Þúsund einkaþotur lentar í Davos

Mynd: Reuters

Hvað er ég eiginlega að tala um? Jú Davos-mennina. Exelið. Þeir eru lentir í Davos í Sviss í meira en þúsund einkaþotum, til að bjarga plánetunni frá endalokum hennar (þeirra): þ.e.a.s. frá umhverfismálaógninni (lesist hlýnun af þeirra völdum)

Um er að ræða allar helstu elítur jarðar og þar með talin nokkur ríkishöfuð, seðlabankamenn og bankastjóra, forstjóra og helstu frammámenn í alþjóðavæðingar-kirkjunni, sem hlýða þar á afspiluð Parísar- og fjölþjóðasamkomulög af grammafóni þeim sem kann bara eitt lag í dag; loftslagið

Þetta er svo sprenghlægilegt að ég fór út og pissaði á klakann til að leggja mitt af mörkum til hlýnunar jarðar þeirra. Þeir eiga hana, halda þeir

Síðast þegar tímabil svona kirkjudeilda gat kallað til hámessu eins og þeirrar sem fram fer þarna í Davos, þá var ástandið svipað og það er í dag. Páfar, ókjörnir kóngar, prinsarnir og þjónar þeirra voru bornir í hásætum hvert sem var, hvenær sem þeim þóknaðist, af vesalingum eins og mér og þér; algerlega gratís. Okkur var gert skylt að bera þetta lið hvert sem því þóknaðist að stíga fæti til jarðar. Í dag lenda þeir hins vegar á þúsund einkaþotum til að bjarga jarðríki sínu frá hlýju vatni eins og kastaðist af mér

En það sem verra er, vondur maður er nú mættur á staðinn og ætlar sá að halda ræðu sína yfir þeim á morgun. Hann heitir Donald Trump. Hann er lentur, fullur af umboði þeirra sem þetta lið skildi eitt eftir á fjóshaug alþjóða-væðingarinnar. Mikið hlakka ég til. Þetta gæti orðið byrjunin á nýrri engilsaxneskri iðnbyltingu, eins og þeirri sem leysti lita pissandi manninn úr ánauð elíta sem bera þurfti hvert sem var, hvenær sem var

Forsætisráðherra Indlands verður sennilega skúffaður, en hann spilaði í gær fyrsta fjárkúgunarstefið úr Parísarsamkomulaginu: "þið sem eruð ríkari en við, þið verðið að gera ykkur fátæka eins og við. Annars fer jörðin til helvítis og þið öll með. Komið þið með peningana"

Þetta lið hefur frá lokum síðustu heimsstyrjaldar verið að þræða fullvalda þjóðríki jarðar upp á einkalyklakippu sína, sem heitir alþjóðlegar stofnanir og samtök. Gamla ókjörna kónga-elítan var hins vegar mest innanríkisleg, því hestar voru ekki einkaþotur. Þetta lið talar ekki við náungan í næstu götu, heldur einungis við þann sem kann alþjóðlegt tungumál þeirra í næsta landi á lyklakippunni, eða hinumegin á plánetunni. Svo lendir það og messar yfir mér og þér í formi hinna og þessara endalausu alþjóðlegu stofnana sem stútfullar eru af svo kölluðum "sérfræðingum". Þetta lið er orðið nýr lykla-Pétur og úniversal-imperial eitur fyrir fullvalda þjóðir. Ekkert er lengur hægt án samþykkis þeirra eða vottunar. Theresa May komst vel að orði þegar hún sagði að þetta lið væri orðið heimilislaust afglapaveldi einskis

Best að fara út aftur og endurtaka síðustu hlýnun einkajarðar minnar. Gott fyrir bláberin, kartöflurnar, rabarbarann, birkið og snarrótina, en vont fyrir nef rebba. Svo tala ég við krumma og bíð eftir horssagauknum

Já. Þúsund einkaþotur í Sviss eru lentar, þér til bjargar (hringja klukkum hér), og himnar opnast. Restina kunna flestir. Þetta lag verður spilað svo lengi sem það eru peningar í því, fyrir útgefandann

Krækja

Irony Alert: A Thousand Private Jets Deliver Globalist Elite to Davos for Climate Change Summit

Fyrri færsla

Smölun hafin í Þýskalandi

Athugasemdir

[Ómar Ragnarsson, 25.1.2018 kl. 11:25]

Davos er fjallabær sem stendur í brattlendi hátt uppi í Ölpunum, víðsfjarri öllum flugvöllum. 

[Gunnar Rögnvaldsson, 25.1.2018 kl. 11:59]

Þakka þér Ómar.

Já eins og þeir sem fljúga til Reykjavíkur, sem stendur bara alls ekki hátt, heldur fellur, en lenda í Keflavík. Og bráðum lendir enginn í Reykjavík og bærinn lokar, því vegur verður lagður utanum þá kulnuðu borholu borgarstjórans. Hún er að verða tóm.

Flestir lenda í Zurick Ómar, en um alls fjóra velli er að velja: Hér er þetta skorið út í pappa handa þér: More than 1,000 private jets are due to land in the airports around Davos

Kveðjur

[Ómar Ragnarsson, 25.1.2018 kl. 13:05]

Það er margfalt lengra frá nefndum flugvöllum til Davos en frá Reykjavík til Keflavíkur.

Ráðstefnan í Davos hefur verið reglulegur viðburður í áratugi án þess að það sé allt í einu talað þannig, að enginn sé gjaldgengur þar nema að hann gangi, hjóli eða rói þangað með handafli bara vegna þess að umhverfismál eru meðal ræðuefna í þetta sinn. 

[Gunnar Rögnvaldsson, 25.1.2018 kl. 13:33]

Það er líka margfalt lengra á milli mín en þín Ómar.

Ég sé að þessir þrjú til fjögur þúsund þotumótorar elítanna koma við þig Ómar. Sjálf yfirborgaralínan í lofti. En samt ekki á þann hátt sem ég gerði ráð fyrir.

Þessu elítuliði er nokkuð sama um umhverfið Ómar. Það er komið í þennan málaflokk til að fá peninga eins og flestir aðrir sem lifa á þessum málaflokki. En fyrst og fremst eru það áframhaldandi völd sem þeir reyna þarna að framlengja. En sem þetta umboðslausa elítu- og sérfæðingastóð sem klessti veröldinni árið 2009, ætti bara alls ekki að hafa. Til að reyna að byggja undir völd sín sem þeir óttast að missa, og eru byrjaðir að missa, er málið sett á dagskrá til líta vel út. Þetta er musteri lýðskrums, hræsni og umboðslausrar valdabaráttu um völdin yfir lífi fólks.

En umboðslausir valdadagar þessa liðs eru brátt taldir. Stærstu pólitísku breytingar síðustu 100 ára eru að hefjast. Umboðslausu sérfræðingarnir fengu sinn séns, en klúðruðu honum og sendu Vesturlönd á guðlausan fjóshaug.