Mun Ísland missa alla sína banka og allar fjármálastofnanir?

Það eru 130 bankar og fjármálastofnanir eftir í Danmörku. Fyrir skömmu var þessi tala stærri en tvö hundruð. 

Í Danmörku búa 18 sinnum fleiri íbúar á tvisvar komma þrem sinnum minna plássi en er hér á Íslandi. Danmörk kæmist 17 sinnum fyrir í landhelgi Íslands sem er 758.000 ferkílómetrar að stærð. Landhelgi okkar er líklega stærsta löggæslusvæði nokkurrar landhelgisgæslu heimsins miðað við íbúafjölda. Efnahagslögsaga Danmerkur er einn sjöundi að stærð miðað við þá Íslensku. Samtals höfum við því tæplega eina milljón ferkílómetra af landi og hafsvæði til að nýta, sem Íslendingar. Þetta er einstakt!

Þessu öllu á að fórna til þess að við getum gengið í klúbb ESB-elítu Evrópu sem er að bana bankarekstri Dana á sama hátt og hún er að eyða friði og fullveldi þjóðríkja Evrópu. Í Danmörku horfa málin þannig að danskir sérfræðingar telja að aðeins 30 bankar verði þar eftir til að þjóna öllu landinu með 5,5 milljón manns, innan skamms. Eitt hundrað bankar og fjármálastofnanir munu láta þar lífið á næstunni. Annað hvort fara lóðrétt á hausinn eða renna saman við risa. 

Hið nýja massífa regluverk Evrópusambandsins á sviði banka- og fjármála mun verða svo hrikalega flókið, dýrt, umfangsríkt og erfitt viðureignar, að borin er öll von til þess að minni og millistórir banka- og fjármálastofnanir Danmerkur geti lifað það af að hafa umsjón með og fullnægja reglugerðarfargani af þeirri stjarnfræðilegu stærðargráðu sem það mun enda í. Þeir munu ekki anna þessu og ekki geta boðið viðskiptavinum sínum neitt né nógu mikið af vöru- og þjónustuúrvali, sem réttlætt getur tilvist þeirra í samkeppninni við risa sem hafa heilar herdeildir maura við vinnu í kjöllurum sínum við það eitt að fullnægja pappírsveldi Brussels.

 

Maí 2008: Í gær skrifaði Berlíngskurinn hér í gömlu Danmörku að það séu um 208 sjálfstæðar peningastofnanir í Danmörku. Af þessum 208 stofnunum eru 42 sem kallast "litlir bankar og sparisjóðir". Margir þessara eru yfir 100 ára gamlir. (mynd; Helgenæs Sparekasse á Haralds Blátannarbökkum)

 

Það er ekkert undarlegt við það að 400 litlir og sjálfstæðir bankar Sviss vilji ekki ganga í Evrópusambandið. Þeir lifa á innrás og öryggi í skjóli fullveldis og sjálfstæðis, en ekki á útrás kjána sem vissu aldrei hvað þeir voru að gera. 

Gangi Ísland í Evrópusambandið munum við missa alla okkar banka því þeir væru allt of litlir til að geta lifað af í samkeppni við risaeðlur Evrópusambandsins. Við munum líka missa Íbúðarlánasjóð Íslands. Hann yrði bannaður á núll komma fimm.

Talið er að áður en langt er um liðið verði aðeins um það bil 45 bankar eftir í öllu Evrópusambandinu. Þetta er fjármálamiðstöðin í næstu vetrarbraut fyrir Íslendinga, sem Samfylkingin og fjármálasnillingar landsins sáu fyrir sér hér á Íslandi. Núll komma núll þekking og vit þarna. 

Ef ég væri íslenskur banka- og fjármálamaður, myndi ég segja nei við ESB-aðild. Ég myndi ekki vilja skera undan mér og þjóðinni allri þá atvinnumöguleika sem felast í því að reka banka og stunda fjármálastarfsemi sem sjálfstæð og fullvalda þjóð landi okkar til heilla. Öllu sjálfstæði okkar á þessu sviði yrði eytt með nokkrum pennastrikum niðri í Brussel.   

Þessu vill Samfylkingin og Vinstri grænir fórna. Þeir vilja líka fórna nýtingu auðæfa okkar í landhelgi Íslendinga - sem erlendir bankar þá munu þéna á. Verið er að rústa sjávarútvegi Íslands á skrifandi stund. Landbúnaður okkar er næstur í röðinni. Samfylkingin og Vinstri grænir vilja fórna öllum peninga- og myntmálum þjóðarinnar um alla framtíð. Öllum rétti okkar til vaxtaákvarðanna og öllum rétti okkar til að stunda og hafa umsjón með peningapólitík og peningapólitískum vöxtum hagkerfis okkar. Við yrðum eins og fiskur á þurru landi. Súrefnislaus.

 

Þessu öllu, og miklu meiru til, vill Samfylkingin og Vinstri grænir fórna fyrir að Ísland verði Grikkland og Portúgal norðursins. Steindautt efnahagslegt steinaldarsvæði eftir bara smá stund í ESB-klúbb elítunnar.

 

Allt stefnir í sömu áttina hjá ríkisstjórn kommúnista og sósíalista Íslands: það er annað hvort Grikkland eða Kúba norðursins.

 

Þeir sem halda að Samfylkingin viti eitthvað betur hvað hún er að gera núna en þegar hún át, drakk, lifði og svaf með "Fjármálamiðstöðina Ísland" í magnaum fyrir hrun, já þeir ættu að hugsa sig um tvisvar. Samfylkingin veit álíka mikið um hvað ESB-aðild myndi þýða fyrir sjálfstæði, fullveldi og velfarnað Íslands eins og hún vissi um útrásarbankakerfi íslands fyrir hrun, þ.e.a.s hún vissi ekki neitt. Þessi hrunstjórnmálaflokkur er 100 prósent clueless.   

Fari þessi ríkisstjórn norður og niður. Hún er furstadæmi fáviskunnar, þjóðhættuleg og stórhættuleg okkur að öllu leyti.

 

Aldrei áður hafa eins miklir vesalingar skriðið eftir ríkisstjórnargöngum Stjórnarráðs Íslands, sem notað er nú sem skjaldborgin gegn þjóðinni og sem eigna- og sölumiðstöð sjálfstæðis og fullveldis íslenska lýðveldisins - sem vannst og staðfest var árið 1944 á Þingvöllum - eftir harða langa baráttu forfeðra okkar.  

 

Krækja: Eksperter: Over 100 banker kæmper for livet 

 

Tengt;

 

Frá maí mánuði 2008: Dauði banka í ESB 

 

Frá FT og Bloomberg í dag: Lending to eurozone banks falls sharply | Euro Crisis May Hit Eastern European Recovery

 

Athugasemdir

[Jóhann Elíasson, 16.5.2011 kl. 08:03]

Flott grein.  Má ég prenta hana út og sýna hagfræðiprófessor hana??

[Gunnar Rögnvaldsson, 16.5.2011 kl. 08:06]

Sæll Jóhann og góðan dag.

Allt mitt hér á þessum blogg er líka þitt. 

Lifðu heill

[Jóhann Elíasson, 16.5.2011 kl. 08:18]

Þakka þér fyrir.  Kunni samt ekki við annað en að biðja leyfis.

[Gunnar Rögnvaldsson, 16.5.2011 kl. 09:11]

Það er eitt sem þú þarft að muna eftir Jóhann þegar þú rekur þetta upp í andlitið á hagræðiprófessor; en það er að binda "hina höndina" á honum fyrir aftan bak. Þá getur hann ekki notað "on the other hand" og snúið sig út úr málinu með því að nota alheims tryggingakerfi hagfræðinga gegn því sem á eftir að gerast; þ.e.a.s að þora ekki neinu og hætta ekki neinu sem kastað getur rýrð á framvirk laun þeirra þannig að þeir geti ávalt haldið áfram að blakta í allar áttir í vindhviðum tækifærismennskunnar.

Þeir eru svo ósjálfstæðir og því gagnslausir, næstum allir. En samt ekki alveg allir.  

[Sigurður Kristján Hjaltestesd (IP-tala skráð) 16.5.2011 kl. 16:00]

Þakka þér fyrir frábæra grein. Allt sem þú telur upp, eru svo orð að sönnu. Það er bara með ólíkindum að það skuli vera til "fræðimenn" sem vilja halda öðru fram. Ég mun senda öllum mínum vinum og kunningjum slóðina á þína grein. Hér er tveir linkar sem margir hefðu gaman af að sjá, en það er hinn breski Nigel Farage, að tala hreint út um Evrópusambandið og hvernig það er uppbyggt. Mál sem allir skilja sem vilja.

Hverjir eru í stjórninni...????

http://www.youtube.com/watch?v=YWSYMpuCFaQ&feature=related

 og hver í andsk. ert þú.....????

http://www.youtube.com/watch?v=2gm9q8uabTs&feature=related

Kveðja Sigurður

[Sigurður Ingólfsson (IP-tala skráð) 16.5.2011 kl. 21:39]

Margt mjög gott í þessari grein Gunnar og ef nokkur fer á pennaflug gegn ESB aðild þá ert það þú. En ríkisstjórnin er nú að gera margt gott og gleymdu ekki að hún tók við,ekki bara vondu búi, heldur rústuðu búi. VG eru ekkert á leið inn í ESB né stærri hluti þjóðarinnar þegar til kastanna kemur. Samfylkingin er með skakka kúrsa í vissum málum eins og það alvitlausasta sem er að aðildin lækki matarverð og okkur yrði borgið með innflutningi. Hefur hún aldrei heyrt um flutningskostnað til Íslands þegar borið er saman matarverð hér og á meginlandinu? Samt held ég að flokkarnir geri sitt besta og ekki er gott að skipta um hest úti í á og allra síst í beljandi stórfljóti. Góðar upplýsingar um ferkm. lögsögunnar og þess sem vænta má í bankamálum. Erum við ekki hvort eð er undir Brussel regluverkinu með EES aðildinni?

[Gunnar Rögnvaldsson, 16.5.2011 kl. 22:57]

Kærar þakkir fyrir þetta Sigurður. 

Fræðimaður var hér áður fyrr notað um þá sem voru afar fróðir. En þetta orð/hugtak var ekki notað svo oft hér áður fyrr. Hef á tilfinningunni að það hafi oftast verið notað um menn sem bjuggu til og leituðu dýrmætra steina um og í fortíð okkar Íslendinga, sem oft á tíðum var þoku hulin. En í hlutarins eðli þá verða "fræðimenn" helst að dvelja við fortíðina. Það er þeirra sérsvið. Vettvangsferðir þeirra eru sjaldgæfar. 

Þegar danski sendiherrann í Moskvu komst við illan leik á friðarráðstefnuna í París árið 1919, og fékk áheyrn, þá var honum ekki trúað. Hann lýsti ástandinu í Moskvu og hinu nýja Sovétríki öreiganna. Nýja Sovétstjórnin hafði ekki sent neinn fulltrúa á þessa mikilvægu fríðarráðstefnu, þar sem Evrópu var splittað upp á ný - og ný landamæri dregin yfir Evrópu, sem í andaglasi væru menn. Sendiherrann lýsti hryllingnum sem var þannig að enginn trúiði honum. Fræðimenn voru spurðir ráða, og "töldu ólíklegt" að það sem maður sagði gæti staðist. Þeir deila enn, þessir svo kölluðu "fræðimenn", um málið í dag.

Þeir sem oftast lenda í ógöngum með raunveruleikann eru yfirleitt bara af tvennu tagi: þeir sem vissu allt, og þeir sem vissu ekkert.

[Haraldur Haraldsson, 16.5.2011 kl. 23:09]

sko Gunnar við gætum ekki verið meira sammála/Kveðja

[Gunnar Rögnvaldsson, 17.5.2011 kl. 10:16]

Þakka þér kærlega fyrir innlitið Haraldur

Sigurður: 

Erum við ekki hvort eð er undir Brussel regluverkinu með EES aðildinni? 

Nei við erum ekki undir þessu regluverki nema að brotinu til. Sjá: 

Goðsagnir um EES-samninginn og "80 prósent" uppspuninn 

- og hér -

Goðsagnir um EES-samninginn og "80-prósent" uppspuninn. (ísland sett inn í stað Noregs) 

[Jón Steinar Ragnarsson, 17.5.2011 kl. 11:04]

Utan efnis, enn einn brandarinn frá Evrópusamtökunum. Nú finnst þeiim RUV ekki vera að standa sig í áróðrinum.

Á hvaða plánetu er þetta fólk?

[Sigurður Ingólfsson, 17.5.2011 kl. 11:18]

Takk fyrir að benda á þessar greinar Gunnar. Maður kemur ekki að tómum kofanum hjá þér þegar kemur að Evrópumálum,þar fer saman reynsla og þekking.

[Gunnar Rögnvaldsson, 17.5.2011 kl. 13:02]

Þakka ykkur Sigurður og Jón Steinar. 

RÚV hefur engar forsendur ne heimild til að fjalla um ESB málið og á að láta það algerlega ógert. "Hlutlaus umræða" um pólitík er ekki til og verður aldrei til: ESB málið er fyrst og fremst stórpólitík og ekkert annað en stórpólitík.

 

Ef RÚV tæki að sér að fjalla "hlutlaust" um stefnu og framkvæmd stjórnmála Sjálfstæðisflokksins, til þess að reyna að gera kjósendum ljóst hvað flokkurinn er og stendur fyrir, þá yrði það aldrei. Aldrei.

 

Þeir flokkar sem berjast fyrir ESB-aðild eiga að berjast fyrir sínum málum. Allt annað væri þvættingur sem heima á í ruslatunnum fáránleikans.

 

Það er bara einn flokkur sem berst fyrir ESB aðild; Samfylkingin og þess vegna á að draga umsóknina til baka, strax. Hún á ENGAN rétt á sér.  

 

RÚV ætti hinsvegar að vera gagnrýnið á ríkisstjórnina, umsóknina og ESB og horfa gagnrýnum augum á það sem þar erlendis er að gerast og hefur gerst, á frekar vofufleygan hátt, verð ég að segja.

 

RÚV á að segja okkur sannar fréttir úr raunveruleikanum. En það gerir RÚV ekki og er því eins konar ríkisstjórnar fréttastofa DDRÚV.