2009: Nú hefst annus horribilis Evrópu. Gáttaþef Ingibjargar og flökt forsætisráðherra

Útvortis verður innvortis. Kommissar Ímat Úrmat þefar gáttir

Þeir sem vita sér nefi lengra vita að það ár sem fer í hönd ásamt þeim næstu árum sem þar á eftir koma munu verða áratugur horribilis í Evrópusambandinu. En á meðan nef stjórnmálamanna er svona langt þá geta þeir í hlutarins eðli ekki séð fyrir endan á því. Það er nefnilega orðið svo alltof alltof langt. Útrás fyrir vonbrigði annus horribilis utanríkisráðherra Íslands fer því miður öll fram innan ríkis núna. Utanríkisráðherrann er orðinn innanríkisráðherra eftir að annus öryggisheimsveldis Íslands varð að horribilis í útrásaræði utanríkisráðherra Íslands til Nýju Jórvíkur. Forsætisráðherra Íslands er því miður einungis orðinn dyravörður í gáttaþefi Ingibjargar Sólrúnar til Brussel. Nýja Jórvík brást og nú er það því Brussel sem utan- og innanríkisráðherrann vill að verði hið nýja tómstundargaman hennar og flokks hennar. Þetta má íslenska þjóðin því miður þola eftir allt sem á undan hefur gengið

Það er átakanlegt að lesa áramótaávarp utanríkisráðherra íslenska lýðveldisins, Ingibjargar Sólrúnar Gísladóttur, þar sem hún segir frá því að hún hafi gersamlega brugðist sem þáttakandi í markaðinum. Hún kennir ekki sjálfri sér um eigin kjánaskap. Nei, hún kennir markaðinum um óvit sitt. Einnig fer hún með staðlausa stafi um málefni Írlands í ávarpi sínu. Í því tilefni bendi ég á fyrri grein mína: (CEPR: Hrun íslenskra banka: ófært og gallað viðskiptalíkan)

En ég get sagt utanríkisráðherranum, sem greinilega á ekki að tjá sig um efnahagsmál, eftirfarandi: þetta er lækningin væna mín! Það er svona sem markaðurinn leiðréttir sig. Kreppa er lækning. Markaður er nefnilega markaður. Hann er staður og stund þar sem kaupendur og seljendur eiga viðskipti sín á milli og á því verði sem þeir semja um. Er utanríkisráðherrann að segja hér að sjálft markaðsverðið hafi ekki virkað? Að það hafi verið rangt? Eða er hún að segja að kaupendur hafi kanski verið fífl, nema kanski að það hafi verið seljendur sem hafi verið fíflin?

Ef maður, af mikilli staðfestu, kaupir allt á uppsprengdu verði og úr samhengi við mögulega innbyggða arðsemi fjárfestinga sinna, þá er alveg með réttu hægt að kalla mann fífl. Dæmi: þeir sem skilyrðislaust setjast inná dýrustu veitingastaði heimsins einungis af því að þeir eru þeir dýrustu - og sem skilyrðislaust kaupa og drekka allt það dýrasta af því sem er dýrast - og einungis vegna þess að það er dýrast - já, þá er með sanni hægt að kalla svona þátttakendur markaðarins fyrir fávís fífl. En það þýðir samt ekki að markaðurinn hafi brugðist. Þú baðst um inngöngu á dýrasta staðinn, þú baðst um dýrsta réttinn og þú baðst um dýrustu vínin - og þú fékkst þau. Markaðurinn afhenti þér vörurnar. Það var ekki markaðurinn sem brást. Það var hinsvegar heili þinn og skynsemi þín sem brást, því allt þetta sem þú baðst um var hægt að fá fyrir brot af því verði sem þú greiddir, ef þú hefðir ekki verið svona mikill kjáni sem bara varð að sveifla um sig með seðlunum til þess eins að sanna sig. Seðlarnir komu úr bönkunum og kostuðu nánast ekki neitt því framboð kjánaskapar var svo mikið

Ástæðan fyrir því að útrásaræði Samfylkingarinnar til Nýju Jórvíkur fór á hausinn var sú að svo yfirgnæfandi nóg hafði Samfylkingin af ódýrum seðlum skattgreiðenda á milli handa sinna. Banki Samfylkingarinnar borgaði, þ.e. skattgreiðendurnir litla Gunna og litli Jón. Þessi útrás var keyrð af sama skorti á vitsmunalegri greind, vitsmunalegri nýsköpun eins og gandreið nokkurra íslenskra athafnamanna um smásölumarkaði Evrópu - fjármögnuð af einkabönkum þeirra. Núna eru bæði Samfylkingin og bankarnir gjaldþrota

En hvað gerist svo í kjölfarið á gjaldþrotinu?

Jú,- nú er það flökt stjórnmálamannanna sem tekur við. Á fagmáli eru svona sveiflur kallaðar flökt (e. volatility) eða óstöðugleiki. Flökt og óstöðugleiki stjórnmálamanna virðist því miður vera miklu meiri og miklu stærri en flökt íslenska gjaldmiðilsins hin síðustu 7 ár á hinum frjálsa markaði sem utanríkisráðherrann segir nú að sé ónýtur? Hefur þetta þá smitandi áhrif á gengi gjaldmiðilsins? Það mun ég koma inná seinna

. . og hver ræður á Íslandi núna?

Hver ræður á Íslandi núna eftir að bankarnir og klapparar þeirra hættu að ráða og stýra Íslandi? Jú, nú er það ESB málið sem á að breiða yfir algeran vanmátt ríkisstjórnarinnar í eigin húsi. Það er nefnilega svo að kjána- og óvitaskapur ríkisstjórnarinnar svipti hana stýri á eigin skútu. Nú er það Alþjóða Gjaldeyrissjóðurinn (IMF) sem hefur stýrið og völdin, skiljanlega. Forsætisráðherra og utanríkisráðherrann, sem í raun er innanríkisráðherra, eru einungs valdalausar skopparakringlur sem snúast í kringum skútuna uppi í þurrkví. Þau eru núna að íhuga hvort það eigi ekki að henda vélinni fyrir borð svo skútan megi fljóta aftur þegar þau seint og síðar meir taka við henni úr höndum IMF. Einnig íhuga þau hvort ekki væri ráðlegra að hætta alvöru útgerð og skrá áhöfnina á skítalaunum undir hagkvæminsflaggi Panama eða ESB um allan aldur og eilífð. Það sem áður hrjáði hið íslenska bankakerfi sem Evrópusambandið kom á hausinn með hjálp nokkurra Íslendinga með stórmennskubrjálæði úti í Evrópusambandinu, það er núna í skuggalega miklum mæli einnig farið að hrjá ríkisstjórnina. Hún er það sem á fagmálinu er kallað flöktandi, eða volatile - og því verulega hættuleg. Ríkisstjórnin heldur að hún geti breytt yfir vanmátt sinn með því að fara að tala um málefni sem eru utan verkahrings hennar og sem alls ekki eru til í stjórnarsáttmála hennar. Hún heldur að fólk sé fífl og gleypi við gömlu táfýlu fötum nýja keisarans í Evrópu

Alþekkt nema á Íslandi? 

Ég hef alltaf vitað að það sem þingmaður breska íhaldsflokksins, Daniel Hannan, skrifar í grein sinni í Morgunblaðinu í dag um Ísland og Evrópusambandið sé hárrétt. Ég veit það vegna þess að ég er búinn að búa hér í Evrópusambandinu í 25 ár og sunda viðskipti og rekstur hér sem Íslendingur samfleytt frá því árið 1989. Það hefur alltaf verið litið niður til okkar Íslendinga af embættismönum Evrópusambandsins. Þeir eiga sér þá ósk heitasta að þessi þyrnir þarna í norðrinu stígi nú loksins niður af hvíta hestinum til okkar hér í framtíðarríki fátæktarinnar, Evrópusambandinu. Það getur nefnilega ekki verið að neinn geti þrifist svona vel án Brussel. Það gengur bara ekki. Einfaldasta leiðin til að tryggja Ísland gegn hagsæld er nefnilega að fá Ísland með í Evrópusambandið. Þá þurfa Brussellingar nefnilega ekki að horfa uppá þetta fyrirmyndar fordæmi þarna hátt uppi á hestinum í norðrinu í félagsskap frænda okkar Norðmanna

En það er leið út úr lömunarveikinni. Hún heitir Vinstri Grænir og Sjálfstæðisflokkur í nýrri ríkisstjórn. Ísland hefur ekki þörf fyrir að afsala sér landi og lýðræði voru. Enga þörf fyrir það og enga löngun til þess. Svo miklir aumingjar erum við ekki ennþá orðnir af öllu góðærinu - því góðæri sem því miður reyndist hallæri fyrir sterka og góða almannaheilli, öllum til heilla. Hallæri hins sterka ramma um almannaheill og öryggi landsins. En hvernig má annað vera þegar utanríkisráðherrann er á flippi og skynjar ekki þær hættur sem beinast að öryggi landsins. Öryggismálin virti hún að vettugi

Klofinn flokkur

Sjálfstæðisflokkurinn er orðinn margklofinn flokkur. Er kanski kominn tími til að flokkurinn gangi í sig sjálfan aftur? Það er alls ekki hægt að horfa framhjá því að hornsteinar flokksins hafa raskast það mikið að vörumerki flokksins er nú að ganga honum úr greipum yfir til Vinstri Grænna. En það er allavega eitt sem ég er búinn að gera upp við sjálfan mig. Eins mikill harðlínu kapítalisti sem ég er, þá mun ég fram í rauðann dauðann frekar kjósa vinstrimenn á borð við Vinstri Græna heldur en að ljá atkvæði mitt flokki sem mun setja það á stefnuskrá sína að ganga í Evrópusambandið og þar með leggja niður það Ísland sem við þekkjum ásamt velferð þess. Ekkert getur orðið verra fyrir Ísland en að breytast í Ítalíu norðursins eða í Nýfundnaland vestursins. Ekkert!

Að lokum

Ég mæli eindregið með að sem flestir horfi og hlusti á viðtal Evu Maríu við Pál Skúlason fyrrverandi háskólarektor hér: 

http://dagskra.ruv.is/sjonvarpid/4454024/2008/12/28/

Hlustið vel og vandlega á það sem Páll segir. Takið eftir notkun hans á nýsköpunarhugtakinu og á orðunum almannaheill og stofnanir.

 

Fyrri pistill: Enginn vildi evru - eða hvað?

Forsíða þessa bloggs 

Af tilefni sendi ég Ingibjörgu Sólrúnu mínar bestu bataóskir í hennar persónulegu heilsufars baráttu 

Athugasemdir

[Haraldur Baldursson, 3.1.2009 kl. 17:29]

Það er nokkuð öruggt, óttast ég, að Steingrímur Sigfússon horfir vonaraugum til þess að fá stól forsætisráðherra. Hann myndi ekki hika andartak með að samþykkja stjórnarsamstarf með Samfylkingunni ef hann fengið stólinn...og ESB...hann myndi ekki láta þann vel bólstraða stól víkja fyrir svoleiðis smámáli.

Ingibjörg hótar 
Nú er svo komið að Ingibjörg Sólrún Gísladóttir formaður stærsta stjórnarandstöðuflokksins, Samfylkingarinnar er ítrekað að hóta Sjálfstæðisflokknum. Nú síðast þegar Geir H. Haarde lýsti möguleikanum að kjósa mætti um aðildarviðræður. Ingibjörg Sólrún Gísladóttir telur sig hafa orðið þokkalegt vald á Sjálfstæðisflokknum og er boltinn kominn í horn Geirs með svör við þessu útspili hennar. Svari Geir þessu útspili ekki með krafti....jæja ég trúi ekki öðru en hann geri það.

Kosningar
Komi til kosninga um aðildarviðræður og þá líka þingkosningar samtímis, eins og Ingibjörg Sólrún Gísladóttir er að reyna að hóta með. Má ætla Ingibjörg Sólrún Gísladóttir fái vel á baukinn. Með góðri OG RÉTTRI kynningu á kostum OG göllum ESB hygg ég að þjóðin velji að halda sig frá þessu "eðal" bandalagi.

xD menn (og konur) eða mýs
Allt er undir því komið að Sjálfstæðismenn sýni einurð á Landsfundinum og velji stefnu sinni áfram farveg utan ESB. Fólk má ekki missa taugarnar vegna kreppu. Ef við veljum ESB leiðina yrðu það okkar stærstu efnahagslegu mistök í lýðveldissögunni.

[Vilborg G. Hansen, 3.1.2009 kl. 18:16]

Því miður Gunnar, verður Steingrímur Joð fljótur að skipta um skoðun ef hann sér forsætisráðherrastólinn í augnsýn.  Því miður. 

Þess vegna vil ég að farið verði í kosningar um hvort hefja eigi aðildarviðræður við ESB ásamt öðrum kostum sem eru í boði eins og myntsamstarfi utan ESB (dollar, Evru eða Norska krónu).  Eða þann kostinn að allt verði hér óbreytt. 

Það ættu nú allir Íslendingar að vita að ef gengið verður til kosninga um leið þá týnist málefnið algjörlega sem og upplýsingar og útrskýringar um kosti og galla.

Ég er farin að hallast að því að vænlegast sé fyrir þjóðina að Sjálfstæðisflokkur slíti stjórnarsamstarfi við Samfó og gangi til liðs við Framsókn ef möguleiki er.  Að öðrum kosti verði mynduð hér þjóðstjórn eða utanþingstjórn

[Loftur Altice Þorsteinsson, 3.1.2009 kl. 22:56]

Að flestu leyti Gunnar er þetta rétt og heiðarleg greining hjá þér. Það er beinlínis glæpsamlegt hvernig Samfylkingin ætlar að kúga Sjálfstæðisflokkin til að taka afstöðu gegn fullveldi þjóðarinnar. Getur verið að Geir H. Haarde sé ekki að undirbúa nýja ríkisstjórn án Samfylkingar. Allt er betra en þessi óþjóðarfylking.

Ég var að skjóta inn athugasemd á síðu Evrópunefndar Sjálfstæðisflokksins. Hún er það nærri því sem þú ert að segja Gunnar, að ég læt hana inn hérna líka:

Er forusta Sjálfstæðisflokksins með öllum mjalla ? Skal öllu fórnað til að sitja áfram í Ríkisstjórn ? Nú þegar öll þjóðin ætti að vera upptekin af að ráða fram úr þeim stórkostlega efnahagsvanda sem þjóð og einstaklingar standa frammi fyrir, er boðað til landsfundar um aðild að ESB. Öllum má vera ljóst að meirihluti Sjálfstæðismanna mun hafna svona rugli.

Ef menn óska stöðugleika er hans ekki að leita í náðarfaðmi ESB. Þeim sama náðarfaðmi sem fyrir nokkrum mánuðum tókst nærstum að kreista lífsneistann úr þjóðinni. Þeim sama náðarfaðmi, sem hefur valdið slíku tjóni að mun útheimta átak allra Íslendskra handa um langa framtíð.

Efnahagslegan stöðugleika er hægt að öðlast, en það verður ekki gert með áframhaldandi óstjórn. Seðlabankinn mun ekki eiga þátt í efnahagslegri framtíð þjóðarinnar. Fleirri stofnanir þarf að leggja af eða breyta. Hvers vegna ekki að einhenda sér að verkefnum sem hrópa á lausnir strax og til lengri tíma ?

Getur verið, að forusta flokksins neiti, að horfast í augu við stöðu efnahagsmála og ætli að svæfa vitund þjóðarinnar með meiningarlausu hjali um ESB ? Ef í alvöru á að taka upp umræðu um ESB, væri þá ekki rétt að byrja á byrjuninni ? Byrjunin er auðvitað uppgjör við þá heimskulegu ákvörðun sem tekin var 1993, með inngöngu í EES. Sjá menn ekki núna hversu sviksamleg sú ákvörðun var og ólýðræðisleg ?

Í stað þess að gangast undir vald Brussel með EES-samningnum áttum við að gera tvíhliða samning við ESB. Þetta vissi allur almenningur, en Alþingismenn svikust undan skyldum sínum og afgreiddu málið á ólýðræðislegan hátt. Alþingi nýtur ekki meira traust núna, enda eru flestir þingmenn ógæfumenn, eftir að hafa gengist undir afarkosti Bretlands og ESB.

Nú er rétti tíminn fyrir þingmenn að líta til baka og meta farinn veg. Er til framfara fyrir þjóðina að endurmeta EES-samninginn og hefja hugsanlega viðræður við ESB um tvíhliða samning í staðinn ? Hugsanlega mun þjóðin fyrirgefa Alþingi lyddu-mennskuna, ef núna er tekið á málum af heiðarleika. Sjálfstæðisflokkurinn á að hafa forustu um að gera upp mistök fortíðar. Innganga í ESB er ekki á dagskrá fyrr en það uppgjör hefur farið fram.

[Ómar Geirsson, 4.1.2009 kl. 02:08]

Blessaður Gunnar.

Ég held að þú sért að verða óvinur Samfylkingarinnar númer eitt.  Öll þeirra pólitík og allt sem þau hafa sagt, ESB er lausnir og himnaríki á jörð.  Og svo kemur þú og gerir grín af þeim, bæði með húmor og rökum. 

Ég man þær dökku stundir þar sem ég hélt að landsala og þrælaskuldbindingar biðu barna okkar og svo skeði undrið og það kom fram maður með rök og dæmi og alltíeinu sá ég ljósið;  Esb á ekki von því þeir eru að fara á hausinn, allir sem einn, bara misfljótir að því. 

En það er þetta með Pál.  Ertu genginn af frjálshyggjutrúnni og  sammála Bjarna Ben um íhald og frjálsan markað, í bland við félhagslegt réttlæti og jöfnuð.  Fáir hafa orðað þeta betur en Bjarni.  Skömm að Björn sé föðurverrungur og skuli kóa upp nýfrjálshyggjuna hjá "Tap" Rebúblikunum í USA.  Ef eitthvað vit á að koma út úr rústunum þá þarf skynsemi í byggingaraðilann.  Lilja hefur verið kveðin með viti og framsýni; Bjarni las hana og túlkaði hana það vel að betur hefur ekki verið skýrt síðustu aldirnar.  Heiðarleg kristileg íhaldsemi er í ljósárafjarlægð frá "Nýfrjálshyggjunni".  Siðblinda og siðleysi verður ekkert skárra þó það kenni sig við frjálsan markað og viðskipti. 

Bjarni, Páll og Sigurbjörn hafa sagt flest af því sem segja þarf.  Ef Ingibjörg er history, hvert þá er svarið af þínu mati?

Gaman að fá pistil um það áður en ég fer að linka á bloggið þitt.  

Kveðja að austan.

[Ómar Geirsson, 4.1.2009 kl. 02:13]

Blessaður aftur.

Las athugasemd Vilborgar.  Má vera að Steingrímur svíki fyri völd.  Þekki hann ekki af slíkum hugsunarhætti.  En við þurfum að láta börn okkar njóta vafans.  Ingibjörg býður uppá þrældóm og landsölu.  ALLT ER BETRA EN ÞAÐ.

Kveðja að austan.

PS. Svo má ekki gleyma heiðarlega íhaldinu.  Það er sirka 70% af Sjálfstæðisflokknum og það mun frekar berjast en að láta þrælagjörning Ingibjargar rætast.

Sami.

Ps. aftur.  Sá sem vanmetur Styrmir er fávís maður.

[Jón Valur Jensson, 4.1.2009 kl. 02:23]

Heill og sæll á nýju ári, kæri Gunnar, og gott er að sjá, að þú heldur hér ótrauður og sigurviss uppi merkinu fyrir sjálfstæði Íslands, þótt hrægammar sæki að landi og þjóð.

Ég ætla að biðja þig einnar bónar, hvort mér leyfist ekki í bloggvandræðum mínum og vegna vinskapar okkar og samstöðu í málum að benda lesendum þínum á, að þrátt fyrir að hafa ekki getað skrifað nýjar greinar á Moggabloggi mínu síðan fyrir jól, þá get ég þó bloggað á VÍSISBLOGGI MÍNU og hef skrifað þar þessar greinar frá gamlársdegi þar til nú á liðnu kvöldi: Forsætisráðherra segir ekki stórmál að hann fremji lögbrot – Bjóðum nýtt ár velkomið og stöndum nú vörð um fullveldi Íslands – Áramótaræður hinna samseku – Sómamanni svarað um ömurleg samningsmarkmið EB-elskandi Samfylkingarmanna og að endingu: SI og ritstjóri Mbl. nota villandi skoðanakönnun í baráttu fyrir innlimun í Evrópubandalagið.

Með heilshugar ósk um gæfuríkt nýbyrjað ár, í þínum ranni og á vettvangi þjóðar okkar. Íslandi allt.

[Ólafur Ingi Hrólfsson, 4.1.2009 kl. 07:02]

Mögnuð umræða - sé ekki betur en Landsfundurinn verði óþarfur. ða hvað. Gott fólk - Landsfundurinn hest rétt fyrir mánaðarmót. Við sem sitjum hann munum taka ákvörðun - hvert fyrir sig - OG SÍÐAN VERÐA ATKVÆÐIN TALIN. Að því loknu liggur fyrir meirihlutavilji Landsfundarfulltrúa. Ég get fullvissað ykkur um að við sem þar verðum erum ekkert að fara á taugum. Hinsvegar leiðist mér að sjá liðhlaupa sem deilir ekki kjörum með okkur vera að gagnrýna utanríkisráðherra. Þeir sem mig þekkja vita að ég er enginn aðdáandi hennar en hún er ráðherra hér og liðhlaupum kemur ekkert við hvað hún segir eða segir ekki. Villandi skoðanakannanir - af hverju verða skoðanakannanir villandi?? Ef þær falla ekki ég viðkomandi eða er það kanski vegna óábyrgra fjölmiðla sem telja sig hafa meira vit á málum en almennt gerist? Óábyrgir einstaklingar ("fréttamenn")óábyrgir stjórnmálamenn sem njóta þess að fjölmiðlar vilja upphlaups"fréttir" en ekki réttar fréttir. Það er rétt sem Vilborg G Hansen segir um Steingrím J. enda hefur varla heyrst í honum síðan skoðanakannanir sýndu stóraukið fylgi VG. Hann sér fram á það að þurfa jafnvel að standa við stóru orðin en allt hans tal hefur verið af sömu ætt og Nýju fötin keisarans.

Ólafur I Hrólfsson

[Gunnar Rögnvaldsson, 4.1.2009 kl. 16:23]

Ég þakka ykkur öllum fyrir innleggin og góðar kveðjurnar.

 

Það er alveg á hreinu að hjá sjálfum mér kemur sjálfstæði  Íslands framar en flokkspólitík. Svo einfalt er það. Einnig framar en mínir persónulegu hagir. Þetta er mál sem varðar framtíð Íslands næstu 1000 árin. Það er þetta sem Sjálfstæðisflokkurinn hefur staðið fyrir.

 

Það sem mér virðist vera að gerast núna er einhverskonar spil sem mun enda með skelfingu og allsherjar ringulreið því hvorki Sjálfstæðisflokkurinn né Vinstri Grænir þora að móta stefnu sem byggist á eigin sannfæringu og grunngildum. Heldur keyra þeir gömlu og útjöskuðu framsóknarstefnuna um að vera galopnir í báða enda, til þess eins að geta breytt um skoðun þegar vindáttin breytist þegar þeir eru á leið niður aðrennslis-brautina á Stóra Bola stökkpallinum. En flugið munu þeir missa því þeir hafa engan fastan lendingarstað vegna þess að þeir fóru í loftið án sannfæringar um hvar þeir ætla að koma niður. En þá verður of seint að byggja upp það vörumerki sem mun verða að standa undir og bera þá í gegnum erfiða kosningabaráttu. Þá verður of seint að byggja upp það "brand awareness" og "brand community" sem mun þurfa að verða burðarvirkið í gegnum þunnt og þykkt. Keep it simple! 

 

 

Kæri Jón Valur: af hverju geturðu ekki lengur bloggað á Mogganum?? 

 

Ólafur Ingi: ef ég er sá liðhlaupi sem þú átt við (sem ég vona ekki) þá ættirðu að prófa gagnrýni frá Brussel í staðinn. En eins og þú kanski veist þá deili ég kjörum með þjóð minni því við vinnum fyrir mörg smærri íslensk fyrirtæki og einnig einstaklinga hér í útlöndum og höfum gert lengi. Við þekkjum vandamál þeirra sennilega einna best. Og eins og er þá þurfum við að taka inn okkar skerf af kjararýrnun því ekki viljum við missa íslenska viðskiptavini okkar því það kostar mikla peninga og tíma að uppbyggja traust og viðskiptavild.

 

Kveðjur

 

[Loftur Altice Þorsteinsson, 4.1.2009 kl. 17:29]

Ég legg til að menn lesi þetta: http://www.brugesgroup.com/news.live?article=18&keyword=10

Höfundurinn Bernard Connolly segir meðal annars þetta:

So what will happen when the small countries are made bust by EMU? I can tell you, as someone who spent many years on the inside, that the aim of those who created EMU was to produce a financial crisis that would leave the small countries with no alternative but to sign on the dotted line of a new treaty that would make them, in effect, colonies of France and Germany. If we were in, we too would become a colony.

[Sigurbjörn Svavarsson, 5.1.2009 kl. 18:11]

Sæll Gunnar.

Tek undir með þér, þessi lömunarveiki ríkisstjórnarinnar er óskiljanleg. Utanrísráðherra hefur fyrir löngu gert sig uppvísa af fávisku í umræðu um efnahagsmál og fjárhæðir yfirleitt á fréttamannafundum, það kemur ekki á óvart. En hvar er ráðherra efnahagsmála og forsætisráðherra? Hann situr undir ESB glósum oddvita samfylkingarinnar trekk í trekk og lætur hrekja sig útí horn.

Hann viðhafði stór orð um þvingun ESB í Icesave málinu, þegar svo utanríkisráðherra kom úr kosningarsneypuför sinni og pönnukökubakstri hjá SÞ þá var tekin 180° snúningur og hún allt í einu orðin talsmaður ríkisstjórnarinnar í Icesave, um að vegna ESS samningsins  væri þjóðin nauðbeygð til að taka á sig nokkur hundruð milljarða. Síðan renndi ríkisstjórnin í gegnum hið auma Alþingi á mettíma heimild til að semja við ESB um lán vegna Icesave. Er hægt að lögsækja Alþingismenn fyrir afglöp í starfi? Það er athugunarefni.

Ég er komin á þá skoðun að kannski væri best að landsfundurinn snúist um að skipta um forystu í flokknum og að ESB umræðunni verði frestað, þar sem ljóst er að þessi ríkisstjórn er í andaslitrunum. Þá geta sjálfstæðismenn komið til kosninga með nýja forystu og nægilegt sjálftraust til að verða í ríkisstjórn í nýrri uppbyggingu. Ef flokkurinn mun ekki endurnýja sig þá má hann fara í langan þyrnirósarsvefn mín vegna. 

[Gunnar Rögnvaldsson, 6.1.2009 kl. 00:07]

Þakka ykkur einu sinni enn fyrir innleggin. Já þetta er ömurlegur slagur og hann er háður við vindmyllur. En menn eru því miður að rugla saman forgangsröð aðalatriða og ættu strax að leggja ESB málið ofaní skúffu og snúna sér að þeim raunverulegu og brýnu verkefnum sem bíða úrlausnar. Menn verða að hugsa dýpra, og já, endurnýja sig í hugsun og gjörðum. Flokkarnir þurfa að koma sér inn í raunverulekann á ný og hætta að nýta sér þann ótta sem ríkir eftir áföllin. Hætta að nýta sér óttan sjálfum sér til framdáttar. Þannig stjórnmálamenn eru beinlínis hættulegir. Svoleiðis stjórnmál eru forkastanleg.

Gjaldmiðillinn  

Það er mikið sett út á gjaldmiðilinn. En það er mín sannfæring að gjaldmiðilinn hefur að mestu leyti og oftast þjónað þjóðinni afskaplega vel. En gjaldmiðillin endurspeglar þó aðeins það sem fram fer í peninga- og hagkerfi þjóðarinnar. Þetta gerist í öllum alvöru peningakerfum nema í myntbandalögum. Þar getur ástand efnahags- og peningamála nefnilega ekki endurspeglað sig í gjaldmiðlinum og því munu sjúkdómseinkennin endurspegla sig á öðrum, en þó röngum, stöðum í hagkerfinu. Í massífu atvinnuleysi, ömurlegum hagvexti, stöðnun efnahags þegnanna og öldrun samfélagsins. Tíminn stoppar og samfélagið visnar og deyr.   

Tökum sem dæmi síðastliðin 6 ár. Hvernig þætti ykkur að búa við gjaldmiðil sem hækkar um 100% gagnvart gjaldmiðli aðalsamkeppnisaðila hagferfis ykkar? Sem neytendur væruð þið glöð en sem skattgreiðendur, launþegar og sem atvinnurekendur væruð þið búin að fá nóg. Það verður adrei hægt að vinna það tapaða upp.

Þó svo að flökt íslensku krónunnar sé töluvert þá er það samt minna en flökt hinna stærri gjaldmiðla þegar til lengri tíma er litið.

Hér getið þið skoðað þetta og svo í huga ykkar borið þetta saman við flökt stjórnmálamanna og flökt eftirlitsstofanna og eyðileggingu hins frjálsa markaðar á Íslandi í skjóli kjánaskapar stjórnmálamanna og brostinna eftirlitsstofnana.

Flökt íslensku krónunnar 

Væntingarnar 

Í því ESB-landi sem ég hef búið í 25 ár hefur atvinnuleysi einungis farið undir 6% í 2 ár af síðustu 30 árum. Það þokaðist niður fyrir 6% árið 2006 (húrra) og einungis vegna þess að vinnuafl þjóðarinnar er orðið varanlega skert og svo vegna tímabundinnar bólu á húsnæðismarkaði. Íslensk fyrirtæki geta svo ímyndað sér hvernig eftirspurn er í svona þjóðfélögum. Hún er hörmuleg og samkeppnin er drepandi, allt keyrir á örsmáum profit margins og á miklu miklu magni. Allir þurfa að keppa þarf við tímalaun í Þýskalandi og þeir hafa varla fengið launahækkun í 10 ár. Kaupgeta neytenda og fyrirtækja svo og fjárfestingar markaðarins haldast nefnilega í hendur við atvinnuástand og þjóðarframleiðslu. Ef atvinnuástandið er slæmt í 30 ár þá mun samfélagið enda sem hina vísa leið til fátæktar. Það er jú ekki útaf engu sem Evrópusambandið er alltaf að dragast meira og meira aftur úr Bandaríkjunum og Íslandi. Það er viss ástæða fyrir þessu og þessi ástæða nefnist missir frelsis og glötuð sjálfsbjargarviðleitni þjóða. Þú kafnar sem samfélag í spennitreyju Evrópusambandsins og situr fastur í hagvaxtargildru þess. Vöðvarnir visna því það er ekki hægt að nota þá í seinnitreyju Evrópusambandsins.  

Vonbrigðin 

Flest íslensk fyrirtæki verða þrumulostin þegar þau þurfa að fara að keppa á svona markaði. Vonbrigðin verða mikil enda hafa þau fæst alls ekki gert sér grein fyrir því hvaða gullepli þau hafa staðið með í höndunum heima á Íslandinu góða. Þetta kemur næstum undantekningalaust sem mikið áfall fyrir þau, því væntingarnar eru oft svo miklar. Allt hlýtur að vera betra úti í hinum stóra heimi en heima á Íslandi. En þegar sannleikurinn rennur upp þá hugsa þau sig um á ný. Stærðin glepur.  

Kveðjur 

[Haraldur Baldursson, 6.1.2009 kl. 00:47]

Bjarni nokkur Ármannsson dregur þá ályktun í grein sinni í Fréttablaðinu í dag fyrst hann og allir hinir hafi ekki hlúð nógu vel að krónunni, sé ekki hægt að halda henni stöðugri. Gott til að vita að hann hefur ekki týnt öllu enn. Tiltrú hans á sjálfum sér hefur greinilega ekki borið mikinn skaða fyrst hann trúir að fyrst hann ekki geti, þá geti enginn.
Við erum ansi heppinn að Bjarni skuli kominn heim að bjarga okkur. Takk !
Öllu jarðtengdari er þó Víglundur Þorsteinsson í Bréfi sínu til Þorsteins Pálssonar. Víglundur bendir þar á að ESB umræðan sé að flækjast fyrir.
Ekki ómerkari ESB sinni en Egill Helgason sér meira að segja að sér og leggur til í grein sinni "Púðrinu eytt í ESB" að etv. sé tími til kominn að snúa sér að raunverulegum vanda landsins í stað þess að eyða tímanum i ESB umræðuna.

Getur það virkilega verið að hugir landsmanna séu að glöggvast fyrir því að ESB er ekki gagnleg umræða (að sinni amk).

[Gunnar Rögnvaldsson, 6.1.2009 kl. 01:15]

Kærar þakkir Haraldur skaltu hafa fyrir að vekja athygli mína á þessum greinum.

.

Kveðjur

[Gunnar Rögnvaldsson, 6.1.2009 kl. 01:48]

Það er svo 100% öruggt að Víglundur Þorsteinsson hefur rétt fyrir sér í því, sem flestu öðru, að bankarekstur verður hola í jörðinni á næstu árum. Millibankamarkaður mun hverfa eins og við þekkjum hann. Hið alþjóðlega bankakerfi mun ekki ná sér næstu 40 árin. Það verður HOLA í jörðinni! Alger HOLA!

Ef Íslendingar eru ennþá að gæla við þessa hugsun um alþjóðlega bankastarfssemi, þá ættu þeir að gelyma henni strax og snúa sér að annari og meira gjöfullri atvinnustarfssemi. Nema þeir vilji fara svissnesku leiðina og laða að fjármagn til Íslands frá útlöndum og í erlendri mynt í krafti þeirrar góðu aðstöðu Íslands að standa fyrir utan The European Tax Cartel, sem ESB einmitt er.

En hver treystir íslenskum bönkum núna? Þeir sönnuðu sig jú sem kjánar og eru núna heimsfrægir fyrir að vera kjánar. Þeir eyðilögðu mikið fyrir þeim sem munu koma á eftir í röðinni. En það er samt hægt að vinna traustið aftur, en það tekur bara tíma og það mun EKKI vinnast með því að taka á sig viðvarandi efnhagssjúkdóm sem heitir ESB. Eða efnahagslega eyðni.

Það er svo gaman að heyra menn tala um þetta furðuverk sem þeir kalla evrusæði. Hvaða evrusvæði? Þetta svæði er ekki til. Ekki til! Það er allavega ekki til á Spáni í dag og hefur ekki verið til þar síðan snemma hausts því það er búið að setja allan Spænska bankageriann í sótthví inni í MIÐJU EVRUSVÆÐI. Þetta átti jú ekki að geta gerst samkvæmt evrumönnum.

Spænskir bankar nenna ekki einu sinni að endurnýja matssaminga við matsfyrirtæki á borð við Standard & Poors lengur því til hvers að vera að eyða fjármunum bankanna í það þegar ENGINN vill lána þeim peninga. Þeir þurfa því ekki á mati að halda því það myndi einungis vera penignar út um gluggann og gera þá að ennþá meira athlægi.

Svo munu kyndarar Fjárbrennslunnar H/F & PLC-GHMB fara í gang með að svíða restina af göflungunum undan bankakefi evrusvæðis því núna er The Second Great Depression (ekki recession) að hefjast í Austur Evrópu og þessi Austur Evrópa ásamt henni Suður Ameríku skuldar bankakerfi evrulanda meira en dálítið heilann helling. Það eru víst 3,5 trilljónir á spili hér - sem eru ólán ESB-bankanna til nýmarkaðslanda.

Upptökin verða fyrst í Úkraínu og baltísku löndunum, ca. 8,5 á Richter, snemma morgin og alltaf um hlegi því þá eru bankarnir nefnilega lokaðir.

Kveðjur

[Haraldur Baldursson, 6.1.2009 kl. 09:55]

Sæll Gunnar.
Athyglisverð grein sem þú birtir á heimasíðu þinni um aulýsingakostnað ESB, sem er hærri en Coca Cola eyðir á heimsvísu.
Ég vill taka það skýrt fram frá mínu sjónarhorni að ég tel með öllu útilokað að nokkur maður á Íslandi fái staka krónu, nei sorry staka Evru, frá ESB til kynningar og ALLS EKKI menn eins og Eiríkur Bergmann, sem eru hreinir hugsjónamenn. Hann myndi ALDREI þiggja neitt. Auk þess er ESB svo mikið hugsjónabandalag að það myndi aldrei greiða mönnum fyrir svoleiðis kynningar. Auðvitað kemur fyrir að ég hafi rangt fyrir mér...en ALLS EKKI um þetta !

[Kristján Erlingsson, 7.1.2009 kl. 22:27]

Sæll og blessaður og gleðilegt nýtt ár.

Fyrst í stað, þakka þér kærlega fyrir þín miklu vinnu sem ég veit að hefur gefið mörgum okkar fast land í þeirri baráttu að halda haus sem Íslendingur. þú átt, að ég tel, mikið hrós skilið. Skrif þín um efnahagsmál eru rökþétt og þekking þín á Evrópubandalaginu aðdáunarverð.

Ég er hinsvegar ekki alveg sammála þér varðandi bankastjórn Seðlabanka Íslands seinustu árin. Hann brást hlutverki sínu og afgreiddi væntingar greiningadeilda bankanna, sérstaklega frá 2006. Með því einu að lækka vexti öllum að óvörum, þ.e.a.s búa til míni kreppu og hleypa verðbólguvæntingum í gegn í stað þess að byggja stærri og stærri múra með sem gátu ekki annað en fallið, fyrr eða síðar. Grunvillan, að ég tel, er að menn greindu ekki á milli neyslubólgu og eignarbólgu. Þannig var síhækkun fasteignaverðs á suð-vestur horninu, fjármagnað af ódýru erlendu fjármagni, tekið sem verðbólga sem kallaði á, samkvæmt gömlu góðu kenningunum, hækkun vaxta, sem styrkti gengið sem jók flæði fjármagns inn í landið og svo fram vegis. Í mars 2006, hefði Seðlabankinn átt að lækka vextina og shokka fjármálakerfið örlítið. Ég man að ég sat með frænda Einari Oddi heitnum þann mánuð á Vegamótum og við klóruðum okkur í kollinum. Hvernig virkar 'markaður' sem er stjórnað af 3 manna nefnd í Seðlabankanum og hann fullnægir vængingum 'markaðsins' þ.e.a.s. bankanna, alltaf? Ég nefni þetta vegna þess að ég er þér sammála um að við eigum getum og ættum að vilja að viðhalda þjóðarbrotinu Íslendingar, með eigin gjaldmiðli. Ég nefni þetta vegna þess að það að gera mistök er ekki það sama og að það sé ekki hægt að gera hlutinn. Það þýðir bara að þeir sem stóðu vaktina vöru störfum sínum ekki vaxnir og ábyrgð fjöldans, læmingjanna, er mjög mikil í þeim efnum einnig. Kirkja Þekkingarinnar er ákaflega hættuleg stofnun þar sem gagnrýnisraddir eru gerðar að röddum kverúlanta og vitleysingja.

Ég hef verið búsettur í Afríku síðastliðin tæp 12 ár og fór af landi brott sem efnahagslegur flóttamaður 'Economical refugee', með konu börn og skuldabagga. Mér finnast orð Ólafs Inga hér að ofan um liðhlaupa vera verulega óviðurkunnarleg og ég tek þau til mín einnig. Ég deildi ekki kjörum vina minna í Reykjavík á meðan landsbyggðin brann. Ég deildi heldur ekki kjörum vinna minna seinustu 6 ár, þar til spilaborgin hrundi, heldur reyndi að byggja upp nýtt líf í nýju landi þar sem blessunarlega ekki var hægt að fá (ó)lán. Meðalskuld íslenskra heimila var í fyrra, ef ég mað þetta rétt, um 213% af ráðstöfunartekjum, skiftir það engu i þeirri stöðu sem þjóðin er komin í Ólafur Ingi? Það voru ekki bara bankarnir, smásalan, verktakarnir og sjávarútvegurinn sem kaffærðu sig í skuldum. Ég ætla hinsvegar að hafa skoðun á málum Íslands núna eins og ég gerði þegar ég bjó þar. Eins og ég hef alltaf haft. Ég er Íslendingur og ég mun mæta á landsfundinn og ég mun kjósa á móti því að Sjálfstæðisflokkurinn taki það upp að hefja viðræður um það að taka fyrri hluta nafns síns í burtu og heita síðan Flokkurinn. Amma mundi aldrei fyrigefa mér annað.

Kveðjur frá Úganda, þar sem engin fjármálakreppa er.

Kristján Erlingsson

[Gunnar Rögnvaldsson, 8.1.2009 kl. 15:28]

Gleðilegt nýtt ár og kærar þakkir fyrir góða innleggið þitt Kristján. Við erum samsinnis um það mikilvægasta!

Mér er sagt að afrískir bankar séu þeir arðsömustu í heimi núna. Mjög passandi að enginn skuli hafa veitt því athygli hér í dótabúðinni í vestó.

Kveðjur til þín