Zelensky: Úkraína mun aldrei geta gengið í NATO

JARÐSAMBANDIÐ EHF

Mynd: Úkraínumaðurinn Nikita Krústsjov, aðalritari og þar með æðsti leiðtogi Sovétríkjanna, ekur í opnum blæjubíl upp Pennsylvaníubreiðstræti Washingtonborgar, þremur árum eftir innrás hans í Búdapest Ungverjalands 1956. Síðan eyddi hann nóttinni í Blair-gestahúsi Hvíta hússins á þessari 12 daga heimsókn hans til Bandaríkjanna. Sjö árum síðar sendi Hvíta húsið fallhlífarhermenn og skriðdreka inn í bílamusteri Detroitborgar, en þá var 50-ára hagsveiflu bílaiðnararins að ljúka og NYSE lagðist í dauðadals-dvala fram til ársins 1982, eða þar til kísildalurinn tókst á loft. Í dag er það hins vegar 50-ára hagsveifla örgjörvans sem er að enda. Arftaki Krústsjovs sem aðalritari Sovéska kommúnistaflokksins var Úkraínumaðurinn Leoníd Bresnjev. Heilsufar þess manns á síðustu valdaárum hans var álíka og heilsufar Joe Bidens Bandaríkjaforseta er í dag. Var Bresnjev haldið nauðugum gangandi af höndlurum og skiltagerðamönnum, þ.e. eins og virðist gert með Joe Biden í dag

NÓG PLÁSS HUGSAR ERDOGAN

Erdogan Tyrklandsforseti gæti sent Evrópu miklu miklu fleiri flóttamenn, jafnvel nokkrar milljónir, nú þegar hann sér að nóg pláss er í Evrópusambandinu. Í Evrópusambandi (við hvað?) sem tístir og tístir á bak við gler, haldandi á sér hita með rússnesku gasi og með rafmagni sem framleitt er úr því líka

GETUM EKKI - ERUM EKKI

Það hlýtur að hafa kostað Rússland kassann að byggja allar þessar aumingjagóðu leiðslur til Evrópusambandsins, svo að meginland taparanna geti haldið á sér hita. Já, Rússar gerðu það, lögðu leiðslur, því ekki gat Evrópusambandið það. Það gat ekki einu sinni skaffað bóluefni og það gat ekki einu sinni komið sér á réttan kjöl eftir fjármálahrun, nema með þrefaldri dollara-aðstoð Bandaríkjanna og seðlabanka þeirra. Það eina sem ESB gat var að rústa Grikklandi og Suður-Evrópu, til að bjarga þýsku stálfátæktarevrunni frá því að leysast upp og verða að gjallarhorni næstu byltingar – plús það að reyna að kúga litla Ísland. Og nú nudda Biden og Evrópa sér upp að kúnnum Vladímírs Pútíns í Venesúela. Er þetta ekki stórkostlegt! Nudda sér og biðja. Og vert er að taka það fram hér að BRICS-löndin svo kölluðu, þ.e. Brasilía, Rússland, Indland, Kína og Suður-Afríka taka ekki þátt í vonlausum efnahagslegum refsiaðgerðum á hendur Rússlandi. Þess vegna beinir Rússland upplýsingaherferð sinni ekki að góðsemis-örmagna grænbatik-stjórnmálaþústum Vesturlanda með sína akademísku vesalinga tístandi sófaskýringar á bak við gler, haldandi á sér hita með rússnesku gasi, heldur beinir það áróðurs- og upplýsingaherferðum að þessum ofangreindu löndum og áhrifasvæðum þeirra. Tístheimur Vesturlanda er nefnilega lokaður bergmálshellir sem enginn nema þeir sem í honum búa hlustar á. Forseti og ríkisstjórn Rússlands vita sem er að hálfsovéskir bergmálshellar samfélagseyðileggingarmiðla Vesturlanda skipta ekki máli nema undir akademískum sófapullum þeirra sjálfra. Hann veit sem er að Vesturlönd gera sér ekki enn grein fyrir innvortis hnignuninni sem ríkir innvortis í vatteruðu grænkofaþvælu þeirra sjálfra. Vesturlönd breyttust nefnilega meira en Rússland þegar Sovétmúrinn féll. Hann féll vestur á bóginn

HALLÓ, ER EKKI ALLT Í LAGI?

Svo kallar forseti Úkraínu á að NATO og Bandaríkin fari í stríð við Rússa, hans vegna. Bandaríkin sem fóru ekki einu sinni í stríð vegna Stóra-Bretlands. Hvurslags þvæla er þetta! Jú þetta er tístkofarugl félagsmiðlafjölmiðla. Tíst allsherjar-ruslahrúgu Vesturlanda. Flatarmál hennar er 99,99 prósent myndir, því þar kunna menn bara hálft tungumál, ásamt því að stilla sér út - sem ærandi góðmenni. Allir hæfir og góðir herstjórar eru grimmir og stórhættulegir menn. Annars sætu þeir sífellt að gratís snæðingi sem til dæmis Þýskalandsdindlar í esb-kvöldverðardeildinni í NATÓ í Brussel. Væru Merkelbuddur í hennar þriðja-heims-her, þar sem allt, já allt, innbúið er meira eða minna myglað jólaskraut sem þolir hvorki að yfirgefa kjallarageymslur né flugskýli. Gluggaskraut nurlara! Og á sunnudaginn bannaði forseti Úkraínu stjórnarandstöðuflokkana heima hjá sér, með þeim rökum að þeir væru ekki á sömu skoðun og hann. Ellefu flokkar voru bannaðir, þar á meðal næst stærsti flokkurinn. Hér má sjá tilskipunina. Joe Biden sem féll þrisvar um sjálfan sig á leið upp í embættisþotu sína, hafði þó nýlega lýst því yfir að Úkraína væri "lýðræðisríki". Ja hérna. Hinum nýja kanslara Þýskalands var ekki skemmt þegar rokkstjörnuforseti Úkraínu ávarpaði þýska þingið. Sá þurri maður hefur greinilega séð svona fyrirbæri áður. Þýskaland og stór hluti Evrópusambandslanda voru nefnilega að vonast til að Rússland gæti tekið við af Bandaríkjunum og skaffað Evrópu vernd og mátt í varnarmálum. Eða eins og Phileleftheros stærsta dagblað evru-Kýpurs skrifaði þann 20. mars 2022 ("frjálslynt blað" => ESB-kratablað):

"It is very likely that Ukraine would have avoided a Russian invasion and the world a new cold war and the threat of a nuclear holocaust if Europe had pursued its own policy instead of serving American hegemony. Europe had the opportunity to integrate Russia into a European security system, which would have also promoted the development of democratic institutions in that country, but it failed to do so. ... Europe opted for a solution that is already proving disastrous for its own interests."

Lausleg þýðing: "Líklega hefði Úkraína komist hjá innrás og heimurinn komist hjá nýju köldu stríði og kjarnorkuvopnaógn á meginlandinu ef Evrópa (lesist ESB) hefði stundað sína eigin öryggisstefnu í stað þess að þjóna heimsveldi Bandaríkjanna. ESB hafði möguleika á að innlima Rússland inn í "öryggiskerfi Evrópusambandsins" (ha, hvad er dét for noget?) og sem hefði þýtt að stofnanir Rússlands hefðu þróast í lýðræðisátt, en það mistókst. ESB valdi lausn sem sannað hefur sig sem verandi stórslys fyrir hagsmuni álfunnar"

Þarna er komið beint að kjarna málsins sem kanslarar Þýskalands (og sumir forsetar Frakklands) hafa unnið að áratugum saman. Allt frá "ostpolitik" Willy Brandts til Helmuts Schmidt til Gerhards Schröders og Angelu Merkels frá DDR. Að Rússland en ekki Bandaríkin tryggi öryggismál álfunnar í framtíðinni og að meginlandið sem skagar úr úr móðurlandi Rússlands renni smám saman í eina sæng. Það er þetta sem tilvist Evrópusambandsins hefur ávallt snúist um: að koma bandaríska hernum og NATO burt af meginlandi Evrópu með því að kljúfa það innan frá. Þjóðverjar hafa miklu meiri andúð á Bandaríkjunum en þeir hafa á Rússlandi. Þannig að nú er að bíða þess hvað hin þurra og ryðgaða kaffikvörn í höfði Olafs Scholz kanslara segir þegar pólitískum mulningi hennar lýkur. En honum var ekki skemmt undir ávarpi forseta Úkraínu. Honum var bara alls ekki skemmt. Moldvörpustarfsemi Þýskalands í NATO síðastliðin 30 ár ber að skoða í þessu ljósi. Ætlunin var að sundra NATO innan frá, með aðstoð hinna föstu gervihnattalanda sem ávallt eru á sporbraut um Þýskaland, sama hvað á dynur

HISSA HISS

Af hverju eru menn svona hissa yfir innrásinni. Það skil ég ekki. Vladímír Pútín Rússlandsforseti var búinn að vara alla við og skera út í stein hvað hann myndi gera, ef þetta snarbilaða NATÓ-brölt inn í Úkraínu myndi fara lengra en af teikniborðinu, eins og eldflaugar Krústsjovs frá Úkraínu reyndu í Kúbudeilunni 1962

BORÐUM GRJÓT

Og enn reyna þessir vitavonlausu fjölmiðlar Vesturlanda að halda því fram að Úkraína sé að vinna stríð við rússneska herinn. Já, vinna stríð við Rússneska herinn. Hvorki meira né minna. Borg eftir borg í öllum áttum frá Kænugarði séð fellur í hendur Rússa og á sunnudaginn þann 13. mars voru herstöðvar Úkraínu vestan við Lviv –fullar af tómum pitsukössum NATÓ– skotnar í tætlur, kannski með Ískander skotflaugum úr meira en 600 km fjarlægð. Já já Úkraína er að vinna þetta maður. Hún er að vinna Rússneskra herinn! Er mönnum virkilega alvara? Eða líta þeir á þetta sem einhverskonar konar tölvutístkofaleik. Rússar munu sprengja landið sundur og saman á réttum stöðum þar til þeir fá það sem þeir komu að sækja: Að Úkraína –að hætti Evrópusambandsins– deili fullveldi sínu með sér. ESB hefur áratugum saman stundað þennan ömurlega leik, en bara með öðrum og langdregnari vopnum. En innrás með pennastrikum er samt innrás. Hún virkar alltaf sem tundurspillir í öllum þjóðfélögum. Alveg sama hvað. Þannig virka innrásir

Rússar nota hins vegar miðlangdræg stjórnmál og meiri blýhörku, því það gengur hraðar fyrir sig. Þjóðaröryggisstefna Rússlands krefst þessarar innrásar, eins og Kúbumálið á sínum tíma gerði hvað Bandaríkin varðaði, og þeir sem hlýða ekki kalli hennar, já þeim verður hent á öskuhauga sögunnar séu þeir eru ekki nógu harðir. Rússar vita þetta vel, þjóðin þar veit þetta líka. En þeir á Vesturlöndum sem vita þetta ekki, vita hins vegar ekki neitt og læra aldrei neitt. Þetta hefur ekkert með persónu né skapgerð Rússlandsforseta að gera. Ef hann er ekki nógu harður, já þá verður honum skotið út og enn meiri harðjaxl settur í hans stað. Rússland er Rússland og verður aldrei annað en Rússland. Annað mál er með Framsóknarflokkinn, sem enginn nokkru sinni veit hvað né hvar er

SÓTT Á NÝ MIÐ

Vitið þið hvað Kremlarlógar Vesturlanda fóru að gera þegar Sovétríkin –án þeirra vitundar– leystust upp beint fyrir framan nefið á þeim og þeir misstu vinnuna? Jú þeir fóru að kenna útrás, hagfræði og jörðin-er-flöt-glóbalisma í háskólum okkar, og komu Vesturlöndum því sem næst á hausinn á næstu 27 árum! Og nú sjálið þið árangurinn í praxís: Þeir sitja á bak við gler, tísta, masa og fjasa, bla-blastast og halda á sér hita með rússnesku gasi, beint frá Pútín mikla.. afsakið... Pútín hinum vonda

Pútín mikli... afsakið... Pútín hinn vondi gæti komið álíka leppstjórn fyrir í Úkraínu og Evrópusambandið kom fyrir í Grikklandi og á Ítalíu, samkvæmt tilskipunum frá valdaöxli Berlín-Parísar, enda voru bestu frönsku stjórnsýsluháskólarnir byggðir upp samkvæmt sovéskri fyrirmynd. Það mikla sovétstarf í Frakklandi sá Frakkinn Maurice Thorez um, en hann kom með uppskriftina að Ecole Nationale d’Administration skólunum í ferðatöskunni heim frá Moskvu Stalíns, og fékk í staðinn andlit sitt þrykkt fast framan á sovéskt frímerki

En þá var Vladímír Pútín ekki í kommúnistaflokknum heima hjá sér, né hér á Íslandi, og heldur ekki í ungliðahreyfingu hans, og hann neitaði þess utan að ganga í kommúnistaflokkinn fyrr en nám hans við háskólann í Leníngrad krafðist þess, samkvæmt vinstri-alræðisbókinni Wikipedia

En hér heima gengu menn hins vegar í Kommúnistaflokk Íslands af fúsum og frjálsum vilja. Hugsið ykkur! Ef Vladímír Pútín forseti Rússlands væri kommi í dag þá væri allt í hinu besta lagi hjá Evrópukommastóðinu í ESB+EES og víðar, og jafnvel hjá sjáfum stigamanninum Biden, sem kemst næstur allra Bandaríkjaforseta því að geta talist þvottheldur kommi, samkvæmt komma-staðlinum þar vestra. Féll hann því þrisvar um sjálfan sig á leiðinni upp stigann í Air Force One

Ný "frétt" þann 16. mars 2022
****
"Ukraine will never be able to join Nato, concedes Volodymyr Zelensky.
UK Government sceptical about talks leading to lasting peace, despite president’s apparent concession to Vladimir Putins key pre-war demand.
Volodymyr Zelensky has accepted that Ukraine can never join Nato, in a significant concession that opened the way for a potential peace deal with Russia.
– Telegraph miðvikudagur, 16. mars 2022

Nei er það?

Þarna hefur greinilega gleymst að bæta við: Úkraína mun heldur aldrei ganga í Evrópusambandið. Það þvaður Brusselveldisins var auðvitað bara hefðbundinn brusselskur popúlismi í sovéskum stíl. Tyrkland er á undan í þeirri biðröð sýndar-geimferðastofnunar Brusselklíkunnar

SUNDURFÉLAGIÐ

Ef það er eitthvað sem startað gæti þriðju heimsstyrjöldinni þá eru það helst félagsmiðlar, þar sem iðkuð er sama stigmögnunarstefna og ríkti í frönsku byltingunni. Þar keppast menn við að ala á Rússahatri (efni dagsins í dag, en annað efni mun koma á morgun) og þeir sem hata ekki nóg eru dæmdir sem meðvirkir eða meðsekir og þurfa því að vígbúa sig gegn apafélögum sínum og sýna enn meira hatur eða falska auglýsingagóðmennsku, og fordæma þá sem voru í sporum þeirra sjálfra fyrir fimm mínútum síðan. Þetta gildir um stjórnmálamenn, embættismenn og þorra almennings, sem er svo ofurupplýstur af þeirri þvælu sem þar veltur fram í endalausum bunum. Eina leiðin til að forða sér frá fallöxinni sem þar brunar um bergmálshellana á hjólum, er að láta alla vita af því að þeir hati hinn eða þennan enn meira en áðan, og enn meira en þeir sem halda að þeir hafi stjórn á fallöxinni þá og þá stundina gera. En hún er því miður á hjólum og bankar á dyrnar hjá hverjum þeim sem sannar og staðfestir ekki hatur sitt á réttan hátt. Þannig étur félagsmiðlabyltingin börnin sín eins og þau voru étin í frönsku byltingunni

STAÐAN NÚNA

Rússneski herinn er líklega búinn að ná þeim markmiðum sem honum voru sett

1) Að eyða hernaðargetu Úkraínu

2) Að ná stjórn á öllum hernaðarmikilvægum stöðum og aðstæðum í landinu

3) Að reyna svo framarlega sem hægt er að eyðileggja ekki meira en nauðsynlegt er og láta landbúnaðarhéruðin í friði, því þar er sáning í gangi og Rússar hafa engan áhuga á að halda gegnspilltri Úkraínu uppi. Hún mun því áfram verða fátækasta land álfunnar. Hershöfðingjar rússneska hersins eru hins vegar mjög svo sennilega ofsareiðir Pútín forseta fyrir að hafa ekki fengið að beita sér og græjum sínum af meiri hörku. Rússland hefur engan áhuga á að hernema eða hersitja Úkraínu. Þeir vita vel hvernig fór með sjö ára löggun Bandaríkjahers í Írak og þeir vita vel hvernig skiltagerðarmönnum Bresnjevs tókst upp í Afganistan

4) Stríðið er sennilega búið, nema það að forseti Úkraínu lokaði þremur þarlendum sjónvarpsstöðvum í fyrradag, því þær virðast ekki hafa sömu skoðun og hann. Í venjulegu styrjaldarárferði þyrfti ekki að loka fyrir slíkar útsendingar því þær væru þegar lokaðar ásamt flestum öðrum innviðum í viðkomandi landi. Þessir hlutir hafa því ekki verið skotmark enn

5) Það eina sem er eftir er að skrifa undir. En það mun hins vegar ekki verða gert fyrr en að sú hliðardagskrá sem forseta Úkraínu tókst að sviðsetja í Bandaríkjunum, um að reyna að halda stríðinu áfram og til streitu í þeirri von að það með tíð og tíma leysi Rússland upp að innan eða komi forseta þess fyrir kattarnef, lognast út af

Fyrstu könnunarsveitir hermanna Pentagons til Úkraínu eru hins vegar byrjaðar að koma heim úr könnunarleiðöngrum sínum með þau skilaboð: að fyrir alla muni ekki koma hingað yfir til Úkraínu því þar verðum við steindrepnir því rússneski herinn er alvöru her: þetta stríð er ekki Írak með ónýtan her og sandpokastjórn að vopni. Þetta er alvöru andstæðingur, segja þeir, samkvæmt stríðskappanum Doug Macgregor fyrrum ráðgjafa bandaríska varnarmálaráðuneytisins. Sjálfur get ég ekki vitað þetta fyrir víst, því báðir málsaðilar, eðli málsins samkvæmt, ljúga massíft að okkur. Í þessu máli verða menn að gera ráð fyrir að allir ljúgi öllu beggja megin borðs. Ónafngreindum heimildum og heimildum án vitna ætti enginn að trúa. Sérstaklega ekki þegar "ónafngreindar opinberar heimildir" og "aðilar" (tískuorð) standa sem ábekingar fyrir fréttum í svo kölluðum fjölmiðlum okkar

6) Finnar vita að þeir ganga aldrei í NATO því NATO var ekki stofnað til að verja rússneska hagsmuni Finna í Finnlandi. Allt gas Finna kemur beint um eina leiðslu frá Rússlandi og þeir hafa ekki einu sinni birgðastöð. Leiðslan er bara beintengd við orkuframleiðslumiðstöðvar Finna því þeir nota ekki gas nema til miðstýrðrar orkuframleiðslu, sem nemur um 10 prósentum af heildarorkuframleiðslu landsins. Áttatíu prósentur af olíum Finna koma frá Rússlandi og um það bil 75 prósentur af þeim þremur til níu milljón tonnum af kolum sem Finnar nota árlega koma frá Rússlandi. Tveir af fimm starfræktum kjarnakljúfum Finna til raforkuframleiðslu koma frá Rússlandi, eða Sovétríkjunum sálugu. Nýtt kjarnorkuver er í smíðum, það sjötta, og það kemur frá Rusatom í Rússlandi. NATO getur því ekki varið Finna fyrir sjálfum sér. Og óþarfi er að verja Svíþjóð fyrir Finnum. Svíþjóð á ekki landamæri upp að Rússlandi nema að Finnland verði enn rússneskra en það nú þegar er orðið - eða eins og síðast þegar Finnar drógust niður í sovétöskuna 1992 og risu upp úr henni á ný. Allir edrú menn sjá hér svart á hvítu að ESB-aðild Finnlands hefur enga þýðingu fyrir landið nema þá til hins verra, því ballið er bara rétt að byrja nú þegar góðviðrisstofnunin ESB fer inn í sitt endalega upplausnarferli, og endar líf sitt í einu herbergi í húsi við Genfarvatn, eins og Þjóðarbandalagið. Opið verður á milli kl. 13-14 á laugardögum

Fleira er ekki í fréttum

Jú eitt atriði enn. Forseti Frakklands hefur áhuga á að þjóðnýta EDF-raforkuframleiðslurisann í landi sínu. Hvorki meira né minna. Skyldi líka hann vera farinn að óttast alla hina sovésku orkupakka Evrópusambandsins?

En við höfum jú vindmyllur!

Fyrri færsla

Henry Kissinger um Úkraínu

Athugasemdir

[Ragnhildur Kolka, 22.3.2022 kl. 09:24]

Sæll Gunnar, mér sýnist við vera nokkurnveginn á sömu blaðsíðu hvað þessi mál varðar. Þú lest Kissinger en ég John Mearsheimer (fyrirlestrar hans eru á YouTube). En í gær rakst ég á þennan link a netinu (https://rairfoundation.com/warning-ukraine-is-the-great-reset-laboratory-of-the-global-tech-elite/) og langar að spyrja þig hvað sé til í þessu. Er þetta arodursbrella eða er e-& til í þessu? 

Ég eins og margir aðrir dáðist að dirfsku Z í upphafi, en eftir sem á líður hefur mér fundist áróðurinn sem kemur út úr Ukrainu bera sífellt meiri keim af því sem við fáum reglulega frá Hamas samtökunum. 

[Gunnar Rögnvaldsson, 22.3.2022 kl. 12:07]

Þakka þér fyrir Ragnhildur.

Ég hef aldrei haft álit á þessum kenningum um tæknirisa vesturlanda. Þeir eru bara fyrirtæki sem innbyrðis verða aldrei sammála né samtaka um neitt sem helst, og hafa ekki stærri burðargetu til áhrifa á gangi heimsmála en járnbrautarbarónar Bandaríkjanna höfðu á sínum tíma þegar, þeir reyndu að einoka náungann með tænki-fjárfestingum sínum á þeim tíma. Þá eins og nú greip löggjafinn inn. Þeim var ekki stætt á einokunartilburðum sínum því þeir höfðu auðvitað lagt brautir sínar um opinbert land sem hinn almenni skattgreiðandi Bandaríkjanna átti. En honum höfðu þeir skipað að nota bara hestinn eða sína tvo jafnfljótu ef hann sagðist ekki hafa efni á orki barónana.

Eins er það með allan tæknigeirann eins og hann leggur sig. Skattgreiðendur, það er hið opinbera, eiga öll þau tíðnisvið fjarskipta sem tæknigeirinn er að nota, bæði í köplum og í lofti. Ríkið þ.e. hið opinbera á allar tíðnisviðsrásir sem tölvunartæknigeirinn er að nota. Tæknigeirinn á ekkert í honum sjálfur. Þannig að löggjafinn getur hvenær sem er gripið inn og sett ný lög sem banna þá ritskoðunar og útlokunarmenningu sem þar er að eiga sér stað. Tæknigeirinn er því valdalaust fyrirbæri.

Hvað Úkraínu varðar þá mun það land aldrei hafa þá stjórnmálalegu getu sem lönd á borð við Finnland og Sviss hafa. En í þeim tveimur ríkjum eru það fyrst og fremst sterkar ríkisstjórnir í krafti yfirþyrmandi samstöðu þjóða innan landamæra þeirra sem tryggt hafa vopnaða hlutleysisstefnu beggja.

Slíkt mun Úkraína aldrei hafa. En hún verður samt að geta búið og lifað friðsamlega með sínum nágrannaríkjum í krafti eigin pólitísks vélarafls. En það mun hún aldrei geta sökum þess hvernig landið er sett saman og hvernig söguleg tilurð þess er.

Rússland vill hlutlausa Úkraínu, en það skil ég á þann veg að þeir munu vilja hafa vissa herstöðvar-aðstöðu í landinu til að stilla til friðar þegar þess þarf, því engin lönd Evrópusambandsins munu geta stillt til friðar í Úkraínu, því Evrópusambandið er stórhættuleg pólitísk tindabikkja á pappírsformi, sem hvorki getur varist ógnum né stundað friðargæslu í eigin garði.

Svo seint sem 2017 lenti Úkraínu og Póllandi saman vegna fjöldamorða Úkraínumanna á Pólverjum í Volhynia og Austur-Galisíu. Þá setti pólska ríkisstjórnin það í lög að bannað væri að afneita þessum fjöldamorðum, því pólsku MW hreyfingunni (ysta ysta hægri) og UPA (ysta ysta hægri) Úkraínu hafði lent saman. Því tók ríkisstjórn Úkraínu afar illa og safnaðist mannfjöldi fyrir framan pólska sendiráðið í Kænugarði til mótmæla. Minnismerki um pólsku fórnarlömbin í Úkraínu voru skemmd og vandalíseruð og grafreitur og leiði pólsku fórnarlambanna í Lviv voru skemmd og eyðilögð. Þarna er ekki allt sem sýnist - hvorki í dag né í gær.

Kveðjur

[Símon Pétur frá Hákoti (IP-tala skráð) 22.3.2022 kl. 13:25]

Hafðu þakkir Gunnar fyrir þína ágætu greiningu á stöðu mála. 

Mig langar reyndar, í því samhengi, til að benda á afar fróðlegt og sagnfræðilega gott yfirlit og greiningu eftir David Stockman og jafnframt hvernig hann telur að Úkraínu verði skipt, já, skipt, enda bitastæðasti hluti hennar tilheyrt Rússum miklu lengur en Bandaríkin hafa verið til.

Sagnfræðilegur skilningur er nauðsynlegur til að sjá hið augljósa, þegar EES/ESB sleikjurnar missa áttirnar í Valhallar gnarrinu.

https://original.antiwar.com/?p=2012345496

[Símon Pétur frá Hákoti (IP-tala skráð) 22.3.2022 kl. 13:52]

Samkvæmt Stockman endar þetta þannig, í stórum dráttum, að nýtt landakort verður dregið upp:

- Þýskaland (ESB) fær sitt, tilkall til norðvesturhlutans, sem nefndur verður Úkraína.

- Suðausturhlutinn verður Nýja Rússland.

- Og Krímskaginn verður áfram hluti Rússlands, eins og hann hefur verið, allar götur síðan Katrín mikla keypti skagann.

Vissulega er þessi niðurstaða greiningar hans sláandi, en byggir hins vegar á djúpri sagnfræðilegri þekkingu, sem er meira en hægt er að segja um gnarristana í Engeyjar Valhöll.

[Símon Pétur frá Hákoti (IP-tala skráð) 22.3.2022 kl. 14:23]

Hvort sem þetta verða sýnileg, eða ósýnileg, landamæri, þá verður skipting áhrifasvæða í þessum stíl.  Fróðlegt væri að fá álit þitt á þessari niðurstöðu sem Stockman dregur hér upp:

[Gunnar Rögnvaldsson, 22.3.2022 kl. 14:55]

Þakka þér fyrir Símon Pétur.

Ég minni á stöðu Katalóníu í dag. Hún minnir að vissu leyti á stöðu Úkraínu. Katalónía telur sig ekki vera hluta af Spáni, heldur telur hún sig aðeins hafa verið hluta að Spænska heimsveldinu, sem búið er með peningana frá Suður-Ameríku núna. Og nú sitja aðskilnaðarsinnar Katalóníu í fangelsum Spánarstjórnar í Evrópusambandinu.

Úkraína telur sig á sama hátt hafa verið hluta af Sovéska heimsveldinu, en þykist ekki lengur hafa verið hluti af Rússlandi.

En núsitjandi Rússlandsforseti getur ekki lengur boðið upp á neitt slíkt, því hann hefur sannarlega ekki í hyggju að koma neinu slíku á fætur á ný. Fyrir honum er það sennilega zar-veldi Péturs mikla sem hann og ríkisstjórnin í Moskvu hafa mestan áhuga á. Aldrei aftur Sovét er sennilega efst í kolli Pútíns í dag.

En hér þurfa menn að stíga varlega til jarðar því síðast þegar helvíti tók sig upp þá þurftu Bandamenn á Stalín mesta fjöldamorðingja sögunnar að halda til að slökkva á því.

Vladímír Pútín forseti rekur ekki Gúlag-fangabúðakerfi í Rússlandi. Það er hins vegar kommúnistaflokkur Kína sem sér um þá hlið málsins í dag.

"Partition" á ensku eða það að skera ríki í sundur, gangast næstum aldrei neitt, því það er ekki hægt að eyða því úr höfðum fólksins sem alist hefur upp við sögðu sína. Þess vegna eru slík pennastrik næstum alltaf til vandræða. Líbanon er eitt dæmi um slíkt "misheppnað ríki".

Afgangsríki eða e. "Rump State" gefast heldur aldrei vel og þau lifa alltaf mjög svo stuttu lífi eins og til dæmis Þýsk-Austurríska lýðveldið gerði 1918-1919.

Kveðjur

[Símon Pétur frá Hákoti (IP-tala skráð) 22.3.2022 kl. 15:06]

Þakka gott og athyglisvert svar þitt Gunnar.

Já, það þarf svo sannarlega að stíga varlega til jarðar.  Og það vita blessunarlega helstu spekingar og vísustu menn Bandaríkjanna og Nato, vestanhafs.  

[Ómar Geirsson, 22.3.2022 kl. 17:07]

Blessaður Gunnar.

Eins og oft áður þá er greining þín skörp, en svo hreinlega skeistu á þig.

Veit eiginlega ekki hvernig þú fórst að því.

En sem gamall samherji margra, þá nísti það hjarta mitt að sjá bóndasoninn frá Hákoti samsinna sig Kolku.

Sú afhjúpun var líklegast mesti styrkur þessa pistils þíns.

Hvort gjaldfellingin á skrifum eða vitsmunum nái mörkum þess að útskýra hina gömlu menntaskólastærðfræði mína um óendanleikann, er svo önnur saga.

En Gunnar, hvernig í fjandanum datt þér í hug að baráttan gegn sameiginlegum óvini, glóbalinu, ætti sér flæði gegn heilögum rétti fólks að verja land sitt, að verja tilveru sína.

Þú ert ekki heimskur Gunnar, þar með veist þú að aðeins heimskt fólk vefur einhverja hundalógík eða pólitík um þá hvöt.

Það var ekki vegna Stalíns að Rússar (sem og Hvítrússar eða Úkraínumenn) vörðu land sitt, en þeir sátu uppi með þá skepnu (Stalín,kommúnismann), og hún bar ábyrgð á ósigrum, manntjóni, beinum ósigri ef Stalín hefði ekki verið settur af sem herstjóri þegar Moskva var umkringd síðla hausts 1940.

Það skiptir ekki máli Gunnar hver skýringin er á innrás Rússa, þar eru þeirra hermenn án sannfæringar, þar sem verja heimamenn land sitt, verja það fram í rauðan dauðann.

Nákvæmlega þess vegna féll Berlín 1945, þvert á spár meintra gáfumanna sem í upphafi stríðsins skrifuðu pistla líkt og þú gerir hér að ofan.

Sem væri sök sér ef hann (pistil þinn) ruglaði ekki í fólkinu sem mannar skotgrafir sjálfstæðis þjóðarinnar.

Það kallast að skemmta skrattanum.

Kveðja að austan.

[Gunnar Rögnvaldsson, 22.3.2022 kl. 17:12]

Takk fyrir innlitið Ómar kommi.

Kveðja

[Ómar Geirsson, 22.3.2022 kl. 17:36]

Ha ha Gunnar.

En við vitum báðir að þú getur betur en þetta, hins vegar hef ég það fram yfir þig að vita, að það er þörf á styrk þínum, það er ekki bara sjálfstæði þjóðar okkar undir, þau öfl sem þú greinir svo vel, sem við erum sammála að kenna við glóbalið, þau ógna tilveru okkar, það er barna okkar og barnabarna.

En svo ég er jákvæður, þá er það visst afrek að ná að sameina Kolku og Hákot.

Fátt er svo með öllu ill!!

Kveðja að austan.

[Símon Pétur frá Hákoti (IP-tala skráð) 22.3.2022 kl. 17:56]

Rólegur Ómar, mæli með að þú lesir grein Stockman, sem er mjög löng og fróðleg.

Það er ekki þar með sagt að ég samsinni öllu því sem hann segir, en hann sem lærður sagnfræðingut með mikla þekkingu á málum Úkraínu, í gegnum aldirnar, er lestursins virði.

Greining hans byrjar strax við upphaf Garðaríkis og Rus fólksins.  Mér fannst athyglisvert að hafa þar einnig í huga skemmtilegan pistil meistara Magnúsar, nú nýlega, um þessa hina sömu forsögu og tengsl norrænna manna við þessar slóðir.

[Gunnar Rögnvaldsson, 22.3.2022 kl. 17:59]

Ef ég væri þú Ómar minn þá myndi ég einbeita mér að boltanum.

Ég hef í samfellt 15 ár svarað þúsundum lesenda minna af þolinmæði og samviskusemi og með rökum, en öllu má ofbjóða og það gerðir þú núna. Stefna mín er að gera einmitt það, því annars myndi ég einfaldlega hafa lokað fyrir athugasemdir og bara "skrifa pistla".

Ranghildur Kolka og Símon Pétur eru gott fólk og ávallt velkomin með sínar skörpu spurningar, sem mér þykir vænt um að fá, og þannig að eiga orðastað við þjóð mína, og það á einnig við um þig.

Stríð er ekki leikur. Hollt er að muna að það eru ekki allir landsmenn Úkraínuforseta sem styðja málstað hans. Ekki nærri því allir. Og menn eiga ekki að hætta sér um of nema að hafa vissu fyrir því að hafa vald á áhættutökunni sem þeir taka. Ekki rífa sig um of við nágranna sína nema að hafa eitthvað til að hafa vald yfir stöðunni.

En einmitt um þá staðreynd snýst málið að hluta til.

Þeir sem etja þjóð sinni út í viðureign við yfirþyrmandi ofurefli sem ekki er hægt að sigra, bera líka ábyrgð. Þeir geta ekki treyst á að sonum og dætrum annarra manna þjóða sé fórnað þeirra vegna.

Leiðtogar þjóða verða að vera leiðtogar þjóðarinnar allrar en ekki bara hluta hennar. Að hvetja menn áfram út í það forað er ekki viturlegt.

[Gunnar Rögnvaldsson, 22.3.2022 kl. 20:09]

þriðjudagur, 22. mars 2022 kl. 20:07:13

Gengisfall rússnesku rúblunnar miðað við Bandaríkjadal á síðustu sex mánuðum er nú 30 prósent. Tyrkneska líran hefur fallið um 43 prósentur á sama tíma. Þannig að svo kallaðar "efnahagslegar refsiaðgerðir" gegn Rússlandi virðast ekki virka eins vel og refsivöndur Erdogans virkar á hans eigin mynt. Skilst mér að BRICS-löndin séu ekki nema rúmlega helmingur mannkyns, þannig að heimurinn stendur Rússlandi opinn til eyðslu á þeim milljarði dala sem örmagna ESB-löndin greiða því fyrir orkuna hvern einasta dag ársins. Er þetta skynsamleg stefna?

Og eru réttu fréttirnar ekki frekar þær að Rússland er risi á sviði vopnasölu í heiminum þannig að allar fréttir um vopnasölu Kína til Rússlands hljóta að verða 180-gráðu öfugar, því rússnesk vopn eru líklega margfalt betri og traustari en þau kínversku. Þess utan framleiða Rússar sjálfir sína örgjörva niður í 28 nanómetra, bæði til vopnaframleiðslu og til borgaralega nota. Er eitthvað vit í þessu öllu?

[Gunnar Rögnvaldsson, 23.3.2022 kl. 06:40]

miðvikudagur, 23. mars 2022 kl. 06:35:56

Leiðari WSJ skrifar í dag að Lundúnakauphöllin fyrir málma (The London Metal Exchange eða LME) hafi látið hinn kínverska eiganda hennar misnota sig til að bjarga skortstöðu kínversks fyrirtækis með nikkel. 

"Verð á nikkel hafði verið að hækka í heilt ár í aðdraganda innrásar Rússlands í Úkraínu, vegna eftirspurnar í rafhlöður rafbíla. Rússland sér heiminum fyrir fimmtungi af hágæða nikkeli og áhyggjur vegna refsiaðgerða vesturlanda núna sendu verðið enn hærra. Það ógnaði risavaxinni skortstöðu hins kínverska Tsingshan Holding Group sem er einn stærsti framleiðandi af ryðfríu stáli og nikkeli í heiminum. Fyrirtækið er einnig einn af hornsteinum Kínverska kommúnistaflokksins í Beltis og Brautar útþenslustefnu flokksins sem leggur fátæk lönd undir sig með því að nýta náttúruauðæfi þeirra."

Leiðarinn heldur því fram að Lundúnakauphöllin fyrir málma hafi ógilt gerða kaupsamninga í kauphöllinni og fryst viðskipti til að bjarga skortstöðu stjórnarformanns Tsingshan, en ætlun hans hafi verið að drekkja markaðnum með sínum birgðum af lággæða nikkeli. En verðbréfasalar hans hafi ekki getað mætt innlausnarkröfum lánveitenda er verðið rauk upp úr öllu valdi þegar refsiaðgerðir vesturlanda tóku gildi. Og þá hafi kauphöllin í Lundúnum bara stöðvað viðskipti og ógilt gerða samninga. Þetta er rosalegt og gæti þýtt endalokin fyrir kauphöllina. En hefði kauphöllin ekki leikið þennan leik eigenda hennar, þá hefði Tsingshan skuldað lánadrottnum sínum 15 milljarða dala, því til að losa sig hefði ríkisstjórn Kommúnistaflokksins þurft að skipta út hágæða nikkelbirgðum sínum fyrir lággæða birgðir Tsingshan. 

Leiðari WSJ segir sem er, að markaðir geti ekki virkað án trausts viðskiptamanna á þeim. Ef LME ógildi ekki þær ógildingaraðgerðir sem hún framkvæmdi, þá ættu bresk yfirvöld að hefja rannsókn á því sem gerðist, segir WSJ.

WSJ: Did the London Metal Exchange cancel trades to help a Chinese firm?

[Gunnar Rögnvaldsson, 23.3.2022 kl. 08:36]

miðvikudagur, 23. mars 2022 kl. 08:36:42

Ég leyfi mér að benda á athyglisvert tveggja daga gamalt viðtal Lou Dobbs við stríðkappann Douglas Macgregor fyrrum ráðgjafa bandaríska varnarmálaráðuneytisins.

Macgregor bendir á austurríska ríkissamninginn frá 1955 sem fordæmi fyrir komandi hlutleysi Úkraínu. Hvort að það eigi við um tilfelli Úkraínu í dag, efast ég þó um því landfræðileg lega Úkraínu er önnur og tímarnir aðrir og íbúarnir í því landi eru ekki ein samhangandi þjóð. En kannski er þetta samt möguleiki.

Macgregor staðfestir einnig þá skoðun mína að Rússland hefur séð Kína fyrir vopnum og vopnatækni áratugum saman, því kínverska dótið er langt langt frá því að ná með tærnar þar sem Rússar hafa hælana í þeim efnum. Kína hefur til dæmis aldrei getað smíðað alvöru þotuhreyfil. Aldrei.

Hér er viðtal Lou Dobbs við Macgregor í þremur hlutum: fyrsti hluti - annar hluti - þriðji hluti

[Gunnar Rögnvaldsson, 23.3.2022 kl. 09:05]

miðvikudagur, 23. mars 2022 kl. 09:04:00

Lög í Rússlandi segja að ef stjórnendur og eigendur erlendra fyrirtækja yfirgefi landið og skilji fyrirtæki sín eftir í reiðileysi og án rekstrarmöguleika, séu þau þar með orðin ógjaldfær og verða tekin yfir. Það gerði til dæmis McDonalds. Hafa því 847 veitingastaðir McDonalds fengið nýtt nafn og nýja eigendur. Ríkisstjórn Rússlands hefur gefið keðjunni nýtt nafn og heitir hún Vanja frændi í dag. Og gengur víst þokkalega vel.

Hagvexti að stærðargráðunni 2,5 prósentur er spáð í Rússlandi á næsta ári, eftir 8 til 10 prósentu samdrátt á þessu ári, segja reiknivélar Goldmans.

Frönsk fyrirtæki hafa ekki kastað öllu frá sér í Rússlandi og finna þau fyrir vexti vegna þeirra sem tístkofaskelltu í lás til að sýnast sýndarskiltagóð í hliðarveruleika-klappsölum sundurfélagsmiðla. Enda talar Macron forseti Frakklands við Vladímír Pútin forseta næstum annan hvern dag.

[Símon Pétur frá Hákoti (IP-tala skráð) 23.3.2022 kl. 12:01]

Eitt vekur athygli mína, sérstaklega, og það er af hverju rússnesk stjórnvöld, og einkum rússneski seðlabankastjórinn, geymdu svo mikið af gjaldeyrisvarasjóði sínum í erlendum bönkum, í ljósi þess að þeir ætluðu að koma skikk á stöðu sína í Úkraínu og hefðu átt að geta búist við því að forðinn erlendis yrði frystur.  Sem raunin varð.

Er þar um að kenna grandaleysi rússneskra stjórnvalda, eða gengur rússneski seðlabankastjórinn annarra erinda en stjórnvalda? 

Þetta hefur t.d. Paul Craig Roberts velt mjög fyrir sér.  Kanntu svör við þessu Gunnar?

[Gunnar Rögnvaldsson, 23.3.2022 kl. 12:29]

Tja Símon Pétur.

Aðeins helmingur forðans var geymdur samkvæmt venju og hefðum í erlendum seðlabönkum. Fáum datt í hug að vestrænir seðlabankar myndu sýna sig sem verandi svo húrrandi snarbilaðir að rýra eða eyðileggja það traust sem þeim er sýnt, því slíkt myndi ekki bara flýta fyrir tortímingu á því trausti sem seðlabankar annarra landa heimsins hafa sýnt þeim, heldur myndi slíkt einnig hefja niðurtalninguna á traustinu sem hefur verið á myntum þeirra sjálfra.

Nú hugsa allir seðlabankar heimsins sig um hvort viturlegt sé að stóla á seðlabanka vesturlanda og menn fara að undurbúa aðrar lausnir.

Rússneski forðinn er þess utan þannig tilkominn að hann myndast ávallt mjög hratt vegna þess að 80 prósentur af landsframleiðslumyndun Rússlands krefjast ekki nema 15 prósentu innflutnings á því sem myndar hana. Allt annað sem þarf til myndunar landsframleiðslunnar er innlenskt. Rússland er Rússland.

Þarna ber allt að sama fávitabrunni tístkofamiðla  vesturlanda.

[Símon Pétur frá Hákoti (IP-tala skráð) 23.3.2022 kl. 13:09]

Tek algjörlega undir gott svar þitt.

Það sem mér finnst einnig verst er að vestrið með sinn 1/7 hluta jarðar skuli vinna hratt í að rústa sínu alþjóðlega trausti.  Veður eru orðin einum of válynd fyrir minn smekk.

Hér búum við á einu yndælasta landi heims, en mikið sem við erum óheppnir með ráðherra landsins.  Hélt t.d. ekki að núverandi formaður Framsóknarflokksins væri svo vitgrannur sem gelt hans og glefs ber vitni.  Hann virðist ekki vita að Rússland er Rússland og að það gleymir aldrei illum orðum í garð þess, heldur geymir í langri og tregafullri sögu sinni.  

Betra væri okkur að eiga góð viðskipti við alla þá sem viðskipti vilja eiga við okkur, og það í gagnkvæmum tvíhliða samningum fullvalda þjóða.  Okkar sem annarra fullvalda þjóða, svo sem  Bandaríkjanna og Rússlands, hvers um sig.  Það er háttur viturra í gegnum aldirnar.

[Gunnar Rögnvaldsson, 23.3.2022 kl. 13:47]

Já en slíkt kemur ekki vel út í gripasýningar-bergmálshellum samfélagsmiðla Símon Pétur.

Ráðherrar verða að geta sýnt sig opinberlega sem ærandi góðmenni, viðstöðulaust að bjarga heiminum. Sýnt sig sem ruslahrúgur sýndarmennsku með dyggðaskiltun sem eina dagskrárliðinn - varpandi regnboga-geislabaugum sínum á hinar og þessar byggingar sem þeir komu hvergi nálægt að byggja, haldandi að norðurljósin á himinhvelfingunni séu áran frá sálu þeirra. Stanslaus aflátsbréfasala.

[Ómar Geirsson, 23.3.2022 kl. 13:59]

Blessaður Símon Pétur.

Þú ættir að skella þér á Borgarbókasafnið og fá lánaða bókina "Hitler og seinni heimsstyrjöldin : var stríðið Hitler að kenna?."  eftir breska sagnfræðinginn A. J. P. Taylors.  Lestu formála bókarinnar þar sem Taylor gerði grein fyrir bók sinni og þær niðurstöðu sem hann komst að.

Í bók sinni þá rakti hann hvernig Versalasamningarnir hefðu verið bein ávísun á stríð seinna meir því Þýskaland myndi alltaf reyna rétta hlut sinn, og hann sýndi fram á hvernig vesaldómur og vitglöp vestrænna leiðtoga hefði leyft málum að þróast á þann hátt að úr varð allsherjar stríð með öllum þeim hörmungum sem fylgdu.  Í formála sínu benti Taylor á að hann væri ekki á nokkurn hátt að hvítþvo Hitler líkt og hann var sakaður um, eða hann væri að réttlæta árásarstríð hans.  Bókin var hugsaður sem lærdómur, til að koma i veg fyrir þær aðstæður sem geta þróast út í stríðsátök.  Hún var skrifuð eftir stríðið, það var ekki þannig að hann hefði lesið yfir almenningi í rústum breskra borga um að það væri skýringar á loftárásum Þjóðverja.

Það er nefnilega þannig Símon Pétur að það eru skýringar á öllu, allt á sér sína sögu, átök ríkja geta átt sér aldagamlar rætur, það er ekkert sem segir að núverandi landamæri ríkja séu rétt dregin.  En þau eru þarna og siðmenningin krefst þess að ríki virði þau og leysi ágreining sinn á annan hátt en að sprengja upp borgir og drepa saklaust fólk.

Sagan þurrkast nefnilega út þegar sá sterki ræðst á þann minni. Það er ekki stríð, ekki frekar en það eru slagsmál þegar tuddinn á skólalóðinni pínir þá sem eru yngri og veikari.

Og þeir sem skilja það ekki Símon Pétur, þeir eiga bara bágt.

Kveðja að austan.

PS.  Ég þarf hvorki að lesa meistara Magnús eða Stundina til að vita um forsögu þeirra ríkja sem eiga í hlut í þessari deilu, en ef þig langar til að fræðast um söguna fyrir afglapastefnu Vesturvelda gagnvart Rússum, þá var nýlega gefin út stórmerk bók sem heitir "Úkraína, hin rétta saga" og er eftir rússneskan fursta að nafni Alexander Volkonskí, en hann skrifaði hana landflótta í París eftir byltingu Bolsévika.  Á vef Bóksölu stúdenta má lesa þessi orð þýðanda; "Ástandið í Úkraínu nú á dögum á sér rætur í flókinni fortíð sem mjög varhugavert væri að horfa framhjá. Er þessi bók einkar hjálpleg til þess að skilja kreppuna sem ríkir þar nú. Loks eru margar af greiningum Volkonskís gagnlegar til þess að skilja fyrirbæri sem í auknum mæli er farið að gæta nú á síðari árum: hatur á Rússum sem ýmsir hafa kynnt undir, undrun og sárindi Rússa yfir þessum fjandskap og jafnframt hagsmunapot Evrópuríkjanna sem hræsni þeirra."

[Ómar Geirsson, 23.3.2022 kl. 14:10]

Blessaður Gunnar.

Ég biðst forláts ef einhver skyldi halda að ég væri það mikill einfeldningur að vita ekki að Frú Kolka er bráðskörp málafylgjukona og sneið mín að Símoni Pétri hefur ekkert með persónu hennar að gera eða rétt hennar til að tjá sig.

Hins vegar veit ég ekki alveg hvort ég eigi að biðjast forláts að hafa haldið þig hafa pung og tækir á móti þegar að þér er vegið. En þér að segja þá snertir grátur þinn um að ég sé í manninum mig lítt miðað við grát þeirra kvenna og barna sem ég sé daglega í sjónvarpinu og ég skil ekki hvernig nokkur maður skuli hafa geð í sér að bera blak af þeirri óhæfu.

Það er rétt að stríð er ekki leikur, þess vegna hefja menn ekki stríð, og sá sem hefur það með innrás í annað ríki, ber alfarið ábyrgðina á því.  Það er klén réttlæting að segja að sá sem fyrir innrásinni verður, sá sem sér borgir sínar sprengdar í tætlur, haf att til innrásar með því að sitja ekki og standa eins og árásarríkið krefst.  Eitthvað minnir mig að við höfum deilt þeirri skoðun þegar þjóð okkar sætti grímulausri árás og ofbeldi breta með bakkuppi frá Evrópusambandinu.

Síðan er það kjaftæði að það að standa ístaðið gegn kúgun og yfirgangssemi stigmagni átök.  Sagan kann engin dæmi um að undanlátssemi og aumingjaskapur hafi komið í veg fyrir frekari yfirgang eða stigmögnun átaka.  Það vissi Frú Thatcher mætavel, enda með bæði með pung og eistu, og þó allar kellingar heimsins hafi fordæmt viðbrögð hennar við innrás herforingjastjórnarinnar í Argentínu á Falklandseyjar, eða það viðhorf hennar að semja ekki við hryðjuverkamenn þó saklausir gíslar væru undir, þá er það einföld staðreynd að ístað hennar var skýr skilaboð til yfirgangsmanna um að háttsemi þeirra yrði ekki liðin.  Gíslatökurnar fjöruðu út, einræðisherrar í vanda heima fyrir fluttu ekki út vandræði sín með stríði á hendur öðrum ríkjum.

Þær ljóstýru sjá leiðtogar okkar á Vesturlöndum, eins gáfulegir og þeir nú eru.  Hvort viðleitni þeirra virki eða dugi er annað mál, en almenningur líður ekki lengur hálfkák dusilmenna, þess vegna aukast líkur á að eitthvað verði gert sem skiptir máli, strax, en ekki seinna.

En hvað um það Gunnar, ég þekki til míns friðar, ég skal ekki ónáða þig frekar.

Kveðjan er samt sem fyrr að austan.

[Gunnar Rögnvaldsson, 23.3.2022 kl. 14:29]

Ómar.

Það er ekki ég sem stend fyrir þessari innrás. 

Hér hef ég rætt orsakir og afleiðingar. Slíkt verða menn að gera.

Þú getur tekið þennan kommarifrildispakka þinn annað þ.e.a.s. austur á þann stað ykkar vinstrimanna sem segir að heimurinn sé ónýtur sé hann er ekki fullkominn.

En innrás númer 1543 í sögu mannkyns er samt í gangi hvað svo sem hver segir. Og það munu koma fleiri. Miklu fleiri.

Kveðja

[Símon Pétur frá Hákoti (IP-tala skráð) 23.3.2022 kl. 15:31]

Sæll Ómar

Mér virðist þú taka undir nánast allt sem David Stockman segir í þeirri grein sem ég benti á.

Kannski þú ættir að lesa hana áður en þú blammerar mann og annan.

Segi annars sem Gunnar, að ég ber ekki ábyrgð á því hvernig komið er fyrir stórveldunum sem greinilega heyja staðgenglastríð í Úkraínu.

Við erum hér öll að reyna að skilja hvað veldur brjálæðinu sem geisar og hver forsagan er.

Já, það er rétt að gríðarlega flókin og löng saga liggur þar að baki og mun eldri en öll saga Bandaríkjanna.

Vona að ég megi, þín og Gunnars vegna, að benda á þessa grein eftir Pulitzer verðlaunablaðamann, sem sagt alvöru blaðamann:

https://scheerpost.com/2022/03/14/hedges-waltzing-toward-armageddon-with-the-merchants-of-death/.

Með bestu kveðjum austur, til þín Ómar

[Gunnar Rögnvaldsson, 23.3.2022 kl. 16:02]

Gjörðu svo vel Símon Pétur.

Ef ég væri Vladímír Pútín forseti Rússlands, þá hefði ég sennilega gert það sama og hann, eins og málum var komið.

Og ég get ekki séð annað en að hann hafi enn sem komið er útsmartað alla í þessu máli - og það eitt og sér segir allt sem segja þarf um hið vesæla pólitíska grænbatikástand sem ríkir hér heima og ríkt hefur allt of lengi hjá okkur á vesturlöndum.

Þessi innrás er í boði útópíuvinstri grænkommaveldis vesturlanda. Í boði rugludalla grænkommamusterisins. Þeir bjuggu þessa stöðu til fyrir forseta Rússlands og grófu undan okkur. Þeir ólu þessa stöðu af sér.

Hmpf!

[Símon Pétur frá Hákoti (IP-tala skráð) 23.3.2022 kl. 16:02]

Orðskýring:  Staðgenglastríð er ónákvæmlega orðað hjá mér, en held það skiljist af samhenginu; rauðu línuna milli valdablokka austurs og vesturs.  Um þá línu snýst þetta ömurlega og hryllilega stríð.

[Theódór Norðkvist, 23.3.2022 kl. 16:55]

Ég skil ekki þessa tilhneigingu að kenna BNA eða Vesturlöndum um það sem Pútín, eða aðrir brjálæðingar eru að gera. Vesturlönd bjuggu til Pútín! Bandaríkin bjuggu til ISIS!.

Nei, þetta er rangt. Pútín bjó til Pútín. ISIS bjó til ISIS, þ.e. þeir helsjúku handklæðahausar sem fylgja morðóða spámanninum.

Hvað varð um ábyrgð einstaklinga og þjóða á sjálfum sér? Gufuðu hún upp þegar einhverjir snillingar uppgötvuðu að hægt væri að kenna Bandaríkjunum um allt sem afvega fer í heiminum og þar með væri málið útrætt? *

* Orðalagið hægt væri að kenna BNA um..., þýðir auðvitað ekki að það sé mín skoðun. Mín skoðun er þvert á móti að það sé ekki hægt eins og sjá má af athugasemd minni. Ég er bara að benda á að þetta er mantran / síbyljan sem er endurtekin í sífellu.

[Gunnar Rögnvaldsson, 23.3.2022 kl. 17:45]

Þakka þér fyrir Theódór

Já ég veit að þú skilur þetta ekki, ásamt mörgum öðrum. Og það er stórt vandamál fyrir okkur hér á vesturlöndum

Í haust bárust fréttir af konu sem klappaði krókódíl í skemmtigarði í vestrænu landi - og hann át hana. Ekki veit ég hvort að hún náði að skilja þetta áður en henni var kyngt niður.

Þegar skrúfað var fyrir orkuna í tvígang til Úkraínu, hvað gerði ESB-evrópa þá? Jú, hún undirritaði risavaxinn orkusamning við Rússa og margfaldaði ávanabindandi orkubönd sín við það. Þangað sendir hún einn milljarð dala á dag í dag.

Og á sama tíma hugðist NATO koma sér fyrir í Úkraínu þannig að það tæki ekki nema nokkrar mínútur fyrir skotflaugar þess að ná til Moskvu þegar næsti klikkhaus kemst til valda á meginlandi Evrópu, sem gerist á ca. 80 ára fresti.

En það þýðir ekkert að ræða þetta við fólk með ríkisfang sitt í Útópíu. Þannig að það læt ég vera.

Kveðjur

[Theódór Norðkvist, 23.3.2022 kl. 17:58]

Ég er sammála þér um orkukaup frá Rússlandi, hræðileg mistök. Hinsvegar finnst mér ekki rétt af þér að tala svona niður til andmælenda þinna. Það stuðlar ekki að málefnalegum umræðum. Ég hef mínar skoðanir, en ég forðast að sýna þeim sem ekki skrifa undir þær, dónaskap.

[Símon Pétur frá Hákoti (IP-tala skráð) 24.3.2022 kl. 12:52]

Heimurinn leikur á reiðiskjálfi og það eina sem hálf elliærum forseta Bandaríkjanna er að setja viðskiptabann á stærstan hluta heimsins, að hans sögn til að einangra Rússland.

Er nema von að maður segi, Guð, hvað ég sakna þeirra tíma þegar Bandaríkin voru land frelsis og almennrar hagsældar hinnar breiðu millistéttar, og land tækifæra annarra til sams konar almennrar hagsældar.

En hér í lokin vonarkveðjan:

Pax Vobiscum.

[Símon Pétur frá Hákoti (IP-tala skráð) 24.3.2022 kl. 13:01]

Dettur í hug, datt út hér að ofan, leiðrétt:

/.../ og það eina sem hálf elliærum forseta Bandaríkjanna dettur í hug er að setja viðskiptabann á stærstan hluta heimsins, að hans sögn til að einangra Rússland.

En mín kveðja er sem fyrr:

Pax Vobiscum.

[Símon Pétur frá Hákoti (IP-tala skráð) 24.3.2022 kl. 22:19]

Alsíðasta athugasemd mín við þennan ágæta pistil, er að benda á að sagnfræðilegar nálganir, speglanir og mismunandi sjónarhorn, varða veginn framundan hvað þessi stríðsátök varðar. 

Um það fjallar Harvard hagfræði-sagnfræðiprófessorinn Niall Ferguson í varúðargrein sem verulega er verð íhugunar:

https://www.zerohedge.com/geopolitical/niall-ferguson-misunderstanding-history-biden-making-colossal-mistake

[Gunnar Rögnvaldsson, 24.3.2022 kl. 23:01]

Þakka þér fyrir Símon Pétur.

Já ég las þessa grein Njáls Fergussonar. Hún, eða krækja á hana beint á Bloomberg var á forsíðu Hoover-stofnunarinnar, ásamt fyrri grein hans um innrásina.

Hann hittir naglann að mínu mati, nema þá kannski um meintan sögulegan misskilning Vladímírs Pútíns, sem að mínu mati er hafður (misskilningurinn) með í greininn sem fyllingarefni, svona rétt til málamynda, svo að Rússahatursstóðið tryllist nú ekki alveg. Njáll þarf að passa sig á þessum galdrabrennutímum eins og allir aðrir.

Greinin snýst næstum öll um klúðrið og sögulegan einfeldningsskap Bidens og ríkisstjórnar hans.

Vel af sér vikið hjá Njáli.

Kveðja.

[Gunnar Rögnvaldsson, 24.3.2022 kl. 23:11]

Mér skilst að Hillary Clinton sé með kínversku Wuhanveiruna núna þannig að það er ekki víst að hún sé í standi til að staulast út á gangstétt til að öskra: Rússarnir gerðu það!