Kæri Pútín

Kæri Vladímír Vladímírovich Pútín forseti Rússlands

Ég skrifa þér af ýtrustu nauðsyn því eftir níu mánaða hernaðaraðgerðir í Úkraínu, þó ekki eiginlegt stríð enn sem komið er, þá virðast vestrænar staðreyndir ekki enn hafa runnið upp fyrir þér sem þjóðarleiðtoga Rússlands. Til að byrja með þá vil ég upplýsa þig um að þú og allt Rússland voruð búin með öll skotfæri, bæði fyrir stórskotalið og allar skotflaugar, í apríl á þessu ári. Þetta þarft þú að vita. Einnig verður þú að vita að samkvæmt vestrænum fjölmiðlum ertu að nota örgjörva úr þvottavélum í hernaðarskyni. Þú þarft líka að vita að dagar þínir sem þjóðarleiðtogi voru þegar taldir í mars á þessu ári. Síðan þarftu að vita að þú hefur legið á einskonar dánarbeði í meira en tvö ár. Tony Blair hefur sagt okkur frá því að þú hafir beðið vestrænt skipbrot eins og Boris Johnson og Elizaveta Trasova, bæði útsendarar Leníns, vegna Kínaveirunnar og félagslegrar einangrunar [sic] sökum hennar. Þess vegna hefur þú verið ófær um að sinna störfum, skyldir þú ekki vita það

Mér er einnig ljóst að þriðji og fjórði burðarásinn í NATO, þ.e. Frakkland og Þýskaland, eiga það miklar birgðir af þeim skotfærum sem ég nefni hér fyrir ofan, að frönsku birgðirnar myndu til dæmis endast rússneska hernum í fjóra daga, þær þýsku í minna en einn dag, og hjá næstöflugasta burðarási NATO þ.e Stóra-Bretlandi, myndu birgðir þess lands sennilega duga þér í fimm daga. Bandaríkin eru því miður þurrausin og ætla því að flytja inn inn skotfæri frá Suður-Kóreu, þannig að þar er eftir engu að koma. En þessu greindi vestræna fréttastöðin CNN frá um daginn. Magnið sem Bandaríkin ætla að kaupa í Suður-Kóreu er 100 þúsund stykki af 155 mm skotum fyrir stórskotalið. Það magn myndi endast rússneska hernum í fimm daga og svarar því til rúmlega þess sem Frakkland hefur sjálfu sér til varnar. En eins og ég greini frá hér fyrir ofan, var Rússneski herinn með vestrænu öryggi búinn með skotfæri sín í apríl. Um það verður ekki deilt því sannleikurinn (r. pravda) um þetta stendur í öllum fjölmiðlum okkar hér á vesturlöndum. Hverjum einasta þeirra

Einnig vil ég láta þig vita af því að vestrænir fjölmiðlar segja að efnahagur Rússlands sé hruninn. Og það sem meira er, hann er búinn að vera hruninn síðan í maí á þessu ári. Þessu þarftu að átta þig á. Þú verður því að grípa til þeirra ráða að reka allt forsætisráðuneyti Rússlands því það sagði í fyrradag að rússneska landsframleiðslan hefði dregist saman um minna en þrjú prósent það sem af er ársins og að á næsta ári muni jafnvel verða hagvöxtur í Rússlandi, eða þá samdráttur sem yrði minni en eitt prósent. Þú verður að minnsta kosti fyrir alla muni að setja Andrey Klepach yfirhagfræðing hjá VEB.RF á stól forsætisráðherra strax, því hann sagði að samdrátturinn á þessu ári yrði 3,1 prósent og er það meira en þeir hjá forsætisráðuneytinu segja. Við hér á Íslandi höfum reynslu af svona málum því hér var slíkur hagfræðimaður settur á valdastól því hann sagði að við yrðum Kúba norðursins. Það gekk auðvitað frekar illa ofan í Norðurslóðana, því þeir menn hafa haft fyrir því að hringborðs-koma saman í bráðum 30 ár til að fagna vorkomu Nýju-Sovétríkjanna - og hafa meira að segja næstum árlega drukkið kaffi í Kredithörpunni frá því að hún var opnuð og sem rekin er með alveg sérstöku og stórkostlegu tapi frá fyrsta degi. Þarna sitja þeir og bíða og hafa gert í 30 ár en ekkert gerist, nema það að sérfræðingar Rússlands í íshafsmálum segja að ekkert muni breytast m.t.t. íss í Norðurhöfum næstu 30 árin. Engin þýða og jafnvel enn meiri hafís næstu 30 árin er langur tími fyrir þessa fundarmenn

Við erum einnig komin með þá fjölmiðla sem forverar þínir buðu Rússum upp á frá 1918 til 1990. Við erum því með öfluga og ramma sovéska fjölmiðla og þeim verður þú einfaldlega að hlýða, því allt sem þar stendur er ríkisrekinn sannleikur og er spil þitt því búið samkvæmt þeim. Þið í Rússlandi ættuð því ekki skemmta ykkur um of yfir þeim, og ekki segja að til dæmis Gréta Thunberg sé næsti Lenín

Það hefði nú verið gaman að hafa mannþekkjarann Maksím Gorkíj til að skrifa um sovétríki vesturlanda í dag. En hann las ég á unglinsárum mínum, í snilldarþýðingu Kjartans Ólafssonar, áður en ég þroskaðist eins við báðir höfum greinilega gert

Þetta var nú það sem ég vildi segja þér í fullum trúnaði, minn kæri Vladímír Vladímírovich Pútín forseti Rússlands

Virðingarfyllst og með góðum kveðjum 
Gunnar Rögnvaldsson þjóðaríhaldsmaður, Íslandi 

PS: Ég bið þig þess að sökkva ekki öllum flugmóðurskipum Bandaríkjanna á fyrsta degi ef til stríðs kemur, því áfallið yrði svo mikið fyrir bandarísk stjórnvöld að þau myndu í hjálparleysi, örvæntingu og bræði sinni grípa til kjarnorkuvopna. Skildu því tvö skip eftir, að hætti Kutuzov, og leyfðu þeim að buslast á næstu 24 mánuðum yfir Atlantshafið eins og síðast. En þá tók það Bandaríkin –nú burðarásinn í NATO– tvö ár að komast sjóleiðina til Evrópu, vegna kafbáta þú veist hverra. Þú getur auðveldlega fylgst með skipunum í öllum gervihnöttunum ykkar. Hvaða stjórnmálaflokk finnst þér að ég ætti að kjósa næst? Ég spyr því ég veit það ekki sjálfur. Hér keppist nefnilega hver stjórnmálaflokkurinn við annan um að eyðileggja landið mitt þannig að mig langar mest til að kasta upp yfir kjörseðilinn minn

Fyrri færsla

Rússneski seðlabankastjórinn segir frá

Athugasemdir

[Eggert Guðmundsson, 24.11.2022 kl. 10:42]

Sæll

Þetta er þörf ádrepa hjá þér á ástandið- skemmtilega sett upp

[Birgir Loftsson, 24.11.2022 kl. 11:06]

LOL. En er ástandið svona slæmt í vopnabúrum Vesturvelda? Á ekki bara að snara bréfi þínu á rússnesku og láta rússneska sendiráðið fá eintak? Ég er viss um að þeir eru ekki önnum kafnir þessa daganna!

[Gunnar Rögnvaldsson, 24.11.2022 kl. 12:49]

Þakka þér fyrir Eggert.

Já ekki er vanþörf á. Eftir þessa níu mánaða syrpu af fullkominni vanþekkingu, húrrandi heimsku og fullkomnum fábjánahætti vestrænna fjölmiðla, hef ég fengið nóg.

Þeir sem aldrei skora sjálfa sig á hólm og taka skoðanir sínar í gegn munu ávallt lenda í því að ofmeta eigin getu sökum vanmats og þekkingarleysi á viðfangsefninu.

Hér sannast einu sinni enn að fjölmiðlar vesturlanda eru fyrst og fremst til til að þéna peninga en ekki til að flytja lesendum staðreyndir og sannleika. Farið hefur fé betra.

Þeir ríkisreknu eru þó allra verstir og frekari ríkisstuðningur boðar aðeins meira af því sem verst er.

Kveðjur

[Gunnar Rögnvaldsson, 24.11.2022 kl. 14:21]

Þakka þér fyrir Birgir.

Já staðan er slæm í vopnabúrum NATO-landa þegar að svona málum kemur því NATO var stofnað til að koma í veg fyrir stríð í Evrópu, en ekki til að kynda undir þau og koma þeim af stað eins og gerst hefur síðan Sovétríkið var leyst upp innan frá. Það bandalag situr því núna eins og það hefur búið í haginn fyrir sig.

Menn verða að athuga að Rússland er landið sem í Síðari heimsstyrjöldinni missti 30-falda stærð bandaríska landhersins eins og hann stóð fyrir aldamótin 2000 - og lifði það af. En sárin eru hins vegar mörg sem Rússland hlaut við að leggja Þriðja ríki nasista og bandamanna þeirra að velli. 

Í dag eru fallnir 100 þúsund hermenn úr NATO-studdum herjum Úkraínu og um það bil 400 þúsund eru særðir og mæta ekki til leiks aftur. Svarar þetta til stærðar bandaríska landhersins núna. Iðnaðargeta NATO-landanna er þó enn minni en vopnabúrin. Hafa þau sjálf séð til þess með því að þylja í sífellu trúarsetningar klerkaveldis glóbalismans.

Bandaríkin eru ekki landherveldi og það eru heldur engin aðildarríki NATO. Bandaríkin eru fyrst og fremst flota- og flugherveldi. Svipað gildir um Bretland, en allur herafli þess kæmist þó auðveldlega fyrir innan í landgönguliðsdeild Bandaríkjanna. Franski herinn er á svipuðu róli og Þýskaland er ekki með her. Ítalía hefur nú þegar sagt að hún sendir ekkert meira vopnakyns, heldur aðeins aðhlynningu. Öflugur gríski herinn er upptekinn við annað og þetta mál kemur honum því ekki við.

Rússar búa betur að sendiráðum sínum en mörg önnur lönd þegar að tungumálum og landaþekkingu kemur. Þannig rötuðu skrif sumra okkar hér á blogginu í rússneska fjölmiðla þegar refsiaðgerðarugl íslenskra stjórnmálamanna hófst, engum til gagns en öllum til ógagns, árið 2014/2015. Taktu einnig eftir því að núverandi forseti Úkraínu talaði ekki "úkraínsku" fyrr en rétt nýlega, því móðurmál hans er rússneska. Spriklar hann ósjálfbjarga í NATO-vösum Bandaríkjanna núna.

Kveðjur