Ríkið hefur ekki vit á þessu

Bara svo það sé á hreinu: hið opinbera hefur ekki hundsvit á rannsóknum, þróun og nýsköpun. Og ríkið og hið opinbera veit ekkert um það í hverju fólk á að mennta sig. Það veit heldur ekkert um hvað á að rannsaka og það veit ekkert um hvað og hvernig á að skapa nýtt

Hvað eru stjórnmálamenn að blanda sér í þetta mál? Geta þeir ekki bara látið sér nægja að mæta í vinnuna, hafa hljótt um sig, hætta að birtast eins og spámenn í fjölmiðlum og reynt í staðinn að sinna þjónustustarfi sínu við að greiða götur fyrirtækja og hætt að ofsækja stjórnarskrá hins almenna borgara, svo að fyrirtækin, þau sem fólkið vinnur í, en ekki þeir, stundi þær rannsóknir og þá þróun sem þau álíta að gróðavænlegt sé að stunda og gera. Og einnig látið fólk almennt um að skapa það nýja sem er því að skapi, en ekki ykkur. Og látið þar með það sjálft um taka ábyrgð á að verpa þeim eggjum sem í níu af hverjum tíu tilfellum eru fúlegg sem fara á hausinn innan næstu fimm ára. Það er þannig sem nýsköpun fer fram

"Stjórnkerfið" stjórnar engu. Síst af öllu sjálfu sér. Það er stjórnlaust og hefur alltaf verið stjórnlaust og sést það best á Reykjavíkurborgarstórslysinu í dag, næstu ár og áratugi. Það er gott slæmt dæmi um glórulaust stjórnkerfisgrjót. Steinninn er ekki lengur við Skólavörðustíg. Hann er orðinn hjartað í borginni. Þar sitja íbúarnir inni og afplána. Þeir sem komast burt, þeir flýja!

Hið opinbera hefur ekkert vit á loftslagsmálum, vegna þess að hið opinbera er gamalt hárlakk. Það er gat í ósónlaginu, hárlakksbrúsi fyrir punthár stjórnkerfisins og heimsfræga alþjóðlega fjármálamiðstöð. Það er líka bla bla erfðagreining sem vinnur við að afla fjár til að að afla fjár til að afla fjár og fara á hausinn og fara á hausinn og lítið annað en það. Riskí bíssness sem horfið getur algerlega á einum degi. Lyf og lækningar er áhætturekstur

Nýsköpun stjórnmálamanna og svo kallaðs stjórnkerfis þeirra, ætti fyrst og fremst að snúa að þeim sjálfum. Því við borgararnir getum allt sjálfir nema rekið lögreglu -sem þið getið því miður greinilega ekki heldur- dómskerfi og landvarnir. Og þær varnir getið þið ekki rekið heldur. Þið getið lítið það sem máli skiptir og sinnið ekki því sem þið eigið að sinna

Allir fjármunir lýðveldisins Íslands verða til í fyrirtækjum þess. Engir aðrir fjármunir eru til. Öngvir! Þjónið því þeim. Þau eiga ekki að þjóna ykkur. Hættið öllum rannsóknum. Hættið allri nýsköpun og hættið að leggja atvinnugreinar í rúst. Lokið nokkrum blöff háskólum. Lokið landamærunum og viðurkennið Kópavog, Garðabæ, Hafnarfjörð og Mosfellsbæ sem höfuðborg Íslands

Og munið: Bandaríkin eru rík af því að þar stundar hið opinbera engar rannsóknir; nema í hernum. Og okkur vantar her. Íslenskan her sem getur gætt lofrýmis okkar og hafsins í kringum landið. Okkur vantar ekki meira "stjórnkerfi" sem getur ekki einu sinni stjórnað sjálfu sér. Upp með herinn og niður með brækurnar. Íslenska herstöð í hverjum landsfjórðungi, þaaað er nýsköpun!

Fyrri færsla

Evrópa er orðin ólæknandi og óferjandi, þökk sé ESB

Athugasemdir

[Hrossabrestur, 11.12.2017 kl. 11:06]

Sammála síðasta ræðumanni.

[Hrólfur Þ Hraundal, 11.12.2017 kl. 21:49]

Já Gunnar það vantar her , öll sjálfstæð ríki með sjálfsvirðingu hafa her.

 Her gætir landamæra ríkja og þroskar sjálfsvirðingu þjóða, kennir ungu fólki að virða land og þjóð en einkum þó að rækta sig sjálft.

 Her sem skilaði þessu væri mikilsvirði en auðvita eigum við að leggja það til sem okkur er fært í samvinnu við þá sem vilja veita okkur lið.

  Það er skömm að því hvað við höfum lagst lát í þessum málum á meðan að óþjóðhollir hafa rægt velvildarmenn okkar.