Þið eruð næst

Verið er að frumsýna nýja bíómynd Rússa í kvikmyndahúsum þar eystra um þessar mundir. Nefnist hún "Áskorunin" og er fyrsta bíómynd veraldar sem tekin er upp úti í geimnum - og hefði ekki verið tekinn upp þar ef Rússar ættu ekki Soyuz-2.1a og Soyuz MS-19 sem notuð voru sem farskjótar. Það er ekki tilviljun að Rússland sé mesta landherveldi mannkynssögunnar og sem þessi árin útskrifar árlega mun fleiri verkfræðinga og raunvísindamenn en Bandaríkin, þrátt fyrir að vera helmingi fámennara land. Rússar voru fyrstir út í geiminn og eru þar enn. Fóru aldrei heim og redduðu því vestrinu með farskjóta og hagnýtar aflvélar sem virka, og aðstöðu áratugum saman. "Þið lofuðuð okkur landnámi á Mars en við fengum bara Facebook", sagði Buzz Aldrin um Bandaríkin, sem eru fyrst og fremst flotaherveldi en ekki landherveldi

****

ÞIÐ ERUÐ NÆST AF ÞVÍ AÐ VIÐ....

Nú þegar þýskir láta loksins af þeirri áráttu að reyna að vera með iðnaðarframleiðslu í sovétríki Evrópusambandsins (sjá tengil á frétt Mbl neðst), þá er röðin komin að þeim öðrum löndum lendum ESB-sovétsins sem enn eru með kjarnorkuknúna raforkuframleiðslu í sínum lendum. Þetta kemur fram í máli Róberts Habecks sem er afiðnaðarráðherra Þýskalands og ráðherra ástigsmála. En þýsk ástigsmál eru alveg eins og þau íslensku: Vinstrimaður, áður rauður en nú grænn, kemur og stígur ofan á heila og lungu svo kallaðra mið-hægrimanna, til dæmis þingmanna Sjálfstæðisflokks, og þá missa þeir andann og þurfa ekki lengur á heilanum að halda - og sem þá þegar er ónýtur fyrir fullt og allt

En svo kallaðir kratískir miðju-hægrimenn eru þekktir fyrir að vera með utanáliggjandi lungu og heila sem hægt er fikta í og verður þar með alfarið undir fótum nývinstrimanna, þ.e. grænkommúnista sem síðan stofna með þeim ríkisstjórnir hugmyndafræðinga. Eins og til dæmis þá sem nú ræður hugmyndaríkjum á Íslandi. Þar hafa menn ekki hugmyndir, heldur hafa hugmyndir ríkisstjórnina í vösum sínum. Sé maður ekki sammála slíkum hugmyndafræðilegum ríkisstjórnum þá er maður af þeim stimplaður öfga-hitt og öfga-þetta og því á móti þeim og óvinur þeirra. Án undantekninga eru slíkar ríkisstjórnir glóbalistar sem annað hvort ætla að bjarga "verkalýð" veraldar eða "umhverfi" og "loftslagi" veraldar, þ.e. heilum reikistjörnum sólkerfa

Það er því í dag sprenghlægilegt að ESB-og-EES-menni skulu vera að vísa Rússum úr ESB/EES-landi fyrir njósnir, því Evrópusambandið og Vesturlönd hafa ekki lengur neitt sem Rússum vantar. Þau hafa einungis það sem Rússar vilja alls ekki, þ.e. gamla sovétríkið. Þau hafa einungis Habeck, sem er eitt stórt hahaha á bekk, og Bjarna Ben meðfærilegan skoðanaleysingja og nytsaman kjána, og Katrínu fóstureyðinga og Sigurð Inga skoðarann mikla, en þó alveg án skoðana. Allt þetta hugmyndafræðiforystufólk sem ég nefni þarna á það eitt sameiginlegt að predika. Það predikar til dæmis fyrir ökutækjum sem tortíma orku í stað þess að nýta hana. Það jafngildir því að hafa framleitt og selt bensíntanka sem leka öllu innihaldi þeirra ónotuðu út í ekki neitt, þegar reynt er að nota þá sem orkugeymslur. En skyldi það þó gerast að Rússum vanti eitthvað sem einhver maður í pólitískum óábyrgðarstöðum á Vesturlöndum segir og gerir, þá fara þeir bara á Facebook. Því Facebook er það eina sem Vesturlönd fengu í stað landnáms á Mars, eins og Buzz Aldrin benti á í MIT-grein sinni 2012. Fengu stafrænt suð í stafrænu auglýsingablaði

Róbert Habeck er því þegar kominn fram á völlinn til að heimta að allar aðrar ríkisstjórnir Evrópu geri hið sama. Þetta gerir hann til dæmis með því að krefjast þess að lokað verði fyrir úraneldsneytissölu frá Rússlandi til ESB-landa og að lokað verði fyrir endurvinnslu Rússa á (nú pólitískt) geislavirkum úrgangi Evrópualanda (DPA). Öll önnur lönd ESB-Evrópu ættu að verða landbúnaðarlönd eins og við hér í Þýskalandi erum að gera, segir Hahahabekkurinn þarna. Pol-pottur Evrópu verður því úr steini þannig að tryggt sé að hann geti ekki orðið útflutningsvara - og leki stanslaust. AfD-flokkurinn mælist því með meira fylgi en þýsku græningjarnir í flokki Habecks. Mælist AfD nú þriðji stærsti flokkurinn í Þýskalandi. Bara CDUCSU og SPD mælast stærri og er ekki nema fimm prósentu munur á SPD og AfD. Hvernig halda menn eiginlega að þetta nýsovéska grænrugl endi þarna?

Vilji maður vernda umhverfið á maður að kaupa sér V8-strokka bensín- eða dísilbíl (helst HEMI) sem eyðir rosalega og er með rosalega góðri vél sem endist 400-500 þúsund kílómetra eða í 18-25 ár. Slíkur bíll fer mörgum sinnum betur með umhverfið -og ríkissjóð- en hið sovéska rafmagnsstóladót hinna pólitísku hugmyndafræðinga ríkisstjórna hins nýja vinstra-helvítis þeirra á reikistjörnunni Jörð

HUGMYNDAFRÆÐINGAR RÍKISSTJÓRNARINNAR

Ríkisstjórn Íslands samanstendur af þremur vinstriflokkum hugmyndafræðinga. Allir sem eru ósammála ríkisstjórninni eru á móti henni og því græna sovétríki á jörð sem hún boðar. Þannig eru hugmyndafræðilegar ríkisstjórnir alltaf. Ríkisstjórnin boðar grænt sovétríki sem enginn kjósandi bað sérstaklega um. Enginn. Í Moggann mjálma síðan grænkommar ríkisstjórnarflokkanna um að þeir sem ekki aðhyllast vitsmunalegt þingsovétríki þeirra og ríkisstjórnarinnar eigi samt að koma um borð og krjúpa fyrir grænum eyðileggingarmætti hennar. Ríkisstjórnin reynir þess utan að múta fólki til að koma um borð í geggjun hennar, og hefur gert svo árum saman. Stórar fúlgur af fé tekur hún úr vösum fólks til að múta öðru fólki. Annað eins hugmyndafræðilegt ofríki hefur varla sést hér á landi síðan að rauðir kommúnistar réðu hér of miklu. Í dag ráða þeir í ríkisstjórninni hins vegar því hvort að plánetan ferst eða ekki. En þær hugmyndir hafa ríkisstjórnarþingmenn um sjálfa sig. Hvorki meira né minna. Um líf en mest dauða er því að tefla, eins og alltaf gildir um hugmyndafræðilegt ofstæki eins og það sem knýr ríkisstjórnina hér heima áfram

Eiginlega vissi ég ekki fyrr en nú að Sjálfstæðisflokkurinn væri orðinn nýsovéskur flokkur pólitískra hugmyndafræðinga. Það er svo sannarlega kominn tími til að leggja þann flokk á hilluna fyrst að svo er komið með hina rauðgrænu flokkselítu hans. Farið hefur auðvitað fé betra og engin eftirsjá verður af þessum hálfsovésku hugmyndafræðingunum xD

Ef það er eitthvað sem ég þoli ekki þá eru það hugmyndafræðingar á borð við þá sem sullast um í hinum rauðgræna sósíalisma ríkisstjórnarinnar og með allt á hælum sér, plánetuna líka. Til fjandans með íslenska kjósendur er mottó hennar. Það er plánetan sem ræður: við erum nefnilega glóbalistar - við erum að bjarga heimsbyggðinni. Sama gamla Leníntuggan og síðast

Fyrri færsla

Gott: Pólland fái kjarnorkuvopn. Slæmt: Hvítarússland fái kjarnorkuvopn

Síðustu kjarnorkuverunum lokað

Athugasemdir

[Ingólfur Sigurðsson, 16.4.2023 kl. 22:12]

Margt í þessu sem ég er ósammála og líka sammála. Þú hefur ekki mikla trú á græningjum og mörgu þannig liði. Það má vel vera að þú hafir rétt fyrir þér að þetta sé sama Leníntuggan og síðast, en ég tel að umhverfisverndin eigi rétt á sér. En margt í þessu firnagott samt eins og með hvernig Katrín og ríkisstjórnin lifa í skýjunum en þjóna síður kjósendum sínum.

En þetta með Facebook sem kemur fram í þessum pistli er þess vert að maður leggi aðeins út af því, enda ekki margir ef nokkrir sem taka eins á málunum og þú. 

Orð Buzz Aldrin eru mjög merkileg.

Þau sýna hvernig Bandaríkin hafa ekki haldið áfram að vera framtíðarríkið sem margir litu upp til.

En orðin um Facebook eru kannski merkilegust, því Facebook er tímaþjófur og gildra fyrir athyglina; fólk sogast inní veröld sem það kemst ekki auðveldlega út úr, og þannig er þetta með Twitter, Instagram, og alla hina. Ég er farinn að vera ekki nema nokkrar mínútur á Facebook í senn, þetta er orðið svo yfirþyrmandi offylli af áreitum frá auglýsingum og skoðunum eða áróðri að maður bara flýr. Eitt sinn var þarna hægt að eiga notaleg samskipti við fólk. Jú, það er ennþá hægt, en að villast í frumskógi auglýsinga í leiðinni - það fælir mann frá.

Samfélagsmiðlarnir eru ekki það sem maður hélt fyrst. Þeir eru ekki einu sinni skemmtilegir. Ég er farinn að komast á þá skoðun að þeir skemmi mannleg samskipti, reyni að búa til eftirmyndir af lífinu sem ekki gera mann hamingjusaman.

Auk þess éta þeir næstum upp til agna auglýsingatekjur innanlands víðar en hér á landi.

Jafnvel þótt mögulegt sé að Vesturlönd sigri Rússland verður sá sigur dýrkeyptur fyrir alla.

Pistlarnir þínir finnst mér alltaf geyma eitthvað merkilegt, stundum stórmerkilegt. Hvort sem maður er sammála eða ekki ertu sjálfum þér samkvæmur, snjall og hefur mikilvægan boðskap. 

[Gunnar Rögnvaldsson, 17.4.2023 kl. 09:17]

Þakka þér kærlega fyrir Ingólfur.

Græningjar eru án undantekninga hinir nýju burgeisa- og ríkisbubbaflokkar vesturlanda. Þeir þrífast best innan borgarmúra og lifa ekki af úti í náttúrunni. Eftir að sovétríki þeirra féll 1990 þá urðu allir hinir rauðu smám saman grænir. Lengra nær hin græna þvæla vesturlanda ekki. Hún nær ekki lengra en að næsta pening frá sköffurum vesturlanda. Þetta er úrkynjað nýkommalið kverúlanta - allt saman eins og það leggur sig.

Það tekur sig varla að eyða orðum á smáfélagsmiðlana, svo lítið er merkilegt við þá. Staðan er hins vegar mun verri með svo kallaða fjölmiðla vesturlanda. Þeir eru að verða þeir verstu í sínum klassa í veröldinni.

Góðar kveðjur

[Gunnar Rögnvaldsson, 20.4.2023 kl. 10:08]

Rússneska bíómyndin Áskorunin fer nú í dreifingu erlendis, segir Tass í dag.

Frá og með 27. apríl verður hún sýnd í kvikmyndahúsum í Serbíu, Bosníu og Hersegóvínu, Svarfjallalandi, Króatíu, Slóveníu, Makedóníu, Barein, Egyptalandi, Jórdaníu, Írak, Íran, Katar, Kúveit, Líbanon, Sameinuðu Arabísku furstadæmunum, Óman, Palestínu, Sádi Arabíu, Sýrlandi og Súdan.

Telur þá sýningarsvæðið 542 milljón manns.