Summa stór fer til bankastjóra

29. blaðsíðan.

 

Góðan daginn. Ég heiti Evrópusambandið og mig vantar lán til fjárfestinga. Heimilishagir mínir eru þeir að lifandi búa nú um 500 milljón manns á heimili mínu. Þeir þurfa all mikið að borða og ýmsa aðstoð

Þetta er mikill fjöldi á einu heimili, segir hinn alþjóðlegi bankamaður. Við sáum þessa tölu birtast með brosi á vör í Landanum á sunnudagskvöldið. Þessa tölu ætti þó enginn að hafa í flimtingum. Hversu margir heimilismanna þinna hafa tekjur, spyr bankamaðurinn

Hvað kemur það málinu við, spyr summa Evrópusambandsins

Jú, segir hinn alþjóðlegi armur fjárfestingarbankans. Við sáum þessa mynd hér að ofan á blaðsíðu 29 í helgarútgáfu Morgunblaðsins. Lestu ekki Morgunblaðið. Þetta er ein stór hryllingsmynd af heimili þínu. Hver á að greiða af lánunum? Eins og staðan var við síðustu kosningar í Þýskalandi þá var meira en helmingur kjósenda þar kominn yfir sextugt. Svipað og enn verra er ástandið í næstum öllum 27 herbergjum heimilis þíns. Hver á að borga af lánunum?

Summa svarar; en við höfum jú evruna

Jahá, segir hinn alþjóðlegi bankamaður. Hverjir eru þessir VIÐ? Eru þessir VIÐ þeir sem eru atvinnulausir? Eru þessir VIÐ opinberir starfsmenn sem samkvæmt eðli sínu geta ekki búið til velmegun né verðmæti. Bara eytt þeim. Eða eru þessir VIÐ allir í þeim stóra hópi heimilismanna þinna sem bráðlega eru að koma sér í kistuna vegna öldrunar. Hvar er unga fólkið ykkar? Af hverju eru svona margir gamlir á heimili þínu. Eruð þið geld?

Alþjóðlegi bankamaðurinn heldur áfram: Við höfum einungis ákveðið fjármagn til umráða, útskýrir hann. Þið getið ekki einu sinni boðið okkur neitt gott veð. Samkvæmt skýrslu alþjóðastofnunar seðlabanka heimsins, Bank for International Settlements (BIS), mun fasteignaverð heimilis þíns falla um allt að 80 prósent á næstu fjórum áratugum. Þetta er afleiðing alls þessa heimabúandi geldneytis á heimili þínu. Hver á að kaupa af þeim eignirnar. Fuglarnir? Þið hafið lítið sem ekkert veðhæft framtíðarfólk. Minna en flestir aðrir í heiminum hafa. Heimilismenn þínir hafa einnig verið sviptir fjárráðum að hluta til. Einnig miklu sjálfræði og lýðræði, sýnist okkur. Er heimili þitt nokkuð á leiðinni að breytast í fangelsi? Við höfum ekki áhuga á fanganýlendum

 

Bankamaðurinn heldur enn áfram; Og samkvæmt útreikningum alþjóðlegra matsfyrirtækja mun ríkissjóður Þýskalands vera orðinn gjaldþrota árið 2060, vegna gífurlega þungarar framfærslubyrði öldrunarhagkerfis síns. Það fáa menntaða ungviði sem er á heimili þínu fær svo lág laun og þarf að greiða svo háa og hækkandi skatta að það flýr Vestur um haf og til Eyjaálfu. Við það versnar heimilisástand þitt enn frekar. Hver á að búa til eftirspurn á heimili þínu? Gamlingjar? Dánarbúið? Og hver á að greiða skattana sem þarf til að halda ykkur á floti?

Eins og ég sagði, við höfum bara ákveðið fjármagn til umráða og við munum ekki lána það út til deyjandi samfélaga á meðan við höfum betri og framtíðarvænlegri valkosti. Við höfum engan sérstakan áhuga á að fjárfesta í deyjandi eignum. Það ættu allir að geta skilið. Við höfum tryggari veð og bjartari framtíðarmöguleika annars staðar í heiminum. Við, peningarnir, erum að miklu leyti fluttir

Sérfræðingar í mannfjöldafræðum hafa enn fremur útskýrt fyrir okkur að heimili þitt sé læst fast í gildru lágrar frjósemi (e. low fertility trap, LFT). Engin lönd sem umfram ákveðinn tíma fara undir 1,5 lifandi fædd börn á ævi hverrar konu, ná sér upp úr þeirri gildru aftur. Ástandið hjá ykkur versnar bara og versnar. Þættir 1,2,3 og 4, fyrir neðan miðju, líta afar illa út á þínu heimili. Líkja má þessu við Svarta dauða. Það tekur ykkur 500 til 1000 ár að koma málunum í lag á ný. Fjárfestingar okkar eru ekki til svo langs tíma. Vextir okkar yrðu svo himinháir að þeir minnkuðu enn meira líkurnar á að þið gætuð staðið í skilum. Sjáðu Grikkland, Spán, Ítalíu, Portúgal og ríkisútsöluna á Írlandi? Hefurðu prófað að tala við Pútin eða Kínverjana. Þið hentið þeim sennilega eðlislega betur. Þið hafið jú dundað ykkur saman áður . . 

Gamli svarti síminn glymur á borði bankamannsins. Rrrrring! Vindlaöskubakkinn hristir í sig öskuna. Já, svarar hann, já, já, já já. Við kýlum á þetta. Akkúrat. Einmitt. Það er það flotta við þetta. Járnbrautarkílómeterinn fyrir hvert flutt tonn kostar aðeins 1/15 í Ameríku miðað við Japan og ESB. Já, þetta er mikið framtíðarverkefni og miklar vegalengdir bæði í norðri sem suðri. Já, já, sjálfbært fólk. Við segjum því já. Innsog. Tölum um það seinna. Við segjum samt já. Vertu sæll

Summan skreppur skattfrjálst saman. Segist bara vinna þarna. Og fer fyrir ekki neitt

 

Fyrri færsla

 

Landinn: kynnir neyðarbremsur þjóðþinga ESB-landa 

Athugasemdir

[Haraldur Hansson, 3.4.2012 kl. 00:42]

Tómas Ingi skrifar góða grein í Morgunblaðið í dag, eins og hann á vanda til. Hún heitir "Summa diplómatískra lasta" og fjallar um ógeðfelldan yfirgang finnska stjórans á Evrópustofu.

Gæti ekki Summa Lastanna einmitt verið finnskt nafn? Mér sýnist þú vera að tala um sama Summa, möppudýr með asnalega hárkollu sem Össur leyfir að brjóta 41. grein Vínarsáttmálans. Ég sé alveg hárkolluna fyrir mér þar sem hann situr og mænir á bankastjórann! Frábær færsla.

[Gunnar Rögnvaldsson, 3.4.2012 kl. 20:17]

Þakka þér Haraldur

Hef lesið allar greinar Tómasar Inga Olrich og þakka honum hér með fyrir þær.

Summa Evrópusambandsins virðist ekki skilja að hann er staddur í fullvalda ríki. Svona umgengnisvenjur fær maður einungs með því að ég vinn bara hjá ESB. Ég ber því enga ábyrgð. 

Ég sé járnkrumlur embættismannaveldis Evrópusambandsins í Brussel leggja hald sitt á gömlu Evrópu með afli Brusselveldis sem nú þykist komið með nýju stjórnarskrá ESB í rassvasann (Losseplads-sáttmálann). Nú verður henni veifað eins og nýjum fána, en þó fána sem enginn kaus.

Eins og sakir standa er þetta embættismannaveldi hinn eini virki herafli Brusselveldisins. En hann er þó alltaf í viðbragðsstöðu, á "high alert" og herjar stanslaust eins og við sjáum á hermangi þess hér á landi. 

Þegar hinn alvöru vopnaði her Evrópusambandsins er kominn í hendurnar á Brusselveldinu þá er of seint að gera nokkuð. Þá er spilið algerlega tapað

[Gunnar Rögnvaldsson, 3.4.2012 kl. 22:59]

KOMINN!!

Hrossagaukurinn er kominn ! 

Yndislegt.