Taka þarf þessum fréttum með fyrirvara

Sjá krækju á frétt Mbl.is neðst

Taka ber öllum fréttum um spillingu í Úkraínu með þeim fyrirvörum að um pólitískar ofsóknir og úthreinsanir getur hæglega verið að ræða

Þarna voru fimm embættismenn, þar af þrír ráðherrar, fjarlægðir á einu bretti

Vissa fyrirvara verður að hafa í huga því utanlögsögu lagaapparatið NABU sem oft sér um þessi mál í Úkraínu var sett á laggirnar af bandaríska sendiráðinu í Kænugarði eftir valdarán Bandaríkjanna, ESB og NATO í Úkraínu 2014. Og NABU hefur notað völd sín til að fjarlægja fólk sem því líkar ekki úr embættum

NABU var þannig stofnað af og stjórnað úr bandaríska sendiráðinu. Þeir sem enn muna eftir Saigon muna vel eftir svona mafíustjórnarfarsstofnunum. Þarna er því alt eins líklegt að verið sé að ganga frá pólitískum andstæðingum leppstjórnarinnar

Úkraína er því miður orðin lepp-einræðisherraríki vesturveldanna, enda kannski um eðlilegt framhaldslíf fyrir landið að ræða, því fyrir stríð var Úkraína eitt gerspilltasta ríki veraldar og íbúarnir höfðu flúið það milljónum saman. Þar er engu að treysta og forseti landsins líkist sífellt meira einræðisherra í vösum annarra ríkja. Í þessu tilfelli í vösum NATO-ríkjanna. En innan þeirrar stofnunar er flest sem kennt var við lýðræði nú að anda síðustu gufum þeirrar loftegundar út og sem sennilega fyrir töluvert löngu er útdauð undir vissum hamförum

Stríðið sem stoppaði árið 1945 í Evrópu endaði ef til vill ekki. Jú það stoppaði, en heldur hugsanlega áfram núna á ný. Þessu atriði ættu menn í það minnsta að gefa vissan gaum. Engir friðarsamningar voru gerðir og ný stjórnarskrá Þýskalands fór aldrei í þjóðaratkvæði

Öllu tiltæku liði Evrópu –og nú Bandaríkjanna líka– skal á ný stefnt gegn Rússlandi og hinn þýski þráður Adolfs Hitlers tekinn upp á ný. Barbarossa virðist halda áfram. Kenna skal Rússum nýju lexíurnar. Er þetta kannski þannig? Óhugsandi?  En í dag?

Málið er komið á það stig að telja verður líklegt að MH17- og Skripalmálin hafi verið undirbúningsrógsherferð gegn Rússlandi fyrir það sem koma skyldi, frá og með febrúarmánuði 2014, þegar vopnunar-uppstöflun NATO gegn Rússlandi innanborðs í Úkraínu hófst, eins og Angela Merkel hefur greint frá

Telja verður mögulegt að Sergei Skripal hafi verið farinn að nálgast rússnesk stjórnvöld á ný, eða þá aldrei hætt í þjónustu þeirra og því vitað of mikið um viss vesturlensk mál. Og það boðar heldur ekkert gott í MH17-málinu að gervihnattarmyndirnar sem Bandaríkin sögðust hafa og lofuðu að koma með sem sönnunargögn í málinu, skiluðu sér aldrei í réttinn. Þær virðast einfaldlega aldrei hafa verið til

Enginn veit lengur hvar Skripal feðginin eru niðurkomin og bresku réttarhöldin í málinu eru farin að líkjast farsa. Rússneska sendiráðið í Lundúnum auglýsti nýlega opinberlega eftir feðginunum

Ég er að minnsta kosti farinn að stórefast um að fréttaflutningur vesturlenskra fjölmiðla af þeim tveimur málum hafi verið nokkurs virði, fyrst að ekkert, ég endurtek, ekkert er að marka fréttir þeirra af Úkraínudeilunni, og sem reknar og pískaðar eru áfram sem eins konar framhalds-McCarthyismi

Fyrri færsla

Sendið endilega þriðja herinn

Háttsettir embættismenn hætta

Athugasemdir

[Ragnhildur Kolka, 24.1.2023 kl. 23:25]

Fyrst þú minnist á MH-17 og Scripal málið er í lagi að gauka því að hér að ég var að kaupa bók sem fjallar meðal annars um þessi mál. Hún heitir The Complete Dances With Bears Comic Og er eftir lögfræðinginn, blaðamanninn, haskóla prófessorinn og nú bloggarann John Helmer. I sambandi við MH-17 málið talar hann um sýndar réttarhöld.

Var að fá bókina og er spennt að hefja lesturinn. 

[Gunnar Rögnvaldsson, 24.1.2023 kl. 23:42]

Takk fyrir þetta Ragnhildur.

John Helmer er stórmerkilegt fyrirbæri. Hann er eini vesturlenski blaðamaðurinn sem rekið hefur sjálfstæða  frétta- og upplýsingaþjónustu frá Moskvu til handa vesturlenskum fyrirtækjum, atvinnugeirum og fjölmiðlum, og rekur hana enn, allar götur frá 1989. Þar áður starfaði hann fyrir forseta Bandaríkjanna, Jimmy Carter, forsætisráðherra Grikklands og að mig minnir forsætisráðherra Ástralíu.

Bloggsíða hans er stórmerkileg og fann ég hana síðastliðið sumar, þegar mig tók að blöskra framhalds-McCarthyisminn á fjölmiðlum okkar og þegar ég sá að engar fréttir þeirra af Úkraínumálinu stóðust.

Hún er hér: http://johnhelmer.net (Dansað við birni)

Það verður fróðlegt að heyra um hvernig þér líkar bókin.

Kveðjur