NATO í tilvistarkreppu

Fréttir frá fundi G7-ríkjanna, sem haldinn var í fyrrum Sovétlýðveldinu Bæjaralandi, voru litlar þegar að NATO kemur. "Klukkustundin" sem Jens Stoltenberg framkvæmdastjóri NATO sagði að myndi taka að samþykkja aðild Svíþjóðar og Finnlands að bandalaginu, er orðin að sex vikum og ekkert gerist, nema það eitt að næsta stærð tímatalsins er ár

Miðjarðarhafsríkið sem stóð á múrnum og var tappinn í suðri gegn útflæði heiðnikirkjuveldis Sovétríkjanna, heitir Tyrkland. Það neitar að samþykkja aðild Svíþjóðar og Finnlands að eins konar Svartahafsbandalagi sem búið er að balkanísera Norður-Atlantshafsbandalagið út og suður í (uppfært kl. 19:48: fréttir seint í dag herma þó að Tyrkland virðist hafa fallið frá því að loka á NATO-aðild Svíþjóðar og Finnlands. Við bíðum nánari frétta af því á næstu dögum)

NATO, þ.e. Norður-Atlantshafsbandalagið, er fyrst og næstum alfarið Bandaríki Norður-Ameríku. Evrópsku aðildarþjóðirnar hafa ekki efni á landvörnum og þiggja því þriðjaheimsaðstoð frá þinghúsahæðum Washingtonborgar í þeim efnum. Ef evrópsku aðildarríkin ættu að ganga í NATO fyrir alvöru þá þyrftu þau að eyða 10 prósentum af landframleiðslu sinni í samfellt 30 ár til að komast upp úr öskubökkunum sem þau sjálf gerðu sig að á síðustu öld og síðustu 65 árin með með tilkomu Evrópusambandsins

En Bandaríkin eru ekki landherveldi. Þau eru flota- og flugherveldi. Síðasti landhernaður þeirra í fúlustu tilvistaralvöru var í heimahögum þeirra sjálfra í borgarastyrjöldinni 1861-1865. En meira að segja þá voru það flotasiglingar á Vötnunum miklu og stórfljóti Mississippi sem redduðu málunum ásamt birgðaflutningum Norður-hersins. Norðurríkin sigldu til sigurs

Bandaríkin geta aldrei unnið landstríð við Rússland á landmassa Gamla heimsins og þau myndu ekki geta notið stuðnings flughersins kæmi til stríðs við Rússa, því Rússland er með besta flugher veraldar yfir heimahögum og nágrenni, samkvæmt fyrirlestri doktors Philips Karber í West Point 2018. Og nú þegar, eftir aðeins fjögurra mánaða fitl Rússneska hersins í Úkraínu, hefur hann þurrkað út skotfærabirgðir 30 ríkja NATO

Stuðningur Bandarísku þjóðarinnar við NATO rambar á barmi hruns, því Rússland rekur ekki Guðlaust Sovétríki eins og forðum, heldur ríður Vladímír Pútín, keisarinn mikli, hvítum hesti og er í krossferð gegn oj-barasta Heiðnikirkjuveldi vestrænna háskóla. Hann er jafnvel okkar maður hugsa margir þar vestra, en þora enn sem komið er ekki að segja upphátt

Það þarf ekki nema eitt misheppnað herútkall til að stúta NATO með innvortis greiðslufalli. Og þegar þjóðir bandalagsins eru orðnar svona margar og ofboðslega ólíkar þá er hættan sú að tími brostins einróma samþykkis innan bandalagsins sé við það að renna upp. NATO er nefnilega fyrir löngu komið út fyrir Rubicone. Og það kemst ekki til baka

Íslensk stjórnvöld verða að sjá til þess að endurnýjun varnarsamnings okkar við Bandaríkin sé óháð áframhaldandi tilvist NATO, því tilvist þess hangir á bláþræði - og Evrópa er enn og verður áfram rúst

Rússland er hins vegar stórveldi, þrátt fyrir tímabundið valdarán vinstrimanna þar í landi - undir rauðum fána

Í dag er Rússland líklega ekki nógu vinstrisinnað land til að njóta stuðnings meðal vestrænna vinstrimanna. Berlínarmúrinn féll nefnilega vestur

Og með því að þvinga ríkissjóð Rússlands í greiðslufall með því að neita að taka við greiðslum frá honum, hafa Vesturlönd heimskað sér yfir Rubicone og komast ekki inn í heimsveldi sitt í viðskiptum aftur. Nú verður ekki aftur snúið. Valkostur er að myndast. Vesturlönd hafa hér með skotið sig í báðar fætur í gegnum tóman hausinn

Fyrri færsla

Lettland kaupir rússneskt gas á ný [u]

Athugasemdir

[Símon Pétur frá Hákoti (IP-tala skráð) 28.6.2022 kl. 14:45]

Það sem NATO ætti að vera, og þá í bókstaflegri merkingu þess orðs, er vitaskuld Norður-Atlantshafsbandalagið, varnarbandalag þjóðríkja við Norður-Atlantshaf og einungis þeirra.

Og vitaskuld er Ísland stofnaðili að því, en ekki einhverju allra sjáva og síðari tíma hrærigraut og vitleysu sem enginn botnar lengur í.

Takk fyrir þarfan pistil, Gunnar.

[Símon Pétur frá Hákoti (IP-tala skráð) 28.6.2022 kl. 15:03]

Og það er ekkert í sögu Íslands sem bendir til annars en að endurnýjunarósk okkar að varnarsamningi við Bandaríkin yrði vel tekið.  Það ber íslenskum stjórnvöldum fyrst og fremst að gera og ganga frá, og tryggja.  

Og ef íslensk stjórnvöld, nútildags, hefðu snefil af viti milli eyrnanna, þá vissu þau að viðskipti Íslands og Rússa voru á sínum tíma enginn Þrándur í Götu hvað varðaði varnarsamning Íslands við Bandaríkin og sem Norður-Atlantshafsbandalags ríki, en jafnframt sjálfstætt og fullvalda ríki.

[Gunnar Rögnvaldsson, 28.6.2022 kl. 15:19]

Þakka þér fyrir Símon Pétur.

Mikið rétt.

En nú er það sovéska hugmyndaglorían um EES-samninginn við hin Nýju Sovétríki Evrópusambandsins (NSU) sem ræður öllu. Í kringum þá rúst hefur heil sovésk hjálenda verið byggð upp hér á Íslandi. Þar sem litið er á bandarískar nærbuxur í pósti sem geislavirk kjarnorkuvopn komi þær inn á borð tollabandalags NSU hér á landi og þar. Svo ekki sé talað um matvæli.

Kveðjur

[Gunnar Rögnvaldsson, 28.6.2022 kl. 22:41]

Kannski að Katrín Jakobsdóttir fóstureyðingarfrömuður verði næsti framkvæmdastjóri NATO.

Það myndi þá væntanlega gerast undir formerkjum kvikmyndar Stanleys Kubrick: "Dr. Strangelove or: How I Learned to Stop Worrying and Love the Bomb"

Á íslensku myndi fréttatilkynningin hljóma svona:

"Frú Furðuást: eða hvernig ég lærði að hætta að hafa áhyggjur af kjósendum og elska kjarnorkusprengjuna."

[Gunnar Rögnvaldsson, 28.6.2022 kl. 23:51]

Þetta með Katrínu Jakobsdóttur sem komandi nýjan framkvæmdastjórna NATO er ekki út í hött nú þegar vinstrimenn líta á NATO sem félagsmálastofnun í varnarmálum.

Enginn þeirra ætlar að borga. Og allir vita hvernig afkomuhorfurnar eru fyrir þannig félagsskap. Þetta kallast að vera á sósíalnum á meginlandi Evrópu: þ.e. að láta Bandaríkin um að herverja rússneska hagsmuni Þýskalands, plús allra gervilandanna sem svífa á sporbraut um það.

Í Þýskalandi er bara einn maður í núverandi ríkisstjórn þess þriðjaheimslands í varnarmálum sem ekki var með í Rússabandalaginu sem Gerhard Schröder og Angela Merkel byggðu upp á síðustu 25 árum, og það er varakanslarinn og efnahagsmálaráðherrann Róbert Habeck úr Vinstri grænum þess lands.

En jafnvel hann er laumufarþegi í Rússabandalagi Schröders, Merkels og Ólafs Scholz. Hvern dag labbar hann nefnilega með milljarð evra og dala inn í Gazprombank til að borga fyrir orkuna frá Rússlandi. Á leiðinni út sendir hann inn merki um að þessum milljarði dala sem hann kom með sé skipt yfir í rúblur og þær notaðar til að borga fyrir hitann sem hann og Þýskaland þarf á að halda við gervitíst sitt gegn Rússum, og þar með er málið afgreitt. Svona leikur Kreml sér að vestræna bjánaveldinu sem skaut af sér báðar fætur í gegnum tóman hausinn á síðustu 25 árum.

Miklu betra hefði verið að hafa Rússa með um borð mígandi út á til dæmis Kína, en inn hina nöktu apa vesturlanda.

[Símon Pétur frá Hákoti (IP-tala skráð) 29.6.2022 kl. 11:01]

Mér líst ekki á blikuna þegar Bandaríkin/NATO og Kína fara í slag.  Já, þá væri Bandaríkjunum/NATO betra að hafa Rússa sín megin, en ekki Kína megin. 

Hver er tilgangur Bandaríkjanna/NATO að stilla málum svo upp, að Rússar sjái sig nauðbeygða til að efla Kína, BRICS og Belti þeirra og braut?

[Símon Pétur frá Hákoti (IP-tala skráð) 29.6.2022 kl. 15:20]

Með þeirri pólariseringu sem nú á sér stað og þar sem NATO virðist stefna að því að þrengja að Rússum alla leið að landamærum þeirra, þá boðar það ekki gott fyrir vestrið, því menn skyldu athuga það að ef stríðsfronturinn verður þar í næstum óhjákvæmilgri heimsstyrjöld, þá má alveg eins búast við því að Kína heyi þar, í Evrópu, við landamæri Úkraínu og Rússlands, stríðið við Bandaríkin/NATO.  Það verður ógnvænlegt fyrir vestrið, ef Kína fylkir þar með Rússum, í Evrópu, við landamæri Úkraínu og Rússlands.

Er það virkilega vilji Bandaríkjanna/NATO að gera alla Evrópu að stríðsátakasvæði, að egna svo Rússa að Kína sláist þar með þeim?  Hefur Evrópa ekki lært neitt af þeim hryllingi sem WWI og WWII var?  Vill Evrópa magna svo upp illdeilurnar að engar samningaviðræður verði lengur gerlegar, að í Evrópu brjótist út WWIII?

[Gunnar Rögnvaldsson, 29.6.2022 kl. 16:03]

Tyrkland virðist hafa fengið það sem það pantaði frá Svíum. Að Kúrdum sé vísað í gröf Ólafs Palme. 

Þannig að nú virðist klappað og klárt að Svíþjóð geti loksins látið sér nægja að nota bara tvær prósentur af landsframleiðslunni til varnarmála í stað fjögurra á tímum Kalda stríðsins. Enda sagði sænski sendiherrann í Washington það við bandaríska fjölmiðla að það sé tilgangurinn með NATO-aðild Svíþjóðar. Að lækka útgjöldin (láta bandaríska skattgreiðendur um þau). 

Fréttir berast einnig af því að á G7-fundinum í Bæjaralandi hafi loftslagsmál verið jörðuð sem málefni sem máli skiptir. Það var mikið segi ég bara.

Eftir þann fund er Ólafur kanslari hinn þýski kallaður "kanslarinn með minnimáttarkennd" í þýskum fjölmiðlum sökum þess að hann svaraði spurningu blaðamanns Deutsche Welle án þess að svara henni. Spurt var: getur þú sagt hvaða öryggistryggingar G7-löndin hafði sammælst um til handa Úkraínu? Já ég gæti það, svaraði Ólafur bara. Þrjú til fjögur orð var það eina sem fékkst.

[Gunnar Rögnvaldsson, 29.6.2022 kl. 19:57]

Miðvikudagur, 29. júní 2022 kl. 19:46:43

Formaður stjórnar rússneska seðlabankans, Elvira Nabiullina, segir í dag að 70 erlendrar fjármálastofnanir í 12 löndum noti nú SPFS-mótsvar Rússlands við SWIFT-skilaboðakerfinu sem gerir fjármálafærslur milli fjármálakerfa landa möguleg.

Þessu greinir rússneska TASS fréttastofan frá í dag.

Ég mæli með TASS sem mótvægi við falsfréttastofum vesturlanda. TASS er orðin betri og nákvæmari fréttastofa en þær og segir meira um fjölmiðlasúpu vesturlanda en hitt.

Hjá TASS má lesa ýmislegt fróðlegt og fréttnæmt sem vesturlenskir stuttbuxna-fjölmiðlar eru ekki með, en ættu að vera með.

[Helga Kristjánsdóttir, 29.6.2022 kl. 23:12]

Þá ærlegu vill almenningur fylkja sér að baki,auralitlir frekar en taka við mútufé.-Takk fyrir skrifin ykkar beggja; Góðir.   

[Gunnar Rögnvaldsson, 29.6.2022 kl. 23:48]

Þakka þér fyrir Helga.

Kveðja

[Gunnar Rögnvaldsson, 29.6.2022 kl. 23:53]

Leiðrétting:

Ég mæli með TASS sem mótvægi við falsfréttastofur vesturlanda. TASS er orðin betri og nákvæmari fréttastofa en þær og segir ÞAÐ meira um fjölmiðlasúpu vesturlanda en hitt.

Vantaði "það" (plús innsláttarvilla).

[Símon Pétur frá Hákoti (IP-tala skráð) 30.6.2022 kl. 00:09]

Gunnar er ætíð með málin á hreinu.  Svo mikið er víst Helga.  Og hann á þakkir skyldar fyrir greinargóða pistlana sem hann útfærir oft nánar í athugasemdum.  Athugasemdir mínar eru einungis hugrenningar út frá innleggjum hans. Gunnar á því þakkir þínar skyldar, en það gleður mig að þér finnist einnig athugasemdir mínar einhvers virði.  Kærar þakkir Helga.

[Gunnar Rögnvaldsson, 30.6.2022 kl. 01:39]

Spurningar þínar Símon Pétur um "vilja" NATO eða vilja Bandaríkjanna eru meira spursmál um grundvallarþjóðarhagsmuni Bandaríkjanna til mjög langs tíma litið en um vilja einstaka forseta þar í landi og sem hafa aðeins 2-4 ár til tímamótunar. Eins og ég skrifaði í síðustu færslu þá gildir eftirfarandi um utanríkisstefnu Bandaríkjanna:

"Annað sem einnig er undirliggjandi hér í þessu máli, eru grundvallar-þjóðaröryggismál Bandaríkjanna til langs tíma litið: en þau eru að ekki skuli ná að myndast ein samstæð heild sem ræður meginlandi Evrópu og sem gert gæti samninga eða samruna við Rússland, en einmitt á þeim nótum hefur viss vængur stjórnmála Evrópusambandselíta verið.

Þó svo að flestir bandarískir stjórnmálamenn séu ekki meðvitaðir um það, þá er þessi grundvallarstefna eða þetta grundvallarstef Bandaríkja Norður-Ameríku alltaf á sjálf-stími (e. auto pilot) án þess að þeir taki sérstaklega eftir því. Þetta stef er bara þarna, og hrekkur alveg ósjálfrátt í fiðlugírinn við réttar aðstæður, án þess að stjórnmála- og embættismenn geri sér sérstaklega grein fyrir því. En það var einmitt þessi langtíma grundvallarstefna í þjóðaröryggismálum Bandaríkjanna sem knúði á um þátttöku þeirra í Fyrri- og Síðari-heimstyrjöldinni á meginlandi Evrópu. Það var alls ekki góðmennska sem knúði þau til þess. Lönd eiga ekki vini, þau eiga hagsmuni, eins og Charles de Gaulle sagði. Bandaríkin horfðu á Bretland brenna án þess að aðhafast neitt. Og nú segja sumir að Bandaríkin eigi að fara í stríð fyrir Úkraínu. "Er þetta bilað fólk" hugsar Kreml. "Er þetta alveg snarbilað fólk þarna á vesturlöndum? Man það ekki neitt?"

En einmitt Stóra-Bretland hefur sömu hagsmuni og Bandaríkin í þessum efnum: þ.e. að koma með öllum tiltækum ráðum í veg fyrir að myndast geti eitt samhangandi veldi á Evrópuskaganum sem skagar út úr móðurlandi Rússlands og sem byggt gæti flota til höfuðs Fimm augum (Stóra-Bretland, Bandaríkin, Kanada, Ástralía og Nýja Sjáland) sem öll eru eyríki, og ráða því hver fær og fær ekki gera innrás hvar og hvenær sjóleiðina."

Deila (splitta) og síðan drottna er málið um meginland Evrópu hér.

Rússland hræðist ekki meginland Evrópu - nema þegar meginland Evrópu er í vasa Bandaríkjanna. En meginland Evrópu hræðist hins vegar Rússland þegar það er ekki í vasa Bandaríkjanna.

Þess vegna þetta haltu/slepptu mér,- eða ástar/haturs,- viðhorf meginlands Evrópu til Bandaríkjanna.

Þetta mun ekki breytast, og meginland Evrópu mun aldrei geta komið sér upp það sem þeir kalla "strategic autonomy" eða strategíska sjálfsstjórn í öryggismálum því til að geta það þá þarf meginland Evrópu að vera eitt land og ein þjóð og með heimsveldisáhrif í hernaðarmálum. Slíku mun meginland Evrópu aldrei hafa efni á og aldrei hafa þjóðargetu til, né landfræðilega pólitíska möguleika.

Það er varla að meginland Evrópu getur orðið heimshlutaveldi.

Svona getur tími heimsálfa liðið og fjarað út, eins og tími Miðjarðarhafsins rann út þegar úthafssiglingar hófust yfir Atlantshafið. Þá breyttist Miðjarðarhafið úr nafla heimsins í lítinn poll, og öll ríkin við það urðu að fyrrverandi stórveldum. Fyrrverandi fyrrverandi meira að segja.

[Gunnar Rögnvaldsson, 30.6.2022 kl. 02:04]

Smá viðbót við langt mál:

"Rússabandalag" Gerhards Schröders og Angelu Merkels sem ég minnist á hér fyrir ofan, já það bandalag hræðast Bandaríkin. Mjög.

Og meginland Evrópu veit að Bandaríkin hræðast það.

Og Rússar vita að meginland Evrópu veit að Rússar vita að Bandaríkin hræðist það.

Þess vegna er Rússlandi alveg óhætt, því það veit vel um þetta endalausa "dilema" sem hér er sífellt að verki.

Rússar vita að heimsvaldagræðgi stjórnmálaelíta stærstu ESB-ríkjanna er sterkari en ótti þeirra er við að samhæfast Rússlandi.

Og þetta Rússabandalag er sterkara fyrirbæri en NATO-bandalagsleitni Þýskalands, Frakklands og sennilega Ítalíu líka er.

Ergo: Sterkasta strategíska bandalag norðurhvels jaðar er hið óformlega bandalag Rússlands og stjórnmálaelítu Þýskalands. Það er miklu sterkara en bandalagsleitni Þýskalands er við NATO.

Og athugið: Þýskur almenningur hefur ekkert að segja hér frekar en nokkru sinni áður í sögu þess lands. Hann bara hlýðir.

[Símon Pétur frá Hákoti (IP-tala skráð) 30.6.2022 kl. 12:01]

Góðar þakkir fyrir Gunnar fyrir svörin. 

Mig langar einnig til að minna á, í því samhengi, það sem sjálfur Kissinger hafði bent á varðandi Úkraínu og Rússland, og sá ástæðu til að ítreka nú nýlega, við litlar vinsældir minnipokamannanna í NATO sem eru að bólgna úr stækkunar-rembingi.  Minni einnig á að hann þótti áður verður friðarverðlauna Nóbels, en nú er látið sem hans realíska sýn skipti engu.

[Símon Pétur frá Hákoti (IP-tala skráð) 30.6.2022 kl. 13:08]

Minni á hin raunsæislegu orð Kissinger, sem þú hefur margoft bent á:

[Gunnar Rögnvaldsson, 30.6.2022 kl. 19:47]

Já Kissinger er ekki beint þekktur fyrir að vera draumóramaður.

Efast um að hann geti lesið nokkurn fjölmiðil lands síns og flestra annarra vesturlanda í dag án þess að springa úr hlátri yfir þeim.