ESB-aðild Spánar hefur rústað vegakerfi landsins

Nú segja vegamálamenn Spánar að vegakerfi landsins sé í sínu versta ásigkomulagi frá því að Spánn gekk í Evrópusambandið 1986. Þá var sambandið skammstafað EEC. Reyndar er ástand vegakerfisins nú það versta síðan AEC hóf skýrslugerðir um vegamál landsins árið 1985. Atvinnuleysi á Spáni eftir 28 ára aðild að Evrópusambandinu mælist nú 25,6 prósentustig

Það sem einkennir aðildarferli landa að Evrópusambandinu er að við inngönguhlið þess hefjast aðlögunar-limlestingar og sundurskrúfun þjóðríkisins á því að taka ríkisfjármálin kverkartaki þar til bláminn vegna köfnunar hefur drepið hið þjóðbernska afl þjóðríkisins; e. natal energy

Svo þegar því hefur verið kálað er landinu af afglapaveldi Evrópusambandsins ýtt inn í ERM-II pyntingarklefa evrusvæðis (óskabarn ASÍ) þannig að úr verði krypplingur sem gengur alfarið fyrir brusselsku handapati ríkisfjármála

Því með ERM-II er gírkassinn óafturkræft tekinn úr hagkerfinu þannig að einu hagstjórnartækin til umráða verða umlin sem koma frá köfnuðum stjórnmálamönnum upp í gegnum líkkistulok ríkissjóðs, undir oki Maastrichts, sem þegar á 20 ára afmæli sáttmálans er orðinn sú volga gróðurmold 1930-ástandsins sem nú rýkur úr á meginlandi Evrópu. Þar gengur allt samkvæmt áætlun til helvítis

Þeir sem aðhyllast ESB-aðild ákalla hagstjórn Sovétríkjanna; ríkisafskiptin og ekkert nema ríkisafskiptin; Vegakerfið til Sovétríkisins

Krækja; Spain’s roads currently in worst condition since 1985, says new study (El País) 

Fyrri færsla

Hin leynda dagskrá verkalýðsforystunnar

Athugasemdir

[Ufsi (IP-tala skráð) 16.4.2014 kl. 01:01]

Þetta ESB hlýtur að vera hræðilegt að leyfa ekki Spönsku valdastéttinni að þvinga pólitíska fanga, atvinnuleysingja, sígauna og annan óæskilegan ruslaralýð til vegagerðar eins og þegar Franco lagði vegina og sá um viðhaldið. Bölvað ESB að taka ríkisfjármálin svona kverkartaki þar til bláminn vegna köfnunar drap hið þjóðbernska afl þjóðríkisins; e. natal energy (lesist afnám kúgunar hins opinbera á þeim sem minna mega sín og forréttindum valdastéttarinnar).

Hvernig hefur vegakerfum hinna 27 ESB ríkjanna vegnað? Og hefur þú komið út á Íslenskan veg nýlega?

[Gunnar Rögnvaldsson, 16.4.2014 kl. 09:28]

Morgunblaðið 20. maí 1944

1944: 17. júní í ár gefum vjer oss sjálfir lýðveldisstjórnarskrána.

"Að baki þeirri niðurstöðu, sem nú er að verða í stjórnmálum, liggur hörð barátta og mikil frægðarsaga Íslendinga. Í far hinna mörgu stjórnmálasigra kom hin öra framför á öllum sviðum.

Fjárlagafrumvarpið, sem danska ráðherrabrotið lagði fyrir Alþingi 1875, var þannig: tekjur kr. 247.906,00, gjöld kr. 203.788,00. Tekjur samkvæmt núgildandi fjárlögum eru 94 miljónir. 

1874 var engin brú og enginn brautarstúfur á Íslandi. Sjávarútvegurinn var aðallega rekinn á smá bátum. I Hafnarfirði voru að vísu skútur 15 til 40 lesta og hákarlaskip á Eyjafirði. Engir vitar voru hjer á landi."

2014: 

Á 70. afmælisári Lýðveldisins í júní næstkomandi hefur 150.000 til 300.000 manna þjóð tekist að byggja upp vegkerfi sem samanstendur af 13 þúsund kílómetrum af þjóðvegum. Og heilan hringveg í kringum landið þar sem byggja þurfti 220 brýr til að loka honum. Við skulum ekki nefna öll jarðgöngin sem hafa verið gerð. Það er óþarft.

Hér er vegakerfi þjóðríkisins ekki í sínu vestra ásigkomulagi á nýrri tímum. Og hér ríkir ekki 28 prósent atvinnuleysi eins og á Spáni eftir 28 ár landsins í Evrópusambandinu. Hér eru heldur ekki 54 af hverjum 100 ungmennum atvinnulaust eins og á Spáni í Evrópusambandinu.

Hér á Íslandi hafa verið lagðir 30 metrar af vegum á hvern íbúa landsins. Á Spáni þarf hver íbúi aðeins að halda uppi 15 metrum af vegi skv. tölum OECD. Aðeins Ástralía og Kanada halda uppi stærra vegakerfi á hvern íbúa en Ísland gerir.

Sértu ekki bara svolítið ánægður og stoltur af íslenska vegakerfinu þá sérðu það ekki eins og það er; sem kraftaverki næst. Sé það svo, er hægt að halda því fram að kálfar launi sjaldan ofeldi.

Hér hefur heldur enginn Franco komist til valda á 70. afmælisári Lýðveldisins. Og það er ekki að ástæðulausu. Við erum frjáls. Þökk sé fullveldi og sjálfstæði Íslands. Þökk sé forfeðrum okkar. Við erum þeim stórskuldug.

Bestu kveðjur