Óskar engum til hamingju [u]

Mynd: Kosningasamkoma vonda fólksins í Butler í Pennsylvaníu nokkrum dögum fyrir kosningar. "Og ég var ekki einu sinni með gítar" sagði Trump. Um það bil 57 þúsund manns sóttu samkomuna

****

Forseti Mexíkó, Andres Manuel Lopez, segist ekki vilja óska neinum til hamingju með sigur ennþá, fyrst að lagalegar athugasemdir hafa verið gerðar við forsetakosningarnar í Bandaríkjunum. Hann segist bíða með það þar til búið er að leysa málin, segir hann. Hann er greinilega ekki eins langt í burtu frá nágranna sínum og Guðni og margir í Evrópu, sem þegar eru búnir að óska Biden til hamingju - með "sigurinn". Lopez þekkir söguna líklega of vel og segir að "the establishment" hafi reynt að ræna kosningunum frá sér 2006. Þá óskaði Spánn andstæðingi hans til hamingju með sigurinn, en varð síðan að draga þá ósk til baka

Styrmir Gunnarsson fyrrverandi ritstjóri segir að "fólki sé létt" yfir því að Biden virðist hafa verið kosinn, enn sem komið er. Styrmir á ef til vill við að hans fólki sé létt, það er establissimentinu í Bandaríkjunum og hinum vonlausu fjölmiðlum þess

En hinum helmingi þjóðarinnar, þ.e. "vonda fólkinu", er ekki skemmt og sérstaklega ekki eftir þá svínslegu meðferð sem hið fegna fólk sem Styrmir talar um, veitti Donald J. Trump forseta síðustu fjögur árin. Henni mun bandaríska þjóðin ekki gleyma og hún mun hefna sín rækilega

Ég minni menn á forsetakosningarnar 1876 í Bandaríkjunum. Þær líkjast þessum núna einna mest, af þeim forsetakosningum sem endað hafa í harðhnút, og þær eru margar. Um áramótin þá var Grant forseti því önnum kafinn við að undirbúa herlög og útgöngubann til að reyna að koma í veg fyrir að það yrðu framkvæmdar tvær innsetningarathafnir (e. inaugurations) í Washington á sama tíma

Fólki er mjög heitt í hamsi í Bandaríkjunum núna. Aðeins veruleikafirrtir menn halda að eitthvað batni með tilkomu umboðslauss Bidens og hinni róttæku Harris. Þau vita vel að þau töpuðu þó svo að þau ef til vill komist í embættin. Þess vegna er þetta flaður núna og flugeldar. Til að breiða yfir þá höfnun sem þau urðu fyrir hjá hryggsúlu Bandaríkjanna. Enginn sitjandi forseti Bandaríkjanna hefur fengið eins mörg atkvæði frá þjóð sinni og Donald J. Trump fékk núna, þrátt fyrir ofsafenginn mótbyr

Nauðsynlegum breytingum mun bara seinka. Þetta mun taka allan þennan áratug. Staðan er þannig og hún hefur ekkert sérstakt með Trump að gera. En hann ruddi brautina fyrir þær breytingar sem verða að eiga sér stað. Mun hann renna inn í söguna sem einn dugmesti forseti Bandaríkjanna nokkru sinni. Sem jarðýtan mikla. Brimbrjóturinn

Ég geri ekki ráð fyrir að "góða fólkið" með aðstoð ESB og Obama muni hvetja til að kosið verði aftur í Bandaríkjunum eins og það gerði eftir Brexit, fyrst að það er bara "vonda fólkið" sem virðist enn sem komið er hafa tapað - og kannski með því að svindlað var á því

Demókratar reyndu 300 sinnum að kæra fram breytingar á kosningalögnunum í mörgum ríkjum Bandaríkjanna síðustu mánuðina fyrir þessar kosningar og tókst það í sennilega of mörgum tilfellum. Um er að ræðra breytingar á kosningalöggjöf ríkjanna um póstkosningar og talningu þeirra. Hvað mun hæstiréttur segja um þær breytingar sem þeim tókst að þvinga í gegn? Hvað mun rétturinn segja um allt þetta mál í heild sinni? Það verður fróðlegt að heyra

Al Gore fékk 37 daga í bara einu ríki árið 2000. Ágætt er að muna það. En ríkin eru sennilega mun fleiri núna

Þetta er ekki búið - og Trump er jarðýta

Uppfært: mánudagur, 9. nóvember 2020 kl. 14:25:30

Victor Davis Hanson er gestur John Batchelor-þáttarins. Efnið er vangaveltur um fyrstu hugsanlega daga Joe Bidens í Hvíta húsinu með tilliti til kínversku Wuhan-veirunnar, efnahagsmála og Kína. Njótið

Fyrri færsla

Hvað vakir fyrir forseta Bandaríkjanna?