Leita í fréttum mbl.is

Átakanleg blinda eða forheimska Evrópusambandssinna?

Því er oft haldið fram af ESB-sinnum að Evrópusambandið snúist um samvinnu þjóða hinnar styrjaldarhrjáðu og þreyttu Evrópu. Já þreytt er þessi heimsálfa sem nú hnignar hraðar en hagstofustáss Brussels nær að tilkynna almenningi í löndum sambandsins. Að allt þetta bákn sem rakið er hér að neðan snúist bara um samvinnu. Eins konar samvinnu, samyrkju, samskotum eða sameiginlegu hinu og þessu. En sem á endanum, ef ESB fær að ráða, mun auðvitað enda með samruna og þögulli eyðni þjóðareinkenna Evrópu í faðmi nýrra kynslóða. Nýrra kynslóða sem aldnar hafa verið upp í vöggu áróðursherdeila Evrópusambandsins. Fjármagnið til áróðurs er þar óendanlegt.
 
Veikastir fyrir áróðri Evrópusambandsins eru nýjar kynslóðir sem þekkja ekki neitt annað en þann massífa ESB-áróður sem þeim er kenndur frá blautu barnsbeini. Skyldumyndin af góðgerð ESB sem límd er í formi búmerkis ESB föst upp á veggi við allar mjólkurkistur og eplakassa á öllum þeim barnaheimilum Evrópusambandsins sem náðarsamlegast hafa fengið leyfi hjá Brussel til að deila út ókeypis ESB-eplum eða niðurgreidda ESB-mjólk (innflutt bannað) handa börnum. ESB er nefnilega svo gott. Ætlast er til að unga kynslóðin muni þetta þegar hún vex úr grasi þjóðríkisins og inn í ESB-baunagras Evrópusamrunans. Munið mín kæru börn eftir ESB-merkinu á vegginum við eplamjólkina sem varð að koma alla leið frá Brussel því landið þitt var orðið svo ofur-sjálfstætt á veru sinni í ESB.      

Þessu sama var þó - og alveg fram í rauðan dauðann - haldið fram um flest þau ríki sem á sínum tíma tilheyrðu Sovétríkjum Evrópu. Þar - samkvæmt öllum Fylkingarmönnum, flestum Samfylkingarmönnum og undantekningarlaust öllum kommúnistum í ytra byrði þáverandi lygavefstóls stjórnmála- og menningarelítu Evrópu - átti allt að vera svo gott í þessu sambandi ríkja kommúnista í Austur-Evrópu. Þegar valdinu nakta var beitt með kúgun, aftökum, pyntingum og útrýmingu, þá kallaðist það á vesturlandi menningarelítu Evrópu að verið væri, alveg rétt í þessu, að tryggja friðinn í Evrópu - og reyndar heiminum öllum. Tryggja friðinn! Þetta fékk maður að heyra þegar nánar var spurt til tíðinda. Alltaf var þetta alveg að koma, árangurinn var bara rétt handan við hornið hvassa.

Aðferðirnar í Evrópu hafa verið mýktar í dag. En að öðru leyti eru hvatirnar og áróðursaðferðirnar ennþá svipaðar. Lýðræðinu skal ennþá drekkt í Evrópu. Og alltaf er útópían við það að ganga upp og árangurinn er ávalt rétt handan við hornið endalausa, sem smá saman breytist í grátmúr. Nú seinast hafa menn skyndilega uppgötvað að myntbandalag Evrópusambandsins getur því miður ekki gengið upp nema að ríkisfjárlög hinna svo kölluðu ofur-sjálfstæðu ríkja sambandsins verði sameinuð og sett undir vald ókjörinna Evrópusambandsmanna Brussels, eða í það minnsta, að aðalstöðvar sambandsins verði settar sem æðsti dómari yfir því hvernig skattatekjum ríkjanna skuli varið hvað varðar mikilvægustu útgjaldaliði ríkissjóðs. Þið vitið kæru lesendur; skattatekjurnar eru þeir fjármunir þegnana sem í flestum löndum sambandsins nema allt að helmingi þjóðartekna í ríkjum sambandsins. 

Þegar betur er að gáð, munu allir sem hafa viljann til að sjá og skilja, að þarna er bara um að ræða sára einfalt innvortis valdarán ESB í dulargerfi samvinnunnar. Fullveldinu og sjálfstæðinu er stolið og það skorið undan þjóðunum í smá skömmtum. Það fer svo í farveg niðurfalls og eyðist. Hornsteinninn er holaður með reglugerðum og skrefum sem þjóðfélagslega er ógerningur að vinda ofan af aftur.  

Hefur þú einhvern tíma séð svo kallaða "samvinnu" þjóða sem krefst eftirfarandi atriða?: 

  • Hertra og hærri tollamúra gegn umheiminum
  • Eigin myntar
  • Afnám réttar þjóðríkja til að gefa út sína eigin mynt
  • Skilyrðislausrar þvingunar til að hætta útgáfu eigin myntar og skyldu til að taka upp mynt sem þú hefur ekkert um að segja
  • Eigin seðlabanka
  • Undirgangast vaxta- og peningapólitík erlends seðlabanka sem leggur efnahag lands þíns í rúst, þ.e. ef þú heitir ekki Þýskaland eða Frakkland.
  • Eigin dómstóla og löggjafar sem er æðri löggjöf svo kallaðra "fullvalda ríkja ESB" á æ fleiri sviðum
  • Óteljandi áróðursherdeilda sem einnig ráða yfir fjölmiðlum
  • Þings og þingmanna
  • Forseta og utanríkisráðherra
  • Eigin stjórnarskrár
  • Eigin lögreglu
  • Eigin komandi hervalds
  • Rétt til að nýta auðlindir annarra þjóða
  • Réttar annarra þjóða til að kjósa sig til auðæfa annarra landa
  • Fána
  • Þjóðsöng
Hér er ekki um samvinnu að ræða. Hér er verið að stofna nýtt ríki: sambandsríki Evrópu, USE.  
 
Eftir 25 ára búsetu og atvinnurekstur í Evrópusambandinu hef ég þetta að segja kjánum Íslands, sem nú eru að reyna að notfæra sér hræðslukastið sem kom þeim svo afar heppilega þegar illa reknar fjármálastofnanir hrundu á Íslandi:

Það er núna sem ferlið á að stöðva. Það er of seint að stoppa öll ferli sama hvaða nafni þau nefnast þegar inn í Evrópusambandið er komið. Þá væri, hægt en bítandi, Ísland okkur glatað. Þetta er ekki pakkaleikur. Landið okkar er í húfi.
 
Tengt
 
 
Fyrri færsla
 

« Síðasta færsla | Næsta færsla »

Athugasemdir

1 Smámynd: Ragnhildur Kolka

Og til að tryggja framhald þjónustulundar skrifstofublókanna og diplómatanna eru skattborgarar ESB-landa látnir greiða fyrir skólagöngu barnanna þeirra. Í skólum þar sem árgjaldið er 2.5 milljón kr. fyrir utanaðkomandi. Sér skólum með áherslu á tungumál og akademískt prógramm sem skilar afkvæmunum beint inn í nefndirnar og ráðin svo börn elítunnar þurfi aldrei að óhreinka sig á samkeppnismarkaði.

Árið 2013 verður áætlaður kostnaðurinn við skólagöngu ESB-elítubarna kominn í 30 milljarða króna og munar um minna fyrir aðildarlöndin sem flest eru með svelt skólakerfi. 

Ragnhildur Kolka, 17.8.2010 kl. 21:58

2 Smámynd: Jón Ásgeir Bjarnason

Þetta er alveg frábært.   Frábært bara.  ..Eða ekki.

Ég vildi óska að þú værir klikkaður.  Stíllinn gæti kanski gefið það í skyn.  Þess vegna er hann líka alveg óvenjulega skemmtilegur aflestrar :)

 Takk fyrir góða pistla sem segja allt sem segja þarf um ESB skelfinguna.

Það er það sem ESB er.  Skelfing.

Það sem Ragnheiður segir hér að ofan er ekta dæmi pólitísku elítunnar sem vex upp í svona umhverfi.  ...Viðbjóður.  Hreint og beint.  Segir sá skólaflinki! :)

Jón Ásgeir Bjarnason, 17.8.2010 kl. 22:16

3 Smámynd: Haraldur Hansson

Með dulbúnu stjórnarskránni, sem kölluð er "Lissabon sáttmáli", var ESB breytt úr sambandi 27 sjálfstæðra ríkja í eitt sjálfstætt sambandsríki. Í sameiginlegri bókun þurfa öll "aðildarríki" að sverja fána Evrópuríkisins hollustueið!

Breskir fjölmiðlar fjölluðu um nýlega um skólana sem Ragnhildur Kolka nefnir, en ESB rekur 14 skóla fyrir börn möppudýranna í Brussel. Þeir kosta breska skattgreiðendur 22 milljónir punda á ári.

Haraldur Hansson, 18.8.2010 kl. 00:03

4 Smámynd: Björn Emilsson

Ný heimsmynd er í sköpum. Þjóðverjar eru loks að ná takmarkinu, þe að leggja undir sig Evrópu. Peningarnir duga betur en byssurnar. USE á sér frekari takmörk. Alger yfirráð á Norðurhveli jarðar. Island í þeirra augum spilar stórt hlutverk þar. Afkomendur Hansa kaupmanna ráða málum í Suður Noregi, semsé þjóðverjar. Grænland hafa þeir nú þegar gegnum Danmörk. Rússarnir verða þeim sennilega erfiður ljár í þúfu, en mun takast. Vesturheimur er þegar undirlagður af þjóðverjum. Þeir stjórna hermennskunni. Gyðingar stjórna fjármagninu. Spáð er að Austurströnd USA verði yfirtekin af USE. Vesturströndin aftur á móti, fellur undir Kína.

Björn Emilsson, 18.8.2010 kl. 00:50

5 Smámynd: Valdimar Samúelsson

Þakka gott innlegg í á móti ESB við verðum að berjast með kjaft og klóm  en í sannleika sagt þá þar löggjafavaldið að kæra Landráð sjá blogg mitt.

Valdimar Samúelsson, 18.8.2010 kl. 13:06

6 Smámynd: Einar Solheim

Rosaleg eruð þið biluð :)

Áhugavert samt að ESB-sinnar eru hættir að nenna að rífast í þessu bulli sem Gunnar lætur upp úr sér.  Sama gildir um mig :)

Endilega njótið nú síðustu áranna án veru í ESB, því þar verðum við

áður en þið getið sagt "öfgafullir þjóðernissinnar".   

Það er ljóst á ykkar öfgamálflutningi að ykkur verður ekki boðleg veran á fórsturjörðinni þegar við verðum gengin í ESB, þannig að ég mæli með að þið leggið eftirfarandi slóð í minnið:

http://en.wikipedia.org/wiki/Suicide_methods

...ó mæ god.

Einar Solheim, 18.8.2010 kl. 15:22

7 Smámynd: Einar Solheim

ps:  Hvað heitir það aftur þegar maður hatar eitthvað ástand en kýs að lifa við það í 25 ár?  Heimska?  Kvalarfíkn?  Líklega hægt að kalla það hinum ýmsu nöfnum, en að eyða bróðurpartinum af lífi sínu í þessu djöfullega ESB - ótilneyddur - lýsir því e.t.v. best hversu mikið mark er takandi á Gunnari.

Einar Solheim, 18.8.2010 kl. 15:25

8 Smámynd: Jón Ásgeir Bjarnason

Ætli Einar búi á Sólheimum?

-Svona fer þegar rökin eru engin gagnvart einkar skemmtilegum og fróðlegum texta Gunnars Rögnvaldssonar.  :)

Jón Ásgeir Bjarnason, 18.8.2010 kl. 16:18

9 Smámynd: Einar Solheim

Jón Ásgeri,

ég hef skrifað víða um áhuga minn á því að Ísland gangi í ESB og er yfirleitt sæmilega málefnalegur.  En maður gengur ekki inn í kirkju og fer að rökræða á vitrænan hátt hvort guð sé til eða ekki.  Hér inni hjá Gunnari mæta þeir allra hörðustu, hlusta á predíkarann, segja hallelúja og ef þau detta í lukkupottinn fær þetta lið að hnýta í trúleysingja eins og mig.  Hef oft bloggast við Gunnar um ESB, en honum verður ekki snúið.  Enda hefur hann töluverða fjárhagslega hagsmuni af því að halda íslensku krónunni í kreppu (eins og flestir þeirra sem eyða tíma í áróður gegn ESB).

Einar Solheim, 18.8.2010 kl. 16:27

10 Smámynd: Einar Solheim

...ps: ótrúlega fyndin þessi tenging við Sólheima!  Hef aldrei fattað þetta áður... Solheim.... Sólheimar ! HAHAHAHAHAHA

Einar Solheim, 18.8.2010 kl. 16:29

11 Smámynd: Jón Ásgeir Bjarnason

Ég vil nú ekki skemma síðuna með þrasi Einar.  Það er ekki sniðugt. 

Ég hef bæði búið á Sólborg og Sólheimum og stoltur af því.  Sérstaklega þar sem ég gat flutt burtu.  Er þess vegna reynslunni ríkari.

Alveg eins eða svipað og Rögnvaldur sem tókst að flytja út úr ESB geri ég ráð fyrir.

Öll höfum við hagsmuna okkar að gæta trúi ég líka, en að hagsmunum einhverra Íslendinga sé þjónað með því að ganga í ESB gildir kanski fyrir þá sem fá vinnu í Brussel.  Að þeir séu mikið fleiri eru kjánaleg trúarbrögð.  ..Því rökin bara hreinlega vantar.   

Jón Ásgeir Bjarnason, 18.8.2010 kl. 19:07

12 Smámynd: Gunnar Rögnvaldsson

Þakka ykkur kærlega fyrir innlitið 

Ég leyfi mér að minna Einar Solheim á þá staðreynd að þegar ég flutti til Danmerkur árið 1985 var Evrópusambandið ekki til. Ári seinna lofaði forsætisráðherra Danmerkur dönsku þjóðinni að Evrópusambandið yrði heldur aldrei til. Það gerði hann þegar kosið var um EF-pakkann árið 1986. Hann sagði: Evrópusambandið er steindautt

25 árum seinna er Danmörk búið að missa stóran hluta af fullveldi sínu og þjóðin situr eftir vonsvikin með sárt ennið og getur sig hvergi hreyft. Þessi síðustu 25 ár í ESB hafa boðið upp á massíft 8-12% atvinnuleysi allan tímann nema í 4 ár. Húsnæðismarkaður hefur fallið um allt að 40% tvisvar sinnum á þessu tímabili og hagvöxtur í Danmörku hefur verið sá þriðji lélegasti í OECD síðastliðin 10 ár og landið hrapar hratt á skalanum yfir ríkustu þjóðir heimsins.  Á næstu 10 árum mun Danmörk fá næst lélegasta hagvöxt allra ríkja OECD.

Í stuttu máli er Danmörk tapað land og mun deyja hægfara dauða velmegunarríkis í kolanámufaðmlagi Evrópusambandsins. Nú er engin leið út aftur og stór hluti þjóðarinnar óskar sér sitt gamla land aftur. En það er ekki hægt. 

Eftir 25 ár í viðbót verður Danmörk að líkindum horfið sem ríki og orðið hérað í Bandaríkjum Evrópu

Kveðjur

Gunnar Rögnvaldsson, 18.8.2010 kl. 20:07

13 identicon

Íslensk stjórnvöld hafa svo sannarlega sýnt það á síðustu áratugum að við höfum ekkert að gera í ESB.

Íslenskar fjölskyldur hafa aldrei haft það betur en í dag.

Kvótakerfið í sjávarútvegi hefur svo sannarlega sannað sig að það er verið að yfirfæra það á landbúnað.  Líklega með frábærum árangri fyrir neytendur.

Á meðan að árangur íslenskra stjórnvalda er svona góður, þá höfum við ekkert með að ganga í ESB.

Stefán Júlíusson (IP-tala skráð) 18.8.2010 kl. 22:46

14 Smámynd: Einar Solheim

Það er rétt Stefán.  Loksins rök gegn ESB sem ég kaupi.  Vill líka nota tækifærið að samhryggjast Gunnari sem flutti til DK á fölskum forsendum.  Greyið ungur strákurinn hélt að hann væri að flytja til lands framtíðarinnar, en var svo settur í fangabúðir og haldið þar nauðugum af ESB, Því eins og allir vita þá leyfir ESB íbúm ekki að flytja af herteknum svæðum sínum.  Honum tókst þó að koma sér til Spánar og fær nú loks að fara til Íslands þar sem fyrirsjáanlegt er að Ísland muni ganga í ESB.

Ég sé það líka núna hversu slæm áhrif ESB hefur haft á Danmörku.  Greinilega allt í klessu þar.  Reyndar ekki verra en svo að íslendingar (sem eru ekki í ESB) flykkjast þangað í hundruðatali þessa mánuðina. Það er líka skandall að Danmörk sé aðeins í 10. sæti yfir þau lönd í heiminum sem best er að búa í (http://www.newsweek.com/2010/08/15/interactive-infographic-of-the-worlds-best-countries.html).  Ef Danmörk hefði ekki verið í ESB hefðu þeir pottþétt verið í 1. sæti!  Eins gott fyrir Finnland (sem er í fyrsta sæti) að þeir ganga ekki í ESB.  Þá myndu lífsgæði í Finnlandi pottþétt hrapa.  Sama sem Svíþjóð sem er í þriðja sæti - þeir munu pottþétt hafa vit á að ganga aldrei í ESB!   ESB þjóðirnar Yemen og Pakistan eru hins vegar nálægt botninum og sést þar vel hversu eyðileggjandi ESB er.

Þó svo að ég sjái nú þvílíkar hörmungar ESB (og föðurlandssvikararnir sem vilja ganga í ESB)  muni færa okkur, þá er ég samt enn ekki viss varðandi krónuna.  Ég hallast þó að því að halda henni til að tryggja að Gunnar fái tvöfalt fleiri krónur fyrir hvern ruslakassa seldan fyrir Evrur.  Það hljómar e.t.v. asnalega en mér finnst hagsmunir Gunnars vega þyngra en almennir hagsmunir þjóðarinnar.

Gott að við erum öll sammála! :)

Einar Solheim, 19.8.2010 kl. 07:02

15 identicon

Einar:  Alveg sammála þér.

Vil bæta einu við. Það er alveg ljóst að verðtryggingin hefur gefið okkur þann stöðugleika sem við höfum þurft til að halda hér sjálfstæði.  Sjálfstæði og verðtrygging haldast þétt saman í hendur.  

Íslenskar sérlausnir eru af hinu góða og eiga að vera kenndar erlendis í háskólum en ekki rakkaðar niður af besserwisserum eins og þessum ESB-sinnum.

Ísland er eins og birkið okkar.  Ef við göngum í ESB, þá verður það líklega bannað því það er svo kræklótt og passar ekki í neinn staðal.   Maður fær hroll við tilhugsunina um að verið sé að gróðursetja útlenskar tegundir í landinu okkar.  Það eru svo sannarlega svikarar sem gera það.

Nei, við ESB.

Stefán Júlíusson (IP-tala skráð) 19.8.2010 kl. 07:35

16 Smámynd: Einar Solheim

Ég frétti að ef við göngum í ESB þá verði vestfjarðarkjálkanum sökkt.  Mönnum þykir hann ekki nægilega straumlínulagaður og formið hentar illa evrópskum framleiðendum landakorta.   Þetta bara má ekki gerast!  NEI, við ESB! 

Á Íslandi býr besta fólk í heimi.  Við eigum flesta stórmeistara í skák pr. íbúa og höfum oftast unnið Ungfrú heimur pr. íbúa. Það er reyndar farið að kalla okkur pólverja norðursins í Noregi, en hvað vita Norðmenn! Norskar konur eru lítið skárri en ESB-konur - langt frá því að ná íslenskum gæðum.  Og ekki viljum við að þær íslensku fari að líta út eins og þær bresku - sem augljóslega mun gerast þegar Tony Blair verður kóngur yfir Íslandi.

Nei - ESB spurningin er spurning um líf og dauða.  Líf innan ESB er augljóslega ekki þess virði að lifa.  Fyrr Deyi Ek Fyrir Födrlandid.

Einar Solheim, 19.8.2010 kl. 10:20

17 identicon

Einar:  og flesta nóbelsverðlaunahafa per haus.

Stefán Júlíusson (IP-tala skráð) 19.8.2010 kl. 11:43

18 Smámynd: Einar Solheim

Urðum við ekki líka heimsmeistarar í handbolta?  Það hefði okkur aldrei tekist hefðum við búið í ESB landi, því ESBlendingar kunna ekkert í handbolta.  Ég man t.d. ekki eftir að hafa séð ESB spila á móti þessum bestu þjóðum heims - líkt og frökkum, pólverjum, spánverjum og þjóðverjum.  ESB hlýtur að vera í einhverri annari deild... aular.... NEI VIÐ ESB!!!!

Einar Solheim, 19.8.2010 kl. 12:06

19 identicon

ESB kommst ekki einusinni með innlimunarstælunum sínum á HM í fótbolta í Suður-Afríku.

Stefán Júlíusson (IP-tala skráð) 19.8.2010 kl. 12:12

Bæta við athugasemd

Ekki er lengur hægt að skrifa athugasemdir við færsluna, þar sem tímamörk á athugasemdir eru liðin.

Höfundur

Gunnar Rögnvaldsson
Gunnar Rögnvaldsson

Búseta: Ísland.
Reynsla: 25 ára búseta í ESB og fyrirtækja-rekstur í DK/ESB frá 1985 til 2010. Samband:
tilveraniesb hjá mac.com

Ég er hvorki skráður á Facebook, Twitter, Linkedin né á neinum öðrum "félags-vefjum". Aðsetur skrifa minna er einungis að finna hér á þessari síðu og á tilveraniesb.net og í blöðum og tímaritum

Bloggvinir

Innskráning

Ath. Vinsamlegast kveikið á Javascript til að hefja innskráningu.

Hafðu samband