Græningjar eru Burgeisar nútímans [u]

SVART VERÐUR HVÍTT

Þetta er sagt um Die Grünen eða stjórnmálaflokk græningja í Þýskalandi og víðar í dag. Fyrr á tímum voru burgeisar (f. Bourgeoisie) yfirstéttin í borgum og undir þeim var svo próletaríatið eða verkalýðurinn, eftir að iðnvæðing hófst. Ágætis dæmi um burgeisa innan borgarmúranna voru til dæmis Karl Marx og Friedrich Engels. Fyrir utan borgarmúrana bjó hins vegar almúginn (d. almuen eða e. peasants)

Burgeisar eru þeir sem vita allt best, og vita vér einir hvernig annað fólk á að lifa, anda (helst ekki), borða, og deyja

SAGAN

Í Þýskalandi komust Græningjar yfir hinn gamla marxíska-hippa-þröskuld sinn þegar Gerhard Schröder rússaóligark varð kanslari 1998 og tók flokk þýskra græningja með sér í ríkisstjórn, og notaðist við þá þar, næstu næstu átta árin. En fyrir þann tíma voru þýskir græningjar karl-marx-hippar, hernaðar-andstæðingar, kjarnorkuvopna-andstæðingar, andstæðingar markaðshagkerfis og gengu í bandalag með Austur-Þýskum "réttinda"-aðgerðarsinnum eftir fall múrsins 1989. Kjörfylgi þeirra var eftir því, eða frá einu prósenti árið 1980 upp í tíu prósent fram til þýska dísilgate 2017

Þátttaka í ríkisstjórn Gerhards Schröders (eins konar Bjarni-Ben yngri á Íslandi og Gucci-Helle í Danmörku, sem seldi Goldman-Sachs-útibúi í skattaskjóli danskt orkufyrirtæki eftir innleiðingu esb-orkupakka 1+2+3) breytti hins vegar öllu fyrir þýska græningja. Þá gátu þeir skyndilega sætt sig við að fresta flestu því "græna" sem flokkurinn var sagður stofnaður um. Kolin máttu vera áfram, eða að minnsta kosti á meðan þáverandi kynslóð græningja væri enn á lífi. Það mátti bara ekki vinna þau úr námum neðanjarðar, né flytja þau inn, heldur átti helst að grafa þau upp frá yfirborði jarðar í formi brúnkola, sem menga mörgum sinnum meira en bestu kolin og grefur þorpin burt undan borgurunum (almúgans utan borgarmúranna). Þýskaland á nefnilega brúnkol til næstu 100 ára. Og græningjar samþykktu einnig að senda þýska herinn til aðgerða í útlöndum, þ.e. í Kosvovo og Afganistan, þvert á loforð

ÞVÆLAN

En svo komst ríkisstjórn Angelu Merkels að völdum árið 2005. Sú kona lét hræða úr sér líftóruna þegar áföll dundu yfir japanska kjarnorkuverið í Fukushima árið 2011. Samþykkti hún því og ákvað að afskaffa öll þannig orkuver í Þýskalandi. Samhliða þessu tók hún að herja á það eina sem þýskar fjölskyldur eiga; þ.e. bílinn, og alveg sérstaklega á dísilbílinn. En Evrópusambandið og stjórnmálamenn í löndum þess hófu herferð fyrir dísilbílum skömmu fyrir aldamót og náði sú herferð hámarki rétt fyrir hrun, eða árið 2007. Með því að henda matvælum af ökrum (almúgans) út í dísil, þá var hann sagður "grænn" og "vistvænn". Svona eins og Evrópusambandið hefur nú með einu pennastriki ákveðið að orkuframleiðsla úr trémassa sé "co2 hlutlaus". Það pennastrik fékk dönsk orkuver til að skipta frá innfluttum "hreinum kolum" og yfir í trjámassa eða d. træpiller, sem eru 150 prósent verri en innfluttu kolin voru í þeim efnum. Milljónir og aftur milljónir tonna af trjám Evrópu er nú brennt í stað kola. Og bara í Þýskalandi slátra vindmyllur um 1200 tonnum af skordýrum á ári, samkvæmt þýskum rannsóknum, norskum og dönskum fréttum. Þeirra smáu dýra ku "vísindamenn" í því landi leita ákaft núna

EIGA LÍTIÐ NEMA BÍLINN

Þess vegna, mínar dömur og herrar, skrifaði Wolfgang Munchau á Eurointelligence (efnislega) eftirfarandi í nóvember í fyrra, um árásir ríkisstjórnar Merkels (CDU/CSU og SPD) á það eina sem þýsku heimilin eiga: fjölskyldubílinn:

"Við heimfærum hrunið í vinsældum ríkisstjórnar CDU/CSU og SPD (sósíaldemókrata) á þá staðreynd að hún er að reyna að flytja tapið vegna dísilskandala bílaframleiðenda og dísiláráttu stjórnmálamanna yfir á bílaeigendur, og hyggst síðan reyna að troða þeim reikning aftur yfir á bílaiðnaðinn, sem ætlað er að borga brúsann. Fyrir vikið flæða kjósendur yfir til græningja. Fyrir utanaðkomandi getur það sýnst furðulegt að málefni tengd undirstöðuiðnaði landsins hafi svona mikil áhrif á þýska kjósendur. En ástæða þess er sú, að Þjóðverjar eiga minnst í húsnæði sínu sjálfir af öllum þjóðum Evrópu (lægsta séreignarhlutfallið er í Þýskalandi því það er rentusækið eða e. "rent-seeking" hagkerfi aristókrata, GR). Og þess vegna er það þannig að helsta eignin (e. asset) sem þýsk heimili eiga, er bílinn. Fyrrverandi ríkisstjórnir landsins hafa greitt niður dísiltækni og þess vegna er dísilbílaeign Þjóðverja svona útbreidd. Og það þýðir að þýsk heimili hafa orðið fyrir áföllum vegna árása stjórnmálamanna og bæjaryfirvalda á þá tækni og framleiðslu hennar"

LÝÐSKRUM GRÆNINGJA

Verið er að banna suma eldri dísilbíla þýskra fjölskyldna og nýrri dísilbílar eru að verða óseljanlegir. Það er þarna sem græningjar koma inn í myndina, því þeir hafa lofað að aðstoða þetta fólk og kaupa af þeim bílinn og ýmislegt fleira í þeim dúr. Þess vegna er fyglisþróun þess flokks svona eins og hún er. Þetta er veigamesta ástæðan fyrir fylgisaukningu flokksins; þ.e. væntingar um niðurgreiðslur sem flokknum hefur tekist að skapa með lýðskrumi á borð við það sem ESB viðhafði í 20 ár um hreinleika og vistvænleika dísils, sé matvælum hent þar út í. Græningjar mældust því stærsti flokkurinn í Þýskalandi á sunnudaginn

Þarna sést að nýr eftirmaður Merkels, steingervingurinn Annegret Kramp-Karrenbauer, dregur engan að, heldur fælir hún frekar frá. CDU/CSU og SPD eru hér að uppskera rotnun sína saman, eftir langt og vont-fyrir-alla samstarf. Eðlilega, enda eitt og sama sullið í tunnu líberalismans. Þeir munu því reyna að halda út því kosningar núna myndu kála þeim eins og kosningar hér heima núna myndu kála xD, vegna samstarfsins við firrtan flokk VG. Firring og siðferðislegur óhugnaður Vinstri grænna hefur nú smitast yfir á xD

GOTT ER VONT

Sem sagt: Það sem stjórnmálastétt Evrópusambandsins og landa þess sagði árum saman að ætti að "bjarga plánetunni", er allt í einu sagt vera að eyðileggja hana. Þvælan úr höfðum þess fólks tekur engan enda. Hún fossar bara út, og nóg er eftir. En það vissum við auðvitað sjálf hér heima, því hér tröllríður þvæla stjórnmálamanna svo öllu í þessum efnum, að sjálfur umhverfismálaráðherrann eyddi sennilega 30 vinnustundum og ómældri orku í að finna og sauma bót á hobbýsnobb-hjólabuxur sínar einar. Tandurhreint ofstækið er alveg hreint og slíkt hefur auðvitað áður sést í sögu okkar manna, sérstaklega komandi úr austri; þ.e. úr Gamla heiminum

Græningjar eru sem sagt hinir nýju burgeisar á meginlandi Vestur-Evrópu. Þeir eru að vísu enn að mestu réttdræpir í Bandaríkjum Norður-Ameríku, sem þola ekki enn hálfkonunglegt yfirfólk á ríkisjötunni, sem veit allt best, og vita vér einir hvernig annað fólk á að lifa, anda helst ekki, borða, og deyja. Til fjandans með þessa nýju yfirstétt grænna burgeisa. Hættum að borga henni skattana

Plánetan okkar er ekki að farast og allra síst loftslag hennar. Það eina sem er að farast eru stjórnmálin á jörðu niðri og það er ekki í fyrsta sinn. Kannski var Valhöll bara hönnuð svona eins og hún er, til þess að negla mætti sem ódýrast staðlaðar krossviðarplötur fyrir alla glugga þar, í einum grænum hvelli. Teikningin passar að minnsta kosti við plöturnar

AÐVÖRUN

Kóngafólk og burgeisar sem stungið hafa sér á kaf ofan í ríkisjötuna sem við almúginn fyllum, er þó ekkert nýtt af nálinni. Það er þar sem Vinstri grænir eru núna. Þeir eru þar á kafi. Og xD er á leið þangað líka. Þetta fólk ætti enginn að hlusta á. Enginn stjórnmálaflokkur jarðar er á móti hreinu umhverfi og það er fyrir löngu orðið mörgum sinnum betra en það var þegar það var verst á nýrri tímum. Enginn þarf að hafa áhyggjur af hvorki umhverfi né loftslagi. Enginn þarf að fá loft slag. Loftslagið hefur einnig alltaf sveiflast fram og til baka eins og stjórnmálaflokkar gera. Það sem við þurfum hins vegar að hafa áhyggjur af, eru þeir flokkar sem ætla að ræna af okkur fullveldinu í orkumálum, sem og öðrum málum líka, og flytja það úr landi undir erlent vald í orkupökkum ESB. Því þurfum við Íslendingar sannarlega að hafa áhyggjur af. Stöðva verður það pakkafólk og taka af því sogrörið niður ríkissjóð almúgans. Burt með það!

JA HÉRNA

Já. Steinaldarstigið mundar sig á ný. Og eins og að dísilhneykslið sé ekki nóg mjöl í munni þýskra heimila, sem geta því ekki blásið, já þá breiða nú miniBOT* stjórnarsáttmála ríkisstjórnar Salvinis á Ítalíu úr sér eins og ískristallar, sem í hendingskasti ákveðið hafa að búa til nýjan jökul handa Þýskalandi úr evru. Þvííí verður fróðlegt að fylgjast með... 

Uppfært kl. 10:50

MINIBOT

* MiniBOT eru ríkisskuldabréfamiðar, skírðir í höfuð ítalskra ríkisskuldabréfa, en sem renna aldrei út. Þá miða getur ítalska ríkið notað til að kaupa og greiða með fyrir vörur og þjónustu (dæmi: laun til opinberra starfsmanna) og sem borgarar landsins geta síðan notað til að greiða skatta, kaupa bensín (ENI) og rafmagn af ríkisfyrirtækjum og sem síðan munu breiða úr sér sem eins konar annar og samhliða gjaldmiðill í hagkerfinu, og ef til vill verða nýr "lögeyrir" ef Ítalía fer á þennan hátt út úr evru. Með þessari aðferð er erfiðara fyrir erlent vald í Berlín-Brussel og Frankfurt að knésetja Ítalíu vegna ofsókna ESB á hendur henni vegna ríkisfjármála. Og erfiðara yrði fyrir alþjóðlegan fjármálamarkað að þjarma að Ítalíu með vaxta- og skuldatrygginga-"álögum". Hugmyndin að miniBOTs er komin frá Yanis Varoufakis sem var fjármálaráðherra Grikklands, en sem bolað var frá. Munaði ekki nema hársbreidd að hún yrði sett í framkvæmd þar. En ríkisstjórn óttalauss Salvinis á Ítalíu er allt annar handleggur en ríkisstjórn Grikklands var undir forsæti hins veiklunda Alexis Tsipras

HA? ENN ÓLEYST!

Þýskur almenningur skilur ekkert í því af hverju evrukreppan snýr alltaf til baka á ný, eins og núna með miniBOT á Ítalíu, því hann stendur í þeirri meiningu að Angela Merkel og Wolfgang Schäuble hafi fyrir löngu bjargað evrusvæðinu frá því að springa í loft upp, og þar með útflutningsmyntina evru undan Þýskalandi. Hann skilur ekki heldur að það samræmist bara alls ekki lengur lífsmarki né lífslíkum stjórnmálamanna í öðrum ríkum evrusvæðis að vera yfir höfuð esb-sinnaðir né hvað þá að verja evruna falli. Þetta eitt út af fyrir sig gerir allar pólitískar spár yfir stöðuna í evrulöndum marklausar. Enginn veit hvað gerist þar næst né hvenær. Evran er þetta spennandi; Verður hún til á næsta ári líka?

Fyrri færsla

Orkupakka friðþægingarstefna ríkisstjórnar

Athugasemdir

[Ragnhildur Kolka, 12.6.2019 kl. 16:13]

Þakka þér Gunnar fyrir þessa grein. Að vera grænn fer að nálgast að vera vangefinn. Don Quixote gæti ekki slegið þessa rata út þótt hann legði sig allan fram, en í dag eru þeir settir á stall og tilbeðnir. Þú þarft að vera alvarlega kookoo til að leggja til atlögu við sólina og alla hennar virkni. Helst þó með því að láta sem hún sé bara þarna á himninum upp á punt. Þannig má telja auðtrúa að maðurinn sé miðja heimsins og aðeins hans vilji ráði. Með því móti má raka milljónum upp úr vösum þeirra auðtrúa. Og líka okkar hinum sem erum fórnarlömb svokallaðra grænna skatta. 

Manngerð vandamál eru hins vegar látin lönd og leið. Líklega af því að þau má leysa. Í dag er fjallað um ástralska rannsókn í Daily Telegraph þar sem niðurstaða könnunar sýnir að við gleypum (Ástralir) sem svarar einu kredit korti af örögnum af plasti í hverri viku. Mest með drykkjarvatni en líka með fæðu s.s. skelfiski. Hver staðan er hér veit ég ekki, en plastið í hafinu er alþjóðlegt og kemur okkur, sem fiskveiðiþjóð, við. Ef aðeins þessir umhverfisfrömuðir kæmu sér úr hjólabuxunum og tækju til við að losa okkur við óþarfa plastið mætti jafnvel sætta sig við að hafa þá á launaskrá okkar skattgreiðenda. En það er víst fjarlægur draumur. Baráttan við vindmyllurnar gefur svo miklu meira í aðra hönd.

[Gunnar Rögnvaldsson, 12.6.2019 kl. 19:49]

Þakka þér Ragnhildur.

Já þetta endar alltaf svona þegar þeim stóra er hent út og maðurinn setur sig í hans stað. Það er ekki nýtt. Mest öll 20. öldin fór í það, eða alla "isma" hennar, og geggjanir þeirra eru jafnframt enn að verki, eins og þú sérð og heyrir út um allt í dag. 

Þú skalt vara þig á nýju plastbylgjunni í öllum hennar ómyndum. Hún er ekki betri en hinar umhverfisþvælurnar. Þú verður að draga 99,9 prósent frá, deila með jafnmörgum peningum og sótt er um í þær rannsóknir og þá hefur þú "vandamálið", eins og með DDT sem er horfið úr óleysanlega vandamálabunkanum núna; étið upp til agna af örverum og stútað.

Lítið sem ekkert er að marka neinar myndir eða fréttir af þessu svo kallaða plast-máli, nema áróðursgildi þeirra. Allir geta fundið ruslahaug einhvers staðar í sínu nágrenni. Flest er vísvitandi falsað til að fá athygli, frægð og peninga, svart eða hvítt. Restin kemur út um annan endann aftur.

Fréttasóðaskapur er ekki betri en áþreifanlegur sóðaskapur. Mundu að þetta er "hot" eða "in" efni til að fá smelli út á. Hér verður lítið að marka neitt fyrr en eftir langan tíma í kaldara fréttaumhverfi.

Þetta með plastið mun koma í ljós eða ekki; síðar.

Markaðurinn fyrir vandamál er óendanlega stór.

Kveðjur

[Ragnhildur Kolka, 13.6.2019 kl. 09:56]

Plastmengun er vandamál og hún er manngert vandamál, þar af leiðir að það er raunhæft að ráðast gegn því.