Leita í fréttum mbl.is

Bloggfærslur mánaðarins, júlí 2008

Hitnar í kolunum

Komið þið sæl kæru lesendur

Bloggið mitt lifði ekki af í diskaþvottinum í uppþvottavélinni hjá Morgunblaðinu. Magaspeglun fer nú fram hjá okkar góða og önnumkafna tölvufólki hjá blogginu á Morgunblaðinu. Þemað mitt, appelsínugult, virkar ekki með mynd setta inn í síðuhaus svo ég hef breytt útlitsþema yfir í blátt, svona tímabundið.

hitnarikolunum

En annars þá virðist vera ansi heitt í kolunum á mörgum stöðum. Tölvan mín segir að það séu 24 gráður hér fyrir utan veröndina, og hitamælirinn minn hérna undir þakinu á veröndinni segir að það séu 33 gráður hér í skugganum. Þetta er því skuggalegt. Og svo virðist vera búið að setja Íslendinga í bræðslu - 22 gráður í Reykjavík og 21 gráða á Akureyri! Bandaríski Dollarinn þýtur og upp og sama viðrist gilda um íslensku krónuna.

Jæja, það er best að drífa sig út að hlaupa. Þá get ég nefnilega bætt nokkrum góðum gróðurhúsalofttegundum við and-rúms-loftið okkar, og vökvað blómabeðið með svitanum úr sjálfum á eftir, ég er nefnilega 15 kílóum of þungur. Hvalveiðar hafa verið bannaðar svo lengi.    

Er þetta heimsendir ?

Au revoir 


Lítill áhugi á evru hjá atvinnurekendum í Skandinavíu

Berlingske Business skrifar hér í dag að samkvæmt könnun meðal 2.400 forstjóra fyrirtækja á Norðurlöndum, að það sé dvínani áhugi á evru sem gjaldmiðli hjá skandinavískum forstjórum. 

 

Yfir helmingur af aðspurðum dönskum forstjórum hafa lítinn áhuga á evru og segja að hún skipti ekki máli. Mestur áhugi var meðal finnskra forstjóra, en Finnland er nú þegar með evru sem gjaldmiðil. Ísland er ekki með í þessari könnun meðal forstjóra stærri fyrirtækja, en fréttin segir þó að í kjölfar nýlegrar efnahagslegrar lægðar á Íslandi sé aukin umræða um aðild Íslands að ESB og upptöku evru. Í Noregi er engin umræða í gangi um aðild að ESB og upptöku evru, og var norskum forstjórum mest sama um evru meðal allra aðspurðra forstjóra í þessum fjórum Norðurlöndum.   

 

Danir: evra vafasamt mannvirki  

 

Á meðal þeirra dönsku forstjóra sem eru andsnúnir upptöku evru vega þyngst rökin um að evra sé vafasamt mannvirki sem varasamt sé að taka upp og reiða sig á. Evran gæti þróast í verða Dönum meira til tarafala en til hagsbóta, og gæti einnig takmarkað athafnasvigrúm þeirra. Hjá þeim dönsku forstjórum sem aðhyllast upptöku evru vega þyngst væntingar um að fá að sitja við stjórnarborðið í seðlabanka evru. Flestir danskir hagfræðingar hafa náð fram til þeirrar niðurstöðu að evra skipti Danmörku ekki máli.

 

Slóð: Topchefer er ligeglade med euroen 

 

Mín skoðun

 

Það er alþekkt fyrirbæri í markaðsfærslu að um leið og neytendur hafa keypt vöru, og þá sérstaklega dýra vöru, þá fara þeir strax í gang með að sannfæra sjálfa sig um að þeir hafi gert góð kaup. Til að styrkja trú sína á að þeir hafi einmitt gert góð kaup, þá fara þeir oft að sjá ýmsa kosti við vöruna sem aðrir sjá ekki, og munu því oft mæla mæla með vörunni við aðra sem hafa hana ekki. Til þess að skapa það sem kallað er "brand-community" (vörumerkja(sam)félag) og til að viðhalda staðfestingarviðleitni þeirra sem hafa keypt vöruna þá er bráðnauðsynlegt að söluaðilar vörunnar haldi áfram að auglýsa vöruna jafnvel þó svo að engin sala sé í gangi, því þannig sjá þeir eigendum vörunnar fyrir áframhaldandi staðfestingu á að þeir hafi gert góð kaup. Ef maður sér aldrei auglýsingu fyrir vöru sem maður hefur keypt þá mun maður smásaman fara að halda að maður sé einn í heiminum með þessa vöru, og hafi verið einn af fáum sem keyptu hana, og að hún sé léleg. Þessvegna hafa Finnar ennþá mestan áhuga á evru af öllum aðspurðum í könnuninni. En þeir eru samt innst inni (smá)hræddir við hvað nágrannarnir muni gera og álykta um þá vöru sem þeir einmitt hafa keypt. Og svo er ábyrgðartíminn útrunninn og ekki hægt að skila vörunni lengur, og ekkert annað hægt að gera en að mæla með vörunni áfram. 


Fast gengi og ESB-aðild hindrar ekki mestu verðbólgu hjá Dönum siðan 1975

Verðbólga vöru sem framleidd er innanlands í Danmörku mælist nú hin mesta siðan 1975. Danskt framleiddar vörur hafa því ekki hækkað eins mikið í verði á milli ára siðan fyrir 33 árum. En allar vörur innlendar sem erlendar á innanlandsmarkaði hafa ekki hækkað meira í verði á milli ára síðustu 26 árin. Verðhækkanir á milli mánaðanna maí og júní er 1,6% og 11,2% frá því á sama tíma á síðasta ári. Innfluttar vörur hafa hækkað um 7.2% á milli ára og danskar vörur um 15,9% frá því á sama tíma á síðasta ári. 

Hátt gengi evru eyðir 100.000 atvinnutækifærum

Danir segja að um 100.000 atvinnutækifæri hafi nú tapast á undanförnum örfáu árum eingöngu af því að gengi dönsku krónunnar, sem er beintegnt og límt fast við gengi evru, er núna nálægt sögulegu hámarki allra tíma. Danir telja sig nú hafa misst tekjur og velmegun sem svarar til tekna frá 100.000 tapaðra atvinnutækifæra eingöngu vegna bindingar dönsku krónunnar við evru, og það einungis allra síðustu fáu árin. En 50% af útflutningi Danmerkur fer til landa utan Euro-Zone og þau lönd eru ekki beintengd við evru. Það er sem sagt heimur fyrir utan evru. Danmörk féll inn í kreppu í síðustu viku. Þumalfingurreglan segir að fyrir hver 3-4% sem gengi dönsku krónunnar hækkar þá tapast 40.000 atvinnutækifæri því útflutningur verður þá minna samkeppnishæfur við vörur frá öðrum löndum. 

Er til heimur fyrir utan evru-land og ESB ?

Margir gleyma að þó svo að gengi dönsku krónunnar sé bundið fast við gengi evru, að já - þá hoppar og skoppar danska krónan á hverjum degi gangvart öllum gjaldmiðlum heimsins nema einum, evru. Þetta þýðir að gengisstöðugleiki er bara gangvart einum einasta gjaldmiðli heimsins. Ef markaðir þessa eina gjaldmiðils eru slæmir fyrir þær vörur sem danska þjóðin selur til og kaupir af þessum eina markaði þá má segja að bindingin sé í það minnsta mjög einfaldur og einhæfur sannleikur því mesti og besti hagvöxtur í heiminum undanfarin mörg ár hefur einmitt ekki átt sér stað á þessum eina markaði evru. Þessi markaður hefur að miklu leyti verið frosinn fastur í vaxtargildru ESB í áratugi. Aðalvöxturinn fyrir Danmörku hefur verið á öðrum mörkuðum og mun einnig verða það í framtíðinni.

Mestur áhugi á ESB í Evrópu að finna á Íslandi?

Einn aðal stuðningsmaður ESB á Íslandi hefur eftirfarandi að segja um það sem hann kallar "Evrópumál" - en sem ég kalla ESB-mál því það eru aðeins 27 af um 54 löndum Evrópu sem eru meðlimir í það sem núna kallast Evrópusambandið og sem þar áður var kallað Efnahagsbandalagið og þar á undan EF og sem þar á undan var kallað Stál og Kola sambandið og sem þar á undan hét einungis Evrópa, og sem Ísland var með í frá því að landið var uppgötvað og numið af víkingum, eða frá byrjun. Að sögn þessa manns þá þurfa allir Íslendingar að ganga í Evrópu aftur. 

"Ísland og Íslendingar þurfa að hysja upp um sig buxunar í alþjóðamálum og hætta þessu væli sem er í gangi í dag. Íslendingar eiga að ganga í ESB, ekki bara til þess að taka ákvarðanir á evrópskum grundvelli, heldur einnig til þess að taka ábyrgð á því sem er gert hérna á landi. Það sem við gerum hérna á landi hefur áhrif í Evrópu og víðar, áhrifin eru ekki bara bundin við Ísland, eins og margir virðast halda.

Það er kominn tími til þess að tímabil sveitamennsku endi á Íslandi og Íslendingar gangi inní Evrópu stolt og jafnframt sem sjálfstæð þjóð innan ESB" 

Meira má lesa um "Evrópumál" þessa stuðningsmanns ESB á Íslandi hér: Stutt eru stráin 

Fleiri greinar sem ég mæli með

Ónýtir gjaldmiðlar • Breytt mynd af ESB - höfuðstefna • Pillan • Lenín verðbólga  


Spurt og svarað: Fyrst allt er svona gott á Íslandi, af hverju eru þá allir að kvarta!

Hún Ásta sem er að fara í sumarfrí spurði mig þessarar spurningar hér á blogg Eyþórs Arnalds.

Ég svaraði henni Ástu okkar svona 

Af því að flest er afstætt Ásta. Íslendingar hafa undanfarin mörg ár upplifað einstaka tíma. Tíma mikils framgangs og mikillar velmegunar sem á sér fáa líka í heiminum. Það er erfitt að gíra sig niður. Þetta er því smá afvötnun og hún er stundum sársaukafull. Svo þegar meðferðin hefst, þá fara Íslendingar að rífast sín á milli. Þeir kenna hinum og þessum um allt á milli himins og jarðar og finnst til dæmis sárt að komast ekki í nema þrjár utanlandsferðir á sama árinu. Þeir reyna einnig veruleikaflótta og finna stundum hinar og þessar leiðir fram hjá timburmönnunum, þ.e. þeir fara að sjá ofsjónum og sjá oft "þriðju" leiðina eða jafnvel "fjórðu" leiðina út úr fráhvarfseinkennunum.

Svo eru Íslendingar einnig gæddir þeim góða kosti að þeir halda alltaf að allt sé betra í útlöndum en heima hjá þeim sjálfum. Þetta er nokkuð góður kostur að hafa því það forðar Íslendingum frá því að falla ofaní þá gryfju að halda alltaf að allt sé best heima hjá þeim sjáfum, eins og allir halda hér í landi, Skandinavíu og í mörgum löndum ESB. Þetta tryggir nefnilega að Íslendingar séu manna duglegastir að vinna í garðinum sínum, enda hefur hann stækkað mikið miðað við alla aðra garða í heiminum. Uppskeran er mikil.

En það er samt sárt þegar það koma ormar úr görðum annarra og éta hluta af uppskerunni. Til dæmis olíu og hráefnaormar og svo útlendir peningarormar. Þá verða Íslendingar reiðir. En þetta eru samt bara virkir vöðvar frelsisin sem eru að vinna sitt starf hjá frjálsum Íslendingum og sem eru sífellt starfandi. Íslendingar sætta sig ekki við hvað sem er því krafturinn og sjálfsbjargarviðleitnin sem þeir náðu sér í sjálfir árið 1944 er svo sterk og hefur virkað svo vel að hann hefur gert þá að þriðju ríkustu þjóð í Evrópu á mjög skömmum tíma.

Svo halda þeir einnig að íslenska krónan, sem hefur gert þá svona ríka, sé einnig orðin ormétin og farin að mygla. En krónan er al saklaus, það vita flestir nema Íslendingar sjálfir, því hún hefur ekki gert neitt af sér. Það eru hinsvegar þeir sem hafa notað hana sem hafa ollið þeim kalí-bruna sem kom í garðinn núna í vor. Þeir báru aðeins of mikið á í garðinum síðustu þrjú vor. En þetta mun allt lagast og er reyndar nú þegar farið að lagast dálítið. Svo munu koma ný blóm í garðinn á næsta ári.

Svona hefur þetta alltaf verið á því Íslandi sem hefur mótað og meitlað þjóðina í gengum þúsund ár. Þetta er ekkert venjulegt land og fólkið sem býr í þessu landi er heldur ekkert venjulegt fólk. Þetta skilja þó aðeins örfáir í hinum görðunum í nágrenninu og þeir skrifa því oft heim til barna sinna um þetta skrýtna fólk þarna í efsta garðinum, og sem hefur númerið Ísaland

Ég óska Ástu góðs og ánægjulegs sumarfrís.  

Eftirmáli og formáli

Einu sinni kom út bók sem bar titilinn Þriðja Augað. Ég las hana þegar ég var táningur. Þessi bók var bull. En núna voru Íslendingar að finna upp nýjan titil á þessa bók. Þeir kalla hana núna fyrir Fjórða Augað. Og þessi titill var ekki hugmynd Lobsang Rampa. Nei hugmyndin er alíslensk. Hún er þessi: að taka upp gjaldmiðil annars lands án þess að ganga í landið og það strax. Og alveg án þess að fá illt í magann. En þá vil ég benda augnlækninga- og leiðamönnum á eftirfarandi:

Ef þið væruð með evru núna skv. Björns Bjarnar-leið eða X, Y eða Z leið (sama hvort þið væruð með í ESB, Noregi, Sviss, Danmörku, Bandaríkjunum, eða ekki) þá sæti Ríkisstjórn Íslands núna á erfiðum fundum við að undirbúa þær refsiaðgerðir fyrir heimili og fyrirtæki sem alltaf þarf að viðhafa til að ná niður verðbólgu og þenslu í hagkerfum sem hafa misst stýrivaxtavopn og peningastjórn sína til annarra landa. Til dæmis væri hægt að hækka tekjuskatta og fjármagnsskatta, hækka skatta á láglaunafólk og lækka persónuafslætti, setja á 100% eða 180% skráningargjöld á nýjar bifreiðar, setja lúxusskatta á matvæli og vörur sem stjórnmálamenn hafa ákveðið fyrir þig að séu "óþarfa vörur". Banna viss útlán og afborgunarlán hjá peningastofnunum. Í stuttu máli: að finna upp allt sem þarf til að stoppa þessa neyslugleði, fjárfestingar og framkvæmdir. Allt saman til þess að ná niður þessari verðbólgu! Og þetta mun bitna jafn illa á þeim sem hafa hagað sér skynsamlega og þeim sem hafa hagað sér minna skynsamlega í peningamálum. Þá myndu nú Íslendingar fyrst fá alvarlega illt í magann og finnast þeir verða ormétnir. Atvinnuleysi væri þá orðið að hagstjórnartæki og Íslendingar myndu fara á kassann í massavís. Og svo þegar það þarf að örva fjárfestingar, atvinnu og neyslu aftur þá er það varla hægt lengur og Ísland verður fátækara og mun dragast meira og meira afturúr eins og ESB er einmitt að dragast afturúr efnahag Bandaríkjanna og Íslands. Öll dýnamík og sveigjanleiki horfinn. Þá væruð þið loksins komin á kassann.

Þið gætuð ekki haft neinn fjármálageira að ráði á Íslandi ef þið væruð með evru svona eins og Björn Bjarnarson og fleiri nefna eða eru að tala um. Hann þyrfti því að flytja úr landi, alfarinn. Stórframkvæmdir væru óframkvæmanlegar undir svona nýlendu peningastjórn. Og svo þyrftuð þið að fara út og kaupa evrur (eða eitthvað annað) á gengi dagsins fyrir tugi milljarða króna til að dreifa í umferð í  peningakerfinu í stað ISK - og það væri einungs stofnkostnaðurinn - allt hitt sem myndi fylgja á eftir væri eitt risastórt vandamál. Þá væri Ísland orðið nýlenda á ný. Til hamingju. Afkomendur ykkar munu varla fara út í þann kostnað að kaupa ramma til setja utanum mynd til að hengja upp á vegg af svona kjánum. Stoppistöð vanþakklátra er greinilega alltaf að verða stærri og stærri. 

Ég vil leyfa mér að benda á eftirfarandi staðreyndir

Sumir á Íslandi halda að núna sé eitthvað að ske á Íslandi sem þeir kalla "efnahagsvandi okkar". Ég vildi ekki óska ykkur að þetta sé aðeins efnahagsvandi ykkar. Svo illgjarn er ég ekki. Næstum öll lönd þurfa einnig að kljást við afleiðingar alþjóðlegrar hráefnaverðbólgu, olíuverðbólgu, og alþjóðlegrar fjármálakreppu.

Nú er ESB ekki gjaldmiðill, því þá væri ESB úthrópað sem verandi "gjaldþrota" og "handónýtt", og það af ESB-sinnum sjálfum. Það sem einkennir algerlega umræðuna á Íslandi er gjaldmiðill Íslands, krónan, ISK. En menn þurfa að hafa eftirfarandi í huga þegar þeir dæma sjálfstætt Ísland sem verandi gjaldmiðil.

Seðlabanki Íslands á hrós skilið fyrir að vinna vel undir krefjandi kringumstæðum síðan krónunni var sleppt á frjálst flot árið 2001. Menn eiga eftir að skilja þetta mikið betur seinna. Það er ekki hægt að segja annað en að það séu undur og stórmerki að krónan skuli hafa haldið þetta vel undir eftirfarandi kringumstæðum. Margir hafa greinilega meiri trú á að Ísland muni spjara sig betur í framtíðinni en sumir hafa trú á á sjálfu Íslandi.

1) Krónan er gefin frjáls árið 2001. Íslendingar kynna gjaldmiðil sinn fyrir umheiminum. Kynning hans er í umsjá nýlega alþjóðavædds fjármálageira Íslands. Síðast þegar þetta skeði í Evrópu þá var það evra sem var kynnt fyrir umheiminum og hún féll álíka mikið eða yfir 30% án nokkurra sýnilegra framfara, ávinninga, aukinna fjárfestinga eða framkvæmda. Hún féll bara. Þeir voru ekki að byggja virkjanir eða fjárfesta hér í EvruLandi ef einhver skyldi halda það. Áður en þessi kynning á krónunni fór af stað vissi enginn hvað ISK var. En núna er ISK í öllum fréttum og er kominn í hóp þeirra gjaldmiðla sem greinendur og fjármálastofnanir fjalla um á hverjum degi erlendis.

2) Heill nýr atvinnuvegur Íslendinga leit dagsins ljós, sem er alþjóðavæddur fjármálageiri og sem skilaði fyrsta íslenska fyrirtækinu innná NASDAQ-OMX-100 listann - þ.e. Kaupþing Banki er núna eitt af 100 stærstu fyrirtækjum á þessum lista.

3) Stærsta fjárfesting Íslandssögunnar fór fram.

4) Alþjóðlegt lánsfé var ódýrara en nokkurntíma áður síðan krónan var sett frjálst fljótandi. Fjármálageiri Íslands notaði tækifærið til að hamra járnið meðan það var heitt. Nú er það hinvegar að kólna.

5) Svæsin alþjóðleg olíu- hráefna- og matvælaverðbólga hefur ríkt núna í tvö ár.

6) Vesta alþjóðlega fjármálakreppa heimsin síðan 1930 hefur núna ríkt í 12 mánuði.

Þetta er all nokkuð nokkuð afrek hjá Seðlabanka Íslands að halda utanum þetta án þess að ver hafi farið. En traust gjaldmiðla er langhlaup og ekki spretthlaup. Eftir þessa kreppu mun krónan verða HERT KRÓNA. Það er augljóst. Ef allir ætluðu að skipta um gjaldmiðil undir svona kringumstæðum þá væru allir gjaldeyrismarkaðir lokaðir, alltaf. 

Hefði evra staðist allt þetta? Er einhver sem trúir því í alvöru ? Nei og aftur nei, alveg örugglega ekki. Núna er evran hinsvegar allt allt of há fyrir útflutning frá ESB og það á sennilega að fara að taka hana í karphúsið aftur, og það alvarlega í þetta skiptið.

Sjálfstætt Ísland er ekki króna og ESB er ekki gjaldmiðill og alls ekki GaldraPappír

Framhald: nánar, og af sannfæringu, er fjallað um Galdrapappíra og ESB á bloggi forstjóra Brimborgar, Agli Jóhannssyni: Ísland og Lettland: Áhugaverður samanburður í ljósi evru umræðu - ég mæli með þeirri lesningu. 

Skrásett vörumerki : GALDRA PAPPÍR © 2008 einkaleyfi Hans Haraldsson - gengisfelling óheimil án leyfis Deutsche Bundesbank- meðalvextir samfylkingar í esb gilda


ESB mun stefna Bretum fyrir óreiðu í ríkisfjármálum

Aðalstöðvar ESB ætla að stefna Bretum fyrir að það muni verða halli á fjárlögum breska ríkisins á næsta ári. ESB er búið að reikna sig fram til að það mun verða mun meiri halli á fjárlögum breska ríkisins en sem nemur þeim þrem prósentum sem leyfileg eru samkvæmt stöðugleika sáttmála ESB. En það er stöðugleika sáttmáli ESB sem heimilar þessum áður sjálfstæðu ríkjum að þjóðarskúta þeirra megi hallast um allt að þrjár gráður á slagsíðu stjórnborðsmegin. 

 

Ef hallinn á þjóðarskútunni verður meiri þá hefur hann hingað til verið leiðréttur með því að þeir skipverjar sem sunda vinnu sína stjórnborðsmegin verða að leggjast í kojur sínar bakborðsmegin og halda kyrru fyrir í rúmum sínum þar til skipið er aftur komið á jafna siglingu. En stundum skeður það að skipið fer að halla of mikið á bakborða vegna þess að allir skipverjar eru komnir í koju og sofnaðir. En þetta vandamál er venjulega leyst með því að henda nógu mörgum sofandi skipverjum fyrir borð þar til aftur er komið á jafnvægi. En þá er veiðum þó yfirleitt hætt og siglt í land til að sækja nýjan mannskap. Þetta skapar því mikla atvinnu fyrir nýja skipsverja.

 

En það er þó ekki hægt að sekta Breta fyrir að hallast um þær 3,7 gráður sem ESB er búið að reikna sig fram til að það muni gera. Nei, Bretar eru nefnilega ekki með í peningaklúbbi ESB, sem núna heitir evra, stundum kölluð GaldraPappír á Íslandi. En það er þó hægt að draga þá í réttinn og setja þá í skammakrókinn. Þetta hjálpar yfirleitt til við að halda góðum og jákvæðum anda á meðal skipverja.          

 

En þrátt fyrir þetta þá eru Bretar - sem einu sinni voru sjálfstæð þjóð og eru það einnig að nokkru leyti enn - mjög móðgaðir. Þeir eru núna komnir í skammakrók ESB ásamt Ungverjalandi. Bretum finnst ESB ekki taka neitt tillit til lágra skulda Breta, og heldur ekki tillit til viðskiptaárstíða Bretlands sem hagkerfis (koma og fara á örðum árstímum en á meginlandinu), og alls ekki taka tillit til fjárfestinga Breta í hinum opinbera geira og innviðum breska ríkisins.

 

Bretar hafa fengið frest fram til október á næsta ári til að henda fleiri skipverjum í sjóinn. 

 

Britain told to rein in deficit by EU 


Gullna hliðið lokast - gengishrun evru yfirvofandi ?

Greiningadeild gjaldeyrismarkaða hjá Jyske Bank spáir að evra muni til að byrja með falla um það bil 15% gagnvart dollar fram að áramótum.

 

Jyske Bank er einn stærsti banki Danmerkur og greiningadeild þeirra á sviði gjaldeyrismarkaða þykir ein sú besta.

 

Jyske Bank telur að í fyrsta skipti í sögu evru muni aðilar á gjaldeyrismörkuðum ganga sérstaklega harðneskjulega til verks við að fella evru. Ástæðurnar eru þessar, segir greiningadeildin:

 

  • Evra er ekki há vegna þess að hún sé góður gjaldmiðill sem byggir á sterkum hagstærðum evru-landa. Hún er há vegna þess að Bandaríkjadollari hefur verið lágur.
  • Ef athyglin fer að beinast að Evrópu vegna þeirrar vaxtargildru sem ESB er í  og því ójafnvægis sem nú er á milli hagkerfa ESB og evru-landa, þá munu markaðirnir fara út í að sannreyna evru sem gjaldmiðil.
  • Greiningadeildin sér vaxandi vandamál í hagkerfum evru-landa. Suður Evrópa sé að fara inn í kreppu og hafi því alls ekki gott af þeirri stýrivaxtahækkun sem ECB kom með í gær, en þá hækkaði bankinn stýrivexti evru um 0,25 prósentur.
  • Athyglin mun beinast meira og meira að þeirri togstreitu sem er á milli hagkerfanna á bak við evru.  Menn munu fara að krefjast þess að þeir fái meiri áhættuþóknun þegar þeir kaupa gríska ríkispappíra en þegar þeir kaupa þýska ríkispappíra. Þessi spurning ætti yfirhöfuð ekki að koma upp í myntbandalögum segir Jyske Bank. Aðilar í markaði munu í auknum mæli beina athygli sinni að þessu misræmi.
  • Ofaní mikinn halla á greiðslujöfnuðum landanna í Suður Evrópu þá berst Norður-Evrópa í bökkum með efnahag og hagkerfi sem keyra á felgunum. Þetta eru hagkerfi sem áður fyrr voru álitin stöðug.
  • Þessvegna álítur Jyske Bank að það muni ekki líða á löngu þar til gjaldeyrismarkaðirnir munu fara að undirbúa sig undir að Evrópa muni falla ofaní öldudal, og að sú lægð muni kalla á lækkun stýrivaxta.
  • Evrópskir bankar eru til dæmis í mun meiri hættu frá undirmálslána-kreppunni en amerískir bankar séu því þeir hafa einfaldlega fjármagnað stærsta hlutann af þessum lánum, eða samtlas 900 milljarða dollara - Púnktur 

Heimild: Euroen på vej mod nedtur over for dollar

 

Mín skoðun:

Það var einmitt það. Ég mun núna, yfir helgina, fara í það að skoða kosti og galla þessa máls og þá með það fyrir augum að við tilkynnum umheiminum að við munum strax fara í það að undirbúa okkur í að redda þessum málum og munum því umsvifalaust koma efnahag ESB til bjargar. Hvað sagði ég ? Við reddum þessu! Er það ekki?

 

Uppfært kl. 19:31 

Skoðun Alþjóðagjaldeyrissjóðsins á framtíðarhorfum Íslands var birt í dag:

1. Íslenska hagkerfið er auðugt og sveigjanlegt. Tekjur á mann eru meðal þeirra hæstu og tekjuójöfnuður einna minnstur í heiminum. Vinnu- og framleiðslumarkaðir eru opnir og sveigjanlegir. Stofnanir og umgjörð stefnumótunar eru öflugar og skuldir hins opinbera eru mjög litlar. Eftirtektarverð stjórnun á náttúruauðlindum landsins hefur gert Íslandi kleift að auka fjölbreytni hagkerfisins og stuðla að sjálfbærni. Í ljósi þessa eru langtímahorfur íslenska hagkerfisins öfundsverðar

 

Þetta álit sendinefndar Alþjóðagjaldeyrissjóðsins 2008 var birt í dag. Á vefsetri Seðlabanka Íslands (það er að segja Seðlabanka Íslenska Lýðveldisins) er að finna: Lauslega þýðingu. Álitið á ensku: IMF Concluding Statement July 4, 2008


Höfundur

Gunnar Rögnvaldsson
Gunnar Rögnvaldsson

Búseta: Ísland.
Reynsla: 25 ára búseta í ESB og fyrirtækja-rekstur í DK/ESB frá 1985 til 2010. Samband:
tilveraniesb hjá mac.com

Ég er hvorki skráður á Facebook, Twitter, Linkedin né á neinum öðrum "félags-vefjum". Aðsetur skrifa minna er einungis að finna hér á þessari síðu og á tilveraniesb.net og í blöðum og tímaritum

Bloggvinir

Innskráning

Ath. Vinsamlegast kveikið á Javascript til að hefja innskráningu.

Hafðu samband