Heimskur almenningur Evrópusambandsins sem skilur ekki neitt

Samkvæmt könnun Eurobarometer telja 54 af hverjum 100 Spánverjum að Spánn hefði getað brugðist sterkara við hörmungum efnahags- og fjármálakreppunnar ef landið hefði haft sína eigin gömlu peseta mynt ennþá - og því komið betur út úr kreppunni. Á Spáni ríkir neyðarástand í atvinnumálum. Tæplega 20 prósent Spánverja eru atvinnulausir eða 19,9 prósent. Hjá ungu fólki undir 25 ára aldri ríkir 40,5 prósent atvinnuleysi. Bankakerfi landsins riðar til falls og útlán til fyrirtækja og heimila eru í járnum. Flest er á hausnum á Spáni. 

Ég skil þetta ekki. Spánn er með evrumyntina frægu svo þeir ættu jú flestir að vera hamingjusamir í stanslausum innkaupaferðum erlendis, ásamt Grikkjum, með fulla vasa af evruseðlum. Það er jú það sem Evrópusambandssinnar á Íslandi hafa sagt okkur að muni sjálfkrafa gerast. 

Nýlega hvatti fjármálaráðherra landsins hins vegar (og allra peseta) til að menn hættu áskriftum á erlendum dagblöðum um t.d. fjármál og viðskipti. Að Spánverjar ættu í staðinn frekar að kaupa spænsk viðskiptadagblöð. Það væri hvort sem er flest þvættingur sem stæði þessum erlendu blöðum um efnahag Spánar. Svo myndi þetta líka bæta hið hörmulega atvinnuástand á Spáni. 

Viðbrögð yfirmanna Evrópusambandsins á Spáni við þessari skoðun þjóðarinnar eru þau að þeir sögðu að almenningur á Spáni "skildi ekki" kosti evrunnar. Skildi ekki kostina væni minn.  

Auðvitað skilja Spánverjar ekki kostina við að raunstýrivextir evru á Spáni hafa næstum aldrei verið í neinu samhengi við verðbólgu í landinu frá því að hún var tekin upp. Hver ætti svo sem að skilja svona geðbilaða peningastefnu með neikvæðum raunstýrivöxtum? Ekki ég. En einmitt þessi sjúka peningastefna seðlabanka Evrópusambandsins hefur sprengt efnahag Spánar, Írlands og Grikklands í tætlur.  

Þetta sem yfirmenn ESB á Spáni sögðu um heimsku spænsku þjóðarinnar kemur einnig innilega illa heim og saman við það sem sjálfur hinn ókjörni forseti Evrópusambandsins sagði. Hann sagði að myntin evra hefði virkað eins og svefnpilla á lönd sambandsins. Hann sagði líka að almenningi hefði alls ekki verið gerð grein fyrir neinu í sambandi við myntina. 

Það skyldi þó ekki vera þannig að evrunni hafi verðið logið upp á lönd Evrópusambandsins? En það er nú sem vandræðin hefjast fyrir alvöru. Það er nefnilega engin leið út úr þessum lygavef Brusselmanna aftur. Mynt er órjúfanlegur hluti af sjálfsæði þjóða. Ef eigin mynt landa er kastað fyrir róða þá glatast stór hluti sjálfstæðisins. Spánn getur ekkert annað gert en að stikna áfram í evrum á steikarpönnu Evrópusambandsins. Það er heldur engin leið til að losna við hvorki forseta Evrópusambandsins né neina yfirmenn þess. Þeir eru hafnir yfir öll lög og allan rétt alls staðar í hinu stóra embættismanaheimsveldi Evrópu: La Vanguardia | Open Europe: Peseta dreams and euro nightmares

 

Tengt frá 6. júní 2010: Evrunni var logið inn á almenning í Evrópu.  

 

Mynd: Þá voru 155 hagfræðingar sammála um eitt 

 

Athugasemdir

[Haraldur Hansson, 30.7.2010 kl. 12:29]

Þegnar Evrópuríkisins geta hvorki valið né kosið burt forseta, kommissara eða aðra valdamenn. Það sem verra er, framvegis munu 501 milljón manns aldrei geta kosið um neitt sem máli skiptir á vettvangi Evrópuríkisins. Ekki heldur snákaolíuna sem kallast evra.

Það er mjög sérstök útgáfa af lýðræði þegar hannað er kerfi sem tryggir valdamönnum fullkominn frið fyrir kjósendum. Þannig er einmitt "lýðræðið" í Evrópuríkinu orðið.

[Bragi (IP-tala skráð) 30.7.2010 kl. 17:03]

"Á Spáni ríkir neyðarástand í atvinnumálum. Tæplega 20 prósent Spánverja eru atvinnulausir eða 19,9 prósent. Hjá ungu fólki undir 25 ára aldri ríkir 40,5 prósent atvinnuleysi."

Hafa Spánverjar ekki verið þekktir fyrir það í gegnum tíðina að hafa hátt atvinnuleysi?

Annars væri nú mjög athyglisvert að sjá hvernig atvinnuleysistölur Spánverja litu út í síðustu kreppum þar í landi, sér í lagi kreppum sem áttu sér stað áður en evran var tekin upp þar í landi. Þá værum við örugglega komnir með samanburðarhæfar tölur.

[Jón Ríkharðsson, 30.7.2010 kl. 21:38]

Gunnar, ég les oft ýmislegt úti á sjó. Stundum situr eitthvað eftir, en oft gleymist einhver atriði. Mig minnir að ég hafi lesið eitthvað eftir þig í Þjóðmálum, en þar sagðir þú frá einhverjum spekingi sem kvað ríki ekki geta orðið gjaldþrota, þau lækkuðu bara gengið. Þó ég muni þetta ekki í smáatriðum þá finnst mér heilmikið til í þessu.

Það er svo einfalt mál að allir ættu að skilja það, við værum mun ver á vegi stödd ef krónan hefði ekki bjargað okkur.

Evran er langt í frá að vera "hinn fullkomni gjaldmiðill". Ég veit ekki betur en að Angela Markel afi komið með þá hugmynd að tvískipta evrunni, þ.e.a.s. sum lönd fengju lakari gjaldmiðilinn og önnur hinn sem betur stendur.

Þetta segir margt, en sauðþráir og staðreyndafælnir ESB sinnar eru líkastir kerruhestum sem sjá bara eina átt. Þeir sjá bara ESB og ekkert annað. Alveg sama hversu góð rök þeir fá.

Gunnar minn, ég hef oft fylgst með þínum rökræðum við þá, þú hefur bent á tölur og staðreyndir. En þeir horfa framhjá öllu öðru en evru og ESB.

ÉG held að þeir ættu að stofna sértrúarsöfnuð þar sem þeir geta dýrkað og tilbeðið þetta samband sitt. Þar gætu þeir fengið útrás og létu þá vonandi hugsandi fólk sem leitar staðreynda í friði.