Herveldin gengu út

Evru-popúlisminn 2000

Hlassi af 28 utanríkisráðherrum á pallbíl Evrópusambandsins var að kröfu pantarans í Brussel, sturtað niður til fundar og kvöldverðar þar í borg um síðustu helgi. Hlassið átti að fjalla um kjör Donalds Trump í forsetaembætti Bandaríkjanna og búa til "sameiginleg viðbrögð" hlassins við því. Sýna átti Bandaríkjunum múrverkið sem Evrópusambandið er gert úr, þar sem hlutfallið allir á móti öllum er notað í loftplötuna, smáríkjum rappað á veggina og sandi stráð í augu almennings til skerpa sýn hans á burðarþolið

Þetta gekk mjög vel. Ungverjaland sagði að evrópska sambandið við bandarískan raunveruleika væri histerískt, Bretland bar við almennri matarlyst og Frakkland afþakkaði steiktar stálevrur í brennandi ítölskum ríkisskuldabréfum, af tillitssemi við fátæktina í suðri. Fóru þessi tvö ríki þar með heim til síns heima og eftir sátu 26 herlausir ráðherrar, teljandi kústsköft með sameignlegu herbragði

Þegar Bretland er farið úr Evrópusambandinu verður Frakkland eina herveldið í hlassinu sem nafni tekur að nefna. Og það vita allir

Fyrri færsla

Evran fellur stíft gagnvart Bandaríkjadal

Athugasemdir

[Ragnhildur Kolka, 15.11.2016 kl. 16:05]

Eins gott og það gerist. Þér tekst Gunnar að gera leiðinda þras meira en bærilegt.

[Elle_, 15.11.2016 kl. 19:38]

Enn tókst honum svo snilldarlega að koma orðum af þessu pappírsbákni í lýsingar;) 

Margir mjög ritfærir menn í Moggablogginu skrifandi greinar.  Jón Steinar fer á kostum í commentum, Hilmar óvanalega orðfleygur af óskráðum bloggurum að mínum dómi en hefur vantað núna. 

[Hrólfur Þ Hraundal, 15.11.2016 kl. 21:43]

Frakkar? Sem aldrei hafa unnið nokkurt stríð, ekki svo að við höfum gert það betur ,  en við höfum þó lifað á okkar.

[Helga Kristjánsdóttir, 16.11.2016 kl. 00:05]

 þetta er sá lífsins elexír sem maður hverfur að eftir daginn dömur mínar.

  

[Gunnar Rögnvaldsson, 16.11.2016 kl. 06:19]

Kærar þakkir öll fyrir innlit og góðar kveðjur.

Já já, Hrólfur. Frakkland er þriðja mesta kjarnorkuveldi veraldar með 10 þúsund km. drægni og hefur ekki fyrirfram útilokað að nota þau vopn í aðstæðum eins og í núverandi stöðu mála, sem eru afleiðingar skipulagðra hryðjuverkaárása á landið.

Eina kjarnorkuknúna flugmóðurskipið í eigu nokkurs ríkis á austurhveli jarðar, og reyndar fyrir utan Bandaríkin, er í eigu Frakklands. Franski sjóherinn er talsverður floti sæfaraþjóðar með sterkar hefðir og reynslu og með öflugan kjarnorkuknúinn kafbátaflota, og flugherinn er talsverður og landherinn er þrautreynd eining eftir margra alda ýtarlega reynslu og árangur. Leyniþjónustan er fyrsta flokks.

Frakkland varð á þessu ári næst stærsti hergagnaútflytjandi í heimi (stærra er Rússland) þegar litið er til í gangverandi samninga, afhendingartölur eru þó minni en samt með þeim stærri.

Mér finnst oft ríkja töluverð vanþekking og vanmat á Frakklandi meðal Íslendinga, svona almennt.

Landið býr við sterk náttúruleg landamæri á alla kanta nema einn, sem gerir því kleift að skrúfa hinn hefðbundna herstyrk á friðartímum verulega niður og láta gereyðingarmáttinn tala sínu þögla máli, þegar að öryggismálum landsins kemur.

Þegar Frakkland stendur andlega sameinað í þjóðarfótinn, þá er það sterkt. En þannig var staðan bara ekki 1940, þá var landið frekar sundrað.

Kveðjur