri sem bílaiðnaðurinn var á í kringum 1970. Ekkert merkilegt nýtt hefur fæðst í tölvunarbransanum síðustu áratugina nema þá helst nýir vírusar, ný göt, nýir gallar og uppfærslur til að laga gapandi og ólæknandi fæðingargalla þessa drasls, sem nú er búið að klæða í hið fárnalega hugtak "snjalltæki" í stað réttnefnisins "taugahrúgald". Og svo uppfærslur á fæðingargalla þeirra uppfærslna, og svo koll af kolli. Ef fólk vill varðveita gögn þá mega þau helst ekki koma nálægt stafrænni tækni. Íslendingar ættu engin handrit í dag ef þau hefðu verið búin til með tölvutækni. Þá ættu þeir ekki neitt

Stærsta hefðbundna póstverslun sem ég hef heimsótt og skoðað var Littlewoods í Stóra-Bretlandi, þar sem met fyrirtækisins var að senda út 17 milljón vörur á einni viku. Tíu þúsund manns unnu þá hjá Littlewoods. Alla katalóga fyrirtækisins frá upphafi er enn hægt að skoða og lesa. Alvöru póstverslanir urðu alltaf að leitast við að veita betri þjónustu en hefðbundnar versalnir, ef þær áttu að lifa af. En netið hefur nú komið flestum þessara fyrirtækja fyrir kattarnef, eða þau verið seld í bútum. Tímarnir breytast og fólkið með. En þó samt ekki

Póstþjónustan á Íslandi er nú komin meira en 100 ár aftur í tímann og í Danmörku svarar póstþjónustan þar til þeirrar þjónustu sem veitt var um 1780. Apar stýra för í báðum löndum

Á níunda áratug síðustu aldar fór konunglega breska póstþjónustan í pakkaverkfall og allar helstu póstverslanir landsins brugðust við með því að setja á laggirnar eigin dreifingarkerfi. Það þarf að bregðast við núna. Greinilega

Fyrri færsla

Staðan í Evrópu og víðar 10 árum síðar


Staðan í Evrópu og víðar 10 árum síðar

Miðað við hið langa ár í vörslu svo kallaðra "sérfræðinga" frá 1945 til 2007, hefur eftirfarandi gerst í Evrópu og heiminum öllum. Sérstaklega á útópíuárunum miklu frá 1990 til 2008:

Hagfræðikenningar sýndu sig sem verandi aðeins þunnur glær glassúr á veröldinni allri. Þær kenningar komu hvorki heiminum úr sporunum né stöðvuðu hann, nokkru sinni. Þær skipta svo litlu máli í samanburði við það sem mestu máli skiptir, og það er þetta: (1) Þjóðir. (2) Þjóðríki. (3) Geopólitík (þ.e. landfræðilega knúnir grundvallarhagsmunir þjóða). Þetta þrennt stjórnar heiminum en ekki hagfræði né pólitísk hugmyndafræði. Veröldin í dag er gerilsneydd af hugsjónum og pólitískri hugmyndafræði. Það sem stýrir henni eru þjóðir, þjóðríki, trú þeirra og geopólitískir hagsmunir þeirra. Öll skurðgoðin gömlu eru nú dauð og Guð einn lifir óháð öllum og öllu. Hagsmunir allra þjóða munu þó ekki ná fram að ganga og illa mun fara fyrir sumum

Hagkerfi þjóðanna eru að komast að því að þau hafa ekki lengur efni á kenningariðnaði sem framleiðir blaður, tonn-blaðsíður eftir tonn-blaðsíður. Endalaust tonna-magn af blaðri, bæði í hinum opinbera geira og einkageiranum. Og þjóðþingin munu komast að hinu sama. Þau geta ekki lengur lifað á blaðri. Og það getur hjálpariðnaður góða fólksins ekki heldur. Sumir háskólar munu loka, því þeir eru komnir út í rugl og framleiða tonn af rugli

Alþjóðastofnanir hafa runnið sitt blómaskeið vegna þess að þær eru orðnar meira til óþurftar en gagns. Þær lifa aðeins svo lengi sem þjóðirnar leyfa þeim að lifa, því allt vald er hjá þjóðunum en ekki hjá hinum alþjóðlegu stofnunum. Þegar þessar stofnanir hætta að þjóna þeim sem knýja þær og fjármagna, þá deyja alþjóðastofnanirnar sínum stofnanadauða eins og alltaf. Nýjar verða svo ef til vill til í kjölfar næstu stóru kasta

Evrópusambandið er lifandi dautt og í dauðteygjum. Þjóðirnar hafa fengið nóg af því, nema þær þjóðir sem nota það til að kúga aðrar þjóðir. Sambandið er að brotna og þorna upp í fjögur þurr á manninn brotabrot:

1. Intermarium-svæðið sem að öllu leyti er mikilvægasta svæðið í álfunni (stöðvunarlínan upp að Rússlandi og Úkraínu). Þetta er hin gamla Intermarium-hugmynd Józef Pilsudski sem er að fæðast í dag og hefur verið í fæðingu í nokkur ár. Grunnurinn er kominn

2. Miðjarðarhafsklúbbinn sem Frakkland mun ganga í að fullu aftur, ef ekki á að koma til uppreisnar meðal Frakka

3. Þýskalandsliðið, með nokkur keimlík lönd á sporbraut umhverfis sig, þ.e. ef Þýskaland kemst ekki austur

4. Sæfaraþjóðirnar í Skandinavíu og Stóra-Bretland

Athugið: Nýtt Tyrkjaveldi er í smíðum, sem svo mun éta sig uppeftir eins langt og það kemst, eins og síðast

Ísland mun þurfa að stórefla skipa- og loftrýmiskost Landhelgisgæslunnar og taka sig á í NATO. Sjóherir allra flotaþjóðanna standa frammi fyrir stóraukinni uppbyggingu í flotastyrk. Tröllaukinni uppbyggingu, því hann er ekki svipur hjá sjón miðað við áður

Nokkuð frjálsir kapítalmarkaðir verða áfram, þrátt fyrir dauðadá flestra hagfræðikenninga, nema að því leyti að öllum þjóðum veraldar verður ekki lengur leyft að henda öllum umframsparnaði hins opinbera og einkageirans í hausinn á galopnum kapítalmörkuðum Bandaríkjanna, nema með tröllslegri hækkun á Bandaríkjadal, sem þá lætur Bandaríkin kaupa heiminn upp, ef menn halda áfram að ætlast til að Bandaríkin taki við sparnaði veraldar sem enga vinnu kemst í heima hjá sér, eins og til dæmis er staðan í Þýskalandi

Pólitískan stöðugleika verður aðeins að finna í Bandaríkjum Norður-Ameríku alla þessa öld og næstu aldir. Restin af veröld okkar verður ófrýnileg ásýndar, nema aðstoðar Bandaríkjanna njóti við. En þau geta þó ekki verið allstaðar samtímis

Engin svo kölluð "fjórða iðnbylting" verður. Allir tölvunarinnviðir veraldar eru á síðasta snúning og sá iðnaður er búinn að vera nema að algerlega nýtt verði til. Og það er alls óvíst að það verði stafrænt

Enginn veit hvaðan næsti leggur iðnbyltingar mun koma, en hann mun þó ekki byggja á neinu sem þekkt er í dag og allra síst byggja á neinu sem tengist örgjörvum og stafrænni tækni, því það koncept allt saman, er ónýtt, eins og allir sjá, en vilja samt ekki horfast í augu við. Sú tækni er ekki komin til að vera, öfugt við iðnbyltingartækni eins og pípulagnir með rennandi vatni og salernum á hverju heimili. Hvað tekur við af þekktri tölvunartækni veit enginn opinberlega enn. En tími þekktrar tölvunartækni er að renna út

Fyrri færsla

Goðsögnin um "þýskan stöðugleika"


Goðsögnin um "þýskan stöðugleika"

Germany 1866-1945 - The Institutional Structure of the Empire - G. A. Craig síða 38-39

Mynd: Bókin "Germany 1866-1945". Kafli: The Institutional Structure of the Empire - Gordon A. Craig, blaðsíða 38-39. Craig sat 24. mars-fundinn 1990 með frú Margaret Thatcher (FT). Lítið vissi Ulysses S. Grant forseti Bandaríkjanna um hversu mikið yrði hlegið að heillaóskaskeyti hans til nýs og sameinaðs Þýskalands og hugmyndum hans um lýðræðisþróun þar. Prins Bismarck hefur velst um af hlátri

****

Maður fer að verða ansi þreyttur á þýskt slefandi Germany-fetistum um það sem þeir kalla "þýskan stöðugleika"

Þetta land, ef land skyldi kalla, var stofnað 1871 og næstum því ekkert gott hefur komið út úr því síðan þá. Heilar tvær andskotans heimsstyrjaldir! Heil fjögur ríkisgjaldþrot, tvö fyrir og tvö eftir stofnun sameinaðs Þýskalands!

Krónískt kengruglaður seðlabanki sem fláði þjóðina inn að beini á altari forheimskandi kenninga um peningamál. Stofnanavætt kukl og meira kukl er það sem einkennir ríkið. Pervertar hugmyndir um efnahagsmál

Enginn í Þýskalandi kann hagfræði. Enginn! Landinu er stjórnað af utanþings þríhyrndum aðli og mafíu

Sitjandi kanslari er algerlega tóm tunna og allir kanslarar frá og með 1945 hafa verið ofverndaðir. Sá síðasti er vangefið fífl

Helstu bankar og ríkisstofnanir landsins hafa tekið þátt í öllum verstu svindl og svikaprettum sem til eru í heiminum

Hefði landið haft kjarnorkuvopn þá væri það búið að nota þau á Evrópu, mörgum sinnum, því það er svo stöðugt til vandræða með sig sjálft og nágranna sína. Landið hefur aldrei getað staðið sjálft. Aldrei

Enginn stöðugleiki hefur verið í landinu nokkru sinni. Frá stofnun þess 1871 og fram til 1945 klúðraði það lífi sínu verst allra landa í mannkynssögunni

Frá og með 1945 og til 1990 var það Washington sem skaffaði landinu líf og stöðugleika, verndaði vinnumarkað, fyrirtæki og peningakerfi landsins frá því að tortímast í nýju þýsku rugli

Frá og með 1993 og til 2017 hefur endursameinað Þýskaland stútað meginlandi Evrópu á ný og sundrað því. Einu sinni enn. Já, einu sinni enn!

Hvað eru menn að tala um? Þetta ríki er misheppnað. Flestar verstu og sótsvörtustu kenningar á sviði stjórnmála var ungað út í þessu landi. Allt saman alger þvæla frá upphafi til enda. Er ekki kominn tími til að leggja gömlu blautu draumunum og hætta fiktinu við gamla delluverkið?

Evrópa er nú að renna inn í nýtt upplausnarferli sem endað getur alveg hroðalega illa. Alveg hroðalega illa. Meginlandið er búið að vera. Það er orðið hættulega misheppnað fyrirbæri. Hættulega misheppnað

Bandamenn hefðu aldrei átt að samþykkja endursameiningu Þýskalands, en hún er verstu geopólitísku mistök álfunnar á síðari tímum

Perspektíf Þýskalands

Mynd: Perspektíf Þýskalands á nágrenni sitt - utanríkismálalegt útkíkk landsins

Fyrri færsla

Þýskaland: Stjórnarmyndun í strand ?


Þýskaland: Stjórnarmyndun í strand ?

Myndband: Donald J. Trump forseti Bandaríkja Norður-Ameríku gerir grein fyrir tólf daga ferð sinni til Asíulanda. Lengstu för Bandaríkjaforseta í aldarfjórðung. Allt skal reynt til að leysa Norður-Kóreu-málin á friðsaman hátt. Svo kallaðir blaðamenn náðu þessu með þurran munn, en ekki hinu. Skattakerfisbreytingar Trumps voru samþykktar í fulltrúadeild bandaríska þingsins í gær, en ekki í reykfylltu bakherbergi

****

Í gær hnutu stjórnarmyndunarviðræður í Þýskalandi um þann tímafrest sem stjórnarmyndunar-flokkarnir höfðu sett sér. Engin stjórn er enn mynduð eftir átta vikna óformlegar viðræður og landið þokast lítið í neina ákveðna átt, nema í átt til þess smitandi stjórnleysis sem evran og myntbandalag hennar hefur grafið sem óendanlega djúpa gröf handa öllum ríkisstjórnum evrusvæðis. Verstu þrætumálin tengjast meðal annars þeim pening og alls þess sem hann hefur eyðilagt í Evrópu. Formlegar stjórnarmyndunarviðræður eru ekki einu sinni hafnar enn. Kosið var 24. september

68 prósent þýskra kjósenda vilja nýjar kosningar í hvelli, ef þessi ákveðna stjórnarmyndun fer út um þúfur. Og þær kosningar myndu fara enn verr með flokk Angelu Merkels og sósíaldemókrata, ef marka má ZDF. Angela Merkel er nú leiðtogi hins stjórnlausa heims evruríkja og ný bankakreppa bankar á dyrastafi Ítalíu, eftir að evran sparkaði útidyrahurð ítölsku þjóðarinnar varanlega af hjörum - og við skulum ekki minnast hér á tifandi Spán og öll hin evrubrunalöndin í sárum

Gerhard Schröder fyrrverandi kanslari og formaður þeirra þýsku sósíaldemókrata sem enn eru eftir, segir að ef þessi ákveðna stjórnarmyndun CDU/CSU+FDP+græningja takist, sem hann telur ólíklegt, að þá muni sú stjórn ekki halda nema í tæpt ár, því CSU muni tapa kosningunum í Bæjaralandi næsta haust - og að SPD-flokkur sósíaldemókrata verði því að gera sig kláran fyrir kosningar frá og með nú, því þær verði ekki seinna en í ársbyrjun 2019, eftir rúmt ár

Sex til tuttugu prósent af öllum stórum fyrirtækjum á evrusvæðinu eru nú gangandi gjaldþrota og fara fjármunir bankakerfanna í að lána þeim áfram fyrir taprekstri svo þau taki ekki bankana með sér í fallinu. Bankarnir sækja sér þetta fé til ECB-seðlabankans og kveikja svo í því. Þess vegna geta þeir ekki lánað þeim fyrirtækjum fé sem enn eru heilbrigð. Fjármálakerfi evrunnar er orðið að múmíusafni í takt við steingervingamyndun fyrirtækjanna í evrum. Í Suður-Evrópu eru fyrirtækin svo illa farin að þau geta ekki einu sinni nýtt sér ferskt fjármagn; því þau eru einfaldlega orðin varanlega örkumla í evrum og verður ekki bjargað (krækjur WSJ | OECD)

Við erum að upplifa síðustu daga Þýskalans eins og við höfum þekkt landið frá styrjaldarlokum. Það stefnir líklega austur, því ESB er að verða þurrausið sem verndarkragi landsins (e. buffer zone) og komið inn í óafturkallanlegt upplausnarferli. Í fyrsta sinn síðan 1945 hefur þýska ríkisstjórnin látið herstjórn landsins framkvæma strategískt mat á stöðu Þýskalands, sem aldrei í sögunni hefur getað staðið sjálft. Sex sviðsmyndir voru dregnar upp í skýrslu sem heitir (e.) Strategic Perspective 2040. Í aðeins tvennum af sex sviðsmyndum varnarmálaráðuneytisins, inn í framtíðina, lifir Evrópusambandið sjálft sig af. Og þó var skýrslunni skilað árið 2014, þegar aðeins sást í efstu tinda borgarísjakanna. Þýskaland er því byrjað að búa sig undir það sem mörgum er að verða nokkuð ljóst; þ.e. hið versta. Það mun vopnast á ný og þar með talin verða líklega eigin kjarnorkuvopn, nema að þau falli Þýskalandi til úr austri, velji landið þá leið inn í óvissa þýska framtíð

Óvissa hefur einkennt Þýskaland frá stofnun þess 1871. Enginn í Evrópu veit með vissu hvert Þýskaland stefnir þá og þá stundina, því landið veit það ekki sjálft; það er óútreiknanlegt miðflóttaafl á meginlandi Evrópu og mun ávallt sundra því, frekar en allt annað. Það er ófært um hvíla í sjálfu sér

ESB-vandamálin í Evrópu hrannast óstöðvandi og stjórnlaust upp og þau koma einnig fram í NATO - þar sem Þýskaland krefst þess að NATO sé helst bara  "pólitískt bandalag" en ekki fyrst og fremst hernaðarlegt, svo það loki ekki á leið þess sjálfs austur. En Bandaríkjaher hefur nú rennt í hlaðið í Póllandi og örvænting Þýskalans eykst. Mun það lokast inni á ný?

Myndband: Bandaríkjaher -óháð NATO- rann í Intermarium-hlaðið í Póllandi í janúar. Landleið Þýskalands austur fer að verða grjóti stráð. Þýskaland með ESB í rassvasanum ofsækir því Pólland og Ungverjaland allt hvað það getur. Það á ekki sameiginlegra hagsmuna að gæta með Intermarium-löndum Austur-Evrópu. Þau lönd búa ekki á sömu plánetu og Þýskaland og Frakkland

****

Fyrri færsla

Stuttar en merkilegar fréttir


Stuttar en merkilegar fréttir

Donald J Trump

Þegar Barack Obama heimsótti Kína neyddist sá forseti til að skríða út um afturendann á Air-Force-One flugvélinni og berjast í gegnum múr af Kínverjum sem undirstrikuðu að hann væri á þeirra flugvelli og ætti eiginlega ekkert að vera þar. Og að fylgdarlið hans væri bara helst að flækjast fyrir

Þegar hins vegar Donald J. Trump lenti í Kína í síðustu viku var öllu tjaldað til og þvílíkur vörður staðinn honum til heiðurs. Rauðir dreglar í endalausum bunum voru lagðir fram - fyrir hann. Hann var nefnilega nýbúinn að segja Kínverjum að fara til fjandans og éta það sem í maga þeirra mun frjósa hagi þeir sér ekki vel. Á meðan á ferð Trumps stóð lágu þrjú kjaftstoppandi drekkhlaðin flugmóðurskip af umþjótandi ísenkrami undan Suður-Kína og Kóreuskaga, - svona til öryggis

1. USS Ronald Reagan (CVN-76)
2. USS Theodore Roosevelt (CVN-71)
3. USS Nimitz (CVN-68)

Donald J. Trump er orðinn vinsælasti forseti Bandaríkjanna meðal Asíubúa og kínversks almennings, sem svo ofboðslega þreyttur er orðinn á pólitískum rétttrúnaði. Þegar sá almúgi sér ekta-vöruna með gult hár koma fljúgandi til landsins, þá halda honum fáir múrar og síst af öllu ritskoðandi eldveggir ríkisstjórnarfjandans

Vinsældir Trumps sem Hitlers í skeinipappírum dagblaða og geislabunum svo kallaðra ljósmyrkursmiðla, eru að dala hressilega hratt. Hann nýtur nú meiri stuðnings en þegar hann var kjörinn (Washington Post). Og þegar draga þarf hið hroðalega ár sömu fjölmiðla saman um áramót (höfundur Dilberts og einn sá fyrsti til að sjá kosningasigur Trumps fyrir) -í hinum sömu vonlausu miðlum- þá vandast málið fyrir afturendapappíra veraldar (Gingrich), því allt sem Trump sagðist ætla að gera hefur hann gert eða er að gera

Þetta var sennilega síðasta diplómataskip Trumps til Asíu, áður en hann slær til gegn kjarnorkuvopnabrölti Norður-Kóreu. En fyrst fór hann til Sádí og keyrði kartöflustapparann í kok þess batterís og eru þarlendar konur nú allt í einu á leið undir stýri, sem er heimsendafrétt fyrir marga. Ef þið stoppið ekki fjármögnun ykkar á ömurleikaliðinu um allan heim, þá er úti um ykkur, sagði hann

Fyrri færsla

Á xD að verða pólitísk þreskivél fyrir VG?


Á xD að verða pólitísk þreskivél fyrir VG?

Því er ekki hægt að neita að mögulegir samstarfsflokkar í ríkisstjórn eru allir mannanna verk og sumir þeirra jafnvel orðnir pólitískir óverknaðir

Fari Sjálfstæðisflokkurinn í ríkisstjórn með Vinstri grænum þá myndi hann virka sem pólitísk þreskivél fyrir VG, þar sem VG myndi uppskera vegna rekstraröryggis Sjálfstæðisflokksins

Þetta myndi hins vegar slíta hinni pólitísku vél Sjálfstæðisflokksins og bitna á honum í næstu kosningum, þar sem VG mætti til leiks með fangið fullt af afurðum sem xD hefur komið heim í hlöðu með burðarþoli og þrauki. xD myndi fá skammirnar og uppserka lítið

Níska er leiðinleg en öræti er skemmtilegt. En enginn ætti hins vegar að láta troða á sér og nudda sig niður bara af því að hann heldur að eina vandamál lífsins séu naglar. Þannig hugsa hamrar allt sitt einfalda líf. Stundum ættu naglar að fá að standa svo aðrir geti rifið sig á þeim. Ég óttast að ríkisstjórn xD með VG myndi slíta og nudda xD niður

Það sem ég skil ekki er þetta: Af hverju snýst stjórnarmyndun um Vinstri græna? Þeir eru enn sama ruslahrúgan og hundi niður úr kosningasvikum og innvortis geggjun árið 2013

Ef ekki tekst að mynda ríkisstjórn núna, þá þarf að kjósa aftur. Vonandi myndi pólitískum óverknuðum þá fækka enn frekar

Fyrri færsla

Hvað ráðleggur stjórnmálastéttin Sjálfstæðisflokknum núna?


Næsta síða »

Höfundur

Gunnar Rögnvaldsson
Gunnar Rögnvaldsson

Búseta: Ísland.
Reynsla: 25 ára búseta í ESB og fyrirtækja-rekstur í DK/ESB frá 1985 til 2010. Samband:
tilveraniesb hjá mac.com

Ég er hvorki skráður á Facebook, Twitter, Linkedin né á neinum öðrum "félags-vefjum". Aðsetur skrifa minna er einungis að finna hér á þessari síðu og á tilveraniesb.net og í blöðum og tímaritum

Bloggvinir

Innskráning

Ath. Vinsamlegast kveikið á Javascript til að hefja innskráningu.

Hafðu samband