Svo lengi sem Grænland er viðriðið Danmörku mun heimurinn ekki líta á það sem frátekið land. Svo einfalt er það

Þetta skilur Helle Thorning-Schmidt fyrrverandi en misheppnaður forsætisráðherra Danmerkur ekki, enda oftast kölluð Gucci-Helle í daglegu dönsku tali

****

GRÆNLENDINGAR EKKI SPURÐIR

Þetta skilur hún sem fyrrum danskur forsætisráðherra úr danska sósíaldemókrataflokknum auðvitað ekki þegar hún í CNN sunnudaginn 30. mars 2025 sagði að ekkert hindri Bandaríkin í að opna enn fleiri herstöðvar á Grænlandi. Þar með er hún að segja að Grænland á höndum Dana geti þess vegna orðið hernaðarnýlenda annarra landa, og þá fyrst og fremst sökum þess að Danir eru Grænlendingum algjörlega getulausir í varnarmálum – eins og í flestum öðrum málum: þó einkum í tilvistarlegum, efnahagslegum, félagslegum, og þjóðaröryggislegum efnum

Og ekki er hún að spyrja Grænlendinga um leyfi fyrir neinu þegar hún opnaði fyrir snilli sína í bandarískum fjölmiðlum í gær. Þar úthlutaði hún í beinni útsendingu herstöðvaaðstöðu til Bandaríkjanna án þess að spyrja neinn Grænlending að neinu, frekar en nokkru sinni hefur verið gert af hálfu hins gamla nýlenduveldis Dana. Þarna sést einmitt danski nýlendupraxísinn í praxís á Grænlandi. Og þarna sannast orð JD Vance varaforseta Bandaríkjanna, Þorgerði Katrínu til mikillar gremju

Síðastliðin 50 ár hefur Danski herinn verið látinn koðna niður í ekki neitt og Danmörk nær aldrei staðið við NATO-skuldbindingar sínar, fyrst og fremst vegna þess að Danmörk er bóla á rassi Þýskalands og fylgir ávallt fordæmi þess (við borgum ekki), enda gervihnöttur á sporbraut um fyrst og fremst þýska ríkið, en ekki um Bandaríkin

Það sást sérlega vel í Síðari heimsstyrjöldinni þegar flokkur Sósíaldemókrata við völd píndi danskt efnahagslíf til að snúa sér burt frá Engilsöxum og að Þýskalandi til að hámarka afköstin í þágu nasista, þannig að Danmörk varð næst stærsta viðskiptaland þýska Nasistaflokksins á eftir Ítalíu, hernámsárin öll

Eftir stríðið þvinguðu danskir sósíaldemókratar svo danskt atvinnulíf til að taka þátt í "refsiaðgerðum" gegn til dæmis Suður-Afríku, Síle, Írak og Burma, en aldrei gegn Sovétríkjunum né Kína, Íran eða Sádi-Arabíu. En nú þola danskir sósíaldemókratar ekki Rússland lengur, því Rússland sveik sósíalisma Evrópusambandsins, sem sækir fyrirmynd sína til pólitísks skipulagsveldis Sovétríkjanna

EINFALT

En ef Grænland væri hins vegar Bandarískt, þá þyrfti enga aukalega herstöð þar, því allir vissu að landið væri Bandarískt – og þar með algjörlega frátekið. Svipað gildir einnig ef sjálfstætt Grænland gerði varnarsamning við Bandaríkin, eða færi í svipað ríkjasamband við þau og t.d. Puerto Rico

RÖKIN

Rök Bandaríkjanna í þessi máli eru þau; að losni Grænland undan Dönum og verði sjálfstætt og fullvalda ríki; að þá geti Grænland sjálft gert þá samninga við Bandaríkin sem þau kunna að vilja og þurfa. Í dag mega Grænlendingar varla sjálfir tala við erindreka annarra ríkja. Hringja verður niður í danska utanríkisráðuneytið í Kaupmannahöfn þegar sauðnautin á staðnum komast að því að þau eru á leið til Kína frá kínverskum flugvöllum á Grænlandi

NOKKRAR STAÐREYNDIR MÁLSINS

Ratsjárstöð á Grænlandi er fínt fyrir þarfir Bandaríkjanna þar. En öll alvöru hernaðaruppbygging á norðurslóðum yrði hins vegar að vera á Íslandi. Og einungis frá Íslandi geta Bandaríkin sinnt Grænlandi eins og þarf

Engin djúpsjávarhöfn getur orðið til á Grænlandi, hvorki vestan-, sunnan-, né austanmegin. Erlend heimahöfn bandarísks flugmóðurskips gæti því aldrei orðið á Grænlandi. Fordæmi fyrir slíku fyrirkomulagi er Yokosuka, Japan. En hún gæti orðið á Íslandi

Rúmir 1500 km eru frá bandarísku Pituffik herstöðinni til Nuuk. Flugleiðin frá Nuuk til Keflavíkur er þó 100 km. styttri.

Og ekki batnar staðan þar nyrðra við það að Kanada hefur vanrækt NATO-skuldbindingar sínar að sama marki og Danmörk. Hefur Danmörk því engan vegin verið sá "góði bandamaður" sem hún allt í einu segist vera núna. Því fer fjarri

AÐ LOKUM

Annars er það harkan sex, eins og Ísland lenti í 1940 og 1941. Og þá vorum við glöð að Bretar og Bandaríkjamenn urðu fyrstir, en ekki meginland tapara ESB-Evrópu

Fyrri færsla

Landsölupakkhús Þorgerðar fúlt út í JD Vance

Athugasemdir

[Ingólfur Sigurðsson, 1.4.2025 kl. 02:54]

Þetta er ágætis pistill og margt kemur fram í honum sem fólk gleymir oft eða tekur ekki með í reikninginn. 

Ég vil bæta því við sem kemur fram í stuttum pistli Wilhelms Emilssonar, en innihaldsríkum, að eitt gleymist í þessu. Grænlendingar eru fátækir og innviðir lélegir. Ef þeir fá fullt sjálfstæði frá Dönum versna lífskjör þeirra enn meira. Eins og hann skrifaði í svari til annars manns, Ásgríms Hartmannssonar, þá koma um helmingur opinberra tekna í Grænlandi frá Danmörku. Ef þeir verða sjálfstæðir, sem meirihlutinn vill, og stjórnin sem nú komst að, þá mun það verða þeim þungur baggi og mjög erfitt fjárhagslega.

Auk þess, sveiflur verða mjög miklar og tíðar í grænlenzkum stjórnmálum, miðað við að kosningaúrslitin komu á óvart, og lítið um skoðanakannanir.

Þar af leiðandi: Ég myndi halda að sú stjórn sem er núna við völd sem Viðreisn segir að sé með sömu (hörmungar) stefnu og þau sjálf sé MJÖG völt og ótrygg í sessi.

Annað mjög merkilegt eftir að ég fór að fylgjast með grænlenzkum stjórnmálum. Flokkurinn sem fékk næstmest fylgi og vill jafnvel taka boði Bandaríkjanna um að verða fylki í Bandaríkjunum og Grænland verði keypt af Trump, hann er núna úti í kuldanum í Grænlandi, eins og aFD í Þýzkalandi, Svíþjóðardemókratar í Svíþjóð, osfv.

Segir mér bara að hann gæti orðið stærstur næst, en um það er ekki hægt að vita með vissu samt.

En fólk kýs yfirleitt með hliðsjón af efnahagnum. Sjálfstæði Grænlendinga verður þeim mjög dýrt. Ég er nokkuð viss um að dýrt sjálfstæði frá Dönum verður mikill hvati að hlaupa í næsta mömmu/pabba faðminn: Til Trumps og Bandaríkjanna.

[Gunnar Rögnvaldsson, 1.4.2025 kl. 13:45]

Þakka þér fyrir Ingólfur.

Ég efast ekki um að grænlenska hagkerfið myndi leysast úr nýlendulæðingi ef Bandaríkin koma að málum þar. Það yrði líklega framkvæmdur uppskurður á því, og sem skera myndi á nýlendukýlinu, þ.e. hinum vonlausa opinbera geira.

En frumástæðan fyrir geopólitískum áhuga Bandaríkjanna á Grænlandi er sá að Evrópa er á leiðinni á nauðungaruppboð. Evrópa getur ekki varið sig sjálf, eins og sést svo vel í dag. Vonlaust er að halda svona ósjálfbjarga fyrirbæri eins og Evrópu uppi og þess vegna eru Bandaríkin endanlega að gefast upp á Evrópu. Kaninn hefur önnur glóandi járn í eldinum og sem eru honum tilvistarlega mikilvægari.

Þessi staða kallar á að Evrópa leiti ásjár hjá Rússum og Kínverjum. Danmörk mun því selja Grænland til hæstbjóðanda í þeim félagsskap eins og gefur að skilja. Og við þá geopólitísku stöðu geta Bandaríkin ekki unað. Þess vegna verða þau að koma Grænlandi í skjól, burtu út þrotabúi Evrópu, þar sem nauðungaruppboðin nálgast.

Í dag er 10-ára ríkisskulda-lántökukostnaður Frakklands orðin meiri en Grikklands og Spánar. Landið er að verða stjórnlaust rekald og Þýskaland er að verða það líka. Nauðungaruppborðin nálgast.

Kveðjur