Pólland kaupir bandarískt Patriot-eldflaugavarnarkerfi

Mynd: Reuters: Pólski varnarmálaráðherrann, Mariusz Blaszczak, undirritar Patriot-kaupsaming við Bandaríkin

****

Andrzej Duda forseti Póllands hefur undirritað stærsta vopnakaupasamning Póllands nokkru sinni. Um er að ræða Patriot eldflaugavarnarkerfi sem kostar 475 milljarða króna. Kerfið mun snúa að Rússlandi. Pólland hefur verið að byggja upp landvarnir sínar frá því að það komst undan tortímandi hernámi Sovétríkjanna, sem varaði í 44 ár, eftir fyrst að hafa verið hernumið og eyðilagt af Þjóðverjum í 7 ár. Bandaríska varnarmálaráðuneytið samþykkti í nóvember vopnasölu til Póllands fyrir að minnsta kosti 1050 milljarða króna á næstu árum. Þetta er fyrsti hlutinn. Næsti hluti verður stækkun á Patriot-eldflaugavarnarkerfinu ásamt 360-gráðu ratsjárkerfi. Yfirmaður pólska hersins, Leszek Surawski, segir að með þessu sé Pólland að færast nær fyrsta flokks landvörnum og verði hér með sterkari hluti NATO-vængsins sem snýr austur. Rúmenía ákvað einnig í nóvember að festa kaup á Patriot-eldflaugavarnarkerfinu, sem alls sex NATO-ríki hafa. Pólland er eitt af þremur NATO-ríkjum Evrópu sem uppfylla sáttmálabundnar fjárframlags-skyldur sínar við NATO. Hin ríkin eru Bretland og Rúmenía. Tvö önnur evrópsk NATO-ríki teljast vera nálægt því að uppfylla skuldbindingar sínar. Þau eru: Eistland og Grikkland

Sama dag, en hinum megin landamæra Póllands í vestri, gáfu þýskar stofnanir út leyfi fyrir nýrri gaslögn á milli Rússlands og Þýskalands. Hún auðveldar Rússlandi að hertaka Úkraínu og Pólland, ef til þess skyldi koma. Lögnin liggur um Eystrasalt og gefur Þýskalandi kost á að þrífast vestan við pólskan varnarmúr, þó svo að Pólland og Úkraína séu undir rússneskri árás. Orkuleiðslan kyndir upp tilvistaráhættu fyrir Pólland. Pólsk yfiröld hafa gagnrýnt Þýskaland harðlega fyrir að haga málum sér í hag á þennan hátt, en Póllandi og Úkraínu viðvarandi í óhag

Breska innanríkisráðuneytið er nú að hefjast handa við að endurskoða dvalarleyfi 700 rússneskra auðmanna sem leyft var að búsetja sig í fjárfestingaskyni í Bretlandi á árunum fyrir 2015, uppfylltu þeir kröfur um minnst tveggja milljón punda fjárfestingar í landinu. Bretar eru nú að yfirgefa Evrópusambandið og lögsögu þess

Í dag er Evrópusambandið á lífi vegna annarra. Það lifir á náð annarra í flestum efnum. Það hefur ekki þá eftirspurn sem þarf til að geta lifað í hagsæld og öryggi. Hagsæld verður ESB að sækja til viðskiptavina fyrir utan sambandið og veltir það þar með efnahagslegum byrðum yfir á aðra í formi eigin viðskiptahagnaðar, sem til verður með því að aðrir eru látnir sitja uppi með mikinn viðskiptahalla. Þýskaland er verst í þessum efnum. Það er með stærsta viðskiptahagnað nokkurs ríkis í heiminum og er það fyrst og fremst vegna gengisfölsunar og innvortis gengisfellinga gagnvart þeim ríkjum sem eru í handjárnuðu gengisfyrirkomulagi við það (evran). Evrópusambandið hefur ekki orku til að halda hita á fólki og fyrirtækjum landanna gangandi. Rússland sér sambandinu fyrir orku að miklu leyti. Evrópusambandið getur heldur ekki varið og verndað líf borgarana og eigur þeirra gegn ógnum utan frá, og heldur ekki gegn ógnum sem koma innan frá og svo þeim ógnum sem illa grunduð tilvist sjálfs Evrópusambandsins skapar

Dagar Evrópusambandsins eru nú brátt taldir, því enginn bað um það nema fámenn elíta og nokkrir falskir þýskir fræðimenn, sem töluðu þjóðríkin miskunnarlaust niður sem göfugar stofnanir á sjötta áratug síðustu aldar, í einmitt þeim rústum sem þýsk heimspeki þeirra hafði komið til leiðar. Hefur sambandið nú skapað svo margar hættur og grafið undan velmegun, öryggi og friði í álfunni að ríkin eru hætt að taka mark á Evrópusambandinu vegna skaðsemi þess. Nú er svo komið að afkastið af eignarhlutum í 500 stærstu fyrirtækjum evrusvæðis á síðustu 12 mánuðum, er mínus eitt prósent. Helmingur tekna þessara 500 stærstu fyrirtækja evrusvæðis koma frá löndum utan myntsvæðisins og eru í Bandaríkjadölum, sem undirstrikar aðeins fáránleika og gagnsleysi evrunnar sem myntar. Hefur evran eftir aðeins 17 ár í umferð þrýst mörgum evru-löndum fram að brún þjóðargjaldþrots. Sum þeirra eru svo veikluð og sködduð að óvíst er að þau lifi af án þess að fara í nauðsynlegt þjóðargjaldþrot

****

Myndband: Rick Wakeman flytur í einleik hluta verks síns Leyndardómar Snæfellsjökuls, sem samið er í kringum samnefnda sögu Jules Verne. Þetta verk hans var á sínum tíma frumflutt og hljóðritað á tónleikum með Sinfóníuhljómsveit Lundúna og Enska kammerkórnum árið 1974. Rick Wakeman styður útgöngu Bretlands úr Evrópusambandinu. Hér er eitt stuð í viðbót með Wakeman, og svo hér í Lincoln dómkirkjunni

Fyrri færsla

Hvað stýrir Rússlandi - og Bretlandi ?

Athugasemdir

[Helga Kristjánsdóttir, 29.3.2018 kl. 00:43]

Sæll Gunnar; Byrja nú að aðlagast nýrri tölvu! Minni mitt dregur fjári langt aftur í tímann,svo langt að það flæðir samfellt frá War 2 og því ískalda,til dagsins í dag. Sömu óvinirnir tortryggja hvorir aðra og gæti ískur í hjörum landamæra eins þeirra hleypt öllu í bál og brand.Það læðist að manni sá grunur að einhvern langi að prófa nýju tólin þótt þau kallist varnarkerfi; eða hvað veit maður um þessi fjölmanneyðandi vígtól,ég á bara eftr að biðja guð að hjálpa komandi kynslóðum.  

[Gunnar Rögnvaldsson, 29.3.2018 kl. 07:39]

Þakka þér Helga

Pólland missti fullveldi og sjálfstæði sitt á sínum tíma vegna bágborinna landvarna, sérstaklega í lofti. Þess vegna var það hernumið og eyðilagt. Það ætla Pólverjar ekki að endurtaka.

Mér vitanlega hafa önnur ríki en Rússland ekki minni rétt til sjálfsvarna en Rússland. Það verða Rússar að læra að lifa með.

Þjóðaröryggisstefna landa getur aldrei snúist um að vona hið besta. Hún verður alltaf að ganga út frá hinu versta. Annars er hún ekki þjóðar-öryggisstefna, heldur þjóðar-óöryggisstefna.

Og svo gæti orðið að Pólland þyrfti einnig að verjast Þýskalandi úr vestri á ný. En með Bandaríkin sem sinn öflugasta Bandamann og það land sem á mestra sameiginlegra hagsmuna að gæta með Póllandi, er þetta hið besta mál á okkar tímum. Öll línan frá Finnlandi niður að Svartahafi (Intermarium) verður víggirt í bak og fyrir, með aðstoð Bandaríkjamanna, óháð því hvað öðrum löndum kann að finnst um það. Þess vegna er Rúmenía nefnd hér til sögunnar að ofan.

Og það er einnig vert að nefna það hér, að Rúmenía, Ungverjaland, Króatía og Makedónía ásamt Eistlandi, Lettlandi og Litháen vísuðu rússneskum diplómötum úr landi í fyrradag, réttmætt eður ei. Það verður að teljast þróun Intermarium-svæisins til tekna, en ESB til meiriháttar taps.

Kveðjur

[Valdimar Samúelsson, 29.3.2018 kl. 13:28]

Gunnar góð grein. Er þá ekki komin tími að Íslendingar læri að steinþegja og gerist hlutlaust þ.E hætti alveg að taka þátt í í rifrildi stórveldanna. ....Þeir... eru líklega byrjaðir að að flytja fólk að öllum þjóðarflokkum hingað eins það hefir sýnt sig undanfarin ár.   

[Gunnar Rögnvaldsson, 29.3.2018 kl. 13:39]

Þakka þér kærlega Valdimar.

Eins og ég hef bent Framsóknarmönnum á, þá eru einu varnirnar sem Ísland hefur sjálft yfir að ráða getnaðarvarnir. Og þær virka greinilega ekki, því eyða þarf um þúsund nýjum lífum hér á hverju ári. Við erum algerlega varnarlaus.

En verum samt róleg í bili, því Framsókn ætlar samt að leggja í þrjár umskurðarvarnir á ári og hert eftirlit með barna-perrum. Held að Framsókn sé komin í einhvers konar ofsókn í atkvæði annarra. 

Ég sé því enga von nema óhlutleysið Valdimar. Ekki ver DDRÚV okkur, því það ofsækir okkur.

Kveðjur

[Valdimar Samúelsson, 29.3.2018 kl. 16:24]

Satt Gunnar tilkynnum umheiminum hlutleysi ef það er ekki of seint.

[Gunnar Rögnvaldsson, 29.3.2018 kl. 23:35]

Nei Valdimar.

Annað hvort stend ég með mínu fólki eða fell. Ég kýs að standa. Ég er ekki hlutlaus, hvað varðar Rússland. Ef þeir yfirhöfuð gætu sannað sakleysi sitt í þessu máli þá væru þeir löngu búnir að því. En það geta þeir greinilega ekki. Svo minn hamar er falinn. Ég stend með okkur en ekki þeim, þar til annað sannast. Svo einfalt er það.

Og ég stend ekki með þeim sem brenna vilja Atlantshafs-arfleiðina til grunna og sjá helst Vesturlönd í ljósum logum. Það er tími til kominn að Rússland komi út úr skápnum eins og það er klætt, eða haldi sig fyrir sig. Ekki skal ég ónáða þá heima hjá sér við að byggja sér nýtt sovét úr síðustu stjórnarfarslegu ruslahrúgu landsins.

Góð kveðja