Hvað eru mörg núll í Evrópu?

Það er athyglisvert að fylgjast með upplausn Evrópu undir stjórn Evrópusambandsins. Það er einnig athyglisvert að fylgjast með síðustu andartökum sovétsins anda hinu stóra Rússlandi hratt kólnandi út um vitin. Og það er einnig athyglisvert, en fyrirsjáanlegt, að fylgjast með djúpfrystingu Kína sem búið er að vera miðað við síðustu 30 árin, eða svo. Það Kína er búið að vera. En þegar það þiðnar -ef það þá þiðnar- þá þiðnar það til að bráðna, hægt en örugglega

Öll þau núll sem núllast þarna út, eru meginlands-evrópsk hugmyndagloría að uppruna. Öll eru núllin fundin upp á meginlandi Evrópu

Það eina sem -í megindráttum- stendur eftir, eru Bandaríki Norður-Ameríku. Og svo mun verða um aldur og ævi. Þau eru ósigrandi, enda var vel til þeirra vandað

Einu sinni voru Bandaríkin þar sem hið ódýra vinnuafl veraldar átti heima. Allt var framleitt í Bandaríkjunum. Einu sinni sáu Bandaríkin veröldinni að miklu leyti fyrir olíu. En aldrei verða Bandaríkin samt eins og núllið Evrópa. Það var með sjö-tommu saum geirneglt djúpt niður í stjórnarskrá þeirra

Hvorki Evrópa, Rússland né Kína munu ná að komast heil á húfi frá langferð umbyltinganna á eins giftusamlegan hátt og Bandaríkin hafa gert. Falli lauf og falli jafnvel Kína og falli jafnvel Rússland og hverfi fallin Evrópa, þá munu Bandaríki Norður-Ameríku ekki falla með. Þau eru ekki þannig byggð. Sjálf gerð þeirra er ekki svo vonlaus. Þau voru ekki byggð þannig. Þau eru voldugasta þjóðríki mannkynsins. Takið eftir orðinu þjóð-ríki

Ísland á ekki að hanga aftaní töpurum. Það eru bara ein Bandaríki Norður-Ameríku í veröldinni. Og þau liggja í vestur

Fyrri færsla

Angela Merkel mun þurfa að flýja til Suður-Ameríku

Athugasemdir

[Ragnhildur Kolka, 9.2.2016 kl. 11:41]

Það er unnið hörðum höndum að því að gera Bandaríkin eins og Evrópu. Barack Obama á þar drjúga spretti og stuðningur ungra kjósenda við Bernie Sanders sýnir að hægt en örugglega stefnir í þa átt.

[Helga Kristjánsdóttir, 9.2.2016 kl. 13:35]

  ....Og alltaf var hægt að stóla á Bandaríkin,þegar Evrópuþjóðríkin bárust á banaspjótum.

[Gunnar Rögnvaldsson, 9.2.2016 kl. 17:13]

Þakka ykkur kærlega fyrir

Bandaríkjunum hefur alltaf tekist að umbylta sér þannig þau gætu verið áfram land hinna "engilsaxnesku-frjálsu" í heiminum (Angolsphere). Umbyltingin þeirra yfir í myndun þjóðríkis Bandaríkjamanna tókst. Umbylting Bandaríkjanna yfir í landbúnaðarveldi tókst líka með miklum ágætum og umbylting þeirra yfir í iðnaðar- og framleiðsluveldi tókst einnig afar vel. "Made in USA" kannast ennþá margir við. Umbylting þeirra frá framleiðsluveldi yfir í annars konar veldi, þ.e. þjónustu og viðskipti, tókst loks einnig, þó svo að áratugirnir frá þeim kaflaskiptum og fram til loka fjármálakreppunnar sem hófst 2008, hafi reynst þeim verulega erfiðir. En þetta tókst allt saman.

En hér þurfa menn að muna að þessi þróun var engan veginn sjálfgefin. En hún tókst vel af því að Bandaríkin eru þjóðríki. Og þjóðríkið það, er afar einstakt og sterkt. Tryggðin við fánalitina er svona sterkt afl þar af því að landið er eitt land og eitt ríki. En ekki nóg með það að Bandaríkin séu eitt land, þau eru eitt ríki á heilum og risavöxnum heimsálfu-landmassa, sem sameinar landið í stað þess að sundra því.

Bandaríkin eru ekki útflutningsháð (export dependent). Þau detta ekki í sundur þó svo að Evrópa, Kína og Rússland detti í sundur. Útflutningur er aðeins rúmlega 10 prósent af bandaríska hagkerfinu og Bandaríki gætu lifað ágætis lífi án hans. Innflutningur kemur og fer frá og með nú, eftir þörfum. Hann þarf ekki að nálgast frá Evrópu, Kína né Rússlandi. Ekki þarf að fara svo langt frá og með nú.

Í ESB er útflutningur vegna dauða innri eftirspurnar sökum geldinga sem eru sökum vonlauss og ömurlegs stjórnarfars, um það bil helmingur af hagkerfinu. ESB er eins konar Kína Evrópu, hundleiðinlegt export hagkerfi. Þýskaland dettur í sundur ef að Kína dettur í sundur og það er að gerast núna. Þýskaland dettur í sundur ef að evran dettur í sundur, því að hún var búin til til að þjóna útflutningi hins deyjandi Þýskalands. Evrópa undir ESB gæti orðið ágætis efniviður í nýtt Sýrland eða Úkraínu eftir aðeins tvo áratugi. Evrópa er meginland tapara.

Rússland er að detta í sundur vegna þess að olíuverð er að detta í sundur. Pútín mun þurfa að fara frá völdum ef að efnahagur Rússlands versnar mikið meira en þegar er orðið. Í stað hans kæmi mun harðari og hamarshögga seigari epoxy-límtúba til að reyna að halda landmassaveldi Rússlands saman og verja hann gegn eilífum innrásum, eins og löng saga þessa viðkvæma ríkis sannar. Stækka stuðarana og grafa undan nágrönnunum. Rússland er ekki þjóðríki. Það er ríki af imperial-state gerð. Þar er engin velheppnuð demos, engin sterk ethos, ekkert sérstakt telos. Það sama gildir um Kína þar sem flestir hlutar landsins hata hvorn annan og hugsa hvor öðrum þegjandi þörfina og bíða færis á að drekkja nú loksins hvor öðrum. Þetta mun allt saman detta í sundur með tímanum og tæta sig sjálft sundur og saman. Og það sama gildir um ESB. 

Þessi þrjú misfóstur hafa ekki meikað framtíðina. Hún kemur ekki til þeirra og fólkið í þeim mun fara í verkfall eins og við sjáum í Japan. Allt saman hundleiðinleg, útflutningsháð og misheppnuð hagkerfi sem tókst ekki að taka stökkin eins og Bandaríkjum Norður-Ameríku tókst.

Kveðjur

[Ragnhildur Kolka, 10.2.2016 kl. 13:26]

Það kemur sko enginn að tómum kofanum hja þér Gunnar.