Stefnuræða forsætisráðherra

Ég hlýddi á stefnuræðu Bjarna Benediktssonar forsætisráðherra Íslands og umræður í kjölfar hennar, við upphaf þessa 147. löggjafarþings Alþingis Íslendinga. Sjálfs þjóðþings okkar, en ekki einhvers "samfélagsþings" eins og stundum mætti halda að þingmenn úr firrtum undirheimum múgsefjandi samfélagsmiðla haldi að þjóðþing okkar sé. Alþingi er þjóðþing Íslendinga og engra annarra!

Bjarni forsætisráðherra blikkaði með stóra vasaljósinu og var sá eini sem gerði það. Hann var sá eini sem minntist á fullveldi þjóðarinnar og hve hart forfeður okkar börðust fyrir þjóðfrelsi og sjálfsákvörðunarrétti hennar. Það gerðu þeir með því að viðhafa þjóðarstefnu (e. national-ism). Og þau öfl sem svo gerðu, voru kölluð hin frjálslyndu öfl. Og þau öfl eru enn hin einu sönnu frjálslyndu öfl

En hann Bjarni Benediktsson er í afar vondum málum með Viðreisn í ríkisstjórn, því sá flokkur er þjóðfjandsamlegur okkar þjóð. Það fer ekki á milli mála

Bjarni þyrfti að hafa stöðugt kveikt á stóra ljósinu. Geri hann það, en sé ekki að fela það, þá þarf hann ekki að óttast kosningar, heldur hlakka til þeirra samfellt og endalaust alla ársins daga

Þingmaður Framsóknarflokksins talaði um að Bjarni væri "ástríðulaus". Það má vel vera. En dómsmálaráðherrann okkar minntist einmitt á það mál með því að minnast á þrískiptingu valds. Þeirri skiptingu var komið á til þess einmitt að leggja bönd á ástríður og ástríðufulla valdagræðgi pólitískra skemmtikrafta eins og til dæmis Steingríms J. Sigfússonar, sem varð fremsti kosningasvikari Íslandssögunnar er hann stóð frammi fyrir því að hafa hemil á valdagræðgi-ástríðum sínum eða ekki. Þessi maður varð því auðvitað háværasta skemmtiatriði kvöldsins. Steingrímur ætti að íhuga stöðu í leikhúsi í stað löggjafarþings Íslendinga. En það sem hann þó benti á í sambandi við bændur, er nú samt rétt. Bjarni, þú verður að koma böndum á þetta mál í þinni ríkisstjórn, því það er í fyrsta lagi nátengt fullveldi þjóðarinnar og í öðru lagi hið ömurlegasta mál. Algerlega nátengt því og ömurlegt

Katrín formaður VG minntist á þjóðtunguna, íslenskuna. Það fór henni mjög vel. Undir tilvistarlegt mikilvægi þess máls ættu allir að geta tekið, þó svo að VG hafi dæmt sig til útlegðar með krónísku rauðgrænu kommakukli og kosningasvikum

Ég hrósa dómsmálaráðherranum okkar fyrir að minnast á skiptingu valds. En 300 árum áður en Montesquieu var uppi, var annar maður uppi sem hét Sir John Fortescue, sem meira hefði verið áríðandi að minnast á. En mest áríðandi af öllu hefði þó verið að minnast á þá skiptingu valds sem Gamla testamenti Biblíunnar kom til skila til síðari kynslóða, og þar á meðal okkar, sem einum af hornsteinum Vesturlanda; þ.e.a.s. skiptingu valds í Ísraelsríki hinu forna. Þar varð skipting valds til. Og einnig landamærin, sem búa til lögsöguna og koma í veg fyrir að ríki þenji sig út fyrir þau til að gleypa alla veröldina í sig, já þau koma líka úr Gamla testamenti Biblíunnar. Það sama gildir um hina grunnpólitísku einingu sem myndar veröld manna; þjóðirnar og þjóðríki þeirra.

Ritningarnar boða þá (laga)heimspeki að enginn megi stjórna heiminum, heldur eiga þjóðirnar að stjórna sér sjálfar. Allt sem til dæmis minnir á eða kallast getur "alþjóðasamfélag" í dag, er einungis dulbúin tilraun og samsæri gegn þjóðfrelsinu, í formi nýs umboðslauss heimsveldis með lymskulegum umbúðapappír utan um, til þess auðvitað að hengja þjóðirnar í og gera þær að þrælum

Mér finnst þingmenn Pírata vera orðnir frekar gamlir, lúnir og gráhærðir. Ef þeir hefðu til dæmis teflt átta til tíu ára stúlkubörnum fram í ræðistól Alþingis, þá hefði kannski verið hægt að hafa eyrun opin og hlusta. Ekki gat þetta kjörna fólk Pírata sem röflaði, og sífellt röflar um reglur, haldið sig við einfaldar reglur um ræðutíma. Ekki frekar en þeir héldu sig við geimferðaáætlun flokksins til Evrópu

Kjólafyrirsæta vina sinna í Lundúnum úr flokki sem kallaði sig Bjarta framtíð, nennti ég ekki að hlusta á. Þá var algerlega nóg komið og ekki síst þegar kvenkyns þingmaður úr pjötluflokki kom og skammaði íslensku þjóðina fyrir að viðhafa lýðræði í landinu með því að þeir flokkar sem kosnir eru til valda séu við völd, en ekki þeir flokkar sem kjósendur hafna

Það sem stóð upp úr á þessi kvöldi var hversu ömurlegur söfnuður af innantómu þvaðri tíndist upp úr ruslatunnum smáflokkanna. Þeir eiga ekki langt eftir. En stóra fullveldisljósið hans Bjarna Benediktssonar og íslenska krónan hans lýstu þó sál mína mest upp og var það uppörvandi tilfinning

En Bjarni minn góður: Númer eitt) Hafa stanslaust kveikt á stóra ljósinu þínu, og númer tvö) boða stórfelldar skattalækkanir fyrir næstu kosningar. Þú einn getur gert það og þér einum trúir fólk til þess. Og númer þrjú) þvo bændaútrýmingarstimpilinn af flokknum. Það verður að gerast!

Gangi þér og xD þingflokknum vel

Fyrri færsla

Fyrsta kynslóð ónýtra Hörpu-forseta lætur úr Reykjavíkurhöfn

Athugasemdir

[Guðbjörg Snót Jónsdóttir (IP-tala skráð) 14.9.2017 kl. 23:22]

 Satt segirðu. Ekki batnar svo ástandið, þegar Sovétfréttastofa Rúv og Stöð2 eru að fara af límingunum út af því, að faðir Bjarna skyldi skrifa meðmæli með þessum barnaníðingi, svo að hann gæti fengið uppreisn æru. Það gæti orðið Bjarna dýrt er ég hrædd um, eins og þessir fjölmiðlar djöflast í fólki, þegar þeir finna einhvern flöt til þess. Fyrst var það Sigmundur, og núna er það Bjarni. Ég óttast mjög, að þetta geti eyðilagt fyrir flokknum, ef þeir halda áfram með þetta hjá Rúv og Stöð2, sem þeir væru svo sem vísir með. Haldið það sé nú!!! Þessir fjölmiðlar fara að verða hreint óþolandi, eins og þeir haga sér. Hvað getur svo fólkið kosið eiginlega? Allir vita, hvað vald fjölmiðla er orðið mikið í dag, og þegar þeir láta svona, þá gera þeir það að verkum, að fólk missir áhugann á stjórnmálum og kosningum, því að þeir eyðileggja svo mikið með þessum gauragangi í sér, að fólk veit ekki lengur, hverja það getur kosið, þar sem þetta er allt saman ómögulegt fólk í augum fjölmiðlanna, sama hvaða flokkur er nefndur. Þetta getur ekki gengið svona lengur. En hvað er til ráða? Það er nú stóra spurningin, sem er vandsvarað. Við skulum samt vona, að þetta skaði ekki Bjarna og Sjálfstæðisflokkinn alltof mikið, og það verði stjórnarbreyting hér í borginni á næsta ári. Hvað Viðreisn varðar, þá er nú ekki við öðru að búast en því, sem blasir við manni í þessum fjárlögum og öðru því, sem þeir leggja fram. Ég er t.d. algerlega ósammála Þorgerði Katrínu varðandi landbúnaðarfrumvarpið, og finnst hún ekkert vit hafa á þessum málaflokkum, sem hún var valin til að stjórna. Það er svo allt á sömu bókina lært bæði varðandi þetta lið í Viðreisn og eins BF, VG og Samfó. Það er ekki nema von, að fólki finnist lítið til Alþingis koma, eins og fólkið er, sem situr þar inni, enda er hundleiðinlegt að hlusta á útvarp frá Alþingi í dag, miðað við það, sem áður var, þegar við vorum að alast upp. Maður verður samt að vona það besta, og að Bjarni og þó miklu fremur flokkurinn sleppi nokkurn veginn óskaddaður frá þessarri orrahríð fjölmiðlanna, sem nú er að bresta á - enn einn ganginn. Svei mér þá, sem þetta er ekki algerlega glatað lið á þessum fjölmiðlum, sérstaklega þó Sovétfréttastofu Rúv! Mál er að linni þessum nornaveiðum, sem þeir eru alltaf að fara af stað með, þegar minnst varir. Það hefur enginn gaman af þessu nema í mesta lagi þeir, og lýsir vel karakternum í þeim.

[Gunnar Rögnvaldsson, 19.9.2017 kl. 19:09]

Þakka þér Guðbjörg. Missti hreinlega af þér.

Bestu kveðjur